أنا والكرونا خلال إسبوع..

10:53 AM August, 03 2020

سودانيز اون لاين
HAIDER ALZAIN-
مكتبتى
رابط مختصر

الحمد لله قدر وستر ..الواحد حسّ إمورو سلكت من قبل إسبوع ..
ولله الحمد والفضل ..

لكن عموماً أحلف صادقاً إنه فد ملاريايه واحدة من بتاع الجزيـرة تعادل ما لايقل عن عشرة كرونات ..

المشكلة الوحيدة بيبقى إحساسك او خوفك إنك تكون نقلتها لي زول تاني ما مجرّتك بملاريا مدني ..
لكن تاني عااادي .. تنوم بس ..: )

بالله اللحم السنة دي كيف .. في لظاظته ودسامته وحلاوتو ديك والا احلى منه النومة دي ..

البيقول لك الكرونا عندها تأثير سئ على المدخنيين ما يعمم..
عادي.. أصحى من النوم على كباية قهوة وخمسة ستة سيجارات ..
لبيقولك فيها صداع يطرشق الحجر ..صدقه
لكن البيقول ليك جابت لي وجع حلق او كحة أضيق نفس .. قول ليهو ما تعمم..

البيقول ليك بيقدر ياكل ويشرب ويقرأ او يستمتع بشئ قول ليهو ما تعمم..
لكن اليقول ليك فتران وغمران وزهجان زي البايتة معاي سكرة عيش صدقه طوالي..

ذكرتني التلاتة يوم القضيتن في ربك مصنع الأسمنت . :).

حمداً لله على السلامة
كويس إنه ما عندك أمراض مزمنة وإلا كان دخلتك الفتيل

الله يسلمك يا ابوحميد...
شايف في نوع منها بقى اكتر من عادي .. بيفقدك الذوق والشم ويسبب خمول
لكن حتى العندهم امراض مزمنة ما بيكون خطير ..دا حسب الشايفه في بعض الحوليني هنا ..

نسال الله يخفف عن عباده ويشفى المرضى الآخرين ..

قالو بتأثر علي حاجات تانية حامياني اعمل حسابك .... 😂😂😂
حمدا لله على السلامة و اجر عافية ....

احتمال برضو تكون زايغ من حق الخروف ... 😂

الله يسلمك يا ابوحسين

Quote: احتمال برضو تكون زايغ من حق الخروف ... 😂

دا حق الخروف ذااتو لأنه زغت منه قبال اسبوع ..
وفور إعلاني عن الزوغان جات المتتسماش..


أما تلميحك المُشار اليه اليعدي تاني إسبوع ونشوفو يعمم والا مايعمم :)

سلامات سلامات يا حيدروف الصلد وما تشوف
شر أبدا ياخ .
وبالمناسبة كلامك صاح مية المية في حكاية الكورونا
مع الامراض المزمنة دي .. دي اشاعة ساي والدليل
ناس بعرفهم عندهم جميع الامراض دي جاتم وقاوموها
ببسالة وفدائية لغاية ما دحروها شر دحر.. ومش كدا وبس
بل يتخيل لي والله أعلم انو المصيبة دي ما راحت براها
بل شالت من بعضهم مرض مرضين من الأمراض المزمنة دي.

الله يسلمك ويكرمك حبيبنا طلحة...

الشئ دي إلا انواع والله اعلم ..لكن إن بقت ياها الجاتني دي بس فيبقى والله الاغلاق والحظر والجرجرة العملوها في الناس دي ما حبابها..
أصعب مافيها النوم وانسداد النفس..

حبيبنا حيدر .. صحتين وعافية
حفظك الله من كل سوء
وحمداً للسلامة

الله يسلمك حبيبنا علي وكل عام وانت بخير..

والله ياعلي لو ما كان ظهرت النتيجة ايجابية ولا كنت بصدق زاتو عندي كرونا ..
بقت حاجة ميتة ساي ..
السنة الجاية حا تكون عبارة عن نزلة موسمية ..
بيتربحوا من وراها بشر بس..
فيتامينات ومكملات وكلام ماتعرف فايدتو من عدمها ..

النومات الطويلة دي مع الإرهاق والصداع بتكون فيها جنس حلات هضربات ..:)
شئ فنتازيا وشئ خيال علمي وشئ ما تفهم زاتو القصة شنو ..

