باسطة سهير .. و الموت غرقاً في عسلها !!

كنت اخلف كراعي في اي مناسبة او اي زياره لي بيت سوداني يقدموا لي باسطة (مشروع باسطة سودانية)
و اقول و الله جميله جداً ( مجاملة ساي طبعاً )
و في سري اقول تجي وين دي لي باسطة عمك الطيب سيد مكي ..
بعد داك ادخل جواي زياده و اقارن في سري يا
باسطة الطيب سيد مكي في ام درمان اسمح و لا باسطة كرم كافي في الخرطوم ؟

و اسرح بعييييد و اتذكر عمك ( نسيت اسمو مع الاسف ) كان عنده عجلة و صينية باسطة قدام سينما كولزيوم في السبعينات
و عمك تاني كان بقيف في حوش مدرستنا في مدني ( الشرقية مدني ) كان ببيع الاتنين بتعريفه .. و اقول ديك الكانت باسطة ..
غرقانه في عسلها و سمرا و ساده و شالت قلبي ..

الى ان شاءت الصدفه ان ( تتنونس ) احداهما بي باسطة سهير !!!
قت ليها دي باسطة سودانية ؟
قالت لي ايي .. موووو بالغه ..

قلت صاحبتنا دي بتكون نست الباسطة ..

المهم يومين كده يدي اكلتني داير اضرب اشيل نمرتها قامت براااها اتصلت ..
قت ليها .. انتي البتعمل الباسطة اسمها منو و ساكنه وين ؟
قالت لي سهير و هنا معانا في مسيساغا .. هسي برسل ليك نمرتها .. رهييييبه ..

و قد كان ..

كلمت صاحبي مدحت ود المسالمة .. و هو قبطي اكثر سودانية من الكتيرين ..
قت ليو حريف نطلب ؟
قال لي معاك ..
طلبنا اول طلبيه و عملتها لينا بالفول .. و ضربتنا في مقتل ..

اسبوعين تاني قال لي صاحبي ياخ ما تطلبها لينا واحده سااااده لا فول لا من يحزنون .. باسطة فقرا بس و خليها تحمرها زياده ..

و قد كان ..

عملت الباسطة الساده .. يمين بالله اتذكرت سكين المعجون حق عمك الفي المدرسة الشرقيه و هو بمرق ليك المثلثين ..
تاكل الباسطة .. تحس انك ملكت الدنيا و ما فيها ..
( عمك داك كان ما برجع بي صينية الباسطة فيها باقي .. و كان حريص كم طالب عارفهم ما بقدرو يشتروها كان بديهم مجاني دون ما نشعر)

امنت بالله الذي لا اله الا هو ..

الما اكل باسطة سهير .. ما اكل باسطة ..

و يا اهل تورنتو .. لو الشوق قام بيكم لي باسطة اصلي بلادو .. عليكم بي باسطة سهير ..

و ناس السكري حضروا المتفورمان .. و عليك يا الله ..

يا سلام على الباسطة المفسحة في مصنع الباسطة في الحارة الأولى وانت ماشي على مجمع المدارس في الثورة وانت ماشي المدرسة الصباح تشتري الدُقة يدوك ليها في كيس تضربها بعد الفطور تقيف صنفور ، في عمك بتاع عربية الباسطة بكون عنده الشيرة لو نشفت بديها ليك بخة زي المكوجي وتلقى الناس تحنسه عشان يديك القطعة الفي الركن ، أموت رُكن ياخ

Quote: تلقى الناس تحنسه عشان يديك القطعة الفي الركن ، أموت رُكن ياخ

الحرفنه يا صديقي انك تقيس الزاويه من بعيد و انت ماش على الصينية
و تشوفها مايله وين ... انشالله درجتين .. كافيه تدردق العسل على الركن ..

انت قايل دخلنا معمار من هين؟ ما من قياس زاوية صينية الباسطة من اولى كتاب!!

