Post: #2 Title: Re: الخرطوم تشهد تصعيد في معظم المناطق andquot;تسق Author: Arif Nashed Date: 11-12-2020, 05:44 PM Parent: #1
نرجوا تأكيد هذه الأخبار التي لا تبشر بخير اتصلت بأخي وأكد بأن هناك غليان وغضب يسود الشارع بعد الكشف عن مقبرة مفقودي الاعتصام
Post: #3 Title: Re: الخرطوم تشهد تصعيد في معظم المناطق andquot;تسق Author: Salah Zubeir Date: 11-12-2020, 06:03 PM Parent: #1
Quote: تصعيد ثوري
عارف ود ناشد ... شنو يعني تصعيد ثوري؟ شوف ... العزوزاب وكوستي ومدني ما شفتهم ... لكن المحلات التانية دي مريت بيها اليوم ... يعني من شرق النيل اتحركتا الصباح مشاقق سوق حلة كوكو وفي بحري شارع شمبات وقطعت كبري شمبات وبي شارع العرضة وواصلت مشاقق امبدة لي قندهار وقيلتا في المويلح ... ورجعت بي نفس الطريق ووصلت البيت مع المغرب ... يعميني ما شفتا حاقه غير طبيعية ... اسمع حكي غرفة عمليات (ل م) ما ينفع ... عندك لايفات ... مرحب حبابك ... بالميت تصاوير بنقبلا ... المرحوم نقد إكان واضح ... وقاليهم حضرنا ولم نجدكم ... اوع من الدقيس ...
Post: #4 Title: Re: الخرطوم تشهد تصعيد في معظم المناطق andquot;تس Author: Arif Nashed Date: 11-12-2020, 06:13 PM Parent: #3
ود الزبير سلام. شكلها شتلة لكن قبل ان أكتب البوست تواصلت مع ناشد وأكد ذلك لأنه هو من أرسل لي الخبر.
Post: #5 Title: Re: الخرطوم تشهد تصعيد في معظم المناطق andquot;تس Author: Arif Nashed Date: 11-12-2020, 06:14 PM Parent: #4
هؤلاء هم المجرمين الحقيقيين بما فيهم قحت
Post: #6 Title: Re: الخرطوم تشهد تصعيد في معظم المناطق andquot;تس Author: Asim Ali Date: 11-12-2020, 06:28 PM Parent: #3
سلام عليكم ياعارف انصح تعمل ليك تويتر او تفعل لو عندك حساب فيهو اصلا لانو اسرع فى فى الاخبار . فى فيديوهات لموضوع الصعيد زى ماذكرت لكن عيب الفيديزهات بركز على اللساتك المحروقه مابديك فكره عن حجم المشاركه عن المشاركين حبر برضو عن اعتقالات فى مدنى وحاله استعداد فى الشرطه بورتسودان فيها حركه لكن اعتقد انها بتاعت زواحف ظاهر فيها شفع رافع بوسترات لكن برضو فى قصور مابيوضح اى شى تخليك متشكك لانو الخبر ناقص مافيهو تفاصيل تدعم او تخليك تتابع الخبر وتتحرى عنو. بالجد نشطاء الوسائط محتاجين توعيه فى الجانب دا . لاشك البلد بتغلى لاسباب مختلفه وجع الحاله العايشنها الناس والعثور على مقبرخه مفقودى الاعتصام وهنا برضو شايف خبر عن توقيع ميثاق شرف بين تجمع اسر الشهداء ولجان المقاومه حتى الكيزان ما اظنهم قاعدين ساى جارنا كوز الضهر برضو خلى عربيتو وطلع فى عربيه جاتو (نظام مابتعرف اللمه فيها منو حسب العربات الواقفه قدام مكان الاجتماع . غايتو بالنسبه اى شىء متوقع وربنا يلطف انا اليومين مركز مع كورونا حايمه فى الناس وخايف تلم فينى تكمل فهم الواحد
Post: #7 Title: Re: الخرطوم تشهد تصعيد في معظم المناطق andquot;تس Author: Asim Ali Date: 11-12-2020, 06:37 PM Parent: #6
خبر لاقانى واكدو لى ورودو على صفحه داليا الطاهر . القبض على اسحق فضل الله . فى زول عندو اضافات ؟
Post: #8 Title: Re: الخرطوم تشهد تصعيد في معظم المناطق andquot;تس Author: Arif Nashed Date: 11-12-2020, 06:52 PM Parent: #7
