هوي ياكيزان يا حرامية... جاكم البلاء

05:25 AM December, 01 2020

سودانيز اون لاين
عمر التاج-KHT
مكتبتى
رابط مختصر

شغلي في بالسكة حديد 🚆خلاني اتجول في السودان🇸🇩 شرقه وغربه وشماله وجنوبه تعرفت على عادات وتقاليد أهل السودان اكد اكون عرفت جميع الأحزاب السياسية وقياداتها في الولايات وفي الخدمة المدنية وخاصة *الكيزان جاهم البلاء.*

وبحكم عملي في مدينة عطبرة🚴‍♂️ لفترة عشرة سنوات كنت *بشوف أنو الكيزان عدوئي الأول بعاين إليهم بعين العداء وخاصة في فترة سيطرة الحزب الشيوعي على النقابات* من الزمن داك خاتيها ليهم، وبعد إنتقالي لمدينة الخرطوم كنت أكثر زول بفك الضحكات 😃واللعنات 🤲على الكيزان وأحرض العمال على النقابة👷‍♂️ و كنت بشوفهم مجرد لصوص بستولوا على أموال العاملين عبر الخصومات و كانت *نقابة الكيزان الحرامية* بتوفر للعاملين قوت العاملين ثلاثة مرات في العام *(قوت الشتاء والصيف وكرتونة رمضان)* واخرها كانت في العام ٢٠١٨م (وبعدها ما شوفنا خير) الكرتونة كانت بمبلغ ١،٢٥٠جنيه تتخصم على ستة أشهر ، متخيل معاي يعني ٢٠٨ جنيه كل شهر، و الكرتونه فيها شوال سكر قيمته في السوق ٨٠٠ جنيه تقريبا ولبن بودرة وشاي وبن وصلصلة🥫 ورز 🍜وعدس وجركانة زيت وكركدي وعرديب وعصير تانج وحاجات تانية كنت بدسها باكلها براي، 🍫ما عمكم كبير محتاج تغذية .

المحيرني🤔 *الكيزان الحرامية* بوفروها كيف بالسعر دا (و الله حاجة تحير) ونشيل في الترحيل🚍 نشتم فيهم والغريبة بضحكو كانو زي الواحد ما بتتكلم معاه .

كمان قبل من تنتهي من خصم كرتونة رمضان يجوك ناطين *بخروف العيد* خروف🐏 ماكن بي ٣٠٠٠ جنيه عليك لي دا قروشه بتتخصم في سنة ومرات بعفو باقي الخصم لما يكون شايل كرتونة وخروف و إحتياجيات العام الدراسي 📚🖋ودي كوم تاني (شنطة، كراسات، اقلام، علبة هندسة وزي مدرسي) *تخم سااااي ما الحرامية جنبك.*

قوت الشتاء و الصيف كرتونتهم قريبة لي بتاعت رمضان ملايانة بس *الملاعين ما بجيبو فيها (الزبيب)* ودا عدم مراعاة لي الناس السنونه وقعت زينا نحن ، ومسمينها (سلة العاملين) *يسل روحهم* سلة كيف و ما فيها زبيب.

المسلطين كانو شاغلننا ليك بتكريم أبناء العاملين المتوفقين 🎁وهاك يا هداية ويوم اسري تقول عرس بجيبو قروش للحاجات دي من وين ما عارفين *(برضو الزبيب ماعافي ليهم).*

لما سقطت قلنا *نكشهم الحرامية وهااااك يا إزالة تمكين* ... غريبة الواحد فيهم إسمو بطلع في الكشف وبكون مبسوط .
بس ما كنا عارفين نحن قطرنا صفر... من يوم سقطت ...لا شوفنا كرتونة لا سلة *ورحنا اتسلت*... ولو ما صحيت بدري لي صف العيش و الترحيل فاتك حدك اتلحق ولي يوم الليلة بدعي انو المدارس ما تفتح لو فتحت نحن بنعرج.

