الاتحاد التونسي يرفض اعتماد تسجيل لاعب سوداني بحجة أنه غير عربي.

07:39 PM October, 23 2020

سودانيز اون لاين
محمد نور عودو-
مكتبتى
رابط مختصر

الاتحاد التونسي يرفض اعتماد تسجيل لاعب سوداني بحجة أنه غير عربي

22 أكتوبر، 2020
سودان فيرست – صباح المصباح

رفض الاتحاد التونسي لكرة القدم، اعتماد تسجيل اللاعب السوداني شهاب الدين صديق، وأبلغ الاتحاد التونسي، نادي تطاوين برفض السستم للاعب.
وبرر الاتحاد أن شهاب لاعب سوداني، والسودان لا يعد بلداً عربياً، وينتمي للقارة الأفريقية، وطالب نادي تطاوين باعتماده في خانة الأجانب.
وأشار نائب رئيس نادي تطاوين التونسي بأنهم قاموا بتسجيل اللاعب في الكشوفات على أساس أنه عربي، ولكنهم تفاجأوا بخطوة الاتحاد في عدم معاملة السودانيين أسوة بلاعبي الجزائر ومصر وليبيا.
وطرح النادي على اللاعب تسجيله بنادٍ هناك حتي موعد التسجيلات القادمة، نسبة لعدم وجود خانة شاغرة في الأجانب.
يذكر أن نادي تطاوين، كان قد تعاقد مع نجم المنتخب السوداني والشرطة القضارف لمدة ثلاثة مواسم، هذا وسيعود اللاعب للسودان في الثامن والعشرين من الشهر الجاري..
رابط المصدر.
http://sudanfirst.com/2020/10/15820/http://sudanfirst.com/2020/10/15820/
.

اها يا أهل دي يفسروها كيف ؟؟

حبيبا محمد تحياتي
شيء مؤسف
ونحن ما زلنا نردد حزب البعث العربي
والناصرية والوحدة العربية
بهذا البوست اقنعتني بأن نطبع مع اسرائيل وحتى ابليس
شيء مؤسف ..

نستاهل نحن

لو سمحت اشرح لي شوية ما علاقة العروبة بالتسجيل

سلامات أستاذنا وعمنا الأستاذ علي عبدالوهاب عثمان حكيم المنبر.
خبر مؤسف حقا.
بالنسبة لسؤالك علاقة العروبة بالتسجيل .
انا زاتي نفس سؤالك في بداية البوست.
وامل ان نلقي إجابة
تحياتي

سلام محمد نور

أكيد الخبر مصاغ غلط

أتحادات كرة القدم للدول العربية لشمال أفريقيا (مصر، ليبيا، تونس، الجزائر والمغرب)
موقعة إتفاقية إعتبار أن أى لاعب يحمل جنسية أيأ منها يسجل فى إتحاداتها كلاعب محلى
لا يحسب فى عدد الخانات المحدودة للأجانب.

دا حصل فى عهد شداد (الحالى)
لو كان دخل معاهم فى الإتفاقية كان بتكون فى فايدة مزدوجة. وهى الفرق السودانية
ستستفيد من لاعبى شمال أفريقيا المهرة، وأنها فرصة ستتيح للاعبين سودانيين
يقيدوا كمحليين بتلك الدول، لأنه من الصعب مستوياتهم تؤهلهم أن يشغلوا
خانة أجنبى وهى خانات محدودة يتنافس فيها مع اللاعبين الأفارقة. كانت
ستكون فرصة لتحسين المستوى. زمان قبل الإحتراف بمعناه وقوانينه الحالية
كانوا اللاعبين السودانيين يجدون فرص للعب بمصر.

إستفاد نادى الزمالك من هذا القرا ر، كان فى فترة قريبة فى كشف لاعبيه 6 لاعبين
من شمال أفؤيقيا 2 تونسىين و4 مغاربة، إضافة للاعبين الأجانب. الآن عنده
1 تونسى و2 مغاربة .. دا غير الأفارقة. والأسبوع الفات بن شرقى المغربى
مهاجم الزمالك سجل هدف الفوز فى الرجاء المغربى بالمغرب فى نصف نهائى
بطولة الأندية الأبطال.

