لو سمحتوا شرح لعبارة ( سواقة الناس بالخلا)

10:24 AM December, 06 2020

سودانيز اون لاين
علي عبدالوهاب عثمان-جدة
مكتبتى
رابط مختصر

مع التحية للاحباب
دائما أجد عبارة ( سواقة الناس بالخلا)
في مواقع كثيرة خاصة الموضوع عن الحرية والتغيير
وتكررت هذه العبارة اليوم بكثرة في مواقع الصحف والمقالات
كتب احدهم لقحت كافية انتهت مرحلة ( سواقة الناس بالخلا )

تحياتي الاحباب الكرام .. طبعاً ما طريقة في القوقل ..
آه يا ضواحي الدنيا

استاذ علي
سلامات
السواقة بالخلاء دا من رندوق ما بعد الثورة .
حكامنا الجدد كلهم شايفين بالخلاء وكمان بدون لوحات
وبدون نور وبدون فهم .

Quote: .السواقة بالخلاء دا من رندوق ما بعد الثورة . حكامنا الجدد كلهم شايفين بالخلاء وكمان بدون لوحات وبدون نور وبدون فهم .

حبيبنا عثمان .. تحياتي
شكرا على الشرح
يعني معرضين لحادث مروري قاتل
بدون لوحات ( مخالف للقانون)
بدون نور ( لا تحديد للهدف)
بدون فهم ( الجهل أكبر مشكلة)

عبارة في غاية خطورة .. شكراً الحبيب عثمان

سلام استاذ علي عبدالوهاب
زمان سفر العربات فى درب الاربعين من امدرمان الي الفاشر اربع ايام (الان بالظلط بقى في حدود 16 ساعة.
ظنى طريق دنقلا برضو كان ترابى في الماضى, و اول ما تتطلع من امدرمان ياهو دخلت الخلا لا فيها اشارات مرور و لا حتى طريق محدد, فقط مهارة السواقين.
في حتات بتكون وعرة شوية و الطريق بكون واحد و في اماكن رملية برضو العربات بتكون عملت درب واحد تجنبا للوحل و فى حتات درداق ساكت, السواقين تلقاهم سايقين بمزاج.

الخلاصة انو سواقة الخلا ما فيها قواعد سواقة المدينة و الحكومة كما يضفها البعض حكومة ناشطين و ما عندهم اى برنامج او سايقين الناس الخلا ساكت.

Quote: ظنى طريق دنقلا برضو كان ترابى في الماضى, و اول ما تتطلع من امدرمان ياهو دخلت الخلا لا فيها اشارات مرور و لا حتى طريق محدد, فقط مهارة السواقين. في حتات بتكون وعرة شوية و الطريق بكون واحد و في اماكن رملية برضو العربات بتكون عملت درب واحد تجنبا للوحل و فى حتات درداق ساكت, السواقين تلقاهم سايقين بمزاج. الخلاصة انو سواقة الخلا ما فيها قواعد سواقة المدينة و الحكومة كما يضفها البعض حكومة ناشطين و ما عندهم اى برنامج او سايقين الناس الخلا ساكت.

حبيبنا محجوب..شكرا على حضورك الجميل
نعم طريق دنقلا أنا سافرت في ذلك الزمان عدة مرات
حقيقة لا اشارات لا حكومة لا مرور فقط السائق هو المسئول عن كل شيء
والرحلة تتوقف على مهارة السائق .. موت أو حياة ..
..
عرفت لماذا تم وصف قحت بهذه العبارة
يا سلام عبارة بليغة جداً
شكرا الحبيب محجوب .. بطريق دنقلا فهمت الموضوع تماماً

حبيبنا على سلام السواقة بالخلا معناها الناس الجدد ديل كلهم بتاعين خلا ما عندهم معرفة بالبندر لذا يغسوا حجر البلد هههها
ملحوظة :-
اجتهاد ممكن يكون صاح وممكن يكون خطأ المهم ناس تكون متفقة من اجل وطن يسع الجميع

