بعد ظهور سلسلة المفاتيح في بيت المقتول يكون المخرج أشر شمال ودخل بينا يمين شغل صعاليك دراما من أمه أول مرة أشوف لي مخرج سوداني يجيد التعامل مع لغز بوليسي
لا زلنا في الحلقة 18 وباقي لينا 12 حلقة وبعد ما افتكرنا كل الأمور واضحة ومكشوفة المخرج مد لينا لسانه
Post: #2 Title: Re: مسلسل دغوتات للنجم جلواك .. وحينئذٍ جاطت Author: أحمد محمد عمر Date: 09-23-2020, 04:37 AM Parent: #1
لو من عشاق الدراما السودانية أوعك تفوت الشغل دة مسلسل خفيف شديد الحلقة ربع ساعة .. يعني بتكملو في جمعة واحدة عمل من طينة الكبار
محمد جلواك هو النجم الوحيد الماشي في الطالع منذ ظهوه بينما البقية ماشين في النازل ميزة مسلسل دغوتات إنه فيه نص جميل وقصص كتيرة داخل قصة واحدة في النهاية بتجمعن سواء
Post: #3 Title: Re: مسلسل دغوتات للنجم جلواك .. وحينئذٍ جاطت Author: أحمد محمد عمر Date: 09-23-2020, 04:41 AM Parent: #2
البداية كانت في رمضان بمسلسل دغوتات النسخة الأولى وطبعاً كلمة دغوتات ظاهرة أخدها من تصريحات الحبيب حميدتي .. شوبش
النسخة الأولى كانت من تأليف الممثل الصاعد بقوة غسان النعمة هو اجتهد لكن الممثل يظل ممثل ما روائي ولا مؤلف بداها بنصوص قوية ثم جنح إلى شغل النصائح وكلام الخير والإيمان في الآخر وكانت كل حلقة منفصلة عن التانية ما بتقدر تقول مسلسل حلو شديد لكن كان أحلى حاجة في رمضان لمدمني الدراما السودانية
Post: #4 Title: Re: مسلسل دغوتات للنجم جلواك .. وحينئذٍ جاطت Author: أحمد محمد عمر Date: 09-23-2020, 04:43 AM Parent: #3
أجمل ما في دغوتات سواء النسخة الأولى أو الثانية هو اختيار مكان التصوير قرية السليمانية كانت عبارة عن كنز غير مكتشف مدينة اعلامية مكتملة الأركان استوفت جميع شروط القرية المطلوبة للعمل الدرامي
Post: #5 Title: Re: مسلسل دغوتات للنجم جلواك .. وحينئذٍ جاطت Author: أحمد محمد عمر Date: 09-23-2020, 04:48 AM Parent: #4
في الجزء الأول الممثلتين سولارا أحمد وميادة عثمان في بداياتهم وأعتقد ديك كانت أول تجاربهم أداءهم كان ظاهر فيه الخجل وما بالجودة المطلوبة لكن في الجزء الثاني كانن فنانتين مكتملات النضوج أدن أدوار عظيمة شديد والقرضة سولارا أحمد سجلت اسمها بأحرف من نور في سجل الدراما السودانية كأفضل من أدوا دور الحبيبة مع صغر سنها دة مسلسلين تلاتة تاني وحتنافس سلوى درويش ورحاب ابراهيم
Post: #6 Title: Re: مسلسل دغوتات للنجم جلواك .. وحينئذٍ جاطت Author: أحمد محمد عمر Date: 09-23-2020, 04:49 AM Parent: #5
كنت مستغرب ليه اسم ميادة عثمان بيجي قبل سولارا رغم إنها حبيبة البطل في حين إنه ميادة حبيبة صاحب البطل لكن مع تقدم الأحداث لقيت إنه الضغط والانفعالات المطلوبة من ميادة أكتر بكتير من سولارا
Post: #7 Title: Re: مسلسل دغوتات للنجم جلواك .. وحينئذٍ جاطت Author: أحمد محمد عمر Date: 09-23-2020, 04:54 AM Parent: #6
غسان النعمة طبعاً طلع مع الكبار من رمضان وكان مؤلف في أعمال عديدة وممثل في عدة مسلسلات في ذات الوقت كان أداؤه لدور عمسيب في المسلسل السوداني اللي نسيت اسمه هو المبرر الوحيد لمشاهدة ما استطعت مشاهدته من حلقات زول فناااااان بمعنى الكلمة .. أداء جبار .. ممثل من طينة الكبار شكل مع جلواك ثنائي عجيب نافس ثنائية جلواك مع أبوبكر فيصل
Post: #8 Title: Re: مسلسل دغوتات للنجم جلواك .. وحينئذٍ جاطت Author: أحمد محمد عمر Date: 09-23-2020, 04:59 AM Parent: #7
الفنان كرم مصطفى أخيراً ظهر في الدور البناسبو وأبدع جداً وكأنما يقول عيسى تيراب لم يمت بعد شفت ليه أدوار مساعدة كتيرة في قناة الدراما السودانية لكن طعم أداؤه هنا مختلف تماماً عين جلواك كانت فاحصة جداً عندما اختارته لدور العمدة
Post: #9 Title: Re: مسلسل دغوتات للنجم جلواك .. وحينئذٍ جاطت Author: أحمد محمد عمر Date: 09-23-2020, 05:04 AM Parent: #8