انال اكريت الباستة زاتو
انت بتجيب الحاجات الحلوة دى من وين
من ذوقك و للا تذوقك و للا من دفترك و للا باسطة سهير
صحت فيك لوعج الشوق و هيجت الذكرى ( ..و صحيتى ف نفسى الوجود..و رجعتى لعيونى النهار..)
انت عسل الباسطة زاتو لو ما احلى منو
لك التحية و التقدير
والله من الصباح ريحت بالنا و انعشتنا
مع التقدير للزملاء كل البوستات زى الملوحة ( التركين) الا تاكلو ف وقت معين و مع ناس معيين ليزداد التشهى و التلذذ
الا بوستك دة تقراه براك و تاكلو براك
هههههه زى الباسطة تضربوا براك كدة بنهم و شراهة
.. و نحن محرومين منو هنا ...بالرغم يوجد ف شارع غبيرا باسطة سودانية .. لكن ما عجبنى
..
و بالمرة يا حبيب احكى لينا عن باسطة زكى ... تقريبا كان ف السوق الافرنجى .. ينوبك ثواب
..
و صباحات باسطة و قشطة .. او بالباسطة بالقشطة زى ما كان يصيح ود خالتى فرحا بالباسطة

مودتى و تقديرى

ياهندسة .... سلام

في الخرطوم كانت الباسطة الجميلة عند حلواني حمدتو (قصاد الجامع الكبير )
وحلواني على خفيف غرب سوق الزنك سابقا ...

ااايه كانت لنا ايام ......

عاالم بطاالــــــــــــــــــة ,,,

Quote: انال اكريت الباستة زاتو انت بتجيب الحاجات الحلوة دى من وين من ذوقك و للا تذوقك و للا من دفترك و للا باسطة سهير صحت فيك لوعج الشوق و هيجت الذكرى ( ..و صحيتى ف نفسى الوجود..و رجعتى لعيونى النهار..) انت عسل الباسطة زاتو لو ما احلى منو لك التحية و التقدير والله من الصباح ريحت بالنا و انعشتنا مع التقدير للزملاء كل البوستات زى الملوحة ( التركين) الا تاكلو ف وقت معين و مع ناس معيين ليزداد التشهى و التلذذ الا بوستك دة تقراه براك و تاكلو براك هههههه زى الباسطة تضربوا براك كدة بنهم و شراهة .. و نحن محرومين منو هنا ...بالرغم يوجد ف شارع غبيرا باسطة سودانية .. لكن ما عجبنى .. و بالمرة يا حبيب احكى لينا عن باسطة زكى ... تقريبا كان ف السوق الافرنجى .. ينوبك ثواب .. و صباحات باسطة و قشطة .. او بالباسطة بالقشطة زى ما كان يصيح ود خالتى فرحا بالباسطة مودتى و تقديرى

اوو
مهمد بدر الدين .. سرقو السندوق يا مهمد لكن مفتاهو معايا

زكي الحلواني كان في عمارة ابو العلا الفي شارع البرلمان مقابل مخازن ايمان ( آل ابّارو )
اشهر ما كان عندهم عصير المنقه و ايسكريم المنقه
تصدق ولد عمك زكي معانا هنا .. كان دفعتنا في الهندسة زمان ..

ايام كانت بديعه يا محمد ..

حبيبنا قباني .. تحياتي والاحباب
يا جماعة ما شاء الله كنتم عايشين في ترف
صدقوني أنا أول مرة اشوف الباسطة عند حضوري للعاصمة
في المدرسة الاميرية الوسطى سمعت اسم الباسطة في منلوج احد الطلاب القادمين من العاصمة :
كان على وزن اغنية ( يا ناس أنا معيون )

في التاريخ درسنا نابليون
خالتو عجوبة بت ليون

بالله ليه الدروس ما تكون
باسطة ومنقا وعصير ليمون
====

كنا نردد باسطة لا نعرفها ..