المفارققة فى السودان اللاعبين الذين يحملون جنسية جنوب السودان يعتبرون أجانب!
كان يفترض إستثنائهم والسماح تسجيلهم فى خانات المحليين ولو بتحديد سقف عددى
لكل نادى.

سلامات نادر
صحيح في اتفاقيات بين الدول الذكرتكم ديل في مجالات كثيرة تحت مسمي دول المغرب العربي واظن مصر ما داخلة في اتحاد دول المغرب العربي لكن عندها اتفاقيات مع هذه الدول.
من خلال تعاملي و علاقاتي مع ناس دول المغرب بما فيهم الموروتانيين تصنيفهم للسودان .دولة إفريقية.

وما يطبعوا ........!؟

سلامات ولدابوك شيخ العرب بريمة.
شنو يا اخي لا سلام لا كلام جدعتا لينا الصورة ومرقت طوالي .وكانك داير تقول لينا
شوفو زولكم عربي؟
تحياتي

سلامات الأخت الفاضلة أميرا حسين .
بتخيل برضو ما بحلنا.
الا نعمل ليهم حي في امدرمان ونسموهو حي التوانسة.

سلامات يا المستنير ابو لمبة
Abubakr Ahmed Abbas

سلامات وان شاء الله كويس انت والاسرة

Quote: سلامات نادر صحيح في اتفاقيات بين الدول الذكرتكم ديل في مجالات كثيرة تحت مسمي دول المغرب العربي واظن مصر ما داخلة في اتحاد دول المغرب العربي لكن عندها اتفاقيات مع هذه الدول. من خلال تعاملي و علاقاتي مع ناس دول المغرب بما فيهم الموروتانيين تصنيفهم للسودان .دولة إفريقية.

محمد نور كتلة المغرب العربى دى شى تانى .. أنا ذكرت ليك إتفاقية رياضية شملت دول شمال أفريقيا فقط وهى عربية
رغم أنى فى مداخلتى الفاتت ذكرت معلومة كنت أظنها إضافة .. عن نادى الزمالك كان فى سجل لاعبيه 6 لاعبين
من توتس والمغرب و لكن دى بتأكد المعلومة بتاعة من هم المعتبرين محليين بإتحادات كرة قدم هذه الدول

نعم يصنفونا أفارقة .. والصحبح عرب أفارقة .. وفى الكورة بالذات معلقينهم الرياضين فى البطولات القارية
للدول والأندية عنجما يعلقوا فيما يقولون من إحصاء لمواقف المنتخابات أو الأندية العربية من ضمنها السودان
فما عندهم أى لبس بأن السودان يلد عربى. فلا يمكن إتحاد الكرة التونسى يخطئ فى قول اللاعب دا ما عربى،
لأن لوائحهم ما فيها تسجيل لاعبين عرب كمحليين بإستثناء الدول المذكورة. وثانيا لأنهم عارفين السودان دولة
عربية وفى جامعة الدول العربية. ما تصادفهم فى الشارع هى حالات لا تبنى علييها.

سلام أ. محمد نور

ليت اللاعب لجأ للسفارة السودانية حتى تخاطب الإتحاد لمعرفة السبب؟

التصنيف إلى عربي و أجنبي يتعلق بعضوية الدول في الجامعة العربية

و لا يتم إعتماداً على الملامح و لون البشرة. يوجد توانسة يشبهوا السودانيين.

تحياتي نور و الزملاء
الموقع و الصحفي الصاغ الخبر وقعوا في خطا - متعمد ام لا الله اعلم - لكنه حقق الاثارة المطلوبة