يعني فجاة كدة تلقى نفسك منحوت جوة حبة رز وإنت على شكل حدة حصان..
مهما تحاول تتمطى تعدل ضهرك أطرافك بتتشقق ويزيد وجعهن. فتفضل تنكمش وتنكمش جوة الحبة لمن تصحى..
الغريبة وقت تقوم تلقى خاتين ليك قدامك صحن مهلبية بي قرفة على شكل سمايل "(

salamtak ya Haydher


tany awaak titkallam fe alsadah

حمدالله على السلامه حيدر
وان شاء الله اجر وعافية وربنا يرفع البلاء والوباء ويعافينا في بدننا وفي سمعنا وفي بصرنا .
وكل سنة انت والاسرة بالف خير وفي دوام الصحة والعافية

آآآمين وانت بالف خير اح محمد يعود باليمن والبركات ويرفع البلاء ...

له الحمد والشكر

الله يسلمك يا ود الشيخ ..

جيرانا 4 عزابة جاتهم كلهم
واحد عندو أزمة ودرتو في يومين لكن الباقين نصحوا

سلامتك يا حيدر ، الف كفارة وكل سنة وانت طيب
البتاعة دي ، الله يجيرك ، شكلها توفيق من الله كما وصف بعضهم "السكرة" ..
ياخي في ناس 3 شهور في التنفس الاصطناعي وبعد داك اتوفوا .. ما تستهون بيها ابدا
سلامتك لكن ما اشوفك حايم في البوست داك ماشي افتحوا
الا يكون معاك شهادة فحص سلبي من جهة طبية معتمدة

الله يسلمك يا عبدالله ادريس وكل عام وانت طيب ..

صحي توفيق .. وكنت بتوفق سريع خلاص

هي اكيد مشكلتها الاكبر مع اصحاب الامراض المزمنة زي ما قيل...
خصيا ما حسيت بيها الاكصدى ملاريا لاولا تعطل الحواس والنوم المتواصل..
ا

حمد الله ع السلامة يا حيدر ..
زي ما قلت الكرونا جات للجميع تقريبا ..
وبتختلف اعراضها من شخص لآخر
شخصيا أخدت معاي 4 يوم
دروختني وبقتني زي الجدادة الضاربا سمير ..

عملت لي عصير ليمون بي قرنفل
مع إنه مر وكريه جدا لكن كنت بكتحو
على الريق الصباح وابقى مارق الشغل
اليوم الخامس بقيت نصيييح ..

صحي حكاية الهضربة دي والله
حياتي ما هضربت كده
وتقوم من النوم مفزوع وخايف

الكرونا شالت ناس كتار ما اتحملوها
لمناعة جسمهم مش لاي سبب تاني
لانه أغلب أصحابي رقدوا
من اسبوع لي 12 يوم في السرير
وقاموا بلا ادوية خلاف البندول او الفلوتاب ..

حمد لله على السلامة اخ حيدر . .
اظن والله اعلم انو الفايروس ده اصبح ضعيف - اذا كان في حاجة زي دي والرأي عند الاخوة الاطباء -
لاني اعرف اربعة اصيبو - في الفترة من رمضان الى قبل ايام - والحمد لله الان بكامل الصحة والعافية واحدهم مصاب بالسكري . .

Quote: لكن عموماً أحلف صادقاً إنه فد ملاريايه واحدة من بتاع الجزيـرة تعادل ما لايقل عن عشرة كرونات ..

نفس الاحساس الا مسخت علينا العيد لكن الكورونا دي اكبر اشاعة ...

حمدا لله ع السلامة يا ود الزين أجر وعافية
زي ما قالوا الزملاء تختلف الاستجابة و الاعراض, بعض الاصدقاء اضطروا ادخلوا العناية المكثفة و ربنا عافاهم و الحمد لله لكن البحكوه عنها صعب صعب
كذلك معانا زملاء في العمل الا الفحص الاجباري العرفهم انهم مصابين لا اعراض و لا اي شي و حتى الاسبوعين القضوهم في العزل ما اشتكوا من اي عرض و من تاني فحص كانت النتيجة سلبية
غايتو اتحسبت ليهم اجازة ساي وروقة

الله يسلمك ياود البشرى وكل عام وانتم بخير ..
فعلاً موضوع اختلاف استجابة او اختلاف سلالة..

انا غايتو بتمنى انها تكون بتعمل مناعة ضد الفيروس عموماً ..

تحياتي

الف حمداً لله على السلام يا ود الزين حيدروف
اجر وعافيه .

لابأس عليك ونحمدالله على سلامتك . لكن اعراضك دي ما اعراض كرونا ماشاءالله حايم في المنبر لا صداع لا حمى

الف حمدلله على السلامة يا زين
و كل سنة و انت طيب
سبحان الله عندنا هنا برغم كل اجراءات الوقاية
الشغلة ماشه كالنار فى الهشيم
قبل اسبوعين كان عندى محكمة تمت بالتلفون
حكموا على بى مية دولار غرامة
و رسلوا لى قرار المحكمة فى الايميل مع وصلة للتوقيع بالاستلام
شفت جنس الخوف ده
وزير الصحة الاسبانى تعليقا على الموجة التانية الضربت اسبانيا
قال بقت تصيب الزول و ما يكون فى اعراض ليها
يعنى تكون خاميها و توزع فيها و انت ما جايب خبر

سلامات حيدر

الف لا باس عليك..
ان شاء الله بلغت الصحة والعافية..

