Post: #1
Title: ما هو مبلغ خوفك من كورونا
Author: حمد عبد الغفار عمر
Date: 09-17-2020, 11:26 AM
11:26 AM September, 17 2020 سودانيز اون لاين
حمد عبد الغفار عمر-
مكتبتى
رابط مختصر
السلام عليكم
اعزي كل من فقد عزيزا
كورونا في بدايتها دبرست بينا وكرهتنا الحياة
لم ارى مرضا ادخل الخوف في كثير من الناس مثلما فعلت كورونا
|
Post: #2
Title: Re: ما هو مبلغ خوفك من كورونا
Author: حمد عبد الغفار عمر
Date: 09-17-2020, 11:31 AM
Parent: #1
شخصيا عند اشتداد الجائحة واعلان الحظر لم آكل لحم او خضروات او اي منتج مكشوف لمدة شهر ونص
تعطل لدي مكيف وخوفا من ادخال عمال قمت بتغييره بنفسي بواحد احتياطي موجود لدي . تخيلوا نزلت ورفعت مكيف 24 وحدة براي بمساعدة بسيطة لا تذكر من ناس البيت
هههه
|
Post: #3
Title: Re: ما هو مبلغ خوفك من كورونا
Author: Elhadi
Date: 09-17-2020, 12:13 PM
Parent: #2
أخونا حمد ـ تحياتي
أنا غايتو ما كنت خائف قدر داك ـ شغال عادي، أصلاً ما وقفت خالص طوال فترة اشتداد الوباء وانتشاره، كنت بدخل وأمرق وأتحرك عادي ـ مع اتباع الحذر الشديد طبعاً ـ ياهو يعني محافظ على التباعد الاجتماعي زي ما قال الكتاب ـ لا بقرب من زول لا بخلي زول يقرب مني
لكن خوف ما كنت خائف على نفسي صراحة بقدر خوفي على الأطفال ـ ناس البيت ـ فبكون أشد حذراً لما أخلص شغل وأرجع البيت..
الملابس المرقت بيها من البيت ما بدخل بيها البيت تاني (عندي قراش ملحق بالبيت خاتي فيهو غيارات فبدخل من هناك )
وأي حاجة داخلة معاي البيت (حرفياً أي حاجة) لازم تتنضف وتتعقم قبلي ما أي زول تاني يلمسا : مفتاح العربية ـ التلفون بالذات ( مخرب لي تلفونين في الفترة دي بالمعقمات والمنظفات) ـ أي أغراض أو مشتروات جاية معاي برضو لازم تتتمسح وتتعقم
|
Post: #7
Title: Re: ما هو مبلغ خوفك من كورونا
Author: حمد عبد الغفار عمر
Date: 09-18-2020, 07:01 AM
Parent: #3
مرحب بيك الهادي
الخوف من كورونا كان ولا زال بتشكلو مجموعة محاذير متداخلة مع بعضها
الخوف من الاصابة الشخصية اولا وتانيا الخوف الاكبر من انو تكون سبب لنقل الاصابة لناس قاعد معاهم ما عندهم ذنب غير انك الشخص المسئول من توفير احتيجاتهم ولا زالت المحاذير موجودة
عشنا ايام صعبة بشكل ما عادي
|
Post: #4
Title: Re: ما هو مبلغ خوفك من كورونا
Author: محمد مجيدو
Date: 09-17-2020, 12:14 PM
Parent: #1
حمد لبد ...
الخواف رباء عيالو ..
قلت لي نزلت المكيف برااك ؟؟؟
عااالم بطاالـــــــــــــــــــــة
|
Post: #5
Title: Re: ما هو مبلغ خوفك من كورونا
Author: Asim Ali
Date: 09-17-2020, 02:31 PM
Parent: #4
سلام عليكم
صدق او لاتصدق لم البس كمامه طوال فتره الاغلاق وحتى الان اولا لندرتها وبعد ما اتوفرت اشتريت واحده وقاعده ما استعملتها حتى الان رغم حوفى من المرض وحرصى هلى التباعد الاجتماعى بقدر الامكان لكن حننت تلاته حاجات البصل والليمون والقرض واحيانا التوم
|
Post: #6
Title: Re: ما هو مبلغ خوفك من كورونا
Author: Ahmed Yassin
Date: 09-17-2020, 04:15 PM
Parent: #5
عمك سوداني دنقلاوي مواليد الخمسينات..رجل فاضل.يسكن جدة
وفي غرفة واحدة مع ابنه في العشرينات وقريب لهما
مرة مرة بمشي اسلم عليهم لانهم جيران... لقيت عمك عيان وقال مشى الدكتور وقال عندك جرثومة معدة
وقبلها بكم يوم كلهم مشو عملوا فحص كرونا وجاتهم رسائل بان النتيجة سلبية ولا توجد كرونا.
اصريت انه اوديهو نفس المستشفى ركب معاي هو وابنه. الدكتور طلب فحص دم واشعة للصدر
لقو حرارته عاملة،(٣٨.٥)المعمل قال نتيجة الدم بعد ( ساعة ونصف).. طلعنا للدكتور .. منعه من دخول الغرفة
وادخلني انا وقال تعال شوف وراني في شاشة الجهاز صورتين للصدر وقال ذي از لايك ( كرونا) وحولنا الى مستشفى
تاني .. قالوا مافي سراير فاضية في العناية من مستشفى لمستشفى نفس الموال، مشينا ( مستشفى ميداني) خاص بالكرونا . قالوا لازم تحويل وبالاسعاف ورجعنا عملنا تحويل ومن الشارع اتصلت على اسعاف الهلال الاحمر لان عمك عنده ضيق نفس. والاوكسحين قالوا (٨٠) فقط... جاء الاسعاف والحقيقة المسعف ما قصر ادخله مستشقى حكومي الان بعد اكثر من شهر عمك شفى والحمد لله.
معليش على الاطالة .. لكن انا كنت مقعد عمك قدام جنبي . واصلا ما خفتً.
[Profile] [Edit]
|
Post: #9
Title: Re: ما هو مبلغ خوفك من كورونا
Author: حمد عبد الغفار عمر
Date: 09-18-2020, 07:14 AM
Parent: #6
مرحب عاصم علي
الكمامة بتضايق شديد واحيانا بتسبب وجع حلق ومشاكل تنفس خصوصا لو الزةل ببذل مجهود محتاج فيهو لزيادة اكسجين . لكن تبقى صمام امان بدرجة كبيرة خصوصا في بيئات عمل ظهرت فيها اصابات
انا امس اليوم الوحيد نسيت اشيل كمامة اضطريت اشتريتها من بقالة في الشارع
|
Post: #8
Title: Re: ما هو مبلغ خوفك من كورونا
Author: حمد عبد الغفار عمر
Date: 09-18-2020, 07:06 AM
Parent: #4
هلا مجيدو
نزلتو وطلعت واحد بدلو . طبعا التنزيل صعب جدا
لكن طبعا استفدت من خبرة الباكستان انك تشيل في ضهرك وانت نازل وطالع
الله لا كسبهم الصينيين دخلوا فينا خلعة ما حصلت 😂😂😂
|
Post: #10
Title: Re: ما هو مبلغ خوفك من كورونا
Author: حمد عبد الغفار عمر
Date: 09-20-2020, 09:57 AM
Parent: #8
مرحب احمد ياسين
انت فارس شجاعي ياخ كورونا دي خوفت عمك ترامب شخصيا
الحذر مطلوب ما بالضرورة خوف
|
|