صعوبات و تعقيدات البيع فى امازون

04:00 AM December, 13 2020

سودانيز اون لاين
النصرى أمين-كالغرى, كندا
مكتبتى
رابط مختصر

قبل حوالى تلاته شهور حصلت (بعد عذاب) على موافقة امازون على البيع فى منصتهم .
افتكرت خلاص المشكلة اتحلت و تانى رش شديد و دولارات داخله كجلو كجلو كجلو .

مرت تلاته شهور ولم استطع إكمال اى عملية ...

اتضح ان امازون بحر غريق غريق ، محتاج تفرغ شبه كامل ؛ برضه محتاج
مساحة كبيرة لتحمل الاخطاء و الى حد ما راسمال متوسط ...
بدات بجمع المعلومات ؛ كل يوم ساعة او ساعتين اقرا و اراجع و اقارن ..
تقريبا اليوم وصلت مرحلة ما بطالة فى معرفة خبايا هذا الجخنون العجيب لكنى لسه متردد .

بعد الحصوا على الموافقة ، طوالى جريت سجلت فى خدمة اسمهFBA
اختصار ل Fulfillment By Amazon
وهى خدمة باشتراك شهرى حوالى 30 دولار ..
ميزة الخدمة دى ؛ انك تشيل البضاعة بتاعتك التى تود بيعها فى امازون ، تشيلها بكراتينها و توديها لاحد مراكز امازون و تمشى تنوم .
امازون تقوم بكل شيء نيابه عنك بما فيها خدمة الزبون و الديليفرى المجان.

انا معاك عاوز ابدا الشغل
قبل فترة بعد جهزت منتجات عشان اعيد بيعها اكتشفت
انه لابد من وجود سجل تجاري للمواد الغذائية
والعملية كما قلت الموضوع محتاج تفرغ كامل
و تاتيك الثمار مستقبلا

ليتك بسطت لنا عن تجربتك و الله بعض المنتجات
اشتريتها من السوق بسعر زهيد
وحتى الان ما بدات بيع
عاوز اعرف كيف اعيد بيع منتجات امازون

من الحاجات المربحة اذا في شخص متخصص في التصميم
الاشتراك في ميرشنت وبيع التصميمات وشايف من الاتجاهات
المغرية لانك بيع التصميم و اماوزن توفر التسي شيرتات
وتجيك ارباحك حسب المبيعات لشعاراك في القطعة الواحدة

انا مثلك اخى احمد عمر
جبت ساعات امريكية جديدة كرت كرتونة ولمن جيت اعرضها سألوني أسئلة نكير مما اضطريت للتخلى عن الفكرة.
برضه عندى منتجات فنية سودانية حاولت احصل على موافقة بعرضها ، انسى ساكت.
دى كانت البداية و عدم العرفة ؛ لكن دلوقت المدارك اتوسعت بعد ساعات و ساعات فى اليوتوب و قووقل.

معظم بضائع امازون صينية الصنع و كلها معروضة فى موقع على بابا الصينى بتراب القروش .
المعركة كلها كيف تختار ال product الصاح و تحوله من على بابا الى امازون .
اى محاولة تانية ، ضياع زمن ، مثل بيع اعمال يدوية فنية سودانية و خلافه.

برضه فى سلع ممنوعة و سلع restricted

غايتو انا مستعد نعمل شغل مشترك من اربعة خمسة اشخاص

انا على استعداد ما عندي مشكلة في الحقيقة انا كنت فكرت
في انواع من العسل مانوكا و ايبورن وديل فشلت عشان
سجل تجاري حسب طلبهم
واشتريت زيت شعر سمعته جيدة والامور ما مشت ناس
البيت خشوا في الزيت من علبة لي علبة و من كرتون لي
كرتون لمن المخزون قرب يخلص
حسب كلامك فعلا الواحد محتاج لوقت عشان يفهم الطريق
وفي ناس بيكون معرفتهم اعمق و انت كمان شكلك
قطعت خطوات فهيا بنا على السوق نبيع و نشتري

النصري وأحمد
سلام ..

Quote: غايتو انا مستعد نعمل شغل مشترك من اربعة خمسة اشخاص

أنا معاكم ..
أنا أشتغلت في العمل لمدة .. وصرفت النظر دون سبب .. فقط لضيق الوقت ..
فهمت FDA .. وغيرها .. يا النصري ..
ويا أحمد .. قصة إيجاد أرقام للبضاعة .. سهلة .. هناك جهات لأستخراج السريال نمبر .. وهي معتمدة من أمازون وإي بيي .. وبفتشها ليكم ..

