Post: #1 Title: هو الكلام بفلوس يا مناوي Author: Gafar Bashir Date: 12-06-2020, 09:57 PM
مناوي في لقاء مثير بإذاعة بلادي FM96-6.
الخرطوم:سودان اندبندنت.اجرت اذاعة بلادي لقاء مميز مع مني اركو مناوي ورد فيه علي لسان مناوي :-
✔️الحرية والتغيير تحالف انتهي في 11 ابريل 2019 بعد سقوط النظام وما حدث بعد ذلك هو سرقة للثورة.
✔️الاحزاب التي سرقت ثورة 2019 هي ذات الاحزاب التي سرقت ثورة 65 و85.
✔️ما يعرف بالمكون المدني في مجلس السيادة انتهي بعد التوقيع علي اتفاقية السلام.
✔️ الحركات المسلحة اقرب للعسكريين في مجلس السيادة لان العسكريين يريدون السلام والمدنيين لا يريدون السلام.
✔️في بداية الثورة ارسلوا لنا ولد صغير تم تلميعه للتفاوض حول السلام وقال انه ممثل الثوار.. رد عليه الكمرد مالك عقار يا ولد انا عمري الثوري قدر عمرك مرتين وانا اخجل ان اتحدث مع امثالك.
✔️القوات المسلحة لا تقوم بانقلابات وانما تقوم بها الاحزاب السياسية عندما تفشل في المنافسة.
✔️السياسيين الحاليين لا يريدون جيش قومي حتي يسيطر ابناؤهم علي الجيش ويحركونهم وفق مصالحهم.
Post: #2 Title: Re: هو الكلام بفلوس يا مناوي Author: Nasr Date: 12-06-2020, 10:59 PM Parent: #1
دبور زن علي خراب عشه
Post: #3 Title: Re: هو الكلام بفلوس يا مناوي Author: Mutasim Idris Date: 12-06-2020, 11:58 PM Parent: #2
من كم يوم قال عنده قوات في ليبيا لكن ما بتحارب مع اي من الطرفين.. قوات متشرشحة هههههههه. جعفر من بدري جدا اكتشفنا كضبة الناس ديل.. السلام كان قد وقع في اديس (يوم البكاء) داك.. لكن بقدرة قادر مشوا للقاهرة بدعوة من السياسي ورجعوا بطيارة اماراتية لجوبا.. دا الضل يا جعفر خلووووه امسكوا في الفيل واطعنوهوا. الفيل اتقزّم غايتو يمممكن تحصلوا فيه طعنة هههههههاااي..
Post: #4 Title: Re: هو الكلام بفلوس يا مناوي Author: Hafiz Bashir Date: 12-07-2020, 01:31 AM Parent: #3
Quote: في بداية الثورة ارسلوا لنا ولد صغير تم تلميعه للتفاوض حول السلام وقال انه ممثل الثوار.. رد عليه الكمرد مالك عقار يا ولد انا عمري الثوري قدر عمرك مرتين وانا اخجل ان اتحدث مع امثالك.
