كان السودان حكامه أمثال هذا الرجل العظيم بوث ديو 🙏🙏

07:10 AM November, 01 2020

سودانيز اون لاين
محمد المسلمي-السودان
مكتبتى
رابط مختصر

يا استاذ محمد صالح لقد أثرت فيني الشجون وخليتني استدعي الذكريات مع ذلك الجيل الفريد في قصة لم اسمعها من أحد ولكن كنت طرفاً فيها.
تقريباً سنة 1977/78
كنت موظف في الإدارة المركزية في قسم الحسابات.
زارنا في المكتب رجل جنوبي كبير السن يرتدي البدلة الكاملة ويتوكأ علي عصا ابنوس أنيقة ويبدو عليه الوقار والرزانه وقد عرفنا أنه السيد (بوث ديو) الذي سمعنا عنه كثيراً ولكن لم يقابله أي واحد منا من قبل. رحبنا به واجلسناه واحترمناه وضيفناه بأقصى ما نستطيع وهو زجاجة بيبسي كولا وكباية شاي، وكانت تكلفتها كلها 3 قروش ونص (بالقديم طبعاً).
بعد أن جلس وقبل أن يشرب البيبسي قال لنا .. والله أنا جايي وخايف لكن بمقابلتكم دي ريحتوني وطمنتوني .. قلنا ليهو انت رمز وطني واحترامك وخدمتك واجب علينا .. اتفضل عندك شنو قال كهربة البيت مقطوعة من أمس ولو سمحتوا ممكن أحكي ليكم حكاية البيت قبل حكاية الكهربه.
طبعاً أنا عندي بيت في الجنوب و لما ظروف العمل جابتني الخرطوم سكنت في بيت حكومي لكن رغم ذلك الزعيم اسماعيل الازهري أصر علي أن أقدم في خطة إسكانية وبتوصيه منه حصلت علي قطعة أرض والقطعة دي قاعدة أرض فاضية وكل القطع الحولها اتبنت وهي قاعده فاضية لحدي ما ناس الحي عملوها كوشة لأني ما عندي قروش ابنيها رغم إني تقلدت منصب وزير أشغال في أربعة حكومات. كل حكومة بحجزوا وزارة الأشغال لبوث ديو وساكن في بيت الحكومه وقطعتي قاعده كوشة
لحدي ما ربنا سهل لولدي (وندر) سافر أمريكا كلاعب كرة سله محترف ومشكور وندر ولدي رسل الدولارات وبعد داك نظفتها وبنيتها وانا علي أعتاب المعاش ولما نزلت المعاش سكنت فيها.
هسي الكهربه مقطوعة من البيت والحقيقة لي مده ما دفعت وعلي متأخرات حوالي 60 جنيه وجيت تشوفوا لي حل.
قلنا ليه انت محظوظ قال أنا عارف إني محظوظ، لو ما محظوظ ما كان لقيت ناس قعدوني تحت المكيف وببسي وشاي واحترام. قلنا ليهو قبل اسبوع عملوا نظام تسهل سداد المتاخرات، حنقسط ليك المبلغ ل 12 شهر
الآن تدفع القسط الأول 5 جنيه زائد 50 قرش رسوم إعادة تيار، يعني حالياً مطلوب منك خمسه جنيه ونص وترجع لك الكهربه وتسدد باقي الأقساط شهريا.
قال والله انتو أولاد حلال
وقلنا ليه الإجراء دا مطبق ليه اسبوع ولأي زول بس الناس ما عارفة رغم إننا اعلناه في الجريدة.
ادانا 6 جنيه سددنا 5 جنيه ونص ورجعنا ليه خمسين قرش ووصينا يرجعوا ليه التيار في ذلك اليوم.
قال والله من أمس افتش لي زول يسلفني 60 جنيه وبعد اسبوع بصل تحويل وندر ولدي وبعد تعب لقيت واحد سلفني 25 جنيه وجيت قلت لو لقيت ناس اكرموني بدفع نص المبلغ والنص الباقي آخر الشهر الجاي.
هسي أنا أمشي اديهو 15 جنيه واقول ليهو بعد يصل التحويل من وندر اديك الباقي والأربعة جنيه ونص ازيدهم لمصاريف للبيت لغاية يصل التحويل.

