ياعثمان موسي الزول دا قطع شك بتعرفو ..عيدية جميلة

10:30 PM August, 02 2020

سودانيز اون لاين
Mohd Ibrahim-مغترب by default
مكتبتى
رابط مختصر

سيد الاسم

كلمات الشاعر الرهيف كامل عبدالماجد ...
والتي تغني بها الراحل أحمد الجابري كان لها أثراً كبيراً في تأسيس قصة حب عجيبة بين مهاجر سوداني وفتاة أمريكية يهودية يمنية الأصل .
فتحولت كراهيتها للطريفي العامل السوداني في متجرهم إلى قصة عشق وإعجاب ثم زواج .

فلنقرأ قصة ما فعلته (سيد الاسم) وفق ما وردت إلينا عبر الوسائط.
هل للأغاني أسرار لدرجة ممكن تغير حياة إنسان رأسا على عقب للتحول إلى 180 درجة؟
أحد السودانيين المهاجرين إلى بلاد العم سام روى حكاية واقعية أقرب للخيال عن أحد الشباب الذي قطعوا دراستهم وهاجروا إلى أمريكا في بداية حياتهم ليبدأوا من الصفر هناك وبكثير من المعاناة.
الشاب اسمه الطريفي، حتى الاسم من الأسماء السودانية البحتة التي تنتشر في الوسط والتي تغنيك عن كثير من الوصف والصفات ورسم الشخصية بالحروف.

قطع الطريفي دراسته الجامعية من بدايتها وهاجر وبعد عناء معتاد وجد فرصة عمل كعامل في أحد المتاجر المتخصصة في الملابس الجاهزة المصنوعة من الجينز.
المتجر تمتلكه أسرة يهودية من أصول يمنية. بنتهم اسمها دانييل مديرة المعرض والمشرفة على الطريفي مباشرة. سنها قريبة من سنه وهي جميلة جداً والطريفي كان معجب بل (مكسر فيها) وفي المقابل هي كانت تكرهه شديد بل معذباه بالعقوبات والخصومات ..

يوم من الأيام تأخر الطريفي عشرة دقايق بس. وهي بعد أن سمعتو كلمتين خصمت من راتبه نصف ساعة..
الطريفي زعل لكن كتمها في حنانو. ولا إرادياً كتب على واحدة من كراتين الجينز التحت يده (مرات أقول أديه كلمة تزعلو )
لاحظت ليه يكتب شكّت وقالت نوع من السحر (أكيد اليهود هم أهل السحر يؤمنون ويعملو بيه أكتر منا)، ولأن العبارة مكتوبة بالعربي وهي ما بتعرف عربي، شالت قطعة الكرتون في غفلة من الطريفي لعمال سودانيين عشان يفسروا ليها المكتوب.
جماعتنا ما قصّروا سمعوها الأغنية كاملة وترجموها ليها سطر سطر.
خلونا نسمعها نحن كمان عشان نعرف سر الغنا الجد
*******
ســـ الاسم ــيد
محبوبي وكتين يبتسم
الدنيا ياناس تنقسم
الفرحه تملاهـا وتزغـرد فيهـا والشـوق يرتسـم
مــرات أقول أديـه كلمة تـزعّلو
حبة عذاب وكلام عتـاب أنا عارفـو ما بتحملـو
علشان أشوف خده الحريـر الدمعـة جاريـة تبللـو
لكنى قبال ابدا بي لحظات أقيف اتاملو
الضحكة واللفتة البتاخد من عيونى النوم شهور وتجفّلو
وأنسى العتاب الكنت ناوي أقولو وأرجع منهـزم
الدنيا يا ناس تنقسم
الفرحة تملاهـا وتزغـرد فيهـا والشـوق يرتسـم
أنا فى العيون ببنيلـو داريـن مـن مـودة ومـن منى
بضمو فى قليبي انبساط ومحبـة فياضـة وهنـا
مـاردت غيـرو ولا هو راد زولا سـواي أبداً أنا
نظراتو كيفـن أوصفـا دى الفي عيوني مدوّنة
همساتو تحنـان القمـارى الراجعة للعُش والجنـا
وتــضـــوّى والــلــيــل يــنــهــزم
وكــتــيــن يــبــالــغ ويـبـتــســم
الــدنــيــا يـــانـــاس تـنـقــســم
الفرحة تملاهـا وتزغـرد فيهـا والشـوق يرتسـم

قال ليك لمن وصلوا للمقطع:
أنا فى العيون ببنيلـو داريـن مـن مـودة ومـن منى
بضمو فى قليبـى انبساط ومحبـة فياضـة وهنـا
مـاردت غيـره ولا هو راد زولا ســواى أبـداً أنا
نظراتو كيفـن أوصفـا دى الفي عيوني مدونـة
همساته تحنـان القماري الراجعـة للعـش والجنا.