😂😂😂 بس ما يقوموا كمان يدخلوا الولد الصغير دا في مجلس الشركاء ويقوموا ناس مناوي و عقار يخجلوا يتحدثوا معاهو. وهسه يا مناوي الفقرة 7 من المادة 8 في الوثيقة الدستورية بتاعة تعزيز دور المرأة والشباب ديك نبلها ونشرب مويتها؟
Post: #5 Title: Re: هو الكلام بفلوس يا مناوي Author: اخلاص عبدالرحمن المشرف Date: 12-07-2020, 01:43 AM Parent: #4
تحدث لأراك
السكوت من ذهب يا مناوي
Post: #6 Title: Re: هو الكلام بفلوس يا مناوي Author: أحمد محمد عمر Date: 12-07-2020, 03:37 AM Parent: #5
أي زول خت يدو في يد البشير في يوم من الأيام متسلق وانتهازي
Post: #12 Title: Re: هو الكلام بفلوس يا مناوي Author: Gafar Bashir Date: 12-07-2020, 10:36 AM Parent: #6
Quote: أي زول خت يدو في يد البشير في يوم من الأيام متسلق وانتهازي
حكم القوي
Post: #11 Title: Re: هو الكلام بفلوس يا مناوي Author: Gafar Bashir Date: 12-07-2020, 10:35 AM Parent: #5
Quote: تحدث لأراك
السكوت من ذهب يا مناوي
طبعا اصلا هم ما ناقصين ، لو عاينت لرسمة عمر دفع الله الفوق دي، بتلخص راي الكثيرين ، جبل الجليد للجهة الاسلامية (عسكري وسياسي) الذائب وين بيصب فالمطلوب كان حسن النوايا وتكذيب التهم الافتراضية بدل من تثبيتها
Post: #9 Title: Re: هو الكلام بفلوس يا مناوي Author: Gafar Bashir Date: 12-07-2020, 07:53 AM Parent: #4
يا موللنا حافظ اظننا حنبل الوثيقة كلها ونشرب ما نروي بعدين الولد ده يعني يعني لسة ما دخل لازم نفتشو نشوفو وين نجيبو بالاسم المشكلة هسي يكون شيب زاتو
Post: #8 Title: Re: هو الكلام بفلوس يا مناوي Author: Gafar Bashir Date: 12-07-2020, 07:42 AM Parent: #3
اي والله يا معتصم ده حالتو الضل ... نلحق الفيل ...
الحتجة المحيراني في كل الكلام ده الفقرة الرابعة بتاعت العسكريون يريدون السلام والمدنيون لا يريدون السلام الكلام ده قدر ما حاولت القي ليهو مخرج وتبرير قانوني او عقلاني او تاريخي او فلسفي غلبني القي ليهو حل ... يعني كان ممكن يلقي اي حاجة تانية يبرر بيها انحيازه المعلن بعد طببعة ثورة ديسمبر وفض الاعتصام
Post: #7 Title: Re: هو الكلام بفلوس يا مناوي Author: Gafar Bashir Date: 12-07-2020, 07:35 AM Parent: #2
سلام يا ناصر
المشكلة هو ما صبر زاتو عشان يقعد كويس في العش دي اولي بشريات شركاء الفترة الانتقالية اللي لسة فيها اعتراض واعادة نظر
Post: #10 Title: Re: هو الكلام بفلوس يا مناوي Author: علي عبدالوهاب عثمان Date: 12-07-2020, 08:24 AM Parent: #7
حبيبنا جعفر .. تحياتي لا فرق بينهم وبين الجيش كل الحركات مرجعيتهم السلاح ولا غير ( حتى ياسر عرمان تم تهميشه ) وفي القوى المدنية لاحظت أن لهم تجمعات كبيرة جداً ظهر جلياً يوم احتفال الساحة
الوطن اصبح جهوي ومناطقي وليس حزبي بالنسبة لمناوي وغيرهم من ارفاق طبيعي النموذج الأقرب لهم حميدتي والدعم السريع وليس الحكومة المدنية وحمدوك ..
تحياتي الحبيب جعفر .. الله يكون في عون الوطن .. السودان في خطر
Post: #13 Title: Re: هو الكلام بفلوس يا مناوي Author: Gafar Bashir Date: 12-07-2020, 10:44 AM Parent: #10
Quote: بالنسبة لمناوي وغيرهم من ارفاق طبيعي النموذج الأقرب لهم حميدتي والدعم السريع وليس الحكومة المدنية وحمدوك ..