تحياتي الحبيب قباني

يا سلالالام يا هندسة
هندستنا والله بالحلا و انت كلك حلا
..

Quote: [تصدق ولد عمك زكي معانا هنا

مفروض نحتفل بيه و نكرم والدو
او على الاقل يعرف ان هناك من يقدر و يحترم و يحب و يكن كل الود و الامتنان لوالده العظيم
و انه مازال حيا فى وجدانهم و افكارهم
لهم منا كل التحية و التقدير و التجلة آل زكى
..
اما الحلوانى كمحل موجود عندنا بكثرة ف حلفا
و تباع فيه معظم انواع الحلا ( باسطة .. بسبوسة .. كنافة ..هريسة ...الخ)
و زبادى .. قشطة .. حليب
و اكلتنا دائما بعد الفطور كانت خليط زبادى مع باسطة و بسبوسة و هريسة و كنافة و عليهم قشطة
و لو بقى تقيل تضيف عليهم قزازة حليب
اااااااه و انسى نفسك
و بالمناسبة دة كان اكل معظم الفاطرين فى رمضان باعذارهم ( من نميرى قفل المطاعم ف رمضان)
باب الحلوانى بيكون مفتوح شوية .. تعاين يمين شمال و طوالى تدلف الى الداخل بسرعة
لتجد كمية من البشر بجوة .. و منهم من يلعن السكرى هههههههه تغطية لعدم صومه ف رمضان
ههههه طيب ما البتاكلو دة بيرفع ليك السكرى الف
ااااخ يا حلفا .. حنين ماج ف صدرى .. حلوانى سيف .. حلوانى البطانة
صباحات ندية
مودتى و تقديرى

يا حلوين
باسطة العبد

كتب عم علي عبد الوهاب:

Quote: حبيبنا قباني .. تحياتي والاحباب يا جماعة ما شاء الله كنتم عايشين في ترف صدقوني أنا أول مرة اشوف الباسطة عند حضوري للعاصمة في المدرسة الاميرية الوسطى سمعت اسم الباسطة في منلوج احد الطلاب القادمين من العاصمة : كان على وزن اغنية ( يا ناس أنا معيون ) في التاريخ درسنا نابليون خالتو عجوبة بت ليون بالله ليه الدروس ما تكون باسطة ومنقا وعصير ليمون ==== كنا نردد باسطة لا نعرفها .. تحياتي الحبيب قباني

ثم كتب مهمد بدر الدين:

Quote: اما الحلوانى كمحل موجود عندنا بكثرة ف حلفا و تباع فيه معظم انواع الحلا ( باسطة .. بسبوسة .. كنافة ..هريسة ...الخ) و زبادى .. قشطة .. حليب

يا عم علي

هو انت مولود قبل الميلاد و لا ايه يا (شيه) ..

مهمد قال محلات الباسطة راقده في هلفا .. انت كنت فين ؟

قال الشاعر:

مُنِعتُ شيئا فأكثرت الولوع به ... وأحب شئ إلى الإنسان ما مُنِعا ..

يحيى دا سيبوهو..
زَهمَر..
لو مازهمر ما بينسى باسطة بَيِِن البكون ضرب منها 2 طن ، ولا بينسى باسطة السمن البلدي في الدانوب شارع ابوروف على بعد أمتار من محل عمنا الطيب سيد مكي أمد الله في عمره ،
طبعا المحل الأصل في شارع ابوروف أمام الشيخ أحمد الشيخ الترزي الأفرنجي وأعمال فوراوي واستوديو الوادي وسانتي الهندي بتاع الأرديه الكاكي ستاكبورد الجاهزه أيام الثانوي العام..
يحيى زهمر، لأنه كان بيمشي المحلات دي كلها راجلا من وداورو..
في يناير الماضي يا يحيى مشيت لمحل الطيب في شارع الجزار وعملوا لي صندوقين قبل ما أمشي المطار، عندنا أختنا الكبيره بتاعت باطنيه عملت معاي تحقيق ودايره تعمل لي محاضره
دي لمنو وشايلا ليه وبوردرلاين وقلوكوفاج ودايميكرون وهايبرقلايسيما و HbA1c تقول لقت عندي هيروين.. خليتا وسافرت..
وندمان انا..