وترجموه ليها فما كانت منها إلا أن تدخل في حالة من البكاء (وما عرفوا يسكتوها)..
وبعدها تغيّرت نظرتها ناحية الطريفي. وبارك أهلها العلاقة وهم أيضاً قد أحبوا الطريفي لحبها له وتغيرت حياته وأصبح يواصل دراسته بالمساء ليكمل تعليمه .. وقد ترقى في الوظيفة ليحتل مدير مبيعات في تلك المؤسسة التجارية. ثم لم يلبث ان يتزوجها.
أكيد توجد تفاصيل كتيرة في هذه القصة حتى وصلت إلى هذه النهاية السعيدة .
لكن ما أدهشني حد الاندهاش هو سر الغنا الـذي يحدث نقطة تحوّل بهذا العنف ويقلب الكراهية إلى حب.
••••••••سيد الاسم

كلمات الشاعر الرهيف كامل عبدالماجد ...
والتي تغني بها الراحل أحمد الجابري كان لها أثراً كبيراً في تأسيس قصة حب عجيبة بين مهاجر سوداني وفتاة أمريكية يهودية يمنية الأصل .
فتحولت كراهيتها للطريفي العامل السوداني في متجرهم إلى قصة عشق وإعجاب ثم زواج .

وينك ياعثمانو

في انتظار اوزمان

الزول صاحب الكتابات القيافة مو
سلام وشكر
حتي استاذي الشاعر كامل عبدالماجد اتكيف الحكاية.
وبعدين يا مو الحكاية انتشرت للدرجة الخلت فنان عربي
كبير يتصل على عبر وسيط ويطلب
الأغنية الصغيرة الكتبتها يوم
جرتق الطريفي .
بعدين كتير من الاصحاب يهود شارع البرودوي اشهر
الشوارع التجارية في العالم قاعدين يجيبوا السيرة .
مشكور يا أخ مو .. تحياتي

Quote: وبعدين يا مو الحكاية انتشرت للدرجة الخلت فنان عربي كبير يتصل على عبر وسيط ويطلب الأغنية الصغيرة الكتبتها يوم جرتق الطريفي .

صدق انا لما شوفت الحكاية عرفت دا اسلوبك في الكتابة ..لكن جرتق الطريفي دي جديدة احكي احكي

تعرف ياعثمان انا انفعلت مع هذه القصة العبقرية اينما انفعال ..انت طبعا قلت انها رواية حقيقية اقرب للخيال لكن في راي هي رواية خيالية اقرب للواقع ..المهم هذه القصة يمكن ان تتحول الي فلم سينمائي
ويمكن ان تلقي رواجا كبيرا وتروج ايضا للاغنية السودانية والتي في الاصل تلقي قبولا واسعا في محيطنا الافريقي ..ارجو ان تعكف علي تحويلها الي نص سينمائي بااضافة تفاصيل اعمق بنفس السلاسة ..وتاكد
انها ستنجح نجاحا منقطع النظير ..

الأخ العزيز مو
سلامات
الزول الكتب عن الحكاية والله ما بعرفو أبدا
وما أظن انو هو مسجل في سودانيزاونلاين .
برضو سمعت انو في زول اتكلم عنها في الإذاعة
السودانية .
تحياتي

مشكور كتير يا أخ مو على بحت الحكاية
والاهتمام والاعجاب .
الف شكر . ومتابع معاك

جبتو ليك البوست يا مو من الشلال التالت .

معذرة يا هندسة بس لو تسمح تصحيح مهم

Quote: الشاب اسمه الطريفي، حتى الاسم من الأسماء السودانية

في الحقيقة الطريفي أصله موريتاني تكروني
ويرجع للأمير الموريتاني التكروني الطريفي ولد أباه
والذي هاجر مع رهطه نحو السودان في طريقهم للحج
وقضى الله أن يقيموا فترة من الزمن في السودان في القرن التاسع عشر
نشروا العقيدة الإسلامية وفقهوا السكان في دينهم
لذا تسمى بالاسم الكثير من السودانيين
ولدي مقارانات إحصائية عن أصل الأسماء السودانية
تبرهن على صحة ما أقوله
معذرة لهذا التصحيح لو خرج عن موضوع البوست
لكن لا يصح إلا الصحيح

Quote: في الحقيقة الطريفي أصله موريتاني تكروني ويرجع للأمير الموريتاني التكروني الطريفي ولد أباه والذي هاجر مع رهطه نحو السودان في طريقهم للحج وقضى الله أن يقيموا فترة من الزمن في السودان في القرن التاسع عشر

تحياتي أخي الحبيب الأستاذ عبدالصمد
في رأي الشخصي الطريفي متداول قديما بالسودان، ومن (مِطرّف ) (طريف) (طريفي) (طريفيّة)

