ياوراق بحق زمالة البورد تعال اعتذر

09:12 AM August, 07 2020

سودانيز اون لاين
mohmmed said ahmed-
مكتبتى
رابط مختصر

اخونا وراق زميلنا فى البورد مناضل له مواقف مشرفة
وقد كان خبر تعينه واليا مكان ترحيب كبير
هذه الهيلمانة والموكب صاحب المواتر
بداية غير موفقة
بحق زمالة البورد وملحو وملاحو
تعال اعتذر لينا هنا
واركب ليك عربية عادية ومافى داعى للمواتر
راجيك كتير شوف المدارس والمستشفيات وكافح كورونا واعمل حساب السيول والامطار

الاخ محمج سيد أحمد

سلامات.

أعتقد أن حزب الأمة بالولاية له دور في هذا الاستقبال.

موقف مؤسف وصورة ما عندها أي علاقة بالثورة
لكأني بالمستقبلين يهتفون سير سير يا اسماعيل نحن جنودك للتعمير

تنزل ليهم في الواطة وتخاطبهم زي ما عملت والية نهر النيل

تدافع الجماهير بشكل تلقائي
ما مشكلة المشكلة فى السيارة الفاخرة والمواتر الرسمية
يا وراق اقعد فى الواطة مع الناس

سلامات محمد سيد احمد
المواتر الفي الصورة واضح انها ما رسمية ولا الاستقبال شكله رسمي واضح انه شعبي
بالنسبة للسيارة الفاخرة اذا كانت دي الحكومية الاساسا موجودة للوالي من زمان ما فيها مشكلة واذا كانت سيارة خاصة برضو ما مشكلة المشكلة لو تم شراءها مخصوص للوالي الجديد بقروش الحكومة
الاستقبال عادي و ممكن تراجع شريط استقبال دكتورة آمنة وهي داخلة نهر النيل و العربية البرادو و الموكب و الاستقبال الشعبي بس الفرق هي ما طلعت من فتحة سقف

عموما جيد ان يكون هناك رقابة شعبية على الولاة المدنيين حتى لو تطرفت فاحساس انهم ناسنا و نحن الجايبنهم وبنحاسبهم و نتابعهم ومدعمهم كذلك واحد من مظاهر الانتقال الديمقراطي الحاصل و المأمول اكتماله
زمان المواكب الرسمية و العربات الفارهة لا تلقى هذا القدر من الانتقاد دليل انفصال الشارع عن اهل السلطة

آمنة ما واصلت كتير في البرادو لمن لقت الاستقبال فتحت الشباك وأشرت للناس ولمن شافتهم كتار نزلت وقفت معاهم في واطات الله والرسول واتكلمت كلام مسؤول ومتواضع
وراق جابها وارمة بس ناقصاهو العصاية والفنانين البغنوا ليه
أسوأ ما في كلامه اعتبار موكب فتحة السقف حاجة عادية وكمان قال ليك الناس اتلقوهو بين (مادح) وقادح!! منو المادح دة؟
ياخي سبب انتشار الصورة الفايرال دة هو القدح بس ومافي زول بمدح السلوك الإنقاذي دة إلا يكون مشتاق للبشير
أنا شخصياً ما لاقوني المداح ديل .. بالله لو في زول عمل بوست في مدح فتحة السقف ألحقونا بيه

يا (أحدهم) انت عشان ما يبقى غلاط ساي
انت معترض على شنو بالضبط, الموكب و الاستقبال نفسه ولا كونه طلع من فتحة السقف و رد تحية الناس البتحييه

اديك معلومة عن وراق وولاية النيل الابيض تحديدا
من اول يوم قبل أكتر من عشرة شهور وحين تحدث الناس عن ولاة مدنيين ظهر اسم وراق مرشح لولاية النيل الابيض ما من داخل مركزية الحرية و التغيير بل من دخل الولاية نفسه
عدد من القوائم طلعت و اتغيرت اسامي ودائما اسم وراق كان ثابت لولاية النيل الابيض و بجماع تنسيقية الحرية و التغيير في الولاية وكذلك المجلس المركزي , صدرت الاسماء و اثيرت اعتراضات على عدد من الولاة سواء من احزاب او اهل لاياتهم او تنسيقيات الحرية و التغيير, لم نسمع باي اعتراض على تولي وراق للمنصب سوى مناورة حزب الامة بسحب جميع ولاته, وحتى حين ثار هذا الامر كان اكبر اعتراض ومن كثير اهل النيل الابيض انفسهم

