تدخل اماراتي في قضية مصادرة مشروع زراعي لعبادة نافع..

07:22 AM December, 16 2020

سودانيز اون لاين
زهير عثمان حمد-السودان الخرطوم
مكتبتى
رابط مختصر

الخرطوم-اثيرنيوز


كشفت مستندات، عن تفاصيل دقيقة حول مشروع منزوع من نجل القيادي في النظام السابق د. نافع على نافع.
ووفق المستندات، فإن المشروع الزراعي المنزوع بواسطة لجنة إزالة التمكين، في طور التأسيس، وغير مملوك لنجل نافع – المهندس الزراعي عُباده، حيث يحوز مستثمر اماراتي وبموجب عقودات موثقة على نسبة 60% منه ويملك شريك سوداني 20% مقابل استعادة امواله علف، بينما نصيب عُباده نافع 20% عبارة عن الادارة وقيمة الارض التي نالها بموجب تصديق عقب جهود مضنية مع ادارة الاستثمار بحكومة الولاية الشمالية في العام 2016 والتي كادت ان تنزعها منه عقب تعثره في استثمارها قبل دخول الشريك الاماراتي في العام 2018 واستجلابه كافة معدات واليات المشروع ودخول الشريك السوداني لاحقا.
ونما الي علمنا من مصدر مطلع ان المستثمر الاماراتي استنجد بسفارة بلاده في الخرطوم في مواجهة لجنة ازالة التمكين مما دفعها للاسراع في مراجعة القرار .

https://top4top.io/

ابننافعالمستجيربالسفارة

تلاعب وغش ، وكمان استعمال نفوذ
كيف المستثمر ما يظهر ويستثمر بالباب
ده اصح قرار للجنة التمكين.

الأخ/ زهير لك التحية

وللأخت المتداخلة إخلاص(برضه بعيداً عن السياسة) أو دفاعاً عن دولة بتكلم عن (المستثمر عموماً)
أنا بديكم أمثلة حقيقية لأصدقاء إماراتيين وكثير من الزائرين للإمارات او العايشين فيها يعرفون الشعب الإماراتي قمة في الأخلاق والتعامل والأدب ويثقون في السودانيين جدا في كل تعاملاتهم
المهم بعرف كم واحد مشوا يستثمروا في السودان أيام إستيلاء (حكومة الكيران وخاصة فترة ظهور البترول) الكثير إستثمر في مشاريع
وطبعا الكل عارف أي مستثمر عايز يعمل مشروع في السنوات الأخيرة (لازم وغصب ومجبور) يشاركه أحد الرؤوس الكبيرةتخيلوا كم شخص (يأخدوا قروض بنكية) لأجل أن يستثمر في السودان وبعد ده يجبروه عشان واحد يشاركه بالاسم فقط وكمان ياخذ أرباح؟؟؟؟؟ وفي الأخير قروشه عشان يحولها هنا ( حتى لو طلعت ليه قروش) بسبب الدولار يكون ما قادر يحولها ويصبح مديون للبنوك ويفلس في الأخير....
أتمنى اكون وصلت لكم مقصدي ليس دفاعاً عن دولة معينة لكن دي حقيقة عايشتها وأكيد في أمثلة من دول ثانية بس ما عندي إثباتات

أها أقول ليكم أنا زاتي والله العظيم شاركت نسيبي في أرض صناعية تقريباً مقابل جامعة أفريقيا او خلفها وفي الآخر (راحت شمار بمرقة) وقتها ما خلينا وزير وإلا مدير حتى مكتب البشير ذات نفسه؟؟ ودفعنا رشاوي بدون فائده وكل الأوراق موجودة في السودان
ربنا يصلح الحال

مره ثانية أزيدكم من الشعر بيت ههههه

أنا من أشد المؤيدين للثورة دي (وبالنسبة للجنة التمكين) برضه

لكن أقول ليكم كلام ويشهد الله ما حبينا ننشر ما عندنا مستندات بتكلم عن أنه تربطنا علاقة قرابة ونسابة مع (نور الدائم) الكل يعرفه الآن متزوج أخت البشير