وزي كل مسلسل سوداني لازم يكونوا فيه الما بعرفوا يمثلوا بس المشكلة إنه المرة دي زكاة المسلسل كانت شخصية رئيسية فيه ما ممكن ياخ ممثل في أول ظهور ليه تديهو دور محوري ! غايتو قريت اسمه في إدارة الانتاج أنا خايفو يكون داخل بقروشه .. شوبش عن عباس أتحدث
Post: #10 Title: Re: مسلسل دغوتات للنجم جلواك .. وحينئذٍ جاطت Author: أحمد محمد عمر Date: 09-23-2020, 05:09 AM Parent: #9
علي ورطة من الشخصيات اللطيفة جداً في المسلسل أدى دور عوير الفيلم كما يجب أن يكون الضحكة المميزة الملازمة ليه في كل حواراته مدة الأسنان ورفعة الراس لي وراء طريقة الكلام بصراحة زول ممتع شديد
Post: #11 Title: Re: مسلسل دغوتات للنجم جلواك .. وحينئذٍ جاطت Author: أحمد محمد عمر Date: 09-23-2020, 05:14 AM Parent: #10
في شخصية الدكتور ما اتوفقوا في الاختيار نعم محمد الإمام ما قصر بس الشخصية كانت محتاجة فنان أكثر وسامة وكاريزما كاتب السيناريو لم يعط الشخصية الاهتمام الكافي مفروض طبيب وناشط سياسي لغته تكون مختلفة عن كلام باقي أهل القرية وإلا حيقنعهم بمشروعاته ونضاله كيف؟ عشان تكسر البنات وعشان تلهم ناس الحلة وتخليهم يقيفوا ضد فساد العمدة لازم كان الشخصية تجد عناية شديدة من السيناريست والإخراج لكن كلفتوها شديد وكأنما بقولوا دة ما موضوعنا
Post: #12 Title: Re: مسلسل دغوتات للنجم جلواك .. وحينئذٍ جاطت Author: أحمد محمد عمر Date: 09-23-2020, 05:19 AM Parent: #11
عوض عبودة رغم إنه دة أول ظهور ليه - على ما أعتقد - لكن أدى شخصية أخو البطلة وود عم البطل باقتدار وما قصر نهائي رغم بساطة دوره لكن كان قادر على موازنة انفعالاته ما بين محبته الخير لود عمه وبين اعتراضه على عطالته وطريقة حياته
Post: #13 Title: Re: مسلسل دغوتات للنجم جلواك .. وحينئذٍ جاطت Author: أحمد محمد عمر Date: 09-23-2020, 05:27 AM Parent: #12
محمد الطيب كشاح فني الإضاءة يحتاج إشادة خاصة شغل محترف بمعنى الكلمة أول ما يشدك للمسلسل هو جودة التصوير والإضاءة جميع زوايا الإضاءة في كل الأماكن وفي كل الأوقات كانت احترافية لا يوجد أي مشهد باهت أو تصويره تعبان فني الصوت جلت منه عدة مرات لكن فني الإضاءة صنديد وحافظ كتابه حتى الآن
Post: #14 Title: Re: مسلسل دغوتات للنجم جلواك .. وحينئذٍ جاطت Author: أحمد محمد عمر Date: 09-23-2020, 05:37 AM Parent: #13
سولارا قرضة وحاة الله قرضة يا اخوانا رغم إنها ممثلة دور الحبيبة لكن الرومانسية في المسلسل بالقطارة ما عارف هل دة مقصود فعلاً كونه جو القرية محافظ ! ولا شخصيات المسلسل هي المحافظة وخايفة من الانتقاد !! بس في كل الأحوال الناس لما تشوف عمل درامي ما عاوزة تشوف الواقع كما هو يمكن مشهد واحد كان فيه رومانسية صريحة لكن أدته بإقتدار شديد وباقي أدوارها كانت رومانسية ضمنية زي خوفها على المرّ (جلواك) وسهرها على راحته أيامه العيان الزولة دي بجمال ملامحها وبساطة أداءها ممكن تبدع جداً في الانفعالات الرومانسية لو تخلى المسلسل عن المحافظة الشديدة دي ناس بحبوا بعض شئ طبيعي يقولوا لي بعض بحبك وبريدك ومعاها غرويدة عيون
Post: #15 Title: Re: مسلسل دغوتات للنجم جلواك .. وحينئذٍ جاطت Author: أحمد محمد عمر Date: 09-23-2020, 05:40 AM Parent: #14
أخيراً المسلسل لعله أفضل عمر درامي سوداني منذ سلسلة زواويل جدير بالمشاهدة لو كنت من عشاق الدراما السودانية مشاهدة ممتعة أحضر بقية الحلقات وتعال انتظر معانا نتيجة التحقيق في جريمة القتل
Post: #16 Title: Re: مسلسل دغوتات للنجم جلواك .. وحينئذٍ جاطت Author: Haytham Ghaly Date: 09-23-2020, 06:04 AM Parent: #15
اول مرة اسمع بالمسلسل دا
في الحقيقة انا ما من متابعي الدراما السودانية بسبب عدم قدرة الممثلين على اداء ادوارهم ونسيان انهم امام الكاميرا
ياخي معسمين جنس تعسيمة مبالغة
غايتو بحضرها واجي انظر ليك هنا
Post: #17 Title: Re: مسلسل دغوتات للنجم جلواك .. وحينئذٍ جاطت Author: أحمد محمد عمر Date: 09-23-2020, 06:34 AM Parent: #16