يا خوانا ما نكسر مقاديف ولاتنا المدنيين بالحق و بالباطل و بالترصد الذي لايخدم سوى اهداف الفلول و العسكر و كل من ينتظر فشل التجربة
تولي ولاة مدنيين للمسؤولية و رئاسة لجان التفكيك يالولايات اكبر ضربة يتلقاها الكيزان و المتضررين من سقوطهم, نعم هناك تحفظات على المحاصصة وعلى بعض الاسماء وهذا شيئ طبيعي فهذه ممارس بشرية غير شمولية لا يمكن ان يحدث فيها اجماع ودائما ناك صوت رافض ويجب اعتباره, لكن الفكرة في الهدف الرئيس من (تكليف) وليس (تشريف) مدنيين يكملون اهداف الثورة و الانتقال

حشود اصطفت لتعبر عن فرحها
ناس عندنا مواتر وناس راجلين وناس
جارين وحاكم قام يبادلهم التحية والفرحة
بما استطاع له سبيلا .. المشكلة وين هنا ؟
سلام يا محمد سيد أحمد وكل سنة وأنت طيب
........
جرجير أحدهم دا منو ؟

Quote: حشود اصطفت لتعبر عن فرحها

هى وينا الحشود الاصطفت دى ؟؟؟
موكب زى سيره العرس عربات ومواتر وتيت تيت ....والشارع فضى ...حتى الصوره المنتشره اخدها زول ضمن الموكب فى عربيه متقدمه على عربيه العريس اقصد الوالى ماشفنا صور اخدها واحد من الحشود المزعونه على طرفى الطريق
بعدين مع الازمات والامطار دى الفاضى منو يجى للهباله دى
لو زول مسئول من رحم الثوره كان اول ظهور ليهو يكون فى مواطن المشاكل مستشفبات او قرى منكوبه بالامطار او السيول او اجتماع عاجل مع قيادات الولايه ...الناس دايره بيان بالعمل.
.
حكايه ذكرتها قبل كدا لما شفت موكب حمدوك فى زيارتو للصادق المهدى
الجزولى دفع الله رئيس الوزراء الانتقالى فى 85 -الطلع من المعتقل لكرسى الوزاره - مهما كان الموقف منو كنا نشوفو الصباح واحنا فى الطريق للمدرسه راكب مرسيدس سوداء -اظنها سيارتو الشخصيه قبل الاخيره الحمراء- وقدام مع السواق (وبس) لاموكب ولاحتى موتر واحد وبنفس الطريه يرجع الساعه 9 او 10 ليلا تتهادى سيارتو رفيقو السائق ولاتعرفها الا لو نظرت لارقام السياره من بعيد.
كنت اعتقد انو مسئلى انتقاليه الثوره ىناس مواكب وهيلمانه ولايحتاجو حلااسه فابناء الثوره حراسهم فى كل شبر من السودان ....لكن هل صح اعتقادى وحسن ظنى بعدعام من وجودهم فى انتقاليه الثوره ؟؟؟

يا زول ملح وملاح شنو
الزول وصل دايرو ينزل!!!!!!
( العنوان من عنوانو)

في زول شايف حشود في الصورة
ولا مواطنين من شرفات عمائرهم
يمكن اكون كبرت وضعف النظر

الموكب ما نفسه
آمنة كانت داخلة نار .. كمية من التهديدات والمتاريس والدوبيت البتقول ليها كان راجلة تعالي عتبي بلدنا
آمنة كانت داخلة معركة شغالة في الأسافير زي وقائع موت معلن بتاعة ماركيز شئ طبيعي كانت تمشي مع حماية
ناس عدييييل كدة مهددينها باللافتات والصور الواضحة