Quote: نفس الاحساس الا مسخت علينا العيد لكن الكورونا دي اكبر اشاعة ...

مش كدة يا اسامة..
حمد لله سلامتك ويعود عليك القابلة بالتعويض .. :)

سلامات والله يسلمك اخ عمر ..

Quote: اظن والله اعلم انو الفايروس ده اصبح ضعيف -

غايتو ما بفتي.. لكن ان بقت كلها زي الكرونا الجاتني دي فشئ تافه مقارنة بالملاريا والصفير..

تحياتي

الله سلمك ياود القوز.. كل عام وانت بخير وحمد لله سلامة الاتفكيت منها..


قريبنا اصر نجي نعيد معاهو بحجة انه عاني واسرته من قريب من الاعراض دي..
لكن لا غحص لا اشتغل بيها قضاها غرغرة قرض وليمون وجنزبيل.
ارفضت طالما انه ما في فحص.. لكن والله اعلم فعلا سلالات وبتختلف..
اخوي ساكن عزابي جارهم بيزورهم يومي عشاء وكشاتين..
فحصه ايجابي وهم ما جاتهم شئ....

الشغلة ماشة زي ما قالوا الانجليز اول .. مناعة القطيع

تحياتي

HAIDER ALZAIN



الاخ العزيز الفاضل ود الزين
كل سنة وانت طيب ي خي
ألف حمد الله ع السلامة ،
و م تشوف شر ،







عزالدين عباس الفحل
ابوظبي

الف سلامة يا حيدر
ما ظنتى تجيك تانى.... قوم عيش حياتك

أنا والحمد لله من النادر أمرض وحتى لما كانت بتجيني الملاريا زمان ما كانت بتهدلني .. لكن مع بدايات أزمة الكورونا جاتني حالة طبية غريبة كدة رغم إنها ما مؤثرة على نشاطي وممارسة حياتي الطبيعية إلا إنها كانت محيرة
جاري وصاحبي اختصاصي جعل منها همه خاصة وإنه المستشفيات كانت مقفلة وما عندهم شغل وبقى حايم بي من استشاري لي استشاري .. ما خليت لي مكنة أشعة ولا رنين ما اتحشرت فيها وكل الفحوصات سليمة .. لحدي ما آخر حاجة عمل لي قمسيون طبي عديل كدة 5 استشاريين وهو سادسهم ومعاهو جارنا التاني برضو طبيب .. هم يتراطنوا وانا بضحك لأنه ما شايف الموضوع خطير وممكن اتعايش معاهو عادي
نهاية اجتماعهم دة قالوا لي ياخوي شغلتك دي شكلها التهاب فيروسي ما عندو أي سبب
الله! كيف يعني ما عندو سبب؟ في حاجة في الدنيا دي ما عندها سبب!
قالوا لي والله ما عرفنا ليك أي فهم بس كل الوصلنا ليه إنه دي حالة عرضية وبتمشي براها
طيب موش ممكن تجي تاني؟
والله ما عارفين
طيب في أي علاج؟
قالوا لي عندنا ليك علاج واحد بس بنسميهو العلاج السحري هو برندزلون لكن الأفضل ما تاخدو وبعد يومين تلاتة بتبقى كويس
قلت ليهم لا لا أنا بفضل آخدو على الأقل أشوف فعاليته عشان تاني لو حصلت أكون عارف آخد شنو
بس زي ما قلنا ليك إنه علاج خطير و.....
يعني بحتاج أجي المستشفى وعندو فك وتركيب وكدة؟
لا لا حبوب
أكتب حنانه يا عمك
ما بحتاج يكتبوهو قاعد في المستشفى هسة بنجيبو ليك
قلت في نفسي عليك الله شوف ديل! هو علاج قاعد في المستشفى وبشيلوهو عادي كدة شابكني خطير وبتاع :)