حبيبنا علي
حتي لو كان الكلام سليم وعظم الناس مقتنعة بيهو طريقة اخراجه وتوقيتها سيئة جدا جدا يعني ماهو معقول اصلا والاتفاقية ما جف حبرها تصنف نفسك كوريث شرعي للثورة وخطتك تكون نسف الجانب المدني اللي هو اساس الاتفاقية ولا كنت حايم في ليبيا لا شغلة ولا مشغلة زي ما انت حايم
Post: #14 Title: Re: هو الكلام بفلوس يا مناوي Author: Mohamed Adam Date: 12-07-2020, 11:19 AM Parent: #13
من خلال التجارب تأكد للقاصي والداني أن أركو مناوي ده ما بيعرف يلعب سياسة.. مجرد زول مهرجل ليس إلا.. قاعد يشوش ويعطل في الناس الممكن يلعبو سياسة ..! مسك كبير مساعدي البشير ولم يقدم أي خدمة لأهله بمنطقة الطينة ناهيك من يقدمها لأهله بدارفور او السودان.! يجب محاسبتة علي خيانته العظمي لمؤتمر حسكنيتة وعلي تبديده لمخرجات أبوجا من مستحقات السلطة الإنتقالية لدارفور وكل ذلك تم بمنظور قبلي وليس قومي.!
Post: #15 Title: Re: هو الكلام بفلوس يا مناوي Author: bakri abdalla Date: 12-07-2020, 02:07 PM Parent: #14
Quote: مسك كبير مساعدي البشير ولم يقدم أي خدمة لأهله بمنطقة الطينة ناهيك من يقدمها لأهله بدارفور او السودان.! يجب محاسبتة علي خيانته العظمي لمؤتمر حسكنيتة وعلي تبديده لمخرجات أبوجا من مستحقات السلطة الإنتقالية لدارفور وكل ذلك تم بمنظور قبلي وليس قومي.!
أن الأوان لفتح هذا الملف
واضح أن مناوي حمل السلاح من أجل مكاسب شخصية
سبق لمني أن شارك مع البشير ولم نري له أي إضافة أو صوت وعندما إستنفذ غرضه رمي به كالزبالة في سلة القاذورات
تلفت يمينا وشمالاً و بعد أن حرق مراكبه مع من أوهمهم بحمل السلاح من أجلهم لم يتبقي له خياراً سوى العودة بخجل إلي الغابة
بعد أن ذهب نظام البشير وبقدوم عهد جديد لماذا لا يبدي حسن النية و ينخرط في خدمة المجتمع دون من أو جزاء
يبقي السؤال إلي متي مهادنة هولاء اللوردات ؟؟؟
Post: #17 Title: Re: هو الكلام بفلوس يا مناوي Author: Gafar Bashir Date: 12-07-2020, 06:35 PM Parent: #15
Quote: بعد أن ذهب نظام البشير وبقدوم عهد جديد لماذا لا يبدي حسن النية و ينخرط في خدمة المجتمع دون من أو جزاء
بالضبط يا بكري ده الكان متوقع وفي عز الثورة كانت الحركات جزء من قوي الحرية والتغيير خلت الناس قاعدة وانسحبت عشان تمشي تعمل جسم موازي وتطالب بسلام منفصل مع ( مزايا ) وحتي القوي المدنية دعمتها بغض النظر عن الملفات القديمة ومشاركة السلطة ودعم الجبهة الاسلامية الكان جزء منها والكان عندو اتفاق معاها وفي النهاية رجعت القوي السياسية مرة ثانية سعيا للسلام وسنة كاملة من الاجتماعا في كل عواصم العالم عشان يصلوا لي سلام ظنا مننا ومن قوي الثورة انو الحركات هي رصيد للثورة وهي بتتكلم عن حق اصحاب الحق
لكن الكلام الفوق ده في سطر واحد نسف كل شيئ ونصب نفسه وريث الثورة
خلينا كل الملفات تنفتح ونشوف الثورة دي ذاتها بتاعت منو
Post: #16 Title: Re: هو الكلام بفلوس يا مناوي Author: Gafar Bashir Date: 12-07-2020, 06:02 PM Parent: #14
Quote: أركو مناوي ده ما بيعرف يلعب سياسة.. مجرد زول مهرجل ليس إلا.. قاعد يشوش ويعطل في الناس الممكن يلعبو سياسة ..!