بريمة

تعرف يا النصري

امازون السعودية ( سوق.كوم)، حاولت معهم باسم الشركة وباسمي الخاص وباسم كل الموظفين وباسم جيرانا وكلها اوراق سليمة ومكتملة
وكلو ما نفع عشان نسجل
ولافي ايميل تفهم منو حاجة ولاف جهة تتصل عليها

اهلا بريمة
الشغلانه معقدة جدا (او هكذا تبدو للزول الجديد)
لو فتحت حسابك ك بائع فى amzonseller.com
تلقى فى مليون لينك و مليون تاب واذا ضغطت على ذر (اريد ان ابيع سلعة) مليون خيار
واذا اخترت الخيار الصحيحة ؛ يبدا بعد ده التحقيق الجنائي هه.
اما شراء البضاعة من على بابا و تحويلها لامازون، عملية بسيطة فى حد ذاتها لكن الشيطان فى التفاصيل.

مثل اى سوفتير ، اول مرة تفتحه تجد نفسك تائه لكن بعد الممارسة المتعددة تبقى عفريت .

المشكلة الممارسة هنا هى تجارب فاشلة ، بضائع تشتريها ولا تنجح و تخسر
وهنا مكمن التردد ..
منو المستعد يغامر و يخسر مرة او مرتين او حتى تلاته مرات لغاية ما يتعلم سر الصنعة ؟


لو الواحد قدر فعلا يفهم تماما اسرار و خبايا امازون ، ممكن جدا كل اسبوع يعمل الفين او ثلاثة الف دولار كل اسبوع بدون اى مجهود
و الشغلانه تبقى self repelling


قبل كم يوم اخترت سلعة بعد دراسة و تحقيق و راسلت المصنع فى الصين ، الاسعار تمام و كل شي تمام
ماعدا الشحن ياخد 50 يوم ؛ بما ان السلعة شتوية ؛ غيرت رأى لان بعد 50 يوم الشتاء يكون فى آخره

غريبة يا جعفر
كيف شركة من ضمن شركات امازون تتعامل مع الناس بالطريقة دى ؟
عندنا هنا ؛ لو عندك اى مشكلة او سؤال تجد الرد خلال 24 ساعة.
للحصول على موافقة للبيع فى امازون ، الإجراءات اخدت زمن لكن كل يوم يرسلوا رسالة مطالبين بمستنندات.

ايه رايك احاول اسجل فى سوق دوت كم السعودية باوراقى الكندية و نشوف رد فعلهم كيف السعوديين الوهم ديل

يا احمد عمر
هناك آلاف المتخصصين فى التصميم بكل انواعه من بنغلاديش و باكستان و الهند فى تطبيق اسمه
Fiverrو بتراب القروش .
انا مرة عملت تصميم لسلعة سودانية مع واحد بنغلاديشى بخمسين دولار .
شغل رهيب و فنيات عالية .
مرة عملت PowerPoint لمشروع تجارى بعشرين دولار .
كل شيء متوفر و بتراب القروش .
لو الواحد اختار السلعة الصاح من على بابا ؛ يعمل التصميم مع fiverr و يرسلوا للمصنع فى الصين لطباعته على المنتج و بعدها يبيعه فى امازون .

يا جعفر
راسلت امازون قبل ساعات بخصوص رغبتى فى البيع فى أسواق
السعودية...
وصلتنى منهم قبل شوية رسالة طويلة عريضه اختصارها طالما عندى حساب بيع فى امازون يمكن البيع فى اى اسواق امازون فى العالم بعد التسجيل و موافاة الشروط.

اتواصل معاى نرش سوق السعودية
منك الإدارة الداخلية و راس المال 😄
و منى الحساب و الادارة مع امازون

طيب يا النصري منتج سعره في
حدود 90 دولار مع التوصيل والنقل
يكلف حوالي 120 دولار قدرت
اشتري منه بطريقة ما القطعة
بفرق سعر حوالي 43 دولار من
قيمتها في متجر محلي
وتستطيع إعادة بيعها بسعر
منافس بفرف 15 إلى 20 دولار
من سعرها في متاجر محلية
رايك شنو في ديل زي ده
تقبل تحياتي

يا النصري
اخباركم
بالتوفيق يا اخي
رسلت ليك إميل كم يوم
ما جاني رد

تحياتي