(مانا الطريف أغراب) أي يبنون خيامهم علي أطراف الدكة والفرقان (مطريفين) لأانهم أغراب
(الطريفيّ المرادة عسينة) وهي الصيدة البتاطع رد الحاسوس ويتكون مطرفة
فخذ من فخوذ الكبابيش يسمون (أولاد طريف)
الشيخ محمدبن الشيخ عبدالله الطريفي
والشيخ عبدالله الطريفي هو جد الشيخ يوسف أبوشراء والشيخ يوسف أب شراء ولد عام 1711 تقريبا
وبالمناسبة الشيخ يوسف أب شراء هو الذي سمى الشيخ محمد راجل مدني(بالسنّي)
لاحظ حفيد ولد عام 1711 لذا إسم الطريفي قديم جدا ،وأنت ذكرت الشيخ المورتادي ولْ أباه في القرن التاسع عشر
الشيخ محمدودالطريفي العركي صاحب(السُّرّاي السُّرّاي)
وماتنسى المثل (فراق الطريفي ل جملو)
معزتي لك وناسف أن حرفنا البوست

الاخوان عبدالصمد والاخ عبيد
سلامات
نحن ماسكين في طريفينا الزول القدر يعمل أعظم
مصالحة تاريخية بالمحبة .
حبوبة دانيل لاحدي الآن بتفتش عن سر سحر بخور جرتق الطريفي .

Quote: نحن ماسكين في طريفينا الزول القدر يعمل أعظم مصالحة تاريخية بالمحبة . حبوبة دانيل لاحدي الآن بتفتش عن سر سحر بخور جرتق الطريفي .

حبابك طن يازول ياسمح
السِّر يا سمح (النافلة السمحة وبياض النيّة والمحبة)
والله ياعثمان أخوي مافي صفة في الدنيا دي أكاد أغير من صاحبها مثل (حسن الظن بخلق الله)
إنت عارف في السلطنة الزرقاء وحروب القبائل قديما ، قصة عشق عفيفة بين
(الكير أبومصيبع) من الكبابيش، وبت فارس من فرسان بني جرار
هذا المحب إقتحم خيمة فتاة لبني جرار ليلا وبينهم ثارات عجيبة، ومن الصدف لدغه ثعبان بالخيمة
وبني جرار فرقانهم عطشى وأطفالهم كادوا أن يموتوا من العطش
الفتاة أخبرت أمها بالمحب، وأن فارسا من الكبابيش إقتحم خيمتي ولدغه دابي
الأم أخبرت زوجها والد الفتاة و دخل الخيمة وسلم عليه، ثم داوي لدغة الثعبان بالشب والقرض و....الخ
الشاب الكباشي قال للشيخ الجراري:(أخبرتني إبنتك أنكم عطشى
نعم يابُني ومتعبون وكذا نعمنا
أرسل أحدهم لحصاني هنالك في الوعرة وليأتني به، وليذهب مع ثلاث فرسان ثم أهدموا الخيم وقربوا العيس للهوادج
وسوقوا النعم وأرحلوا في أثرنا
وقد كان دلهم علي الماء
مكث معهم الشاب الكباشي ثلاث أيّام وبعد شفاءه
ثم نادى الشيخ الجراري،في أهله ودقت الطبول وزوجه إبنته
وكانت من الأسباب لوقف الحرب بينهم سنينا عددا،وأنجب هذا الشاب الفارس ذرية والآن صارت فخذا
من فخوذ نوراب الكبابيش ولقد رثته إبنته ومنّحت عليه بعد موته
معزتي لك

الصحفي والإعلامي الأستاذ محمدإبراهيم
شديد إعتزاري وأسفي،
وتحيات طيبات زاكيات
ودي عربون إعتزاري
قال شاعر كباشي:
(لامَنْ ربَّدت مداغتي جابْت الشَّيب
ولسَّع بالى في القايم صغار ولتيب
ختّالا بختل الدَّرعة بى المحريب
مابتمرق منِّي علا السالمه ليها دريب)
وقال ودجودة الكاهلي العبَّادِي:
بريدك من ولد نامن نقرني الشيب
وبعزِّك لسَّه ياشيكة بشير أبوجيب
الضايق الحاضر مابحمل جرورة الغيب
والصايد الحُمُر كتل أم تنيق لي عيب
وقالت شاعرة من غنا الجراري
أني وتومي أرواحنا نداد
وفي الآخرة نومنا قِلاد
وقال ودعبدالمولي:
الريد نافلة مابجبرولو
طربة نيَّة ياكفيل السِّوِّي حجولة
يارقَّابة الصبَّن جماعة تِعولو
ني لي الليلة مافات الجداد من طولو
معزتي

يا استاذ مو
يازول مشيت وين ؟