لكن بالله قت لي القطعة الفي ركن الصينيه؟ الفيها حرقه بنيه؟ الفي الزاويه البعيده؟..
بالله زي فاولات ميسي في كازياس.

أقول ليهو ذهب مع الريح يقول لي خطوبة سهير..

ود قباني .. يا هندسة

يعني بعد ما شبعتنا باختياراتك الغنائية الرائعة .. جيت هسه كمان تقدم لينا
التحلية بالباسطة .. انت ناوي تجيب لينا السكري ، بعدما عز المزار منو لينا
والحمدلله .. شباب ما بتخاف الله فينا .. تعمقنا في العقد السادس وأوشكنا على
الدخول من بوابة السبعينات .. وإنت تدرق فينا بالباسطة المعسولة .. يعني
عاوزنا (نتسوكر) أي نصاب بالسكري على آخر عمرنا .. ؟!
مالك يا زول علينا .. ؟

والله بوستك عسل في عسل وبطعم الباسطة الأم درمانية او باسطة سلا عندنا
نحن ناس بحري ..

أخونا العزيز المرتضى ود حامد .. بموت أنا في كتاباتك والله .. ربنا يديك العافية
و ود قباني ما زهمر .. ده أصيب بمرض جديد اسمو تبسطر .. أي أدمن الباسطة
حتى صار هو والعسل اخوان في الرضاعة .. ههههههههههه

بوست روعة بروعة الباسطة المغموسة في العسل في الركن المايل من الصينية ..

مودتي ،،،


( ليمو )

والله جننتونا جن
و خوفتونا
و ذكرتونا ايام الهجوم الشرس على الباسطة...هجوم ايجابى ههههه
انا حسع متخيل كأنما هناك هجوم عنيف لنسف الباسطة و لحس ما تبقى من عسله..
مرة كنا شلة طلبنا مشكل( باسطة كنافة بسبوسة )
واحد من الشباب كان قدامو البسبوسة و هو يضرب .. و الباسطة و الكنافة قدامنا
واحد من الجماعة قام لف الصحن عشان الباسطة يكون قدام الزول داك
لانو قرّّب ينتهى من البسبوسة براهو
قال يخت قدامو الباسطة لزوم يقفل ليه نفسو ( من عسله و سمنه)
لكن صاحبنا ازداد شراهة .. و قضى على الاخضر و اليابس
واحد من الشباب قال ليه بعد دة اتعلم اكل العنكوج (نوع من الحشائش عصى على الاقتلاع الا بجهد)
سبحان الله فى ناس ماشاءالله ممكن ياكلو صينية او كم كيلو برااه ..
و ما يجيه اى حاجة .. لا تسمم لا ورتاب
و فى ناس الحبة البختوها ف كوكتيل عشاء الاعراس داك ما يقدروا يتموها ...
..
و لكل مدنية ناسها و باسطتها ..
و اتبرا عبدالفتاح ... و ما بالسمنة و كدة ..
و لكل مدينة سرها الذى لم تبح به
.. و زعلتنا يا شيخ مرتضى ...ف حد يخلى الباسطة و يسافر
ما تاكل و محل ما يدخلك ربنا تخش ( ترجمة حرفية لمقولة بلدياتنا المصاب بالسكرى و يضرب الممنوعات من الطعام )
و ربنا يشفيك و يشفى كل المرضى ..
و صباحات منعشة
مودتى و تقديرى