ده كلام سليم يا محمد ادم
في النهاية الكلام البيقول فيهو ده ما بي صفتو الشخصية، وبالتالي مش بينسحب علي مجوعته بس بل بينسحب علي كامل الحركات المسلحة ، باعتبار انو دي العقلية الجايين بيها لاتفاقية السلام ، واصلا هي ما ناقصة ودي مأساة في حد ذاتها بغض النظر عن الملفات التاني
Post: #18 Title: Re: هو الكلام بفلوس يا مناوي Author: محمد البشرى الخضر Date: 12-07-2020, 06:53 PM Parent: #16
غض النظر عن كلام مناوي و التحفظات العليه كنت اتمنى ان تكون الحركات رصيد للثورة و انضمامها للحكم يكون في صالح الانتقال لكن للاسف ما حدث من الحرية و التغيير من ايام اديس اببا و خذلان الجبهة الثورية و نقض التفاهمات ثم الموقف السلبي لجزء من الاحزاب من مفاوضات جوبا صور الأمر وكأنه رفض الجلابة ان يشاركهم الغرابة و الهامش الحكم! او لنقل المحاصصة و تلقائيا اعطى هذا الوضع كردت للعسكر باعتبارهم هم من يريد السلام و مشاركة الحركات السلطة عكس المدنيين الفكرة خاطئة بالطبع لكن للاسف هي واقع في الاذهان على الحرية و التغيير و الناشطين و المدنيين عموما ضبط خطابهم تجاه الحركات! و التوقف عن التخوين و المزايدة بالنضال و الثورة و تجاهل مساهمة كل من حمل السلاح ضد الانقاذ في اضعافها وتعريضها للحصار الدولي بل و حتى تقديم قادتها للاهاي الثورة ليست منبتة بدأت في ديسمبر 2018 فقط, و لا من اتي لميدان الاعتصام ساهم فيها باكثر من الاخرين! طالما هذه فترة انتقالية ولا يوجد تفويض انتخابي يبقى للكل الحق في المشاركة في السلطة و المطالبة بذلك دون ان يخوّن أو يتهم بالانتهازية و الجري وراء السلطة!
Post: #19 Title: Re: هو الكلام بفلوس يا مناوي Author: Mahjob Abdalla Date: 12-07-2020, 07:05 PM Parent: #18
Quote: وفي عز الثورة كانت الحركات جزء من قوي الحرية والتغيير خلت الناس قاعدة وانسحبت عشان تمشي تعمل جسم موازي وتطالب بسلام منفصل مع ( مزايا )
' استاذ جعفر بشير هنا لم تقل الحقيقة. ما حدث كان هو العكس. قحت هم الذين قررو وضعهم في مفاوضات سلام بينما كانو جزءا منهم.
Post: #21 Title: Re: هو الكلام بفلوس يا مناوي Author: Gafar Bashir Date: 12-08-2020, 09:06 AM Parent: #19
Quote: استاذ جعفر بشير هنا لم تقل الحقيقة. ما حدث كان هو العكس. قحت هم الذين قررو وضعهم في مفاوضات سلام بينما كانو جزءا منهم.
يا حبيبنا محجوب الجبهة الثورية كانت جزء من كتلة نداء السودان، قبل قحت وبعد قحت، ثم قررت تجميد وجودها بعد شهر واحد من مجزرة القيادة ... حسب علمي ان الموضوع كان مبكر جدا للكلام عن محاصصة او سلام واذا كان في خلافات داخل كتلة نداء السودان مفروض انها مفهومة اما بقية الحركات فكل الدعوات اللي وجهت ليها كانت واقفة موقف المتفرج لكن اذا ما اسعفتني الذاكرة ياريت تذكرني بيها
Post: #20 Title: Re: هو الكلام بفلوس يا مناوي Author: Gafar Bashir Date: 12-08-2020, 08:48 AM Parent: #18
سلام يا دفعة
Quote: طالما هذه فترة انتقالية ولا يوجد تفويض انتخابي يبقى للكل الحق في المشاركة في السلطة و المطالبة بذلك دون ان يخوّن أو يتهم بالانتهازية و الجري وراء السلطة!