واموت واعرف الكيزان بجيبو القروش من وين؟
*وهوي يا كيزان يا حرامية ...*

نحن ناس كبار وما عندنا حيل للسمبك

الحكومة لو ما سقطتوها يجيكم البلاء


واي زول بقول الجوع ولا الكيزان ...
*والله تجوع برااااك.*

عمكم / حسن إبراهيم الجاك
..
..
الحال من بعضه يا عمنا حسن.

و الله يا ود التاج الواحد يخاف يعلق في بوستاتك
حقت الكيزان بالايجاب ولا بالسلب ويقوم المصنفاتية
يصنفوها.
بس ما قاله ود الجاك هو ما راينا باعيننا وسمعنا باذاننا
تصدق عشرة سنوات في وظيفة حكومية يشهد
الله لا اخدت يوم كرتونة ولا خروف ولا منحة
ولا تامين طبي والله كنا عايشين ببركة ربنا العالمين ورضاءه
الكنت بستغرب ليه في حاجة اسمها سلة رمضان للاسر
الفقيرة ولا المتعففة ولا شنو كده ما عارف وهي انواع
من الاقل جودة للاعلى جودة والغريبة الاعلى جودة كان بيدوها
الدكاترة والاداريين الكبار والمتعففين كانوا بيرشوهم
بالكرتونة الفيها البلح المعتت الذي لم يغيب عن اعيننا
منذ معسكرات التدريب

أحمد عمر
كيف تمام

عمر التاج
والحاج حسن إبراهيم
تحية طيبة

عندي جاري على طول في نقد وكره دائما للكيزان ودائما ما ندخل مع بعضنا البعض في نقاشات حادة
وأول ما تم السقوط للحكومة جاني جم بيتنا وقعد يكورك لي "الكيزان سقطو نشوفك تاني حتقبل وين "
ودار الزمن والأيام وفي القريب العاجل حصل ليهو ظهور إعراض فتاك للمرة الثانية وقبل كده عمل عملية قبل سنة ونص
فسألنى قريب دا ما طالعين مظاهرات ؟ فقلت ليه بتسال ؟ قال لي عايز اطلع معاكم
استغربت طبعا شديد وقلت ليهو مالك فجاة كده غيرت منهجك ؟ قال لي مشيت اشوف برنامج الفتاك وقرروا لي عملية ولمن عملت الفحوصات لقيت الحصيلة بتاعتها مايقارب الــ(4000) خارج رسوم العملية فقلت مامشكلة نعملا, بعديها قال لي بعد ماعملت الفحوصات مشيت للدكتور قال لي تمام كده بس مافاضل ليك الا العملية وحاليا المستشفى قلبها واقف وماف طريقة الا في شهر واحد ولمن سالتو من رسوم العملية سعرها كم قال ليهو (10,000)ج
فقال لي والله انا لمن عملت العملية الأولى كلفت معاي بالفحوصات وكل المنصرفات (1000)ج بس
خلاصة الموضوع :-
لايدرك قيمة الكيزان الا من عاشر تجربة في الماضي والحاضر وقارن بين الاثنين

Quote: الله يا ود التاج الواحد يخاف يعلق في بوستاتك حقت الكيزان بالايجاب ولا بالسلب ويقوم المصنفاتية يصنفوها. بس ما قاله ود الجاك هو ما راينا باعيننا وسمعنا باذاننا

والله يا أحمد عمر كلنا بدينا كدة ..
في البداية ثرنا وملينا الدنيا زعيق فرحة بسقوط الكيزان
ثم بدأت الحقائق تتضح فيدنا نتذمر ..
أها تذمرنا ده خلى الجماعة الطيبين يصنفونا كيزان وسجم رماد
وما كان بهمنا اين موقعنا من التصنيف
مايهمنا هو ان نرى الحقائق مجردة وان يراها الكل مجردة ..
الطريق الخطأ لايقود الا الى المكان الخطأ ..
والبعرة تدل على البعير
وبعرة السودان اليوم لاتسر صديق ولا تغضب عدو