أيوة فتحة السقف مستفزة وإذا زول متوافق عليه مفروض طوالي يمشي من سكات ويقوم بمهامه عادي موش يمشي بي تشريفة مواتر البشير
إذا كانت دي عقليته زفة المواتر والعربات والطلوع بي فتحة السقف وتحية المريدين ثم بعد داك يقول في ناس مدحوا السلوك دة أنا أول واحد أراهن على فشله
محب الشو دة بذكرني بي محمد الطاهر ايلا اللي لحدي هسة في ناس مخدوعين فيه بسبب الآلة الإعلامية بتاعته
لو جابتو الثورة يا محمد أصلاً ما برضى بالتشريفة دي ولا بعمل الحركة المرتبطة بالإنقاذ والحكومات العسكرية دي

المهم دة تنبؤ من (أحدهم) زولكم دة عقليته ما حقة الثورة .. أمشوا أقدلوا معاهو وانا بنتظركم في اللفة

عرفتو يا تنظير!
اهو يغالطك فييييي اسمك

ياخي وينا المواتر التشريفة دي؟ الله يسألك شفت ليك موكب رسمي فيه موتر سوزوكي سايقه رادف صاحبه معاه!

Quote: زفة المواتر والعربات والطلوع بي فتحة السقف

يا أبوحميد زفة المواتر ما عندو فيها يد
كما هو واضح .. ناس عندها مواتر ملك خاص استقبلوا بيها
الوالي الجديد.. هسة مثلا لو كانوا جوا راكبين حمير هل كان
بكون فيها حاجة ؟
الطلوع بفتحة السقف دي أنا شايفا أحسن من يضيع زمنو
في النزول والركوب كل مرة ينزل لى جماعة يحييهم
ويبادلم المجاملات والهتافات ويركب تاني عشان بعد كمين
متر يعمل نفس الحركة خصوصا وأن الحشود مصطفة طوليا
على الشارع .. أحسن يكسب زمنو وزمن الناس فالعصر
عصر السرعة والانجاز ..
..................
والله أنا شايف دا كلو كلام ساي .. المهم ح يعمل شنو كوالي ؟
دا السؤال الأهم وحقوا الناس تحاسبوا على الإجابة عليهو بس.

Quote: المهم دة تنبؤ من (أحدهم) زولكم دة عقليته ما حقة الثورة .. أمشوا أقدلوا معاهو وانا بنتظركم في اللفة

الموضوع ما فتحة سقف ولا موتر
الموضوع طريقة التفكير اللي حايتم بيها ادارة الولاية

خليك في اللفة لمن يصلوك

يا جماعة خلاص ما في حشود
طيب الناس الراكبين مواتر ديل
والما راكبين القام الوالي دا يحييهم
بمثلها ديل القاصدم أنا ..
.........
عضمة الموضوع هو اختلافي مع وجهات النظر
البتستنكر رد الوالي للتحية .. ( وبرضو ممكن اكون أنا غلط
ووجهات النظر دي الصاح) .. عشان ما أحرم زول من حاجة.

Quote: الموضوع طريقة التفكير اللي حايتم بيها ادارة الولاية

هي لكن الناس شهدوه يا دفعة ولا ادوه فرصة يدير حاجة! الراجل لسة في السكة ما وصل مكتبه و اللخ دور
خلوه يومين تلاتة و تظهر نتائج طريقة ادارته حتى دوروه

ودالبشرى ما يطلبه المستمعين ممكنرتجيب لينا فيديو موكب ندى القلعة في الدورة المدرسية

الاحباب الكرام
يبدو كانت هناك اخبار بموعد قدوم الوالي بالساعة والدقيقة
ولا يمكن للناس ان يجتمعوا هكذا عشوائياً بدون مواعيد وتنظيم
كان مفروض يدخل بسيارة عادية بدون مواعيد وأي تحضيرات

احتمال كان في اعلان :
الوالي سيحضر اليوم الفلاني وفي الموعد الفلاني ... الخ

تحياتي الأحباب ..