المسلسل على يوتيوب فقط ودة في حد ذاتو إعجاز كونه يتم عمل بضخامة 30 حلقة كإنتاج خاص لناس قاعدين في السودان الاعتماد على شركتين تلاتة في اعلان ثواني في بداية المسلسل بالتأكيد ما بغطي تكلفة الانتاج .. وبما إنه مافي جهة سياسية مستفيدة من العمل معناها الناس ديل سايقهم شغفهم للإبداع لو اتعرض في قناة معناها القناة بتدفع كامل تكاليفه لكن كونه يتعرض في قناة يوتيوب فقط دي قمة الشجاعة والمجازفة وفعلاً ظهرت المجازفة في توقف المسلسل لزمن ليس بالقصير ربما بسبب خلافات في الانتاج أو المقابل المادي ورجع تاني بعد تصريحات جلواك إنهم فقدوا حتى الباك أب واضطروا يعيدوا التمثيل من جديد
بصراحة تجربة شجاعة شديد
_________ ملحوظة: المعسمين قاعدين بس بغطوا عليهم المعلمين
Post: #18 Title: Re: مسلسل دغوتات للنجم جلواك .. وحينئذٍ جاطت Author: usama Babiker Date: 09-23-2020, 07:40 AM Parent: #17
تحياتي يا ابوحميد ومشتاقين ياعمك المسلسل جميل وجلواك موهوب جدا .. انا شخصيا مابعرف الممثلين السودانيين وماظن حضرت مسلسل قريب بس صراحة المسلسل لقيته في اليوتيوب ومن اليوم داك ما فوتت حلقة ... ملاحظاتي الممثل عباس ضعيف وانفعلاته اقل من الحدث والممثلة بنته الصغيرة دي والولد حبيبه ... شغالين تسميع من غير اي احاسيس ... العمدة خطير بس مرات بكون اوفر حبتين ... جكسوية جلواك نار منقد وممثلة خطيرة ...
Post: #19 Title: Re: مسلسل دغوتات للنجم جلواك .. وحينئذٍ جاطت Author: أحمد محمد عمر Date: 09-23-2020, 08:39 AM Parent: #18
حبيبنا أسامة شوق الشوق
Quote: ملاحظاتي الممثل عباس ضعيف وانفعلاته اقل من الحدث والممثلة بنته الصغيرة دي والولد حبيبه ... شغالين تسميع من غير اي احاسيس
بالضبط كدة ولو إنه البت يرجى منها .. ما كعبة شديد .. ومع صغر سنها دة بتتصلح .. قارن أداء سولارا في رمضان وهسة بتلقى الفرق كبيييير لكن الجوز التانيين ديل متشعبطين في الشغلانة ساي
Post: #20 Title: Re: مسلسل دغوتات للنجم جلواك .. وحينئذٍ جاطت Author: احمد عمر محمد Date: 09-23-2020, 09:56 AM Parent: #19
رغم انني بعيد تماما عن الشاشة الا انني اتابع اكثر شئ الدراما المحلية في اليوتيوب ليه ما عارف طرأ على بالي رواية وفلم عرس الزين مما شوفت الزاكي الاهطل في المسلسل ورغم انني لسه في الحلقة 10 خوفي يعرس بت العمدة واذا حدث معناها دي جلطة في القصة المر مما قالت ليه في الحلقة الاولى رقية اشتهينا ونستك في البيت قلبو وقف المسكين الجميل ان ستنا تحب الدكتور والدكتور يحب رقية ورقية تحب جلواك و الفريع هو الرايح فيه ولنا عودة
سلام يا أهلنا، بعيد عن موضوع البوست .... أنا عارف إنه كلمة (دغوتات) هي واحدة من كوميديا حميدتي أيام الإعتصام. لكن ما لاقي ليها تسجيل ... في واحد يقدر يجيب لينا تسجيل دغوتات؟
Post: #22 Title: Re: مسلسل دغوتات للنجم جلواك .. وحينئذٍ جاطت Author: عبد الصمد محمد Date: 09-24-2020, 09:00 PM Parent: #21
شغل جميل خالي من التكلف وحقيقة خطوة لقدام في الدراما السودانية
شغل جميل رغم الكثير من العوارات المافي ليها داعي ورغم التعسم المعهود في المنثل السوداني لكن في مجملو عمل جميل يستحق المتابعة
ما لاقي الحلقات من 21 للنهاية
Post: #24 Title: Re: مسلسل دغوتات للنجم جلواك .. وحينئذٍ جاطت Author: أحمد محمد عمر Date: 09-26-2020, 06:14 PM Parent: #23
Quote: Omar Alameen شكرا جزيلا أحمد محمد عمر. شكرا لأنك انصفت جلواك أخوك مدمن دراما سودانية، أحضرها حتى لو كانت بايخة وما أكثر البايخ منها. من أجمل الأعمال السودانية مسلسل سكة الخطر انتهت اعادة عرضه قبل حوالى اسبوعين في قناة الشروق. شكرا برضو حضرت بعض الأفلام الأمريكية بعد اشارتك ليها في بوستات سابقة. اضافة: الأعمال الجديدة في اليوتيوب كأعمال عبد الله عبد السلام وجلوك تمتاز بجودة الصورة والصوت والاضاءة الأمر الذي تفتقده قنواتنا السودانية خاصة ضبط الصوت. إذا عندك اخبار من The Walking Dead خاصة الحلقة الأخيرة والموسم11 أشركنا فيها. نازل اجازة اجبارية أكتر من شهر ونص، للأسف حا اقضيها في البيت لصعوبة السفر حاليا. ما تبخل علينا بالاقتراحات.