Quote: فى فيديوهات لموضوع التصعيد زى ماذكرت لكن عيب الفيديوهات بركز على اللساتك المحروقه مابديك فكره عن حجم المشاركه عن المشاركين خبر برضو عن اعتقالات فى مدنى وحاله استعداد فى الشرطه بورتسودان فيها حركه لكن اعتقد انها بتاعت زواحف ظاهر فيها شفع رافع بوسترات لكن برضو فى قصور مابيوضح اى شى تخليك متشكك لانو الخبر ناقص مافيهو تفاصيل تدعم او تخليك تتابع الخبر وتتحرى عنو. بالجد نشطاء الوسائط محتاجين توعيه فى الجانب دا . لاشك البلد بتغلى لاسباب مختلفه وجع الحاله العايشنها الناس والعثور على مقبرة مفقودى الاعتصام وهنا برضو شايف خبر عن توقيع ميثاق شرف بين تجمع اسر الشهداء ولجان المقاومه حتى الكيزان ما اظنهم قاعدين ساى جارنا كوز الضهر برضو خلى عربيتو وطلع فى عربيه جاتو (نظام مابتعرف اللمه فيها منو حسب العربات الواقفه قدام مكان الاجتماع . غايتو بالنسبه اى شىء متوقع وربنا يلطف انا اليومين مركز مع كورونا حايمه فى الناس وخايف تلم فينى تكمل فهم الواحد
شكرا اخوي عاصم علي المعلومات التي أوردتها فأنتم أقرب لموقع الأحداث لكن ما يثير حيرتي لماذا تم الكشف عن موقع المقبرة في هذا التوقيت وما الهدف وراء ذلك وما الجهة التي كشفت عن موقع المقبرة وهل هناك صلة للجنة أديب بالأمر؟.
Post: #9 Title: Re: الخرطوم تشهد تصعيد في معظم المناطق andquot;تس Author: محمد البشرى الخضر Date: 11-12-2020, 07:14 PM Parent: #8
الجهة الكشفت هي اللجنة المكلفة بالتحقيق في موضوع المفقودين ودا شي طبيعي يتابعوا اي معلومة تجيهم او دليل له صلة بالقضية التوقيت لو استبعدنا نظرية المؤامرة ح تلقاه عادي باعتباره اللجنة بتعمل ابديت للتطورات و اللحظة الكشفوا فيها المقبرة اعلنوا زي ما عملت اللجنة المكلفة بقضية ضباط رمضان اول ما وصلت للمقبرة المشتبه دفنهم فيها - في المرخيات برضو - اعلنت عن ذلك أما لو عايز نزرية مؤامرة ندّيك - المافي ى شنو يا قول قيقا طيب واحد: كباشي شم ريحة اباطه و نفش ريشه فا المطلوب تحجيمه وه دائما اول اسم مرتبط بموضوع فض الاعتصام اتنين: بعد سقوط ترمب و مجيئ بايدن الافتراضا كديمقراطي يخدم خة اوباما القديمة الخاصة بالاخوان المسلمين يبدو ان الكيزان في الجيش عايزين يقلبوا على اللجنة الامنية بعد طول سكوت و تحالف مصالح كفى ولا ازيدك, الخرمجة رااااقدة ولا تكلف شي, خت في راسك نظرية مؤامرة و اديها و ليّس ليّس بطلع كويّس
Post: #10 Title: Re: الخرطوم تشهد تصعيد في معظم المناطق andquot;تس Author: Arif Nashed Date: 11-12-2020, 08:39 PM
ود البشري تحياتي. اطلعت علي بيان النيابة العامة في بوست الاخ معاوية حسين كما كتب المعلومة التالية. كتب التالي.
Quote: كتب الشاعر محمد الحسن ابنعوف يوم 4-علي صفحته بالفيس
جثمامين كتيرة جدا في داخلية الزهراء في طريقها بعد قليل لدفنها بالمرخيات #كاكي_اخضر
بعد الرجوع لحساب ابنعوف في الفيس فقد كتب ايضا في نفس اليوم
دفنت الجثامين اليوم شمال الجيل الزرق المريخيات
لماذا استغرق الكشف عن هذه المقبرة كل هذا الوقت مع توفر هذه المعلومات البيان الذي اذاعه الكباشي يدين كل المذكورين وهو دليل إدانة واضح. أما ما يحدث الآن فهو نتاج طبيعي ورد فعل لشناعة الجريمة المرتكبة في حق هؤلاء الشهداء وذويهم.
Post: #11 Title: Re: الخرطوم تشهد تصعيد في معظم المناطق andquot;تس Author: Arif Nashed Date: 11-12-2020, 08:49 PM Parent: #10
وصلني فيديو في الواتس يشير الي وجود مجموعة من المتظاهرين في حي المهندسين ويحملون يافطة مكتوب عليها (تشييع حكومة حمدوك الي مثواها الاخير)