والبعض يقول أن الأبيات لجميل بتاع بثينة وقال المدائني هي لأبي جُندُب الهذلي، والعرب تسمي أبو جُندُب وأبي حشرة وأبو الزفت زاتو . عموماً الزول العمل الحركة دي سغيّل جداً، شنو يعني متوّر الناس من النوم مخلوعين ؤ عامِلّهًم إزعاج عشان يقولهم الحب بكتُل الراجل واللآ ما بيكتلو !!!، سغالة بس ما أكتر ولا أقلّ عشان كدا إتخلعو فيهو ؤ قالولو قبحك الله ألِهذا أيقظتنا ؤ قطعت نومتنا!!!، أيوا بيكتلو ؤ يفجِخ عضامو فجيّخ ؤ يخليهو مجنون يشوّت في الحجار في الشارع، ؤ يكتل ميتينو زاتو . بصرآحة الزول دا سغيّل جداً وأرجو أن لا أكون سغيل مثله قد سببت لكم إزعاج وأقلقت نومكم، عموماً أنا حيران ؤ عندي ليكم سؤال لا يقل سغالة من سُوعال الزول دا، وإن شاء تقدروا تحملوني.
في الآونة الآخيرة تغيبت عن البورد والكتابة لفترة ليست بالقليلة بالنسبة لي حيث أعتبر نفسي كنت مواظباً منذ أن طرقت باب هذا الحوش وولجت، ثم قررت العودة وهنا إعترضتني المشكلة وهي أنني أصبحت عاجز عجزاً تاماً من الكتابة والرد علي مداخلآت الزملاء والزميلآت !!!، وبلغ بي الحد إلي أن فتح بعض الأعضاء بوستات بإسمي وعجزت تماماً من الرد علي من شاركوا في تلك البوستات، عموماً ما زلتُ محتار وطالب منكم المساعدة .
بعض الإخوة زعلو وأظهرو غضبهم ؤ معاهم ألف حق والله رغم أنني تهربت بحُجج قطعتها من رأسي لكن الحقيقة إني صرت عاجز عن الكتابة هنا وأنا الآن بطرح ليكم مشكلتي شاعر بأني مجبور علي الكتابة ؤ راجي متين البوست دا ينتهي ؤ ما عارف شبكت نفسي فيهو ليُه زآتو ؟!!!...
في كل لحظة الواحد يفكر الف مرة يواصل في الكتابة ولا كفاية، وهل الكتابة فيها فائدة ام فقط خسائر واضرار ، الكتابة كمن يلمس. الجمر، غايتو انت زول اديب وكتابتك منها فائدة
انا عافية لك من الرد ، اكتب ال في رأسك.
Post: #12 Title: Re: يا ناس الحوش النايملها شنو، وأنا مغروّد ف� Author: النصرى أمين Date: 08-17-2020, 02:54 AM Parent: #11
نوم شنو يا مدير يا مرتاح ؟
والله ما قادر انوم من السخانه ، حالتى فاتح الشبابيك كلها. متين الشتاء يدخل و نرتاح من الحر ده .. يا مدير ، البورد ده بشتغل بالمزاج ، فى مزاج تكتب و تعلق و تفتح بوست ، مافى كزاج تنسى ، حتى لو كان البوست من صنعك
نصيحة يا مدير ... البورد ده فيهو ناس شغالين بالكورة .. امسك فيهم... في ناس شغالة بالفن و الغناء امسك فيهم ... في ناس شغالة بالادب و الثقافة قصة شعر امسك فيهم.. في الوناسين تونس معهم للآخر البورد جميل في ناس شغالين بالناس ... بس ديل اختاهم بودوك الكوشة اها قصرت معاك؟؟؟
سلام ود المدير عودا حميدا ياكبير ابشر بالخير وواصل المسيير كان فى ضحى أو هجير الحمدلله تم التغير اها رايك شنو يامدير؟ ياخ قوم أخد دش بلاش كلام كتير وأعمل ليك نغير لحكومة الحرية والتغير امكن تصل يا مدير غايتو سميها زى ما تسميها لا خير فى الكبير ولا الصغير
Quote: هل فيكم زول مرّت عليهو مثل هذه التجربة يفيدني ؟...
ههههههههه نسأل الله السلامه لك .... شوف طبعا العربات الجديدة بتستعمل ديجتال كونتاكت في البوبينا والعربات القديمة بتستعمل أنالوق كونتاكت ... غالبا الأنالوق كونتاكت بتاعك عايز نضافه وصنفره ...
