هههههه بت ابا امتثال..حبابك يا صديقتي الأميرة.. عارفة تلاتة مرات بحاول ارد على هذا الخيط وبدون ما اشعر القى نفسي قاعد اعمل تسجيل اوديو..!! شفتي الواحد (مزمهر ) كيف؟ كتر خيرك كتير يا صديقتي.. والمحظوظ فينا في هذى الدنيا الفانية ان يكون لك احباب واصحاب وصديقات واصدقاء (وجكاسي ذاتو)..يسألوا عنك ويفقدوك..! مرات يا امتثال ، فكرت كتير لو القى لي فرصة افط شهر ديسمبر..!! ثلاث ايام في ديسمبر ، بتمثل لي ذكرى خاصة للغاية ، ومنها اليوم الصادف سؤالك عني يوم 4 ديسمبر.. (4 ديسمبر كان اغتيال بشير الطيب ، 5 ديسمبر انضربت في شارع النشاط بواسطة الإحتياطي المركزي ، 6 ديسمبر كان اغتيال التاية ابو عاقلة وسليم وجرح ناس كتار..!)..هي ايام احتفي بها دوما بطريقتي الخاصة..! فتشت تراث اهلنا في بحر ابيض..ولقيت نقارة اهلي سليم ..وكدت ان اناديك واقول ليك: هل ستراقصيني يا امتثال..! ثم طشيت نحو مالي..ولقيت مزيكا سمحة لكن قلت دي ما بتنفع في الدوارة عن زول..! ثم فيديو انصاف فتحي (المريود)..وانصاف لابسة زمام اب تيلة..وقلت مناسبة نتونس عن الزمام اب تيلة والزمام اب رشمة والفرق..!
لكن..!
الدعيتر جي..سماح لمتنا علي ..! شعار لمسلسل سوداني للكوميدان مختار بخيت..! والغناء لإنصاف فتحي..! والجزء المنشور هنا هو تقريبا اول حلقة في المسلسل..! لأول مرة في تاريخ الدراما السودانية يظهر نموذج للبقاري ..وهو النموذج الذي حاول ترسيخه اخونا واستاذنا الفنان مختار والفنانة بت ابا نايرة اسماعيل..وبقية نجوم هذا المسلسل اللذيذ..! فشنو يا بت ابا ليك العتبى حتى ترضي..! نتلاقى في الدكان ..يلا اشربو الشاي.. بنراعي ليه سماح لمتنا علي..! والهوادة ..وليدكو دي سمحة دروبا..عاجبني في طبعا واسلوبا.. وتلك جكة تانية.. تهاني بالذكرى الثانية لثورة استقلال السودان المجيدة..
ههههههه.. ول ابا عبد اللطيف..حبابك يا صديقي.. اهلك المسيرية عندهم مثل بيقول: حد التراب بيتك..! يعني تلف العالم والكون وتاني ترجع لبيتك.. سودانيز اونلاين هو بيتي الذي اهداني الكثير الكثير..فيه عرفت ناس كتار ، وعرفوني ناس كتار..ياخي حتى الجكس القديم ، لمن لاقيتهم..بيقولوا لي شايفنك متجدع في سودانيز اونلاين..! رسالتنا وصلت يا صديقي واحدثت الأثر..والشكر لسودانيز اونلاين وصاحبنا الجمهورية بكري ابوبكر عليه السلام..! في رحلة الحضرة (الحضرة دي كيف معاك يا عب لطيف؟..اي مسلم داير يجيب ليهو نظرية..ذي المهدي المنتظر مثلا..ولا فكرة استاذنا محمود محمد طه ، عليه السلام ،..يقول ليك دخلت خلوة..!!)..في تلك الرحلة يا عبد اللطيف..حزنت..أن السودانيات والسودانيين في نواحي الواتساب والفيس بوك ما عندهم احساس بالفلسفة..وهذا مؤشر خطر شديد..فدنيا امسودان مطلقا لن تكون مجرد ثقافة فاست فوود..! افتقدت الكثير في هذا المنبر ، والسبب ظرف طارئ..معاي هنود فجأة قرروا ياخدوا اجازة في زمن واحد، نظام اعتصام القيادة وكده ويا ليتني ما شرحت ليهم فكرة الإعتصام..!!..ووقعت على راسي..بلغ بي الأمر يا صديقي.. ان اعمل لمدة اربعة اسابيع متواصلة من غير ون دي اوف..والفكرة نفعت معاي كتير..ولكنها اوضحت لي عامل السن واني بقيت عجوز..لبن حبوباتك المسيريات كلو اتشفط يا صديقي بتقدير خاطئ من قبلي..!
كل المحبة يا صديقي..يا جاري..!
لك هذا الفيرشن للغنية التي طلبتها..!
والمعنى واضح..! لا نحتاج الأن في دخول حرب مع اثيوبيا..والإ ح نمارس غشامتنا ونهد السد العالي والكائن يكون..!
Post: #9 Title: Re: محمد النور كبر Author: Kabar Date: 12-20-2020, 00:07 AM Parent: #1
صديقي عبد الصمد..حبابك
كتر خيرك على هذه المطايبة الأنيقة.. صاحبنا مهدي عامل ، انجز حكاية (نقد الفكر اليومي) وكنا نظن انها خطوة مناسبة ، مدخل ، لقراءة الواقع السوداني..ولكن يا حسرة..! اللحظة يا صديقي ، واقع امسودان مشحون بالغضب والعاطفة..وكدنا ان نصرخ: لماذا لا مجال للتأمل والمراجعة وصياغة الأحكام والخلاصات التي يمكن ان نبني عليها؟؟ الشكر عبرك يا صديقي ..لشباب ثورة ديسمبر..بنات واولاد..من يحرصون على عدم حدوث النكسة كما حدثت في اكتوبر وابريل..!!