Quote: السنتر تكشف اسباب رفض تسجيل السوداني شهاب الدين لنادي تونسى كتبت :داراالنعيم عابدين تناولت بعض وسائل الإعلام خبر رفض الاتحاد التونسي تسجيل اللاعب شهاب الدين صديق في نادي اتحاد تطاوين التونسى وذكرت بعض المواقع أن الاتحادالتونسي برر انه (غير عربي وينتمي للقارة الأفريقية) ، وقعت المواقع في خطأ عند ذكر سبب رفض الاتحاد تسجيل اللاعب ، وهذا يؤكد أنه بعض من وسائل الاعلام لا تعرف أن تونس بلد عربي وتقع في قارة أفريقيا مثلها مثل السودان ، فكيف يرفض الاتحاد التونسي تسجيل اللاعب. سبب رفض الاتحاد هو أن اي لاعب لا ينتمي لدولة من شمال أفريقيا يسجل في خانة الأجانب والسودان ليس من دول شمال أفريقيا، وكان الاتحاد التونسي قد أكد أن أي لاعب من شمال أفريقيا يعامل على أساس أنه لاعب محلي ، وليس اجنبي ، مثل اللاعبين الليبيين والمصريين والجزائريين والمغربيين وهذه اتفاقية دول شمال أفريقيا.

نحن ذاتنا ما بنتشرف نكون عرب..
والخاحة الغريبة لهسع في سودانيين بيقولوا انهم ينتمون لحزب
البعث العربي والحزب الناصري وايه ما عارفة القومية العربية...
مفروض السودان ينسحب اليوم قبل الغد من جامعة الدول العربية
ويكتفي فقط بعضوية الاتحاد الافريقي.....
يا ربي بريمة العربي قرا البوست ده!!؟؟؟

والحاجة الغريبة ان التونسيين انفسهم لا يجيدون الحديث باللغة العربية وكلامهم ما مفهوم لانهم بيلخبطوا العربي مع الفرنسي لان ثقافتهم فرنسية وليست عربية، والسودانيين بيتكلموا عربي احسن منهم على الرغم من اننا ما عرب ،،،وبنتعلم اللغة العربية في المدارس.

لا خبر محزن لا خبر مُخل عين الحقيقة وبدون تبريرات دول شمال إفريقيا ... إلخ ياريت السودانيين
يعترفوا قبل غيرهم إنهم ما عرب .. ويشوف حاجة تانية يتعلقوا فيها.

كلامهم صاح السودان ما دولة عربية اطلاقا
حشرو ناس معقدين في جامعة الدول العربية من 1957 حاصل فارغ عشان يقعد تحت جذم اسيادهم المصريين لحدي هسة 2020
السودانيين كوشيين ذى دول الايقاد دي كلها

سلامات عادل امين
اها والدبارة كيف؟

طُظظظظظظظظااااااااااتو ووو
● سلام مربع لأستاذي الحبيب ود عودو ،
و طبعن (طٌظ) دي حاش لله تكون ليك إنتا ؛
و إنما أتشرف إني لأول مرة لقيت لي مناسابة
أتداخل معاك على صفحاتك. بس شكل الخبر ، كما
تفضل أخونا نادر الفضلي ، فيه شبهة خلل صياغة
أو فبركة من مصدره . و لكن حتى على فرضية
صحته ، فطُظ ثم طُظ في بني عُربان و أصبعنا
الكبير دا فيهم بعبوص من هنا لي حدهم .

●لكن بالله سؤال: شنو يعني يرفضو تسجيلو
عشان طاعنين في عروبتو؟ و ما دخلها بالرياصة
ثم من متين العرب بقو سلعة رائجة لاحتراف الكورة؟
● ثم سؤال تاني أبيخ: لو كان دا صمويل إيتو و لا كان
الكمروني، دروقبا الأفواري، رشيد يكن و أموكاشي الفلاتة
موش كان التوانسة حيلحسو (...) عشان بس يجوهم؟!
● ياها و الله بس المضحكات المبكيات و ياهو بقى هوان
الزلابية لامن يبزِّغ فوقل حثالة الضبان تبع الليان!!

