علاقة التوظيف بالدرجة الأولى او الثانية (ق) الأول

في شروظ التوظيف حتى في الوظائف الفنية غالبا ما يضعون هذا الشرط وكأن خريجي الدرجة الأولى والثانية القسم الأول هم فقط الأكفأ والأحق بالعمل والتوظيف وما عداهم فلا.مما يحضرني ان رئيسا في مؤسسة اكاديمية ما وهو ليس من خريجيها وتصادف انه كان يرأس لجنة المعاينات وكان يتم ادخال المتقدمين لشغل الوظيفة الاكاديمية تباعاً وكانت اللجنة سريعة في قراراتها فكانت بعد إنتهاء المعاينة وقبل مغادرة المتقدم يقولون له للاسف انت غير مقبول بالوظيفة.حتى اذا كان دور احدهم وتلقى الرد بعدم القبول فتسأل ممكن اعرف السبب فرد عليه رئيس اللجنة وقال له لاننا ببساطة لا نوظف في هذه الوظيفة الأكاديمية الأ من تخرج بالدرحة الأولى ولسوء حظ رئيس اللجنة فقد سبق للمتفدم وأن اطلع على السيرة الذاتية خاصة ذاك الرئيس وشهاداته ابان عمله كمتعاون بنفس الكلية فما كان منه إلا ان قال للسيد رئيس الجلسة عاجبني أنت المتخرج بامتياز يا صاحب الشروط التعجيزية ما انت ذاتك متخرج بالدرجة التانية واهو اشتغلت لمن بقيت عميد يعني بقت علينا نحن وانت تتمتع بما تمنع منه الناس وقد شوهد المتقدم فيما بعد وهو يشغل الوظيفة ذات الشروط القاسية لانه فضح كبير القوم وكبير القوم مرقا للخليج.

بعضهم دخل الجنة وأغلق وراءه الباب بالمفتاح.


هذا الشرط يجب أن يراجع ضمن أشياء كثيرة بعد الثورة .... لأنه شرط مفصل على مقاس بعض الكيزان

سلامات احمد عمر
طبعا ماسمعت بتركيز على قصه درجه التخرج كشرط اساسى فى التقديم لوظيفه كتقليد معروف الا فى التعيين فى الجامعات .
اعتقد انو القصه ربما موروثه او منقوله مع بعض الفوارق بيننا وبين اى نظام زى دا لكن برضو شايفو منطقى حاصه فى بعض الجالات /التخصصات (بالنسبه للخريج الجدي) لما يكون خضع لبرنامج دراسى متكامل ومتكاسك متضمن فتره التدريب اثناء الدراسه(بتكلم من واقع خلفيتى التحصصيه فى مجال تطبيقى) بيكون التميز الاكاديمى المعبر عنو بصدق ووضوح بدرجه التخرج .
لكن فى بلد زى السودان برامج اكاديميه قاصره (غير مكتمله اركان العمليه التعليميه ) وربما بعضها مازال يدرس تاريخ التخصص المعنى دون تحديث مواكب للتطورات.
طبعا (فى وضع مثالى) ممكن يتم التميز الاكاديمى بعامل الخبره اى انو المتقدم يكون ماحصل على الاولى/مماز او التانيه القسم الاول /جيد جدا لكن الخبره واضافه درجه/شهاده اعلى تمكن من تجاوز التميز الاكاديمى خلال مرحله الدراسه الجامعيه (البكالريوس/ليسانس)
كليه عمليه عنددنا فى الجامعه فتره كان عميده لواء متقاعد من الجيش يعنى درجه علميه وخبره ولاحقا نفس الكليه عميدها كان مهندس باحد المصانه المعروفه فى السودان وبرضو الخبره اضافه تتجاوز التميز الاكاديمى خلال المرحله الجامعيه الاولى
تحياتى

الدرجة مطلوبة فقط في التدريس وهي شرط عادل جداً وإلا حنقدر نقيس كفاءة المتقدم للوظيفة كيف!
لو داير مدير شبكات بفتش لي زول عندو شهادة CCNE صاح؟ بنفع اعتمد معيار تاني غير الشهادات الاحترافية العليا في الشبكات؟
عندي سيرفر تبع مايكروسوفت بفتش لي زول عندو شهادة مايكروسوفت .. سيرفري تبع أمازون بفتش لي زول عندو شهادة أمازون .. وهكذا
التدريس هو إنك تدل الناس على طريق التفوق الأكاديمي .. يبقى مالم تكون انت في ذاتك متفوق ما ممكن توريهم يتفوقوا كيف!
انت سقطت في مقرر قواعد البيانات مثلاً وامتحنته 3 مرات حتى جبت فيه الباص بمساعدة مجلس الممتحنين .. معناها ما فاهم قواعد البيانات ببساطة كدة! ولو درستها بتضيع الطلبة
الدرجة الأكاديمية دة أكتر شرط عادل ونحمد للكيزان إنهم ما لغوهو واكتفوا بالتحايل عليه بشهادات معاهدهم - اسلام المعرفة مثالاً - وامتحانات المجاهدين واستثناءات مناطق الشدة .. دي طبعاً زي تخزين اللعيبة في الأندية الصغيرة .. يعينوا واحد في جامعة طرفية بخطاب استثناء من مدير الجامعة وبعد سنة ينقلوهو الخرطوم بنفس درجته

في طب الجزيرة مافي حاجة اسمها تعليق النتائج على البورد .. بتمشي شباك المسجل تديهو رقمك بطاقة الجامعة يتأكد أول من إنك صاحب النتيجة حتى يوريك ليها
سألتهم لشنو التعقيد دة قالوا لي أفرض إنك سقطت في كورس الجلدية واتجاوزت عثرتك واجتهدت وجضمتها لمن بقيت أخصائي جلدية .. ممكن ببساطة واحد يجي يشكك في كفاءتك يقول ليهم أخصائي شنو دة! وحاة الله دة كان ساقط جلدية في الجامعة.
طبعاً بعد طلعت من السودان اكتشفت إنه مافي حاجة اسمها نتيجة تتعلق في البورد أساساً والبيانات الأكاديمية ليها حرمتها وسريتها
فالفكرة يا سيدي اتخيل استاذ قواعد البيانات الفوق داك لمن الطلبة يدقوا جرس يقولوا ما فاهمين منه واحد يقول ليهم والله هانت ياخي دة كان أفشل طالب في قواعد البيانات كيف يدرسكم ليها!!