هلا حبيبنا عمر شوق قناة محمد صلاح في اليوتيوب بنزل ليك منها مقطع هسة .. دي أحلى ارشيف للدراما والفن السودانيات سكة الخطر طبعاً جميل شديد رغم إنه أداء أميرة علي وطارق على كان فيه شوية تكلف ، أقمار الضواحي برضو خطير لكن أجمل مسلسل سوداني اتعرض حتى الآن هو بيوت من نار
مع الأسف أخوك أفلام ومسلسلات الرعب ما زولها عشان كدة ما تابعت The Walking Dead بالنسبة للترشيحات لو متذكر بوست النصري بتاع نتفليكس فيه ترشيحات خطيرة بما فيها ترشحات النصري ذاتو مسلسلي ozark و dark لكن أنا أفضل مسلسل بالنسبة لي هو house MD بلا منازع حضرته 3 مرات وممكن احضره تاني 10 مرات عادي .. ما بسبب اللغز الطبي أو التشويق وإنما بسبب شخصية هاوس نفسها ذكرتني قريبي أيام الكورونا قال لي رشح لي مسلسل فرشحت ليه La casa de papel شابكني ليك اسباني بتاع فنيلتك؟ أنا داير امريكي أقول ليه يا عمك احضر بس وما بتندم يقول لي امريييييكي امرييييكي أنا عاوز اثارة وشغل دراما جاضم قلت ليه شوف يا حبة المسلسل دة أنا واثق فيه شديد ما أقل من أي مسلسل امريكي بس انت جرب احضر فيه كم حلقة وبراك بتشوف اتصل علي بعد كم يوم نزل ليك فيني نبز شديد : دة شنو العملتو دة؟ ترشح لي مسلسل ما تامي؟ يعني هسة أنا أعمل شنو؟ الجماعة لسة جوة والنت ما فيه أي خبر عن موسم خامس .. عمليتك ما ظريفة هسة أنا البصبرني لحدي ما يصوروا الجزء الجاي شنو .. بس قول لي اعمل شنو أنا ؟ قلت ليه تغني بيلا شاور وتنتظر زينا كدة
Post: #25 Title: Re: مسلسل دغوتات للنجم جلواك .. وحينئذٍ جاطت Author: أحمد محمد عمر Date: 09-26-2020, 06:19 PM Parent: #24
Quote: ما لاقي الحلقات من 21 للنهاية
لسة ما نزلن المسلسل لازال في العرض بتنزل حلقة كلي يوم الساعة 9 مساء
Post: #26 Title: Re: مسلسل دغوتات للنجم جلواك .. وحينئذٍ جاطت Author: أحمد محمد عمر Date: 09-26-2020, 06:22 PM Parent: #25
Quote: مما شوفت الزاكي الاهطل في المسلسل ورغم انني لسه في الحلقة 10 خوفي يعرس بت العمدة واذا حدث معناها دي جلطة في القصة
وييييين يا عمك! هسة هم دايرين يشيلوهو الشيلة .. كبش فداء لكن شكلو كدة في النهاية حيقلبها بيهم
Post: #27 Title: Re: مسلسل دغوتات للنجم جلواك .. وحينئذٍ جاطت Author: أحمد محمد عمر Date: 09-26-2020, 06:44 PM Parent: #26
Quote: بعيد عن موضوع البوست .... أنا عارف إنه كلمة (دغوتات) هي واحدة من كوميديا حميدتي أيام الإعتصام. لكن ما لاقي ليها تسجيل ... في واحد يقدر يجيب لينا تسجيل دغوتات؟
تصدق ما لقيتها :) يا ربي يكون جازفوها ناس الدعم السريع! كدي البلقاها يعزنا بيها
لكن في حقة موكب بورتسودان .. ديك إلا بالسماعة
Post: #28 Title: Re: مسلسل دغوتات للنجم جلواك .. وحينئذٍ جاطت Author: أحمد محمد عمر Date: 09-26-2020, 06:48 PM Parent: #27
Quote: شغل جميل خالي من التكلف وحقيقة خطوة لقدام في الدراما السودانية
والله جلواك أكتر واحد ماشي لي قدام باقي النجوم كلهم ماشين لي وراء تحس بيهم عاوزين ينتجوا أي كلام من أجل الانتاج فقط
Post: #29 Title: Re: مسلسل دغوتات للنجم جلواك .. وحينئذٍ جاطت Author: Haytham Ghaly Date: 09-27-2020, 05:14 AM Parent: #28
Quote: والله جلواك أكتر واحد ماشي لي قدام
فعلاً يا ابوحميد جلواك ممثل بارع وفنان حقيقي وتلقائي
شدة ما اجاد الدور لمن تظن انو دي شخصيتو الحقيقية
ههههه بكيفني جداً لما يلاقي رقية ويعمل حركات الجنون بتاعتو دي رفيس حيط وكرفيس جلاليب هههههه
بس الشي البغيظ كعويج الخشم عند الممثلات حتى لو اتكلمت في موضوع عادي برضو بتكعوج وتعوج خشمها
اسع دا شنو يعني؟؟؟
Post: #30 Title: Re: مسلسل دغوتات للنجم جلواك .. وحينئذٍ جاطت Author: Haytham Ghaly Date: 09-29-2020, 06:42 AM Parent: #29
انا غايتو عندي تخمين للقاتل
احمد انت عارفو وللا برضك مجهجه زي البقية