بلعت الكورس الأول 40 ملغرام والحالة انتهت لكن قالوا لي ما توقف لازم تبلع تاني 20 ملغرام لأنه لازم يقيف بالتدريج
اليوم داك طالع الشارع لاقاني جارنا الأختصاصي قال لي ماشي وين كدة؟ ووين كمامتك والقفازات؟ انت ما عارف البلد مليانة كورونا؟
ضحكت قلت ليه والله فعلاً ياخ نحن ما بتجينا عوجة لكن الواحد خايف على الشفع ما بستحملو
قعد يضحك وخت يدو في راسه قال لي شفع شنو يا عمك؟
انت بتاخد بردنزلون يعني استيرويد بدمر مناعتك نهائي .. يعني لو جاتك الكورونا ما بنوديك المستشفى بنسوقك المقابر طوالي .. بنخت ليك اللابتوب بتاعك وسيرمس قهوة وأول ما نلقاك اوفلاين بنتصل بناس الصحة يجو يدفنو

أها من ديك بقيت سايق لي صيدلية

Quote: قالو بتأثر علي حاجات تانية حامياني اعمل حسابك .... 😂😂😂

أبو حسين يا حاقد
الف حمد لله على السلامة يا حيدر
وإطمئن المصيبة دي حدها الرئة بس

الله يسلمك الاخ علاء سيد احمد ويمن بالشفاء على كل مصاب .


سلامات الاخ احمد يس..
فعلاً حمى نهائي ما حسيت بيها .. ولا كحة .. بس كان في صداع.. تحياتي


سلامات حبيبنا جلالدونا والله يسلمك..

Quote: وزير الصحة الاسبانى تعليقا على الموجة التانية الضربت اسبانيا قال بقت تصيب الزول و ما يكون فى اعراض ليها يعنى تكون خاميها و توزع فيها و انت ما جايب خبر

عرفت هسه انه معانا نفرين بالمكتب مشو فحصوا ساي بدون ما يشكو وجات نتيجتهم إيجابية
وللآن ما بيعانوا من اعراض..
يعني ديل كانوا مستودع عدوى حايم وسط الناس .. :)


الله يسلمك يا الشيخ والحمد لله له الشكر كامل الصحة والعافية .. ومتفرغين لإدهاش المنبر


تسلم حبيبنا وصديقي الفحل .. وماتشوف شر يارب

Quote: ما ظنتى تجيك تانى.... قوم عيش حياتك

الله يطمنك يامكاوي يآخ وكل عام وانت والأسرة الكرية بخير وعافية ..

Quote: وإطمئن المصيبة دي حدها الرئة بس

الله يسلمك ويطمنك يامولانا ..
أصلاً ابوحسين كخردة هكرة بيكون حاقد .. :)

Quote: ØIMG]

صراحة انا في الوقاية والحاجات دي ماكنت شغال بيها
بعمل وقاية نفسية بس :)

شايف محل علبة المعقم دي كان عندي فد كمامة بختها زي النضارة أملصها والبسها مرات اكتر من إسبوع عشان المرورIMG]https://sudaneseonline.com/db/attention/030_Wink.gif[/IMG]
أغيرها وقت تتوسخ بس ودا كله إعتماداً على مناعتي الذاتية !
بعد زراتني الست كرونا تقول لي ندمان ما اخدت احتياطاتك.. ؟
ممكن أقول ليك لا ..حاجز واتكسر واتفكيت منه ... واتوقع انه اي اصابة فيروسية بتبني مناعة ..


بس ان شاء الله بعدين يدونا شهادة يفكوك من حتة إلزامية الكمامة وقفازات البقالات دي !

ي HAIDER ALZAIN
السيارة مالها ضيقة كدا ؟؟؟؟؟
و الأبواب مكيسة بالكمامات ،
Wonderful







عزالدين عباس الفحل
ابوظبي

حمدلله على السلامة
وشايف في كم واحد من الزملاء الجاتهم الكرونا
ضرب مثل بملاريا مدني في التسعينات
معناها نحن كنا عماالقة في مقاومة تلك الملاريا
العجيبة ..
تحياتي يا غالي

ما ضيقة بس مصورها من وراء
ملبسينها العوازل البلاستيكية عشان كان ركب معانا صاحب كورونا زي حيدر دة نتكافى فيروساته

تسلم يا سيد الكارو وكل سنة وإنت طيب ..

Quote: معناها نحن كنا عماالقة في مقاومة تلك الملاريا العجيبة ..

صحي والله .. ربنا يرحم عمنا الهادي ويُحسن اليه كما احسن الي طلاب الجيلي صلاح ..
اكتر مقاومة كنت ومجموعة بنلقاها من حلة اللبن ليلاً
ومريسة الجير نهاراً .. :)

تحياتي يا الحبيب

الف سلامة اخي حيدر

رغم التطمينات ، الا اننا لا زلنا نعيش الخوف والقلق
حفظكم المولى

تسلم ريسنا الحبيب ابوجهينة
ربنا يحفظكم ويبعد عنكم الشر

تحياتي