شوف بالله الناس دي كانت نظيفة كيف ..



——
منقول

حبيبنا المسلمي أبونسب .. مسكاقمي ..
يا سلام على هذا الانسان النموذجي .. جيل لن يعوض
نزاهة وضمير وانسانية
لا يوجد ناس بهذا الضمير والمثالية هذه الايام

سرد جميل .. والرحمة لعمنا بوث ديو

تحياتي الحبيب المسلمي

ودالمسلمي محمد
سلام عودا حميد
اخبارك والاهل الحمد لله انك طيب
تحياتي لكل الاهل

صديقي الغالي لعلك بخير والشوق كميات

حبيبنا ابوالنسب لعلك والأسرة بخير الجيل السابق لايعوض وتركوا سيرة طيبة وتاريخ خالد

بقلم شوقى بدرى

الاخ محمد المسلمي.

بوث ديو كان صديق شخصي للوالد رحمة الله عليهم، والمنزل الذي يتحدث عنه هذا هو بمنطقة الخرطوم 2 بالقرب من مدرسة النيلين التجارية ومدرسة دار النعيم الثانوية قبل أن تصير مركز لحزب الجبهة الاسلامية القومية.
بوث ديو من أبنائه وندر بوث ديو كان أحد نجوم كرة السلة السودانية وحقق مع الفريق القومي السوداني البطولة العربية التي أقيمت في دولة الكويت عام 1970، كان في أمريكا لفترة ومن بعدها أنتقل الى دولة الإمارات وتوفى قبل حوالي 9 سنوات، شنقيطي بوث ديو كان ضابط شرطة في الخرطوم قبل الإنفصال، بول بوث ديو موجود بولاية تكساس.

فى الفتره ديك (نهايه السبعينات كان عندو اولاد ساكنين برى اللاماب واحد منهم كان دفعتى (كمال بوث ديو) فى مدرسه برى اللاماب الابتدائيه

اهلا اخونا محمد المسلمي
وحسرتي على الجنوب الذي ذهب جنوبا

الاخ. دينق سلامات ولعلك بخير

Quote: بوث ديو كان صديق شخصي للوالد رحمة الله عليهم، والمنزل الذي يتحدث عنه هذا هو بمنطقة الخرطوم 2 بالقرب من مدرسة النيلين التجارية ومدرسة دار النعيم الثانوية قبل أن تصير مركز لحزب الجبهة الاسلامية القومية. بوث ديو من أبنائه وندر بوث ديو كان أحد نجوم كرة السلة السودانية وحقق مع الفريق القومي السوداني البطولة العربية التي أقيمت في دولة الكويت عام 1970، كان في أمريكا لفترة ومن بعدها أنتقل الى دولة الإمارات وتوفى قبل حوالي 9 سنوات، شنقيطي بوث ديو كان ضابط شرطة في الخرطوم قبل الإنفصال، بول بوث ديو موجود بولاية تكساس.

نحن عايزين الان حكام ومسؤلين مثل هؤلاء في الأخلاق والتجرد والنزاهة. ولو وحدنا مثلهم لما كنا في هذه المرحلة المتأخرة جدا

الاستاذ Hassan Farahشاكر مرورك ومشاركتك

حياك الله اخونا المسلمي.
وعودآ حميدآ.

بالنسبة للجنوبيين أتذكر اسرة الراحل (جيمس اجيت أوول).
اظنه كان محافظ مدينة (جوبا)..تخيل هذا الرجل حتى توفاه الله لم يمتلك بيت يأويه هو واسرته.
اسرته سكنت جنبنا (حيطة بالحيطة) وتعلمنا منهم لغة الدينكا وكيف نتخاطب بها مع الدينكا.
اسرة كانت في غاية الذوق ..حتى اننا كنا نطلق على والدتهم (مما).
تفرقت بنا سبل الحياة ولكن بقيت الذكرى الجميلة.

كسرة: إن شاء الله ألقى لي وقت لأنو عندي نية أكتب عن فريق (قورماهيا) الجنوب سوداني
وذكرياتي مع تلك الوجوه الابنوسية الجميلة.
فريق مفروض الناس تعرف عنه الكثير لأنو كان يلم كل القبائل الجنوبية .

تحياتي