Post: #31 Title: Re: مسلسل دغوتات للنجم جلواك .. وحينئذٍ جاطت Author: أحمد محمد عمر Date: 09-29-2020, 07:34 AM Parent: #30
المخرج سايق الناس باتجاه عباس لكن شغل التحقيقات بوري إنه المخرج دة معلم دراما حدسي بقول لي إنه حيلف بينا عكس في الحلقة الأخيرة
.
Post: #32 Title: Re: مسلسل دغوتات للنجم جلواك .. وحينئذٍ جاطت Author: Haytham Ghaly Date: 09-29-2020, 08:20 AM Parent: #31
ههههههههههه
انا تخميني انو القاتل اخو البنية الجميلة رقية ما عارف اسمو منو لكن هو القاتل على ما اعتقد
Post: #33 Title: Re: مسلسل دغوتات للنجم جلواك .. وحينئذٍ جاطت Author: أحمد محمد عمر Date: 09-29-2020, 08:39 AM Parent: #32
غايتو كان عملها يكون بالغ المخرج داك زول مسالم ياخ
في شرمة خلاها المخرج فاتحة واللي هي اختفاء المر وقت ارتكاب الجريمة وعدم تقديمه أي تبرير ولا في أي زول عارفه مشى وين في حتة تانية .. مفتاح ستنا المخرج برضو اتلاعب بينا شديد في الحتة دي .. لما الفريع سألها مفتاحك الوداهو بيت الدكتور شنو! اتصعـلك علينا ود اللذينة وخلى الباب دق عشان ما نعرف الإجابة :) أمس برضو المخرج وقفنا في سؤال مفصلي يغير اتجاه القضية واتجاهات المشاهدين برضو واللي هي الضرب المر منو؟ غايتو راجين إفادة الزاكي الليلة
لكن صراحة شغل اخراج فنان عديل كدة أول مرة اشوف لي اخراج سوداني بالبراعة دي لقضية بوليسية
Post: #34 Title: Re: مسلسل دغوتات للنجم جلواك .. وحينئذٍ جاطت Author: أحمد محمد عمر Date: 09-29-2020, 08:51 AM Parent: #33
باقي الحلقات لتسهيل المتابعة
Post: #35 Title: Re: مسلسل دغوتات للنجم جلواك .. وحينئذٍ جاطت Author: Haytham Ghaly Date: 09-29-2020, 08:53 AM Parent: #33
Quote: داك زول مسالم ياخ
اصلاً هو قصد يديك انطباع انو مسالم جداً عشان يبعد عنو الاتهام لكن قبل الجريمة جاب مقابلتو للدكتور اضافة لتعليقو مع الضابط انو الدكتور دا حقار
اخوك عندو حس امني غريب
Post: #36 Title: Re: مسلسل دغوتات للنجم جلواك .. وحينئذٍ جاطت Author: أحمد محمد عمر Date: 09-29-2020, 09:05 AM Parent: #35
أيوة متذكر التعليق دة كويس مع ملاحظة هيجان المر لما قالوا ليه الدكتور مشى لي سراج في الكمينة غايتو المخرج مخليها مفتوحة على كل الاحتمالات
لكن خوف العمدة بوري إنه عندو دور في الموضوع عليك الله شوف من الدقيقة 16:06 وحاة الله خلتني أضحك براي زي المجنون
Post: #37 Title: Re: مسلسل دغوتات للنجم جلواك .. وحينئذٍ جاطت Author: أحمد محمد عمر Date: 09-29-2020, 09:41 PM Parent: #36
ياااااخي الليلة جلواك جدع دور مبااااااااااااالغة
Post: #38 Title: Re: مسلسل دغوتات للنجم جلواك .. وحينئذٍ جاطت Author: Ahmed Yassin Date: 09-29-2020, 10:05 PM Parent: #37
بامانة يا احمد انت زول فنان ياخ انا لو منك يا بقيت ممثل يا مساعد مخرج
Post: #39 Title: Re: مسلسل دغوتات للنجم جلواك .. وحينئذٍ جاطت Author: أحمد محمد عمر Date: 09-30-2020, 05:07 AM Parent: #38
هازول دي فصاحة كيبورد ساي لكن وحاتك القبة خاوية على عروشها :)
Post: #40 Title: Re: مسلسل دغوتات للنجم جلواك .. وحينئذٍ جاطت Author: احمد عمر محمد Date: 10-01-2020, 06:04 AM Parent: #39
غريبة أن الضابط يبني معلومات على اشياء لا اعتقد يعتد بها أمام القضاء لأنها بكل بساطة ليست ادوات قوية وهي مذكرات الطبيب المتوفي لانه في الغالب يحكي فيها يومياته حسب ما يرى هو أو يتراى له والدليل هي ليست دليل قطعي وهي ما استند عليه عباس والشئ الثاني أيضا الزاكي شخص فاقد للاهلية فما السبب الذي يجعل الضابط يعتمد عليه وعلى أقواله بل وأيضا يقوم بتهديده مرة ومرة أخرى بأخذه بلطافة وأقواله هي ما دعت الضابط يستجوب عباس وهذا لم يفصحه الضابط لعباس ولكن في الغالب اذا أفصح للضابط أن زكي هو من شهد بضربه المر أيضا سيعترض كون الزاكي ليس عاقل ولا يمكن للقضاء أن يعتمد شهادة انسان مشكوك في أهليته.
