سلام وتقدير

03:10 PM September, 25 2020

سودانيز اون لاين
محمد عبيد الفاضلابى-
مكتبتى
رابط مختصر

سلاماً ذاكياً وموتي.
حضرنا بعد غيبه طويله..اتمني ان يكون الجميع بخير وصحه

الشَرَقَانِيـّه.
_______

محمد عبيد الفاضلابي

بادي المرقه ضُل
وبادي الدنيا دم
باقي الناس سلام
وتاريخهم ندم
يمرقنا الحرام ..
لي وادي النِعم
ياخيمنا المقلّع
من عُودنا المَطرّح
جمعتنا الروائح
والرمله أم صُنان
قطّعت النشيد
وظهّرت القيام
بِ الطوب المُسلّح
جسمك طاب منفّح
يتعافى النظام
فِ الخَدَر الملفّخ
والسِرِيّه نُونتْ
بي... صوت النيام
وجمعتنا الروائح
والضُل النريدو
حارساتنّو شُلّه
من كلُّوب
قريضو
شرقانيّه تُجمه
وجمعتنا الروائح
لا كلباً
يسامح سيدو عزّل كيف ؟
لا شدراً يضلل عودو عزّ الصيف
وبايتين بي دموعنا

زيرنا إنشق يابس
تحت المسرحيه
والفنان مكتف
في ضهر البلاطه
يا الجلاطه كِرِكِك
فى الغّمُوصه

لُوصه
ونِيلِك كمشتينو

تِخِننبُو .. المسالِك
بال..
من تحتى سالِك
نجّسنبُو التُرابه

جيت ألقاك تشدّي !!!
قدّ المرقه نفّح
مرقنبو الغلابه
وجمعتنا الروائح

كان البلده نايمه
والنجمات بعيده
عمق النيل خواده
والكِنتِين تعرفو
بي ريحة الزرائب

واللَّبانه باعوا
لبن الطير
لي قبطي
وصدر القيفه
مجّك
ل زراعة
المقطّي
بي جسمو الجراد
الجامع مفتّح
والهيم فِ السعيّه
في جلد القضيّه
صلاياً ويمدّح
جمعتنا الروائح
جمعتنا الروائح
وجمعتنا الروائح
كان الفاقه في شهوة سرج
تابله .. وحِنيكه سنين
قامت بدري
شدت مهرت الغناي
كايسه لي حُضن الدلاليك
فِ النسائب والرِزِق
وكايسه
في شدر المراغنه .. الضُل
وضِحيك اليلاقِيك
فِ العلامات
والسلامات
والبطون الشوكها يلصف
والبلوغ
وهُن كانوا
عُضلاب الشِريق
ليهم خلائف فِ الأزل
كّشاكه
ويبيعوا
التُرُمُسه وفانوس
سِبِر أُمبكول
أم عويناتن تدمِّع فِ الضلام
ضوء حليبن .. يعرفك
طُوال
يختفوا الحبّه
من مناقير الطيور
يعقدوا علي بنياتن .. وُوِليداتن
بدري
ومشلّخين سِلّم
جلاليبن زِبد صفره وطويله
وعِمَّتن جِدّيع
وتسعه ونص صباح
يختولنا الفطور
ديل المحاميد
الرطاناتن حجاب
يختروك للمشي
وبانطونن
يَهّنِق للرجوع
ديل المحاميد
المناخِيرُنْ خَتِيف للنسمه
والحر .. والجبال
وكانوا بيعادوا الزرقه
جاهلين إحترامن .. والختا
وكانوا مدهونين صعاب
جاتن من خيالاتن
سلامه
قالوا اليعقدوا علي الطريقه
البلده للمدعو الوطن
جابو من الدلكه علبه
ومن سرية الناسخين
شدرهن نوبه للحفل الجميل
ديل المحاميد يمدحوا
بلداً نشوفو
واسعات جروفو .. صابرين نطوفو
نعدلّو قيفو
بالما سياسه .. نكسر هتوفو
والجاب يطفّر خنق الزرافه
والما بيحّفِر حفرن ظروفو
والسكه لينه .. لسّانا ترطن
حُرّاسها لصّو
فصّو وضلوفو
سرقوا المدينه .. والبت سكينه
مرقت ممسحّه بالمسطرينه
بنوا فوقها طوفو
بلداً نشوفو
واسعات جروفو
صابرين نطوفو
نعدلّو قيفو .

حبابك محمد الفاضلابي
وعودا حميدا في هذا الحوش الماهل

دمتم