جيتو يا خيبة رجانا جيتو يا وجع المنافي

Post: #1
Title: جيتو يا خيبة رجانا جيتو يا وجع المنافي
Author: Ali Alkanzi
Date: 08-19-2020, 08:11 AM

08:11 AM August, 19 2020
سودانيز اون لاين
Ali Alkanzi-Sudan
مكتبتى
رابط مختصر

يوم طلعنا
كنا قايلين بكرة أجمل
وكنا فاكرين
انو بالتغيير حنوصل
يوم طلعنا
كنا شايلين الاماني
للوطن مستقبل افضل
واعتصمنا
وما انهزمنا
ولا انقسمنا
وقلنا يرحل
الا يرحل الا يرحل!
وقام رحل
جيتونا انتو
جيتو يا خيبة رجانا
جيتو من وين لي اذانا
ولي عذابنا ولي شقانا؟
وين كلامك
يا (سنعبر)؟
يا (سنصمد)
يا (سنصبر)؟
ووين وعودك بالتقدم
ولا قاصد بالتأخر؟
ووين (حنبني)
وما (حنشحد)؟
وبكرة يا سودانا تكبر؟
وموية مافي
وغازنا مافي
وكهربتنا الجيت لقيتها
هسة مافي
وجازنا مافي
لا في بنزين في الطلمبات
لا المصافي
عيشنا مافي
امنِ مافي
وانت شغال لينا سينات
(سوف نفعل)
و(سوف نترك)
ياخي قوم لف
وانت اصلاً كنت لافي
يا الخبير الاحترافي!
كنا عايشين نعمة قبلك
كهربا وموية ومشافي
مواصلاتنا كتيرة وافرة
وكلو بالدعم الاضافي
وجيتو يا وجع المنافي
جيتو يا الوجع الخرافي
وزدتو وجعتنا العلينا
جيتو جوعتونا اكتر
وما قدرتو على البدينا
جيتو خربتو اللقيتو
ويا شماتة الناس علينا