كسرة المفاجأة والخوف تكون رقية هي القتلت الدكتور
Post: #41 Title: Re: مسلسل دغوتات للنجم جلواك .. وحينئذٍ جاطت Author: Haytham Ghaly Date: 10-01-2020, 07:33 AM Parent: #40
Quote: المفاجأة والخوف تكون رقية هي القتلت الدكتور
لا لا دي بالغت فيها ياخ اوريك السيناريو المتوقع في جريمة القتل دي وليه انا قلت سراج اخو رقية هو القاتل اولاً المخرج زي ما قلت قبل كدا ادانا انطباع انو سراج زول في حالو ومسالم وما عندو تدخل كبير في كل ما يدور في الحلة الشي التاني مقابلة الدكتور له وطلب يد رقية واحساس سراج انو الدكتور دا زول حقار زي ما قال للضابط الشي التالت سراج هو اللحق المر جنب بيت الدكتور ولقاهو مضروب واظنو ربط المواضيع مع بعضها واستنتج انو الدكتور هو وراء ضربة المر بالذات انو الدكتور اختفى ليلة الحادث لفترة
الضابط طبعاً من النوع البتعسم في التمثيل اداءه ضعيف وما قدر يمثل شخصية الشرطي المحقق الذكي طريقة التحقيق تفتقر للواقعية يعني ما ممكن تجيب المتهم وتقعد تتونس معاهو لا تكتب وقائع التحقيق واقوال المتهم ولا حتى يوقع عليها
Post: #42 Title: Re: مسلسل دغوتات للنجم جلواك .. وحينئذٍ جاطت Author: أحمد محمد عمر Date: 10-01-2020, 10:04 AM Parent: #41
الضابط تمثيله تعبان وطريقة تمثيله بتاعة رباطي أكتر من ضابط مذكرات الضابط ما دليل مادي بحسم القضية لكن موجه هام لمسار التحقيقات وأدى الضابط كل المعلومات العاوزها الزاكي أهم نقطة في القضية وهو عارف ومعاصر كل الأحداث عشان كدة بقى أهم عنصر لكن شهادته براها ما كفاية عشان كدة الضابط ما أدان الزاكي بي أي حاجة توقعاتي إنه ستنا مشت للدكتور زعلانة وبتقول ليه إنت بوظت حياتي وحياة الحلة وعليك الله امشي خلينا، وبالصدفة المر شافها ولحقها وحصل زي اعتداء خفيف على الدكتور وطلعوا جروا بعديها جاء عباس قتل الدكتور
Quote: بامانة يا احمد انت زول فنان ياخ انا لو منك يا بقيت ممثل يا مساعد مخرج
أثنّي،
ومتأكد جدا انه ناقد جيد للنصوص السينمائية والتلفزيونية..
إلى الأمام...
Post: #44 Title: Re: مسلسل دغوتات للنجم جلواك .. وحينئذٍ جاطت Author: osama elkhawad Date: 10-02-2020, 04:49 AM Parent: #43
يا استاذ احمد سلامات
تمتلك ثقافة مشاهدة عالية.
لو كل مرة تكتب لنا عما يدور بخاطرك حول السينما او المشاهدة الفنية عموما،
سترسم لك طريقا متفردا في المنبر،
وسنستفيد من معلوماتك وذكائك..
حاولْ ولن تخسر ،
بل نحن سنكون الرابحين..