السبب يا ود الاصيل نحن
ساكتين لي ناس محسوبين علي السودان والسودانيين قاعدين في راسنا لحدي هسة ويلهثو ورا العرب والدول الناهبة للسودان ومصر ام الدنيا المتلازمة الكرونيك
شوف البعثي ده شارييي شعارو قدر شنو
واللع كويس يا ود الاصيل
بقيت ذى عمك جقود تشوت بوذ
ديل ما بحسو بالهوان لان العبودية متاصلة فيهم وقرو في المركز واتعلمو السياسة والت############ة كمان وضيعو كل السودان والسودانيين
https://top4top.io/
واللعوير القال اسرائيل احسن من العرب
https://top4top.io/
ديل شعب الله المختار شايفين العرب اولاد السرية هاجر انت شنو معاهم
ديل الفلاشا قوم موسي الاصليين ما معترفين بيهم
العرب واسرائيل
خرية وقسموها بخيت
طظ فيهم الاثنين
سوداني بي
كوشي وافتخر
جنوب السودان وبس التطبيع كده ولي بلاش

Quote: والله كويس يا ود الاصيل بقيت ذى عمك جقود تشوت بوذ ديل ما بحسو بالهوان لان العبودية متاصلة فيهم وقرو في المركز واتعلمو السياسة والت############ة كمان وضيعو كل السودان والسودانيين ▪والعوير القال اسرائيل احسن من العرب ▪ديل شعب الله المختار شايفين العرب اولاد السرية هاجر انت شنو معاهم ديل الفلاشا قوم موسي الاصليين ما معترفين بيهم العرب واسرائيل خرية وقسموها بخيت طظ فيهم الاثنين

● عاجبني فيك يا عمو و سارِّي بالي
إنك بتيمي الأشياء بمسمياتها تمامن. تقولا
للاعور في ود عينو. و صدقني مهما تبلغ بينا
خشونة اللفظ و حموضة العبارة ، فمتل كتاباتك
و محاضراتك الصوتية النادرة دي حتفضل متل
غناء قريبي ود اللمين؛ خليهم سادربن في غيهم
كدا و مصيرم متى ما برجعو ليها حيعرفو حاحة.
جاييم بهناك نتونس بي رواقة. بس هسي خليك مع
مناحة قريبي الشيخ دفع الله أحمد فريجون رحمه الله
من منا من لم بسمع لمناحة غرارة العبوس بصوت الفنان الكبير
محمد الامين و اختلف الناس فى مؤلفها. فبعضهم نسبها لامرأة
ترسى أباها و لكن الحقيقة مؤلفها هو جدنا الشيخ دفع الله أحمد
فريجون قولاً واحداً ، من قرية زهراء ريفي طابت و مناسبة نظم
القصيدة أنه ارتجلها و هو متؤكئ على عصاته في لحظة مواراة
جثمان الشيخ عبدالباقى الشيخ حمد النيل أزرق طيبة الثرى.

♧ غرارة العبوس دار الكمال ونقاص دوبا
حليل أبويا اللي العلوم درَّاس
فى يوم الخميس خبرا شهير انشاع
فى الأربع قبل أزرق طويل الباع
تبكيك الخلوق بأغزر الدمَّاع
كم حليت مضيق وللبطون شُبَّاع

♡ ياوسيد العلوم الليلة فُرقك حار
خليت القد كبير للبعيد و الجار
طلابك تألف غير البجوك زُوَّار
ليك خمسين سنة مافت تُكْل النار
شاحدين الكريم سيد النبى المختار
حمد النيل يعيش و يحي لينا الدار

● فاقداك الجوامع الإتبنت ضانقيل
لدراسة العلم و كلمة التهليل
راكب الصافينات خيلاً بجن بالليل
ياود الطريفى وجدك المانجيل

♤ كملت العمر وفنيتو فى الطاعات
ياقوت الخلوق فى المهلة والضيقات
مئتين من محمد درسوا فى الخلوات
شاحدين الكريم اتباركوا الجنيات

☆ شكرك ماحصل لعلماء او دُرَّاس
سيد نخلاً قديم والجود بقالك ساس
بالرز والقمح والشاى غير قياس
لا تتعجبوا! دا الجدو شافع الناس

◇ يا ود الطريفى البى الكرم موصوف
أبو قلبا صميم والله خاتى الخوف
بتصادم المغارة الخيولا ألوف
كم حليت مضيق وكم نقذ ملهوف
ود أحمد عِبيدكم ناظم الأشعار
منسوب يالطريفى ليكم وليد وحوار
ختوا البال عليهو يا الكبار وصغار
قولوا مننا واكسوهو بالانوار !!