Quote: في كل لحظة الواحد يفكر الف مرة يواصل في الكتابة ولا كفاية، وهل الكتابة فيها فائدة ام فقط خسائر واضرار ، الكتابة كمن يلمس. الجمر، غايتو انت زول اديب وكتابتك منها فائدة
والله ما قادر انوم من السخانه ، حالتى فاتح الشبابيك كلها. متين الشتاء يدخل و نرتاح من الحر ده .. يا مدير ، البورد ده بشتغل بالمزاج ، فى مزاج تكتب و تعلق و تفتح بوست ، مافى مزاج تنسى ، حتى لو كان البوست من صنعك
النصري يا مرتاح، إنكرب قدامك تاني 10 يوم من الفاسوخي الجد جد، والله اليوم حايم نُصصصصت نِهار ؤ مادي لساني زي الضب وامِس وحات الله لآصق الكرسي مع الشباك ؤ نايم علني أحظى ولو بربع نسمة والوضع دا للصباح .
يا النصري والله البورد دا تب غلبني، ؤ حيرني زاتو !!!، غايتو عم بحاول يا زلمي . خليها تبرد شوية ؤ نجي نمشي فهد الباكستاني بمزاج ...
Post: #23 Title: Re: يا ناس الحوش النايملها شنو، وأنا مغروّد ف� Author: ترهاقا Date: 08-19-2020, 02:35 AM Parent: #22
تكون وقفت من اكسير البلح ، ما توقف مرة واحدة ، شوية شوية والف حمد الله على السلامة
عادي، انا جات مرحلة ما بهوب بجاي زاتو، هسا بقينا نخرتو باخدرو، غير المزاج، ولما يحكم تعال، والا خليك بعيد، وفي الحالتين انت في القلب مقيم وفي الخاطر صابيها،
Quote: نصيحة يا مدير ... البورد ده فيهو ناس شغالين بالكورة .. امسك فيهم... في ناس شغالة بالفن و الغناء امسك فيهم ... في ناس شغالة بالادب و الثقافة قصة شعر امسك فيهم.. في الوناسين تونس معهم للآخر البورد جميل في ناس شغالين بالناس ... بس ديل اختاهم بودوك الكوشة اها قصرت معاك؟؟؟
ما قصرت معاي يا عزيز دنياي . جيّب أضانك أخاليّك، إنت براك مختفي ...
الرطوبة يا ود عمتي، خلي بالك أنا قربّت ألحق حبوبتي فاطنة بت ميدوب الله يرحما .
أنا زاتي صلعة، ما عندي شعر يا عاطل ؤ تعال أناقشك . بعدين يأخ نحن سمعنا بنص رغيفة، نص شري، نص رطُل، نُص البلد، لكن نُص دُبُر دي يطرشنا !!!، كدي النسعلك يا شيخنا الدُبُر دا بيقسمو النُص كيف ؟!، غايتو جِنِس مِحن !!!...
Quote: سلام م م د عادي جداً، كلنا، في ناس لما يغلبها بترد بي وشوش أو نجوم، زي المدعو ابوحسين 😀😂و ناس بتغير الموضوع أو تحكي قصص و نكت، يعني مافي زول مثالي و عارف كل حاجة و مزاجو رايق 24/7 زي الروبوت. أسهل تتداخل في بوستات الآخرين لغاية ما (يلح) عليك موضوع ما، فتفترع بوست، فترد.
سلامات د، ن ع . شكراً علي النصيحة الغالية، بَس عليك الله في داعي تجيبي سيرة أبو حسين، أصلك لازم تطبظيها، عموماً سوف أعمل بنصيحتك لعلها تلفِق ...
Quote: سلام ود المدير عودا حميدا ياكبير ابشر بالخير وواصل المسيير كان فى ضحى أو هجير الحمدلله تم التغيير اها رايك شنو يامدير؟ ياخ قوم أخد دش بلاش كلام كتير وأعمل ليك نغير لحكومة الحرية والتغير امكن تصل يا مدير غايتو سميها زى ما تسميها لا خير فى الكبير ولا الصغير
شاعرنا الحبيب صديق، ألف شكر لك علي هذه الإلياذة أو فالنقل الخريدة التي رفعت روحي المعنوية وجعلت نشوة الكتابة تدب في أناملي كدبيب النملة الزرقاء في الليلة الظلماء فوق الصخرة الصماء . إنني من شدة فرحي بهذا النهج الأوديسي أطيرُ في الفضاء أُحلقُ أو كما قال الشاعر .
حاولتُ مجاراتها لكن إستعصى عليّ ذلك، فمعذرة ...