ده كلام سليم وحتي متفق معاك علي الصورة النهائية اللي اترسمت من خلال السلوك الجمعي للقوي السياسية رغم عدم صحتها. وجميعنا كان يتمني ان تكون الحركات المسلحة جزء من ودعم للثورة وليس الشق العسكري والذي ايضا اتفق معك انه انتهز الفرصة وتقدم خطوات لم تستطيع الحكومية المدنية تقدمها ...
لكن نحن الان وهنا بنتكلم عن المحصلة ، بعد كل ما حدث تكون العقلية القائدة للحركات المسلحة تعتقد ان الجانب المدني ( قوي الحرية والتغيير ) سرقت الثورة ، وان الوريث الشرعي للثورة هو الشق العسكري مع الحركات المسلحة ، مناوي ليس فردا بل هو قيادة واذا كان دي الافكار فعليا اللي بتقود الجبهة الثورية وفصائلها ... شنو النتيجة تتوقع؟ في المستقبل القريب ، خليهو البعيد وانظر الصراع الحالي مجرد ما تم الاعلان عن مجلس شركاء الحكم
Post: #22 Title: Re: هو الكلام بفلوس يا مناوي Author: نعمات عماد Date: 12-08-2020, 12:28 PM Parent: #20
Quote: .وكشف مناوي، في المنبر الإعلامي للجبهة الثورية، في قاعة الصداقة امس الثلاثاءعن[\ red]تحديات تواجه تنفيذ اتفاقية السلام وعلى رأسها التمويل ، مشيراً إلى إمكانية تمويل الاتفاقية من الموارد السودانية عبر ترشيد الصرف ووضع برنامج اقتصادي وتوحيد القنوات المالية وتحديد اولويات الصرف .
(2020/11/24)
سلام عليكم أعتقد أن السيد مناوي تقلقه مسألة إنزال إتفاقية السلام لأرض الواقع بدون مصادر تمويل ثابتة و سخية. لا أعرف كيف كان مناوي يصرف على جيشه قبل إتفاقية السلام، و لكن ربما فشل المقترح الذي قدمه فآثر أن يتبنى طرح الطرف الآخر (العساكر و المحور) لتسديد فاتورة جيش الحركة و فاتورة إتفاقية السلام.
Post: #23 Title: Re: هو الكلام بفلوس يا مناوي Author: Gafar Bashir Date: 12-08-2020, 02:38 PM Parent: #22
Quote: عتقد أن السيد مناوي تقلقه مسألة إنزال إتفاقية السلام لأرض الواقع بدون مصادر تمويل ثابتة و سخية. لا أعرف كيف كان مناوي يصرف على جيشه قبل إتفاقية السلام، و لكن ربما فشل المقترح الذي قدمه فآثر أن يتبنى طرح الطرف الآخر (العساكر و المحور) لتسديد فاتورة جيش الحركة و فاتورة إتفاقية السلام.
تحياتي
ده طبعا ممكن ببساطة يكون مفسر لكل ما يقوله لانه فعليا متبني خطاب الشق العسكري موضوع التمويل من جهة ثانية اظنو مقلق للجميع ، لانو الكلام هنا قوي عسكرية عايزة صرف ، في حال تعذر استيعابها ضمن القوات المسلحة أو بالاحري ضمن قوات ( الدعم السريع ) اذا صح تقديرك انو المسالة مالية في الاساس ...
Post: #24 Title: Re: هو الكلام بفلوس يا مناوي Author: عمار عبدالله عبدالرحمن Date: 12-08-2020, 02:56 PM Parent: #23
كلام مناوي دي رسالة للكفيل و محاولة مشاركة في الرز الصهيواماراتي ,,,
Post: #25 Title: Re: هو الكلام بفلوس يا مناوي Author: Biraima M Adam Date: 12-08-2020, 03:09 PM Parent: #22
مني مناوي، رجل صادق مع نفسه .. بالله يا مولانا جعفر بشير ما هو مأخذك علي النقاط التالية .. أو أي منها ..؟
Quote: لحرية والتغيير تحالف انتهي في 11 ابريل 2019 بعد سقوط النظام وما حدث بعد ذلك هو سرقة للثورة.