Quote: ◇ يا ود الطريفى البى الكرم موصوف أبو قلبا صميم والله خاتى الخوف بتصادم المغارة الخيولا ألوف كم حليت مضيق وكم نقذ ملهوف ود أحمد عِبيدكم ناظم الأشعار منسوب يالطريفى ليكم وليد وحوار ختوا البال عليهو يا الكبار وصغار قولوا مننا واكسوهو بالانوار !!

لو طبعنا مع الله ورجعنا لي هويتنا الدينية والسياسية الطبيعية والسستم الخلو الانجليز وزحينا من العرب قبل يوحو مننا زي اللاعب المسكين ده
بنرحع لي زمن الرجال الرجال ده زول بتطاول علينا مافي

ويا النور عودو
الدبارة مشروحة في 10000 بوست
نزح من العرب قبل يزحو مننا
ونرجع لي اللجنوب
وذى ما قال الفيتوري
كان جنوبيا هوانا
مرة جابو جون قرنق في التلفزيون قال القصة دي
كنا في امريكا دورة عسكرية
مع عرب وافرقيين ونحن السودانيين كنا اثنين بس
لمن جا الامريكي يسجل بالاثنيات قال العرب بي جاي والافارقة بي جاي
جون قرنق قال لي الضابط الشمالي قاعد محلك بس
جا الامريكي قال ليهم انتوشنو
قال ليه جون قرنق سودانيين
الامريكي صنفهم طوالي سودانيين
شفت مشكلتنا كيف
وصلت حتي الكورة
المشكلة شنو نكون سودانيين بس ؟؟

اوووو مين اديبنا واستاذنا الأصيل ود الأصيل.
يا اخي برشا سلامات بالتونسي وراك مزيان يااخويا بالتونسي.
طاعنين في عروبتو وين يا قريبك؟
الخبر قال لانو ما عربي عديل كدا. وقفلوا الموضوع بالضبة والمفتاح .لأي طعون

سلامات ميرغني تيتاوي
هو الخبر من ناحية محزن محزن لسودانيين العروبيين اكثر من العرب وصدمة بالنسبة ليهم
لكن مين البقنع الديك؟
تحياتي

سلامات بتنا امتثال
عمنا بريمة ادم شيخ العرب جاء قدل فوق البوست خاتي الطاقية الكاو بوي بالجنبة وجدعنا لينا صورة اللاعب ومرق بي عدلوا.
تحياتي

سلامات باشمهندس
محمد البشري الخضر
صحيح الخبر عمل اثارة ويتوثق في التاريخ .
انا غايتو من امس قاعد افتش لأي توضيح أو تصريح من الاتحاد التونسي بخصوص الموضوع دا ما لاقاني للان.
ناس السنتر ديل الكلام دا من عندهم ولا من الاتحاد التونسي أو من أي جهة تونسية انا ما عارف.
ما يكون زي قصة اغلطوا يا الاحباب نجيكم نحن بالاعذار.
تحياتي

سلامات دكتورة نعمات
اللاعب قالوا راجع السودان يوم 28 أكتوبر علي حسب الخبر

سلامات مجددا نادر
ما مختلفين يا نادر في موضوع اتفاقيات ما يسمونا أنفسهم بدول المغرب العربي لو لاحظتا انا في مداخلتي قلتا في بين هذه الدول اتفاقيات في عدة مجالات منها الاقتصادية والتنقل والأمنية والرياضية والخ.لكن ما متاكد هل الاتفاقيات دي شاملة دولة مصر ولا لا ؟لان مصر ما في دول اتحاد المغرب العربي
يا تري اذا كان اللاعب دا سعودي أو يمني أو أردني ح يواجه نفس مصير اللاعب السوداني دا؟.