Post: #34 Title: Re: يا ناس الحوش النايملها شنو، وأنا مغروّد ف� Author: محمد مجيدو Date: 08-20-2020, 09:30 AM Parent: #1
يا مراحب يا ود المدير ,,,, وكل سنة انت واسرتك بخير ,,,
الحالة دي عامة ما برااك .. بس خفف من اكل الفووول بالجبنة ... وقلل من البتاع دااك ... تكون في السليم ,
عليك الله انا اكون في كندا بلد المُز والرز البيدخلني سودانيزاونلاين محل صديق وعيييييك شنو؟
عدم القدرة دي زاتها بتكون عقاب رباني ليك عشان رفسك للنعمة ..
متلك متل قصة صاحبنا الحقيقية دي :
زولاً لينا من كنور امورو ظبطت وبحبح وبقى في نغنوغة من العيش ورخاء نواحي السوق العربي الخرطوم.. وبقى راسمالي يُشار ليهو بالبنان .. وعندو أخوهو ود أبوهو من قام في الدنيا فارش كيمان خضاره في ملجة اتبرة ومرتاح ومبسوط ومكتفي بالعنده.
أها ياسيد اللمنتي ليك قوم يا الجماعة شبكو الراسمالي يآخي عيب والله أخوك دا يكون فارش طماطم ورجلة في هجيـرة اتبرة وانت زول مرتاح الناس بتشيل حالك ساكت يآخ قوم يا التَلب سايس أخوك وتعال افتح ليهو دكان في العربي واملاهو ليهو بضاعة وقعده فيهو .. ولدنا قعد وضربته الكندشة والترطيبة واكل المعلب والزبادي الساقط وبقى وضعه غيـر .. لكن بالمقابل فجأة هضلم وحيلو مات وعوده نشف وبقى زي العيان ليهو سنين من دكتور لي دكتور ومنعيادة لعيادة نواحي البندر والقاهرة ومافي نتيجة.. آخر شئ الحكيم سأله إنت شغال شنو ؟ قال ليهو والله هسع قاعد في دكان في الخرطوم لكن زمان كنت ببيع خدار في سوق أتبرا قال ليهو اشتغلت في الخرطوم متين؟ قال ليهو لي سنة .. بس حوالي 20 سنة فارش خدار في الملجة..
نادى مرافقين صاحبنا قال ليهو شوفو .. الزول دا ما لقينا ليهو مرض عضوي ملموس لكن اصحكم جربو رجعوهو قريته وفرشة خضاره دي زمن إحتمال عدم الشمس مؤثر معاهو..
عليـك امان الله ياود المدير اربعين يوم في الملجة ووسط الكبسيبة وصاحبنا فت زي الحصان قام علي حيله اقوى من اللول .. ولي يوم الليلة قاعد في سوق خداره ولا يشكي شئ سوى عدم شوقه لرؤية الخرطوم الغاليـة ..!
فيا صديقي مشكلتك إنت حاتكون متعلقة بعدم توفر الدُفيَق .. ودا موسم الدفيَق والرطب .. وساعتك البايلوجية والذهنية مشتهية كاضومة دفييفيق ومنها بتروق وتبدع ؛)
Quote: ههههههههه نسأل الله السلامه لك .... شوف طبعا العربات الجديدة بتستعمل ديجتال كونتاكت في البوبينا والعربات القديمة بتستعمل أنالوق كونتاكت ... غالبا الأنالوق كونتاكت بتاعك عايز نضافه وصنفره ...
Quote: عادي، انا جات مرحلة ما بهوب بجاي زاتو، هسا بقينا نخرتو باخدرو، غير المزاج، ولما يحكم تعال، والا خليك بعيد، وفي الحالتين انت في القلب مقيم وفي الخاطر صابيها،
منعم يا صديق لك التحايا النوآضر يأخ . ظرف غريب يا منعم، الرغبة في المواصلة موجودة المشكلة بمجرد ما أفتح اللآب توب بتنزل عليّ غُمّة بقفلو طوالي وأحياناً بغالبها وأسأل الله أن يعينني علي التواصل معكم ...
يا هلآ ؤ مرحبا بمجيدو . وإنت وكل من تحب بألف خير .
والله الفول بالجبنة دا مرقناها في الأسكيمو لقيناهو قدامنا، ؤ ما قادرين نرفع مِنّو الأبنص، أما إن سألتم عن البتاع دآآآك فيا حليل أبوي بقينا ما عندنا ليهو قُدرة لكن سامع لي خبر حُقنة !!!...