خالص الاحترام
Post: #45 Title: Re: مسلسل دغوتات للنجم جلواك .. وحينئذٍ جاطت Author: keiga2000 Date: 10-06-2020, 08:35 AM Parent: #44
وصلنا وين في الحلقات
ابومصطفى
Post: #46 Title: Re: مسلسل دغوتات للنجم جلواك .. وحينئذٍ جاطت Author: أحمد محمد عمر Date: 10-06-2020, 08:54 AM Parent: #45
حبيبنا أسامة الخواض شكراً على اشادتك لكن وحاة الله أنا ما عندي الخبرات الانت خاتيها دي :) لو عندي قدر دة كان بتلقاني منفوخ .. ما شايفني بدخل بوستات الكمبيوتر والجامعات فارد عضلاتي كيف وحاتك هسة لو ظهر لينا عضو متخصص في الدراما هنا يطلعني ليك عنقالي من قولة تيت .. ويقول لي عليك دينك اتكلم في مجالك ما تخرب لينا الاتعلمناهو في الجامعة :) هسة أخوك عامل فيها سمّيع غناء وذواق وبتحكر في بوستات الفن جاء أحمد يس طلع لي صوت محمود عبد العزيز وصلاح مصطفى واحد .. والله صحي ياخي في ذائقتي الفنية ولا حواء وآدم ما يلموا لي صوت صلاح الحنين الرفيع مع صوت محمود القوي الأجش
كيجا وباقي المشاهدين اليوم يسدل الستار على لغز جريمة قتل الدكتور اليوم الحلقة الأخيرة في المسلسل توقعات الغالي شكلها طلعت آوت الورقة الطلعوها أمس في نهاية الحلقة احتمال كبير تطلع لي ستنا برة القضية ويبقى جزء من توقعي برضو طلع آوت لكن لسة أنا مصر على رأيي
جلواك إبداع لليفة قاليهو "ول زيطك دي ما بتنفع؟" 😂😂😂
كاتب الحوار لمح كم مرة لإنو الجريمة جماعية العمدة يمثل السلطة الفاسدة وعباس والزاكي وقرض تمثل أدوات السلطة الفاسدة من أجهزة أمنية وشرطية ومؤسسات إقتصادية الدكتور يمثل الطليعة المثقفة بقدراتها العلمية والعملية وإنتهازيتها في التطلع لسرقة مكتسبات الشعب المر والفريع ورقية وستنا وسمسمة يمثلوا الشعب الواقع بين سندان السلطة الفاسدة والطليعة المثقفة الإنتهازية الشعب يساق غصباً عنه ودون أن يدري إلى التحالف مع السلطة الفاسدة لتنفيذ جريمة جماعية وإغتيال الطليعة المثقفة تحقيقاً لمصالح السلطة.
Post: #49 Title: Re: مسلسل دغوتات للنجم جلواك .. وحينئذٍ جاطت Author: أحمد محمد عمر Date: 10-06-2020, 02:07 PM Parent: #47
طبعاً لسة الموضوع ما اتحسم .. لكن لو صدق بجي بنطط ليكم هنا :)
زمان بعد جابوا لي أول ولد بقيت اتفاصح على أي زول يلدوا ليه بنت .. أشبكوا ليك انتو ماا ناس برندات ساي ما بتعرفوا درب الأوض :) في الشغل عندي غرام خاص مع الخالات الفرّاشات (عاملات النظافة) .. بعد الفطور عندي كباية جبنة ثابتة معاهن بلقاهن منتظراتني بيها بخت لي كرسي في البرندة قدام مكتبهم بشرب الجبنة واقرّق معاهم أها في الحمل التاني كل مرة يسألني ولد ولا بنت؟ وانا أقول ليهم البجيبوا ربنا كلو خير :) يومي العملت الموجات الصوتية وطلع ولد جيتهم وقلت ليهم عملت الموجات .. طبعاً الشمار ماكلني لازم اتشو أها بس القاسية سؤالهم ولد ولا بنت؟ وقمت ليك علي حيلي وبقيت أكورك فيهم : أفففو!! دة سؤال تسألوهو؟ بتاع بنات أنا؟ أنا قعد اجيب بنات؟ حصل سمعتوا بي جبت بت؟ شوفوا بتاعين البنات ناس استاذ مصطفى واستاذ محمد ديلك الما بعرفو درب الرجال وملوا البيت نساوين لكن نحن هييييع رجال بس غيرهم ما بنعرف :) طبعاً بقوا يتضاحكوا فيني شوووفوا المحتاااال أيامه دي كلها مسيكيييين يقول ليك البجيبو ربنا هسة من عرفه ولد بقى يتفرعن
Quote: اصلاً يا عمك منطقياً كدا لازم الاشرار هم من يدفع الثمن
إلا مسلسل أقمار الضواحي العمل الوحيد الكان مغرق في الواقعية لدرجة هزم كل الخير الموجود في البلد وخلى الشر ينتصر قاسم أبو زيد مبدع لكن غياظ ياخ سباعي بطل المسلسل الاستاذ المثالي البمثل الخير والطيبة بكل معانيها خت ليك فيه شاكوش قدر الضربة ونهاية المسلسل جدع الطبشيرة وفرش هدوم في واطات السوق رافعن ويكورك بي أسعارهن