كدي يا ناس فهمونا حاجة
إنتوا زعلانين عشان الخبر غير صحيح
ولا عشان التوانسة قالوا لي ولدنا إنت ما عربي؟

سلامات عبدالعظيم
انا غايتو ما زعلان

السيد الطيب جلال الطيب

المنسق الإعلامي لفريق الشرطة القضارف

رقم الهاتف : 00249912862157

كلمت السيد الطيب و أخبرني( بأن الناس فهمت الموضوع غلط)،

الموضوع ان دول المغرب و مصر بينهم إتفاق يُعاملون على أنهم

مواطنين و كل اللاعبين الآخرين يعتبروا أجانب. و لم تتوفر خانة في

صفوف الأجانب.

السيد الطيب قال أنه يرحب بأي مكالمات للإستفسار.

اللاعبين التوانسه بتسجلو في خانات اللاعبين كمحترفين في الدوري السوداني ،، البخلي اللاعب السوداني يتسجل في خانات غير المحترفين في الدوري التونسي شنو ؟

سلام يا شباب
هو الموضوع هنا شنو؟
هل موضوع هوية وما إذا كان السوداني عربي من ناحية عرق وثقافة؟
أم هل السوداني عربي من ناحية تعريف الشخص العربي في قوانين الدول المنضمة لجامعة الدول العربية؟
من ناحية العرق، السودان دا ما فيهو زول عربي إلا بريمة😜.
ورغم ذلك السودان دولة عربية بحكم إنتمائه لجامعة الدول العربية.
وبالتالي لا يستطيع الاتحاد التونسي لكرة القدم رفض تسجيل اللاعب السوداني شهاب الدين صديق بحجة أنه سوداني والسودان لا يعد بلداً عربياً.
فالإتحاد التونسي يرجع في تعريفه للدول العربية للتعريف المستخدم في دولة تونس وهو كل الدول التي تنضوي في جامعة الدول العربية.
نادي تطاوين لن يقبل بمثل هذا التبرير من الإتحاد التونسي لكرة القدم ويمكنه التمسك باللاعب وسيجد الحق في ذلك من ناحية قانونية.
اللهم إذا كان اللاعب طلع ماسورة وقرار الإتحاد وقع لنادي تطاوين في جرح.

د. حافظ بشير جبت المفيد المختصر.

أقترح على حكومتنا الإنسحاب من الجامعة العربية و الإكتفاء بالإتحاد الأفريقي.

حتى نرتاح و نريِّح. و على كال حال المنطقة كلها ستصبح الشرق الأوسط الجديد!

قبل تلات سنوات تقريبا وقع لاعب المريخ السابق والهلال شرف شيبوب في خانات المحترفين في الدوري التونسي ،،

Quote: اوووو مين اديبنا واستاذنا الأصيل ود الأصيل. يا اخي برشا سلامات بالتونسي وراك مزيان يااخويا بالتونسي.طاعنين في عروبتو وين يا قريبك؟الخبر قال لانو ما عربي عديل كدا. وقفلوا الموضوع بالضبة والمفتاح .لأي طعون

● و تاني سلامات كوتارات لقريبي الحبيب ود عودو
و بصراحة، عندي مزاج كدا بس ما عارف ليه ، أناديك/
ود جار عودو !!؟ يمكن لأنو عندنا في ناس كمل نومك ،
ريفي أم صفقن عوراض ، محلية (حشرو عباس) ؛ بقى
ناس الجار عودو و (عوج الدرب) ديل رموز خرافية
لطغيان سمات المرجلة و المروءة و الكرم الحاتمي.
● يلا نجي تاني لفرضية صحة الخبر من عدمها، و بصرف
النظر عن ملابساته مهما كانت ؛ لأستأذنك برضو نجيب ليك
مقتبس مقولةٍ:نادرةٍ لعمنا جقود دافنشي ؛ و أظنها جاءت نقلاً
على لسان مالكوم إكس أو مارتن لوثر كنغ ؛ ماني متأكد منها
و هي : أنه لن يستطيع كائنٌ من كان ابن معفنة ، أن يركب على
فزرتك ، مالم تتبرع له بإرخاء مؤخرتك سلفاً".و أنا من هنا أثنيهم
رافعاً شعار" السن بالسن و العين بالعين و القدم بالقدم و الجروح
قِصاص"؛ و كان البادئ ألعن و أظرط. ثم تبن لهم جميعاً، و ثكلتهم
أمهاتهم و أخواتهم من الرضاعة و ربائبهم اللاتي في حجورهم.