✔️الاحزاب التي سرقت ثورة 2019 هي ذات الاحزاب التي سرقت ثورة 65 و85.
✔️ما يعرف بالمكون المدني في مجلس السيادة انتهي بعد التوقيع علي اتفاقية السلام.
✔️ الحركات المسلحة اقرب للعسكريين في مجلس السيادة لان العسكريين يريدون السلام والمدنيين لا يريدون السلام.
✔️القوات المسلحة لا تقوم بانقلابات وانما تقوم بها الاحزاب السياسية عندما تفشل في المنافسة.
بريمة
Post: #26 Title: Re: هو الكلام بفلوس يا مناوي Author: محمد حمزة الحسين Date: 12-09-2020, 05:11 PM Parent: #25
إذن يا أخي أحمد محمد عمر... لم تترك للسودان من الشرفاء غيرالمتسلقين والإنتهازيين غير عبد الواحد نور ...
Quote: أي زول خت يدو في يد البشير في يوم من الأيام متسلق وانتهازي
Post: #27 Title: Re: هو الكلام بفلوس يا مناوي Author: Gafar Bashir Date: 12-09-2020, 05:34 PM Parent: #25
سلام يا بريمة الكلام كلو علي بعضو يا بريمة هو انه بقي ملكي اكثر من الملك والكلام ده هسي ولا المجلس العسكري ما يقوله جماهيريا ، الا في صوالينهم
يعني شنو يعني تحالف الحرية انتهي في 11 ابريل والباقي سرقة ... سرقة من منو ومنو المفروض يكون علي القيادة والالية شنو؟ هل هو المجلس العسكري ؟ هل هي الجبهة الثورية؟ هل حكومة مشكلة منهم الاثنين؟
طبعا في حال انو استبعدنا ليهو الاحزاب السياسية اللي هي الالية الوحيدة الشرعية و المعروفة في العالم لممارسة الديمقراطية وهي التفويض الشعبي للممارسة السياسية ، مالم يكون مناوي عندو نظرية سياسية تانية وعنده مؤسسات لممارسة الحكم الديمقراطي غير الاحزاب السياسية ينورنا بيهو
وثم هسي هو بعمل في شنو في الاتفاقية؟ هل برجع في الثورة لاصحابها؟ هل انت عندك قناعة بانو مناوي بمثل اصحاب المصلحة الحقيقية؟ هل اصحاب المصلحة في دارفور بقولوا احسن ليهم العسكر ؟ حميدني والجنجويد ، والبرهان رب الفور؟
ياخي كان اول حاجة يقدم اعتذار عن مشاركته في حكومة الجبهة الاسلامية زي ما عمل غيره بعدين ينصب نفسه وريث شرعي للثورة
Post: #28 Title: Re: هو الكلام بفلوس يا مناوي Author: Gafar Bashir Date: 12-10-2020, 01:21 PM Parent: #27
ده رده علي موضوع المشاركة القفز الي الامام
Post: #29 Title: Re: هو الكلام بفلوس يا مناوي Author: Gafar Bashir Date: 12-10-2020, 04:06 PM Parent: #28
Post: #30 Title: Re: هو الكلام بفلوس يا مناوي Author: ترهاقا Date: 12-10-2020, 04:40 PM Parent: #29
سؤال عن الأسماء وعلاقتها بمكان معين : هل اسم مناوي وكمان ابوهو أركوي ده اسم سوداني؟ هل هنالك عدد من الناس في الغرب اسمهم مطابق لهذا الشخص أو اسم والده؟ سمعت كل الاسماء في الاربع أركان في السودان ولم اسمع هذا الاسم فيا أهلنا في الغرب هل الاسم ده شايع عندنا هناك؟ كما علمت هو شخصيا اسمو سليمان لحد هنا اسم موجود في كل أرجاء السودان