Post: #50 Title: Re: مسلسل دغوتات للنجم جلواك .. وحينئذٍ جاطت Author: أحمد محمد عمر Date: 10-06-2020, 02:11 PM Parent: #49
Quote: الدكتور يمثل الطليعة المثقفة بقدراتها العلمية والعملية وإنتهازيتها في التطلع لسرقة مكتسبات الشعب
أنا طبعاً بحضره في السينما لااااايف كدة حااار من نارو ومعاي زي 3000 نفر بكونوا حارسينو وبتونسوا في المدرجات أثناء العرض أول اعلان مقتل الدكتور كانت التعليقات أثناء العرض كلها (الفريع جازف الكوز)
Post: #51 Title: Re: مسلسل دغوتات للنجم جلواك .. وحينئذٍ جاطت Author: أحمد محمد عمر Date: 10-06-2020, 06:26 PM
Post: #52 Title: Re: مسلسل دغوتات للنجم جلواك .. وحينئذٍ جاطت Author: احمد عمر محمد Date: 10-06-2020, 06:53 PM Parent: #51
كنت اشوف الفريع هو الضائع وسط الزفة لانه برغم تعلقه بستنا هي مالت الدكتور والدكتور تعلق برقية التي كان تعلقه بالمر اكبر فكده كده الفريع كان بره اللعبة الحلوة وستنا اتورطت بفتنتها بالدكتور لذا المفاجأة تكمن اليوم حول الفريع أو رقية لأن المر وستنا طلعوا شبه براءة حسب شهادة الزاكي والتي حسب وصفي لها ليست دليل وتبين تسرعه من اتهامه لستنا التي اتهمها كأول متهمة وبالتالي كل افاداته سيتبين خطلها تباعا لكننا اظن اليوم سنرى مفاجات ربما يكون العمدة طرفا فيها
Post: #53 Title: Re: مسلسل دغوتات للنجم جلواك .. وحينئذٍ جاطت Author: أحمد محمد عمر Date: 10-06-2020, 07:23 PM Parent: #52
نهاية بايخة شديد طبزوها في النهاية
قالوا في جزء تاني ما عارفهم حيغيروا رأيهم في نهايتهم البايخة دي ولا كيف
Post: #55 Title: Re: مسلسل دغوتات للنجم جلواك .. وحينئذٍ جاطت Author: أحمد محمد عمر Date: 10-07-2020, 05:53 AM Parent: #54
هو البزعل إنه النهاية جات بالتلاتة الما بعرفوا يمثلوا لكن النقطة الإيجابية إنه الضابط الرباطي العوير وتحقيقاته الدائرية ما كان عندها أي دور في القضية
3 أنفار يدخلوا البيت بنية القتل وكلهم يحمل مشروع قاتل بداخله .. وربنا ما يوفقهم :)
المخرج خلى كمية من المواقف محتاجة تفسير زي إنه المر وستنا داسين شنو؟
في معلم كبير من جماعة المدرجات اتنبأ بالنهاية دي قبل نهاية الحلقة .. كاتب ما معقول يكون في تركيز شديد كدة على بتول وهي بتفكر مهمومة بدون ما يكون عندها دور في القضية وما ممكن بقة دة يكونوا جايبينو المسلسل عشان يحب بتول يومين ويختفي ساي كدة بدون ما نعرف عنه حاجة
Post: #56 Title: Re: مسلسل دغوتات للنجم جلواك .. وحينئذٍ جاطت Author: احمد عمر محمد Date: 10-07-2020, 08:48 AM Parent: #55
اعتقد المخرج لمن اتوسعت الدائرة عنده تكل النهاية على ابن اخت العمدة وخارج نفسه والا ما ممكن شخص دوره اقل من ثانوي يكون مركز الأحداث وعلى قولك حينئذ جاطت
Post: #57 Title: Re: مسلسل دغوتات للنجم جلواك .. وحينئذٍ جاطت Author: امجد الجميعابى Date: 10-07-2020, 11:45 AM Parent: #56
المؤلف و المخرج ابن عمي مدثر حسن أحمد شاب صغير و مجتهد ربنا يوفقهم جميعا
Post: #58 Title: Re: مسلسل دغوتات للنجم جلواك .. وحينئذٍ جاطت Author: Hafiz Bashir Date: 10-07-2020, 11:51 AM Parent: #57
عطفاً على مداخلتي الفاتت، المؤلف والمخرج قصد يقول أن الحوار بين السلطة والشعب والطليعة المثقفة في السودان تحسمه في النهاية عقليات طفولية غير ناضجة.
Post: #59 Title: Re: مسلسل دغوتات للنجم جلواك .. وحينئذٍ جاطت Author: أحمد محمد عمر Date: 10-07-2020, 12:32 PM Parent: #58
مداخلتك الأولى احتمال يكون فكر فيها لكن علي الحلال التانية دي مافي زول بفكر فيها :)
قريبك يا أمجد مبدع حقيقي اتمنى يواصل طوالي وما يقيف .. بلغوا إشاداتنا وبرضو بلغوا زعلنا من النهاية :)
والله يا أحمد عمر أنا من البداية شكيت في موضوع عباس دة .. إنه سايق الناس في اتجاه عباس مخصوص عشان يفاجئهم في النهاية بي إنه برة الموضوع