حبيبنا صديق تحياتي الحبيب
أنا مما حبيبنا محجوب شبه الموضوع بسفر اللواري زمان في الخلا
تذكرت رحلات دنقلا .. قرب لي المعنى كثيراً

أفتكر يا صديق بمعنى الجماعة ما عندهم خبر

شكرا صديق الحبيب لحضورك
وملاحظتك الجيدة وهي الأهم ( الناس تتفق من أجل الوطن ) هذا هو المطلوب

ظهرت لغة جديده يمكن ان تقبل داخل نطاقه المحدد لكن للاسف رشحت في كافة الاتجاهات مثلا فى فتيل ، نار الضلع ، سواقة الخلا و ماشابهها من لغة القونات

Quote: ظهرت لغة جديده يمكن ان تقبل داخل نطاقه المحدد لكن للاسف رشحت في كافة الاتجاهات مثلا فى فتيل ، نار الضلع ، سواقة الخلا و ماشابهها من لغة القونات

حبيبنا النورس تحياتي
صدقت الحبيب النورس .. هذه لغة خرجت من الخصوصية الى العمومية
مع الغالبية العظمى في الوطن لا يدركون المعانيها والمقصود منها

تحياتي الحبيب النورس

السواقة بالخلا
لقى الناس فارات ودقسهم ههههههههه
المعنى
الزول يفتكر الناس ما فاهمين حاجة ويغشهم لفترة من الزمن
لحدي بعد فتره يكتشفوا انه كان سااايقهم بالخلا

السواقة بالخلا
لقى الناس فارات ودقسهم ههههههههه
المعنى
الزول يفتكر الناس ما فاهمين حاجة ويغشهم لفترة من الزمن
لحدي بعد فتره يكتشفوا انه كان سااايقهم بالخلا

بالاضافة لشرح محجوب
الخلا مافيهو شارع واحد
ممكن تمسك شارع غلط يوديك للموت
وشارع يمرقك
وشارع يكمل جازك

الحبيب علي و المتداخلين تحياتي

اعتقد المقصود من قول السواقة بالخلاء

السواقة بالخلاء ما في زول بيكون عارف الاتجاهات غير السواق و المساعدين
اما الركاب و هم الشعب طاشين ساكت ما عارفين حاجة

الاقرب لهذا القول

" زي ديك البطانه"
يشيلوه السوق مدنقس و يرجع مدنقس ما بيكون فاهم اي حاجة

Quote: " زي ديك البطانه" يشيلوه السوق مدنقس و يرجع مدنقس ما بيكون فاهم اي حاجة

الحبيب صديق تحياتي
قرأت هذه العبارة ( ديك البطانة ) قبل يومين
في مقال لصحفي ما متأكد من أسمه ربما ( حيدر المكاشفي )
لأن الديك في الذهاب والعودة لم يرى شيئا ً ( لأنه في وضع أب سايد داون )

تحياتي الحبيب صديق

Quote: السواقة بالخلاء ما في زول بيكون عارف الاتجاهات غير السواق و المساعدين اما الركاب و هم الشعب طاشين ساكت ما عارفين حاجة

الحبيب صادق .. تحياتي
صحيح مداخلتك عن تجربة في طريق دنقلا امدرمان زمان
وطريق كريمة دنقلا ( المحيلا )
كم الأرواح ضاعت ..

مودتي الحبيب صادق

تحياتي الحبيب أبوسن ..
اضافة لمداخلة محجوب .
يتوقف على السائق وركاب بدون اي معرفة

تحياتي ..

السواقة بالخلا
لقى الناس فارات ودقسهم ههههههههه

==============

تحياتي الحبيب عمر
فارات ودقسهم ..

