أرواح الشهدا ... تروس النيل والهوا والشارع

04:10 PM November, 13 2020

سودانيز اون لاين
عبدالماجد موسى-بريطانيا / لندن
مكتبتى
رابط مختصر

وين سودانا الثورة
الهز الأرض الصخرة
بدماه الزاكية وعطر
كل السودان الأخضر
وينو طريقنا الجمرة
نحنا الثورة في دمنا تجري
وشهيدنا بناخد حقو
نحن الثورة طريقنا الدغري
واليابانا الدايرو نتمو
نحنا هدمنا معابد الظلمة
والدايرنا حبابو نلمو
نحنا تروس الهوا والشارع
ونحنا رفعنا الحلم الفارع
نحنا ملوك الساحة الشرفا
ونحنا الطول للغالبو يصارع
أرواح الشهدا الكانت تهتف
نادتنا الليلة قلوبا ترفرف
تحتنا النار وقادة وقايدة
ارواحنا عمل إنجاز وقيادة
أعدل همك وامشي قصادو
أشعل روحك وعادي العادو
وطن الخير زايدات خيراتو
اوعك تقنع من بركاتو
بلدنا تكفي تكفي
يمين بالله تكفي زيادة
اوعك تندم
اوعك تحزن
اوعك تسقط راية الأمل الضوا
ثورتنا نعيد تصحيحا
لو واحد حاول يهدم
لو واحد حاول يهزم
الشمس الطلقت فينا
يلقانا براكين ثايرة
تتمشى وتجدعو غادي
خلو قلوبكم دايماً صاحية
ثورتنا الثورة فصيحة
ابداً رجْعتنا محرمة تاني
خلو الإيدين تتشايل
نحنا المستقبل هيا
فتش عن دورك إنت
سيب البمرق ويشكك راجف جنب الطوفان الهادر
وأنسى المارق يدسا
صَرَّاعْ الموج غرقان
جيل الثورات الطامح
شَدَّاد خطوات ويبشر
رويان بالأمل الباسم
نظراتو بعيدة تعمِّر
رافع الرايات من تاني
يقلع في المرض الجاثم
اتلمو تعالو علينا
كنوزنا تنادي جنينا
عليكم نحنا مشينا
دقايق بس وثواني
الرعد القادم عوا
بكرا لقانا امرقو
شباب السودان إنتو
بقليلكم دايماً شاركوا
صونوا السودان وأمانتو
إنتو شهود للشهداء الفاتو
والعِرِق النابض فينا
أبداً ما بِنْسى ويخذِل
عَلَّاية جباهنا الحرة
غاياتا السامية تلالي
حَرَّاقة لحومنا المرة
ترخص للوطن الغالي

✍🏽 عبدالماجد موسى
لندن