بعد الفيديو الجابو عاصم دة لسة ناس المواتر الاتلمت بالصدفة والمستقبلين في روسين البيوت عندهم كلام؟ :)
لكن هي جنس حشود

Quote: خلوه يومين تلاتة و تظهر نتائج طريقة ادارته حتى دوروه

ياخ نحن سالناهو هسي
هو الما ادانا ولا يوم
بعدين وراق ده يا حبيب ياهو مافي حاجة تاني

Quote: احتمال كان في اعلان : الوالي سيحضر اليوم الفلاني وفي الموعد الفلاني

ما احتمال
أعلنها هو ذاتو في صفحته
بعد داك المواتر اتلمت بالصدفة وكمية العربات المرافقة ليه برضو اتلمت بالصدفة
وكان في جن واقف على الطرقات ما بظهر في الكاميرات لكن ظهر للوالي وجن راكب في روسين البيوت مما اضطره يطلع بي فتحة سقف البرادو ويحيهو

و الله يا اخوان
مكبّرين الشغلة ساي
كدي زي ما قال ود البشرى :
خلوه يصل مكتبو و بعدها لكل حدس حديس

محمد سيد احمد عساك طيّب

وهو في حدث أكبر من عمر البشير والياً للنيل الأبيض!

Quote: التدافع الشعبي الصادق عفويا وهو تعبير وتجسيد لفرح المواطنين بدولتهم المدنية بعد فصول من الظلم والمعاناة

طيب يا وراق خلاص بحركتك العملتها دي قنعننا من قصة إنو بعد الثورة يتغير مفهوم العلاقة بين المسئول والمواطن.
وقنعنا من قصة إنو الوالي يفهم إنو موظف في الدولة لخدمة الشعب لا للإستعلاء عليهم.
وبنتجاوز عن المعاناة التي يعانيها المواطن من صلف المسئولين البتخيلوا أنهم في درجة أعلى من المواطن تجعل من واجبه أن يحتشد لهم بالهتاف والتصفيق.
وتجاوزنا عن إدعائك بأنك المدنية التي يفرح بها المواطنون وتجاهلك لحقيقة أنهم هم من يحق أن يًحتفل بنضالاتهم التي حققت المدنية.
وكدا فقدنا حوالي 50% من روحنا الثورية,
يلا بس منتظرنك تحافظ لينا على ال30% الباقية دي لغاية ما الله يهدي حمدوك ويشوف غيرك.

ما مصدق انه اتخارج من الفقر .. فرحان ما باقى إلا يقول للشعب الفضل عقبال ليكم .

انتو يا ناس سودانيذ اون لاين لو الواحد بقى والى تمعطوا ريشه كدة .

شكرا محمد البشرى على الملاحظة
المواتر ليست رسمية

الملاحظ ايضا عدم وجود حشود


نقدنا لموكب وراق نابع من حرصنا ومحبتنا لزميل من ايام الوقوف ضد سلطة الكيزان
نتمنى ان تكون الانتقادات اشارات تنبيه
وراق لديه فرصة كبيرة للنجاح ولن نتوقف عن دعمه

Quote: هي لكن الناس شهدوه يا دفعة ولا ادوه فرصة يدير حاجة! الراجل لسة في السكة ما وصل مكتبه و اللخ دور خلوه يومين تلاتة و تظهر نتائج طريقة ادارته حتى دوروه

هههههههههه
نحن من شفع لمن نشوف السحابة وهي لسع ما اتجمعت كويس نكورك فوق ميكائيل
عوووووووووووووووووك كيل يا مكائيل بالربع الكبير

شفقة بت يس السيرتا في مدني فطرت في الكاملين الجميلة
.
.
النقد البناء حبابو ويكون علمي ومؤسسي
تحياتي وسلامي لراعي البوست وكل الضيوف المشاركين مليون سلام

اظنكم قسوتم على الرجل قسوة شديدة بدون داعي،،،،
يعني هو شايف ناس اتلموا وعاوزين يحيوهو ويستقبلوهو بترحاب عشما فيه بانه هو الرجل
المناسب لاصلاح حال الولاية يقوم هو يدسا جوه العربية ولا يقوم يبادلهم التحية ،
مفروض ننتظره للميه يوم الاولى ونحكم عليه بعمله ،،،اذا وفر الخبز للمواطنين ووفر الوقود وقام باصلاح
نظام الرعاية الصحية واتخذ اجراءات صارمة لحماية الناس من وباء الكرونا وقام باصلاح الشوارع في مدن
الولاية الكبرى وقام بفصل اي موظف في الخدمة المدنية لا يقضي حاجات الناس اليومية بالسرعة المطلوبة
فاهلا به وسهلا واليا للولاية والا فليات حمدوك بشخص غيره يستطيع ان يحل مشاكل الناس اليومية ،،