Post: #1
Title: اتصل بشركة الجوال و اطلب port protection على رقمك
Author: النصرى أمين
Date: 09-08-2020, 04:37 AM
04:37 AM September, 07 2020 سودانيز اون لاين
النصرى أمين-كالغرى, كندا
مكتبتى
رابط مختصر
لا استطيع الدخول على حساب ال PayPal الا بعد استلام رسالة خطية على الجوال
فيها رقم سرى.
لا استطيع الدخول على الايميل (من كمبيوتر البيت) الا بعد وصول كود على الجوال.
تقريبا كل التطبيقات المالية تستخدم رسائل الجوال خط دفاع اساسى ..
حتى الفيسبوك يرسل ارقام دخول سرية عن طريق الجوال.
طيب اتخيل الهاكر استطاع السيطرة على جوالك 🥶🥶🥶🥶🥶
كيف يفعل ذلك ؟
ممكن يتصل بشركة الإتصالات منتحل شخصيتك و يطلب تحويل الرقم الى شركة منافسة .
مثلا ..انا مع شركة روجرز ....شخص لديه كل معلوماتى الشخصية ؛ يتصل بالشركة و يطلب منهم تحويل الرقم الى شركة بيل كندا...
اذا تم ذلك ...ذلك الشخص يسيطر على الحساب و اخرج انا بقد القفه....
بعدها يسيطر على الايميل و رسائل الواتساب الشخصية و حساب ال PayPal و تستمر الكوارث.
الحل بسيط
اتصل بشركة الجوال و اطلب منهم وضع خاصية ال port protection على رقم جوالك ؛ اهم شيء تقول لهم انك
تتعرض لتهديد من هاكرز و انك خايف تفقد الحساب.
هذه الخاصية مجانية ؛ فقط عليك بطلبها من شركة الإتصالات....
افعل ذلك بكره و لن تندم ....
|
Post: #2
Title: Re: اتصل بشركة الجوال و اطلب port protection على رقم
Author: النصرى أمين
Date: 09-08-2020, 04:44 AM
Parent: #1
الكلام ده لناس كندا و امريكا.
ناس السودان ، ما عندى فكره والله
|
Post: #3
Title: Re: اتصل بشركة الجوال و اطلب port protection على رقم
Author: Abureesh
Date: 09-08-2020, 05:32 AM
Parent: #2
| Quote: ناس السودان ، ما عندى فكره والله |
عندك فكرة لكن ما عاوز تقولها عشان البوست ما يتفلت هههههههه
كيفك يا النصرى..
|
Post: #4
Title: Re: اتصل بشركة الجوال و اطلب port protection على رقم
Author: النصرى أمين
Date: 09-08-2020, 01:38 PM
Parent: #3
سلام يا محمد
فعلا ..عندى فكرة لكن مستحى اقولها وهى
تكنولوجيا الإتصالات لم تصل السودان بعد ...يعنى جوالك اتسرق ؛ شريحتك راحت
مافى اى مشكلة ؛ تمشى اقرب كشك و تشترى شريحة جديدة و على مهلك..
لا عندهم Paypal لا عندهم كرديت كارد لا عندهم كريبتو كرنسى
نوثنق
منتهين ههههههه
|
Post: #5
Title: Re: اتصل بشركة الجوال و اطلب port protection على رقم
Author: ابوحراز
Date: 09-08-2020, 02:27 PM
Parent: #4
ياخي والله إنتوا ناس طيبين جدا
نحن لمن الموبايل يتسرق
طوالي نمشي للفكي نحوطو
قبل أسبوع عندنا حبوبة جوالها اتسرق
والمشكلة هو ريبيكا
يومين الحاجة بدون موبايل
وهي بتتلقى الاتصالات يومياً من أولادها وبناتها واحفادها
اها واحد من اولاد بناتها قال ليها
يمة اديني 100 الف بالقديم عشان نحوطو عند فكي أبكر
الشافع شال القروش وقال الفكي وعده بارجاع الموبايل
انتظروا الجماعة يومين ولم يظهر الموبايل
اها عندنا واحد ببيع الموبايلات القديمة
مشينا ليه وقلنا ليه ياخ الحاجة دي عايزين ليها موبايل مستعمل
قال موبايل الحاجة ذاتو قاعد
اشتريتو قبل كم يوم لانو الزول الباعو قال عاوزين نشتري ليها واحد جديد
تصدق السرق الجوال وباعو
هو نفسه القال عاوز 100عشان يمشي لفكي ابكر
قال(port protection) قال
|
Post: #6
Title: Re: اتصل بشركة الجوال و اطلب port protection على رقم
Author: محمد البشرى الخضر
Date: 09-08-2020, 04:10 PM
Parent: #5
طبعا يا نصري قوقلت بورت بروتيكشن دي عشان افهم طلعت مسلسل وفي الموسم التالت كمان!
|
Post: #7
Title: Re: اتصل بشركة الجوال و اطلب port protection على رقم
Author: النصرى أمين
Date: 09-20-2020, 01:47 AM
Parent: #5
معذرة يا شباب على التاخير في الرد رغم أهمية الموضوع!
ابوحراز يا مرتاح
مستمتعين بقصصك الظريفه والله .
التحذير فى البوست ليس مقصود منه فقدان الجوال او سرقته ، لان العضم نفسه لا يمثل
اهمية كبيرة فى حماية صاحب الجوال.
سرقة الحساب هى الخطر المقصود .
اتخيل حبوبتك دى لمن فقدت جوالها ، الحرامى استطاع الاحتيال على شركة الاتصال و حول رقم شريحة
حبوبه الى نفسه و بالتالى اصبح المالك الحقيقى للشريحة و كده بقى امتلك حساب الحبوبه فى الواتساب .
حتى لو الحبوبه استردت الجوال المسروق ، لا فائدة من استرجاع حساب الواتساب لانه مربوط بالشريحة وليس العضم (الجوال )
فى حالتنا نحن سكان العالم الأول نشاطنا كله فى الإنترنت يعتمد كليا على رقم الشريحة
مثال :-
الدخول الى الايميل يعتمد على رسائل الموبايل.
كل الأعمال المالية و المصرفية تعتمد على رسائل الجوال.
تحميل معظم التطبيقات الحيوية يعتمد على رسائل الجوال.
|
Post: #8
Title: Re: اتصل بشركة الجوال و اطلب port protection على رقم
Author: النصرى أمين
Date: 09-20-2020, 01:53 AM
Parent: #7
كلامك صحيح يا ود البشرى ، المصطلح غير معروف ، حتى قوقل لا يوجد تعريف واضح ل port protection
لكن لو اتصلت بشركة الجول طوالى يعرفه انت تقصد شنو !
انا اتصلت بشركة الجوال و طلبت الحماية بمنع تحويل حساب الشريحة الى اى شركة أخرى.
الطلب يحتاج ثلاثة ايام للنتفيذ .
الأن فقط أشعر بالأمان .
طالما حساب الجوال باسمى تانى مافى مشكلة ، حتى لو فقدت الجوال ، ما مشكلة.
|
|