يحي كيفك يا سكري
يعني لازم توقظ فينا الشوق للباسطة و ما أدراك ما الباسطة..
و أنا لي فيها غرام عجيب..ولكن حلاوة السكر في الدم حجّمت الأشواق الدفينة للباسطة..بحب الباسطة أكتر من الكنافة و البسبوسة..ولكن في العدم ما مشكلة
كلهم ببقوا حبيبات وقريبات.
أتذكر ونحن في الداخلية في الجامعة أيام الداخليات والعز والسُفرات المجيّهة.. إني انتظرت العشاء الذي كان ذلك اليوم اسبيشال لأنه فيه باسطة ..وطبعا باسطة

بالسمن الأصلي..لونها بيجي أتذكر.. و مكونة طبقات طبقات رهييفة...وكنت ناوي امشي السينما الدور التاني مع الشباب زملاء الغرفة...أكلت أتنين من أم تلاتة طوابق

وسحبت التالتة...وخلاص التخمة حصلت..ونص ساعة كده كافجأة حيلي مات... وما قدرت امشي ذاتو..و الجماعة يضحكوا ..واحد يمسك بي هناك و التاني يمسك بهناك

عشان يمشوني ...و أخف شوية ونحصل السينما.. تأني تحب الباسطة؟؟

طبعا راح علينا و عليهم الفيلم..ولغاية اليوم يتذكروا اليوم داح و يتندروا..أتذكر إنهم شخصوا الحالة بإنها تسمم نشوي STARCH POISONING..

لكن كانت تستاهل والله..

Quote: قال الشاعر: مُنِعتُ شيئا فأكثرت الولوع به ... وأحب شئ إلى الإنسان ما مُنِعا .. يحيى دا سيبوهو.. زَهمَر.. لو مازهمر ما بينسى باسطة بَيِِن البكون ضرب منها 2 طن ، ولا بينسى باسطة السمن البلدي في الدانوب شارع ابوروف على بعد أمتار من محل عمنا الطيب سيد مكي أمد الله في عمره ، طبعا المحل الأصل في شارع ابوروف أمام الشيخ أحمد الشيخ الترزي الأفرنجي وأعمال فوراوي واستوديو الوادي وسانتي الهندي بتاع الأرديه الكاكي ستاكبورد الجاهزه أيام الثانوي العام.. يحيى زهمر، لأنه كان بيمشي المحلات دي كلها راجلا من وداورو.. في يناير الماضي يا يحيى مشيت لمحل الطيب في شارع الجزار وعملوا لي صندوقين قبل ما أمشي المطار، عندنا أختنا الكبيره بتاعت باطنيه عملت معاي تحقيق ودايره تعمل لي محاضره دي لمنو وشايلا ليه وبوردرلاين وقلوكوفاج ودايميكرون وهايبرقلايسيما و HbA1c تقول لقت عندي هيروين.. خليتا وسافرت.. وندمان انا.. لكن بالله قت لي القطعة الفي ركن الصينيه؟ الفيها حرقه بنيه؟ الفي الزاويه البعيده؟.. بالله زي فاولات ميسي في كازياس. أقول ليهو ذهب مع الريح يقول لي خطوبة سهير..

اول الشي السر شنو انك الوحيد النقشت تطابق باسطة سهير مع خطوبة سهير ..

انا قبال ما افتح البوست استأذنت اختنا سهير و حكيت ليها حكاية مسرحية خطوبة سهير ..

النوستالجيا واحده يا صديقي .. و كان زمن واحد و سودان واحد الخلى عندنا التليباثي دي ..

اما باسطة بين فو الله ما نسيتا .. لكن رحولنا الخرطوم اثر على الذكريات ..

السلام عليكم ورحمة الله وبركاته اهل الباسطة
قرات في ادب الباسطة الذي جادت به اناملكم ولم اجد ذكراً لباسطة صدقي في الشجرة ربما ليس بينكم من عاش في احياء جنوب الخرطوم.
يعود تاريخ المحل الى بداية التمانينات وعرفت للتو انه لا يزال يقدم الخدمة وبنفس الجودة.