لكن السؤال : لماذا التدريس؟ أنا ما شايفه مهنة سمحة ولا جاذبة إلا بي إجازاتها الكتيرة لكن غير كدة مهنة عبيطة ساي .. ومن السهل جداً تتحول فيها لموظف خدمة مدنية تجي تؤدي نفس الشغل كل يوم .. أي والله بعرف ناس ماسكين كورسين بدرسوهم كل سمستر من نفس الشيت لدرجة بقوا حافظينهن. ما شايف فيها أي حاجة مغرية المهنة دي .. أظني أكتر واحد استقلت منها لكن كل مرة بلفلف وترجع العرجاء لمراحها.
ملحوظة أكتب هذه المداخلة بعد أن أكملت التقديم لوظيفة IT علها تنقذني من التدريس

يا هاني
بالنسبة

Quote: لأنه شرط مفصل على مقاس بعض الكيزان

الشرط اساسا في الغالب يصعب تحققه لانك
تصادف ان دفعة لم يتخرج فيها سوى شخص
واحد بالدرجة الاولى، وفي خذا الحالة ربما
يلجاون للاقل خاص اذا كانت الكليات لا توظف
الا خريجيها.
اما الكيزان اوالمتنفذين في الغالب لا تسري
عليهم هذه الاحكام لانها تطبيق على المتقديمن
من العوام.

يا عاصم احيانا واحد يكون خريج بالاولى وبثكون
امكانياته في توصيل المعلومة وتدريس الاخرين
فيه صعوبة ولان الوظيفة الاكاديمية للخريجين
الجدد تعتبر شئ مرموق بيدخل المجال وبجهج
الطلاب عدلي واحيانا حتى مساعد التدريس الفريش تلقاه
بيدرس طلاب في السنة الاخيرة ومادة حساسة
وهو لم يكن مضى عليه على تخريجه وحتى دراسته
للمادة ستة اشهر وذلك بسب تسيب بعض الاساتذة
الجامعيين ونسبة لتغطيتهم محاضرات في كليات اخرى
بمبالغ عالية.
ربما ده مش موضوعنا بالاساس ولكن الذي لفت
نظري وظيفة اعتقد انها فنية اكثر منها اكاديمية مرت
علي في الميل ولاحظت ان شرط التوظيف فيها
ان يكون المتقدم حاصل على الدرجة الأولى.
هذا ما استوةقفني طبعا هذا اذا كان هناك اساسا
روح في التعليم الاكاديمي في وقتنا هذا.

يا احمد كلامك منطقي و دي الحاجات اللي بيتندوا
عليه وهذه الامور لا خلاف عليها غالبا.
بس احيانا بتطلب في الوظائف الفنية و انا اعتقد
اي وظيفة ما فيها طباشيرة وسبورة حتى لو كانت
في ناسا فهي وظيفة فنية مهما علت مكانتها واعتقد
انت تعرف ان الحاصلين على الدرجة الاولى هم
فقط الذين كان يتم توظيفهم في الوظائف الفنية
في شركات النيل وما شابه برغم وجود خانات اخرى
لناسات كده.
و الوظيفة الفنية في مجال IT اذا كانت في مؤسسة
فارز كيمانها تكون مريح لانك تشتغل و تعمل
وتتطور في حدود ما تعمل عكس لاشركات التي
ترى في خريج ال IT كمبيوتر يشتغل اي حاجة
بنفس الكفاءة فيرون فيك مصمم ومطور ويب
ويرون فيك محلل وفني شبكة وبتاع قواعد بيانات.
لكن الشركات اللي عارفة عاوزة ايه مريحة و انت ترتاح
وتتطور بسرعة فيما تجيد وتحب.

سلام عليكم احمد عمر
خلال عملى مع احد اساتذتى (بروفسور عرقى تقلب فى العمل فى دول عديده اوروبيه وعربيه ) وانا مساعد تدريس وخلال حواراتى معه مايؤيد ماذهبت اليه فى بدايه ردك
قد يكون الشخص (غالبا معين (م.ت) زكمتدرب يتدرج فى سلك التعليم الجامعى بالتالى تقع المسئوليه على على اساتذته فى القسم بمتابعه التقييم له من حيق التواصل مع الطلاب واداء المهام (توصيل الماده) للطلاب كتيوتر او فى المختبر ...الخ
بل اذكر انو ذكر حادقه استغناء عن مساعد تدريس وطالب ماجستير لان الاستاذ المشرف لاحظ تعاملو بشكل يدوى مع بعض المكونات فى المختبر بشكل يلوثها ويخربها
.

Quote: ولكن الذي لفت نظري وظيفة اعتقد انها فنية اكثر منها اكاديمية مرت علي في الميل ولاحظت ان شرط التوظيف فيها ان يكون المتقدم حاصل على الدرجة الأولى. هذا ما استوةقفني

لو كنت مكانك كنت راسلتهم مستفسر عن سبب ايراد الشرط دا حتى تطلع على وجهه نظرهم وتعرفها للدنيا للزمان
تحياتى