نموذج شرحك مفهوم .. بدأت الفكرة تتضح

تحياتي

سلام امبس علي

اؤيد ما جاء في رد الاخ محجوب

الحبيب أبوجهينة .. تحياتي
نعم اشارته الى سفريات الخلا زمان
مثال دنقلا امدرمان .. فهمنا الوضع
لأن السائق هو الامر الناهي لا يستطيع اي احد من الركاب ابداء الرأي
لأنه يجهل الجغرافيا والزمان .. فقط يسلم روحه للسائق الى أن يصل
أقرب منطقة مأهولة ..
وينطبق هذا الكلام على بعض الممارسات السياسية

تحياتي أديبنا ابوجهينة

عمك علي اديك مثل عن سواقة الخلا يقال انه حقيقي:

قالوا كان في ضابط كبير في القضارف او كسلا ما متذكر .. جاو استدعاء للقيادة العامة في الخرطوم و قرر يمشي بي ليلو داك كان منتظر ليهو ترقية ..
و قالوا السواق الفلاني داك بشق بالخلا يختصر بيك الوقت ..
المهم السواق داقش الخلا و داقش و ماشي و كل شوية الضابط اها ما قربنا .. السواق يكون ليو اي لا خلاص ..
و تمر ساعة و (الادنروبر) يطلع في رمله و ينزل في دقداق و يزوغ من حفره ..
و كمان كم ساعة .. و تاني يقول اي قربنا ..

و فجأه السواق كورك .. خلاص سعادتك انا شايف (بُهرة) ام درمان .. ساعة بالكتير نكون هناك ..
و حاتك قبل الساعة .. عمك لقى روحه داخل القضارف مرة تاني ..

Quote: قالوا كان في ضابط كبير في القضارف او كسلا ما متذكر .. جاو استدعاء للقيادة العامة في الخرطوم و قرر يمشي بي ليلو داك كان منتظر ليهو ترقية .. و قالوا السواق الفلاني داك بشق بالخلا يختصر بيك الوقت .. المهم السواق داقش الخلا و داقش و ماشي و كل شوية الضابط اها ما قربنا .. السواق يكون ليو اي لا خلاص .. و تمر ساعة و (الادنروبر) يطلع في رمله و ينزل في دقداق و يزوغ من حفره .. و كمان كم ساعة .. و تاني يقول اي قربنا .. و فجأه السواق كورك .. خلاص سعادتك انا شايف (بُهرة) ام درمان .. ساعة بالكتير نكون هناك .. و حاتك قبل الساعة .. عمك لقى روحه داخل القضارف مرة تاني ..

حبيبنا يحى يا سلام يا جميل
حضورك دائما ممتع
أجمل عبارة لوصف الوضع هو ( آي قربنا )

يا سلام يا يحى دائما عندك حكاوي جميلة
أكثر ما استفدت من سودانيز ( العامية )

حبيبنا يحى تحياتي
انتو ناس امدرمان عندكم فن الحكي
امس في التلفزيون واحد اسمه ( أحمداني ) ما متأكد كويس
المهم ان الرجل لديه مقدره سرد عجيب في برنامج عن الفن حديثه جاذب جداً احلى من الغناء
حتى حسين خوجلي رغم شحطاته مقارنة بالباقين زول حكايات
ما سر هذا الذي يتميز به أهل امدرمان

تحياتي الحبيب قباني

معليش شوية بعيد عن موضوع البوست
نحن في الشمالية ( ضواحي الدنيا ) نعاني من مدخلات زراعة القمح
في المساء اتابع نشرة الاخبار ( التاسعة مسا ء ) خبر عن الشمالية
تنظيم (( ورشة عمل عن بناء السودان الجديد )) تجمع بناتنا وأولادنا بالكمامات
قاعة ضخمة محاضرات وكلام غير مفهوم .. ما الفائدة ..