أها (نور الدائم) وسط الأهل بما أنه عنده شركة مقاولات ومستثمر فتعامل كل الأهل تقريبا معه يتم بدون مستندات مثل بناء جزء من منزل او طابق او او

المهم عندي من الأسرة من أقرب الأقربين كان مفروض يبني لهم طابق كامل وإستلم قروشه كاملة ولكن الآن (دخل السجن)؟؟؟؟

مافي ورق يثبت ذلك حسب تعاملنا كسودانيين مع الأقرباء وووو وتقريبا كثير من السودانيين تربطهم علاقات بأي طريقة مع النظام السابق إما نسابة او او

هذا مثال واقعي (ماذا تفعل لجنة التمكين) في مثل هذه الحالة) وهناك الكثير؟؟؟؟

Quote: ونما الي علمنا من مصدر مطلع ان المستثمر الاماراتي استنجد بسفارة بلاده في الخرطوم في مواجهة لجنة ازالة التمكين مما دفعها للاسراع في مراجعة القرار .

يعني شنو مراجعة القرار؟؟

لجنة إزالة التمكين مطالبة بالتوضيح

الاستحمار ده خلاص .
اراضي كثير مستثمرة ل 99 سنة بسعر
التراب ، شريك لود نافع يعني عارف نفسه
مشارك منو ، الشعب ده ما غبي ويستحسن
الدول توعي رعاياها بطرق الاستثمار .

عرفنا محمد نافع
زراع اللغف للوالده سيء الزكر
والاول يحمل الجواز الامريكى
بالميلاد وعندو شلة بتاعت لغف
من انداده حملة الجوازات الامريكية
متخصصين فى لغف اموال الشعب
السودانى التانى دا كان لابد وين

نعم اختي إخلاص

أكرر (الموضوع ليس سياسي) هنا المعني شخص (وليس دولة) بدليل أنه إستنجد بالسفارة كي تنصفه او تقف معه

هذا الشخص ربما مظلوم أو لا وفي الحالتين لا يملك (باسوورد هنا عشان يجي يفند او او)

Quote: ويستحسن الدول توعي رعاياها بطرق الاستثمار .

أتمنى حقيقة يتم وضع قانون في الأول والأخير يكون في مصلحة السودان (ويضمن حق المستثمر أيضا أي كان)

Quote: الاستحمار ده خلاص . اراضي كثير مستثمرة ل 99 سنة بسعر التراب ، شريك لود نافع يعني عارف نفسه مشارك منو ، الشعب ده ما غبي

لكن الشق الأول بالنسبة لشريك نافع مثلا (يشهد الله لا أعرف من هو) ولكنه كما ذكرت أكيد تم إيهامه بفوائد مجزية وووو وفي الآخر باعتبار والده (نافع) إعتقد بأنه أموره حتكون متسهلة
وأغلب المستثمرين دائما يبحثون عن (ضهر) زي ما بيقولوا في مثل هذه الحالات

السودانن الان يمر بمرحلة جديدة (نتمنى أنه نحن كشعب او حكومة نفتح أيادينا بيضاء وكل مستثمر دخل في مشاريع هنا أي كان يا ريت لو يتم عمل جدولة لديونة واعادة جزء منها له في حالة وجود ما يثبت ذلك)

اهو نحن دفعنا لأمريكا ووووو ليه ما ندفع لأفراد إتضرروا عشان الله سبحانه وتعالى يفتحها علينا نقول للمستثمرين ديل خليكم هنا ونفتح معاكم صفحة جديدة)

تتذكروا مشروع (عقارات المقرن في الخرطوم) حاجة تبكي والله ناس باعت الوراها والقدامها وللأسف

وربنا يصلح الحال