غايتو يا عبد العظيم انا زعلت لمن مرارتي اتفقعت،،،هههههههههههه

Quote: يا تري اذا كان اللاعب دا سعودي أو يمني أو أردني ح يواجه نفس مصير اللاعب السوداني دا؟.

سلام صاحب البوست ..

سألتنى السؤال الفى المقتبس
نعم سعودى أو يمنى أو أردنى وكمان سورى، ولبنانى، عراقى، إمارتى، عمانى، بحرينىكلهم كانوا سيواجهوا نفس الموقف لهم خيار وحيد يسجلوا فى خانة (محترفين أجانب) وزى ما قال ليك الأخ معاوية .. اللاعب السوانى شيبوب قبل ثلاثة سنوات تسجل فى نادى بالإتحاد التونسى (محترف أجنبى)واللاعبين التوانسة عدد منهم تسجل بأندية بالإتحاد السودانى محترفين أجانب ..

Quote: وبالتالي لا يستطيع الاتحاد التونسي لكرة القدم رفض تسجيل اللاعب السوداني شهاب الدين صديق بحجة أنه سوداني والسودان لا يعد بلداً عربياً.

يا حافظ اللاعب رفض تسجيلو لانو ما بينتمي لمصر او الجزائر او المغرب بس كده . .
قصة عربي ولا ما عربي ما ليها دخل هنا . . ده اتفاق بين الاتحادات دي (الاربعة دول) انو لاعبيهم يتم معاملتهم معاملة اللاعب الوطني . .

قصة دولة عربية هذه الم يحسمها نتنياهو ؟
وكذلك ترامب
الحفل والاحتفال يجري علي اساس ان السودان ثالث دولة "عربية" تطبع
الناس تسمع الكلام بقي .... مصلحتووو اولاً
شايف الموقع ذاتو اسمو السودان اولاً ...اسم مشبوه طبعاً ...والتكتيك واضح ..
الموضوع يرتبط بصراع الهوية داخلياً ... فقد ...لوحظ ...بدون مجهود ..ان الغلبة
الغالبة من جماعة السودان ليس دولة عربية ...هم جماعة التطبيع ...ولكن التطبيع
جري واحتفل به علي اساس انه دولة عربية ...وهم لسه مواصلين ...حاجة كدا ...تيران الله في برسيمه

سلام عمر سعيد علي

Quote: يا حافظ اللاعب رفض تسجيلو لانو ما بينتمي لمصر او الجزائر او المغرب بس كده . . قصة عربي ولا ما عربي ما ليها دخل هنا . . ده اتفاق بين الاتحادات دي (الاربعة دول) انو لاعبيهم يتم معاملتهم معاملة اللاعب الوطني . .

هذا بالضبط ما قصدت أن أقوله.
أن الإتحاد التونسي لكرة القدم لا يمكن أن يكون قد رفض تسجيل اللاعب بحجة أنه غير عربي كما ورد في عنوان البوست.
ولابد أن هنالك سبب آخر او شروط أخرى يشترطها الإتحاد لتسجيل اللاعبين كلاعبين محليين ولا تتحقق في اللاعب السوداني.

سلام يا دكتورة نعمات

Quote: التصنيف إلى عربي و أجنبي يتعلق بعضوية الدول في الجامعة العربية و لا يتم إعتماداً على الملامح و لون البشرة. يوجد توانسة يشبهوا السودانيين.

وكذلك يا دكتورة أكثر من 36% من سكان دول المغرب العربي هم من الأمازيغ الذين لا ينتمون عرقياً إلى العرب
ولا يصنفون أنفسهم من ناحية إثنية على أنهم عرب.
ولكن رغم ذلك هم ينتمون إلى دول منضمة إلى جامعة الدول العربية وتصنف جنسياتهم وجوازات سفرهم على أنها صادرة من دولة عربية.

السؤال القديم/الجديد هل العروبة عرق أم ثقافة؟ وماهو المرجع لتصنيف فلان بأنه عربي أو غير ذلك؟