ورشة عمل قاعات وكراسي وساعات فراغ
يا ريت ورشة جازولين وسماد وتقاوي

اصلا العبارة جات من سواق الوالي الكوز
الوالي جاي راجع للولاية بالخلا عذب السواق عذاب اقيف ، جيب المصلاية وجيب الابريق ،صب لي الاتوضأ ويغسل كرعينو زي عشرة غسلات
ويقيف اقل شىء تلت ساعة في الصلاة ويسبح نص ساعة ويبرطم ربع ساعة، والسواق مرضان كورة مستعجل ماشي يحصل كورة اهلي/ اتحاد
وهم داخلين على مدني الساعة عملت 06:30 مساء والكورة الساعة 07:00 قام الوالي قال ليه اقيف هنا المغرب قرب ، السواق قال ليه يا سعادتك
بنصل البيت قبل الآذان ونصلي جوة جامع الحي الوالي رفض رفضا باتاً الا يقيف وامر السواق بى نهرة (قلت ليك اقيف هنا) السواق وقف ونزل ليهو
الابريق والمصلاية وصب ليهو الموية ، و..أول ما كبر دور خلاهو ليك في الخلا
لما وصل رئاسة الولاية ..الناس سالت من الوالي .. وين الوالي؟ قال ليهم :
(سبحان الله الوالي دا صاحب كرامات نزل يصلي شفتو.عرج بي مصلايتو في الجو قريب السحاب .. سبحان الله
الوالي بعد العشاء جا كداري وغبارو يتطاير لقي الناس مجهزه الساوند والعجل والتكبير والتهليل
سال اول زول لاقاهو الحاصل شنو ؟
قال ليهو السواق قال انت من مصلايتك عرجت الي السماء
طوالي الوالي نادي السواق ومسكو من اضانو وقال ليهو نحن ما قلنا الحاجات دي ما بتكلمو بيها.

فنانا الجميل احمد ياسين تحياتي
يا سلام أجمل هدية أفتتح بها يومي في المكتب
ده كلام يوطن الابتسامة في الفم ؟؟

شكرا يا جميل .. صباح جميل

تحياتي

Quote: و فجأه السواق كورك .. خلاص سعادتك انا شايف (بُهرة) ام درمان .. ساعة بالكتير نكون هناك .. و حاتك قبل الساعة .. عمك لقى روحه داخل القضارف مرة تاني ..

باقيلك الجماعة ديل رجعونا القضارف ؟
تحياتي علي وضيوفك

حبيبنا خالد تحياتي
شكرا على حضورك ..
يحى قباني الحبيب حكاويه جميلة

نعم رجعنا القضارف

مودتي الحبيب خالد

Quote: ¯ (السواقة بالخلاء) من مصطلحات ما بعد الثورة، ويُقال لمن يخدع الناس، ويليق بالسياسيين، وليس بالمهنيين الذين يجب أن يتحلوا بالموضوعية والمهنية في أفعالهم وأقوالهم..!

يبدو أن هذه العبارة ( السواقة بالخلاء) موضة الكتاب المقالات
اليوم في مقالة لقريبنا طاهر ساتي بعنوان ( تغيير الشرائح ) عن اضراب الاطباء

تحياتي الاحباب

الحبيب علي سريناقمييه ...
اكتر زول قدر يفهمك ويوصلك هو الهبيب مهجوب ...


لكن كولهم بتزاوغو يدخلو بي حمد ويمرقو الحتانه ...
سواقة الخلاء كلمة مجازية تضرب عندما يكون الإستغفال والتجهيل سيد الموقف ...
وكأنك سايق ركاب بطريق خلوي لا توجد فيه علامات تدل الركاب وتجعلهم يتكهنون بمصير الرحلة ...
يعني إنت السواق وحدك الذي تعلم الي الي تسير ومتي تصل وكيف ...
قحط جاتنا فزع بقت وجع لا أعلم لكم إله غيري ولا أريكم إلا ما أري ...
المصيبه هم نفسهم لو تعمقت فيهم تجدهم مساعدين حلل مع السواق في رحلة الخلاء ...
ومسيوقين لكن حب السيطرة يدوك إحساس إنهم عارفين ويطمنوا في الركاب ...

محمد حمزة أمبس
تعرف أنا فهمت البعد من العبارة
عندما استحضرت سفرنا زمان من امدرمان الى دنقلا والعكس
اتضح انها عبارة بليغة جداً

فعلا محجوب شرحه في البداية فتح لي النافذة لاعرف المقصود

تحياتي محمد امبس