Post: #2
Title: Re: لكم خرطومكم ولي خرطوم
Author: أبوذر بابكر
Date: 10-23-2020, 12:30 PM
Parent: #1
مبني بمساحة أكبر من ملعب كرة القدم
امتداد طولي من الشرق للغرب والمحلات التجارية بتفتح على كل الجهات
مع مساحة داخلية مسقوفة على طريقة أسواق اسطنبول من الناحية الغربية
فى الزاوية الشمالية الغربية كان الصرح العالي وغالي
مكتبة النهضة السودانية- تأسست سنة 1937 - لصاحبها محمد عباس أبو الريش
وفي الزاوية الشمالية الشرقية كانت قهوة الزيبق العتيدة والعريقة
وحلواني حمدتو في منتصف الضلع الشمالي ويفتح على جامع الخرطوم الكبير
الحلويات من باسطة وكنافة وبسبوسة وغيرها على يدك اليمين وانت داخل
بإشراف العم عبد الرحيم محجوب
وقصاد المدخل مباشرة بتلقى محل الايسكريم
مستودعات ألومنيوم انيقة ونظيفة ومغروسة راسيا
وعمك سعيد بوجهه المتجهم طول السنة واقف وراها
وبعوض ليك التجهم وعدم الحضور الودود بطعم الايسكريم العجيب
بلونه الأبيض وهو معبا في الكؤوس المعدنية زى لوزة القطن
طويل الطعم والتيلة والنكهة
وب قرشين اتنين بس
عشرين مليم
تذوقنا وربنا واستمتعنا بكل أنواع وأشكال ونكهات الايسكريم في تلاتة قارات
لكن وايم الحق
ما ضقنا زي إيسكريم حمدتو
يا ليتنا عدنا
أو عادت الايام
|
Post: #3
Title: Re: لكم خرطومكم ولي خرطوم
Author: أبوذر بابكر
Date: 10-24-2020, 10:47 AM
Parent: #1
فول سلوى
عمنا عوض من ناس المحمية
باب صغير جدا ومدخل ضيق يمكن بعرض متر واحد
ممكن ما تلاحظ الباب لو اصلا ما كنت عارف انه هنا في باب
الباب وسط صف محلاتى القماش في صف مخازن البان جديد ومحلات خرسي
نفس الباب الصغير مع الممر الضيق
فجأة بقودك لعالم رحيب وواسع
طاولات مرصوصة وحركة دائبة ورائحة الأكل من كل نكهة ونوع
الفطور فيه كل الأصناف الشهية المعروفة
فول وعدس وكبدة وجقادق الخ
الغداء نفس الشي
بامية وفاصوليا وبطاطس وملوخية (كان اسمها شريفة الأيام ديك) مع كل اصناف واطباق اللحوم المعروفة
أما العشاء
فول بس
تاكل بس
تستمتع بس
فول بالزيت
فول بالجبنة
فول بالسمنة
فول بالوادي فول بالشنقيطي فول بالموردة وفول بالأربعين
ألا ليت أيام الأفول جديد
ودهرا تولى يا سلوى يعود
|
Post: #4
Title: Re: لكم خرطومكم ولي خرطوم
Author: أبوذر بابكر
Date: 10-25-2020, 05:50 AM
Parent: #1
مطعم الهلال
ملاصق مبنى شركة عبد المنعم محمد
في نفس صف شركة ابو العلاء - وكلاء مرسيدس
بفتح شرق على مبنى البنك الصناعي القديم ومكتب البوستة على اليمين
وميدان الامم المتحدة على الشمال
كل الوجبات السمحة وشهية ونضيفة موجودة
لكن السمك كان سيد الموقف
خصوصا في وجبة الفطور
كل انواع الأسماك واصنافها واشكالها
ظازجة يوميا
والأسعار في متناول كل زول وأي زول
كده كانت الخرطوم
وفرة وأمان وسلام وراحة وطمأنينة وسعة في الفرح والعيشة الهنية وندية
|
Post: #5
Title: Re: لكم خرطومكم ولي خرطوم
Author: Osman Musa
Date: 10-26-2020, 07:40 AM
Parent: #4
مطعم الأمريكيين
تتذكرو يا اب ذر ؟
غربو تلاجات الموز وشرقو بي محليين بنك النيلين
المطعم يفتح شمال .
كان يختلف من كل المطاعم في السودان . أظن صاحب المطعم خواجة.
كان تجلس يجيك جك الليمون والشوربة والتحابش.
الفجرية لابسين نفس لبس الجراحين في مستشفي همراسميس في لندن.
ورقة الحساب تجيك في مجلد في سرويس.
مطعم عجيب . مطعم متمدن .
تعال شوف الليلة الخبوب وكمونية الحمير في سودان ما بعد الإنقاذ .
|
Post: #6
Title: Re: لكم خرطومكم ولي خرطوم
Author: أبوذر بابكر
Date: 11-24-2023, 11:11 AM
Parent: #5
ليرحم الله الخالق روحك ويتولاها بعطفه ومحبته
يا عثمان بن موسى
وليصطفيك الله مع من يحب
وجدت ويا لحسرتي اليوم، اليوم فقط والله يا عثمان
وجدتك حاضرا هنا ولم انتبه طيلة السنوات التي خلت
وكأني على موعد بلقياك هنا كيما تينع الذكرى وتخضر اللحظات التي مضت بك وانقضت
فلتغفر لي غيابي بمثل ما احتفي أنا بغيابك يا صديقي
|
Post: #7
Title: Re: لكم خرطومكم ولي خرطوم
Author: أبوذر بابكر
Date: 11-24-2023, 11:16 AM
Parent: #5
مطعم الأمريكيين
صاحب المطعم ومؤسسه ما خواجه ولا أجنبي
بالعكس، هو واحد من أحفاد صاحب المكان الأول
والمكان المعني هو منطقة جامعة فاروق، وهو في الأصل موقع مسيد ومسجد الشيخ أحمد ارباب العقائد
بعد ما قطع الأزرق من توتي قصاد الخرطوم وبنى وأنشأ مسيده وخلوته ومسجده
صاحب ومؤسس مطعم الامريكيين هو خالنا الأمين أرباب
وهو من محس بري ومن احفاد ارباب العقائد
وتتداخل الأنساب وروابط الدم بين ناس توتي وبري المحس وبري الدرايسة
وتمتد وتصل منطقة البشاقرة غرب في شمال الجزيرة
وبرضو تتشابك وتتداخل مع الأهل في الجريف غرب وفي المقرن وفي القوز
|
|