يا كيزان أختشوا

من 89 وحتي94

العيش كان تبيت في الفرن
البنزين تبيت في الصف
السكر وقيه في اليوم بالبطاقة


دمرتوا البلد وما خليتوا ولا مشروع واحد ناجح


ارفعوا فراشكم ده وخلوا الثكلي

Quote: من 89 وحتي94 العيش كان تبيت في الفرن البنزين تبيت في الصف السكر وقيه في اليوم بالبطاقة

شفتو زي المتعوس ده طالع من كهف ٩٤ وبفترض ان الثورة قامت عشان تعالج مشكلة سنة ٩٤
لا يافالح .. الثورة قامت ضد الكيزان والرغيف كان بالهبل .. والوقود متوفر .. والمواصلات ماتديك الدرب
والدولار ب ٦٠ جنيه ..
والان انت جيت تصلح الوضع.. تقوم تبيت الناس في الطلمبات يومين ومرات اسبوع
وتخلي العيشة ب١٥ جنيه والدولار ٢٨٠ ..
اسه العامل الثكلي انت ولا الكيزان؟

Quote: والدولار ب ٦٠ جنيه ..

يا عمر التاج
والانقاذ جات وكانو خايفين الدولار يصل 20 جنيه . .

بعني الكيزان كانوا كعبين يا عمر سعد
طيب انت مشيت في طريقهم وعملته ٢٨٠
وحتى الحاجات البسيطة الكويسة الكانت عند الكيزان انت وقفتها
يبقى البلد استفادت منك شنو؟
الفشل فشل يا عمر سعد ..
واذا انت قلت الكيزان كعبين حقو تكون صادق مع نفسك والوطن وتقول ديل برضو كعبين.

Quote: الفشل فشل يا عمر سعد ..

مافي زول راضي عن الحكومة الحالية يا عمر التاج . .
لكن المقارنة هنا ظالمة . .

Quote: عندي جاري على طول في نقد وكره دائما للكيزان ودائما ما ندخل مع بعضنا البعض في نقاشات حادة وأول ما تم السقوط للحكومة جاني جم بيتنا وقعد يكورك لي "الكيزان سقطو نشوفك تاني حتقبل وين " ودار الزمن والأيام وفي القريب العاجل حصل ليهو ظهور إعراض فتاك للمرة الثانية وقبل كده عمل عملية قبل سنة ونص فسألنى قريب دا ما طالعين مظاهرات ؟ فقلت ليه بتسال ؟ قال لي عايز اطلع معاكم استغربت طبعا شديد وقلت ليهو مالك فجاة كده غيرت منهجك ؟ قال لي مشيت اشوف برنامج الفتاك وقرروا لي عملية ولمن عملت الفحوصات لقيت الحصيلة بتاعتها مايقارب الــ(4000) خارج رسوم العملية فقلت مامشكلة نعملا, بعديها قال لي بعد ماعملت الفحوصات مشيت للدكتور قال لي تمام كده بس مافاضل ليك الا العملية وحاليا المستشفى قلبها واقف وماف طريقة الا في شهر واحد ولمن سالتو من رسوم العملية سعرها كم قال ليهو (10,000)ج فقال لي والله انا لمن عملت العملية الأولى كلفت معاي بالفحوصات وكل المنصرفات (1000)ج بس

تعرف يا اخ اسحاق ..
مواقف ٩٠% من الشعب السوداني الان تشبه موقفي تماما ..
انا لست عدوا لاحد ..
وماكانت عندي مشكلة مع الكيزان الا في حاجات معينة..
وهي الفساد والشمولية وسوء الحالة الاقتصادية ..
الكيزان مشو واستبشرنا تجي حكومة تتجاوز بينا هذه العثرات
فاذا بحكومة تتعمق فيها وتغوص في وحل الموبقات أكثر ..
والمشكلة انه الكيزان كانوا حاسين بمشاكل البلد
الا ان الحكومة الحالية وأبواقها شايفة الوضع تمام
وشايفة السودان خلاص عبر
عشان كده صغروا في نظر الشعب وحايصغروا اكتر طالما مفتكرين الشعب مجرد كبزان لا يستحقون غير التكميم والسجون.

المقارنة ظالمة كيف يا عمر ..
حاول فكر بتجرد واعتبر نفسك مواطن عادي
الكيزان فشلوا وراحوا في ستين داهية ..
طيب حكومة حمدوك نجحت؟
الإجابة فتشها عند اهلك الغبي..
فتش عنها في الحواري والقرى
شوفها في عيون المساكين والغلابى .
واذا اقتنعت ان حكومة حمدوك والبرهان فشلت
فتبقى النتيجة واحدة
والمقارنة في الفشل موجودة بشدة..
وبالمناسبة .. الزول القال الكلام الفوق داك
والقال الكلام التحت ده .. ما كوز
ولا مواطن عادي ..
ديل كانوا مؤيدين بشدة لحمدوك ثم أفاقوا على الواقع الأليم

Quote: *أي قحاطي مطرطش يقول ليك سبب الكفاوي الحاصلة في البلد هي الدولة العميقة، رسل ليهو البوست ده، وما تناقشو تاني، لانو واضح انو ما بفهم ولا عايز يفهم* مشكلتكم شنو؟ هشام أحمد شمس الدين طيب مشكلتكم شنو؟ قلتوا نحن الممثلين الوحيدين للثورة، قالوا ليكم كويس، قلتوا نشكل الحكومة برانا، قلنا آمين، قلتوا المكون العسكري شريك لينا في السلطة، قلنا تمام، قلتوا الدعم السريع قوات جميلة، سكتنا، قلتوا دايرين نفكك النظام القديم، قالوا ليكم اتفضلوا، قلتوا دايرين تتعاملوا مع المحور الإماراتي، سكتنا، شكلتوا الحكومة وقلتوا دي حكومة كفاءات، قلنا طيب، يدكم مطلوقة في كل الوزارات تشيلوا الدايرنوا وتعينوا البعجبكم، حتى التعليم قلتو مسح وكسح، طاااايب، أها مشكلتكم شنو؟ معارضة زي الناس ضدكم مافي! ليه ما قادرين تشتغلوا؟ ما عارفين مشكلة السودان شنو؟ كنتوا برا؟ قلنا "العِيشة، العدالة، السلام، الحرية"، الحرية خليناها أمنعوا الدايرين تمنعوه، والعدالة شايفنكم بتقبضوا في ناس وتخلوا ناس وبتتماطلوا في التحقيقات، قلنا كويس، السلام لقيتوه معقد؟ نديكم شوية؟ طيب، أها عِيشة البسطاء دي مشكلتها شنو؟ ما قلتوا كفاءة وجايبين ناس من برا وعلماء وجهابذة! قضيتوها كلها محمود محمد طه، وتشطبوا في القرآن من المناهج، وفي هوس ديني، وترفدوا في ناس ما عندكم بدائل ليهم، وتمكين مضاد، واحتفالات، وأهازيج، وسفرات نمشي نجيب منها قروش نرجع مطالبين، وغزل في المليشيات، ونبز في الإسلاميين، وشعر، وغنا، وهاشتاقات! دايرين وقت لسة؟ كويس الناس الأوضاعهم معقولة حيصبروا، لكن لازم تعرفوا إنو ديل قلة في البلد دي، الأكثرية هم المسحوقين والمسحوقين تماما، والبتململوا أسي ديل المسحوقين بس، المسحوقين تماما ديل لو قاموا ما حيمهلوكم فرصة للفزلكة. حاولنا نرفع درجة الوعي العام أصريتوا إنها تنخفض إلى أدنى حد، بتفتكروا دا من مصلحتكم، حاولنا نتكلم عن وحدة وطنية، استقلال في القرار السياسي، ما في زول فتح خشموا إلا وقلتوا كوز وفكيتوا فيه الغوغاء والدهماء، ظللتم من ضعف لضعف حتى استقوى عليكم العساكر وأمنوا جانبكم تماما! ولكن حنظل نكرر رغم كل شيء: ١. الوحدة الوطنية (السياسية والاجتماعية) ٢. استقلال القرار السياسي ٣. النقاش المجتمعي الموسع ٤. رفع الوعي قدر الإمكان بتعقيدات السودان (الإنسان، التاريخ، الواقع)'