التلفزيونات تنقل سيول السودان .. وقنواتنا مع بنوتنا الحلوات الله يحفظهن

01:41 PM August, 02 2020

سودانيز اون لاين
علي عبدالوهاب عثمان-جدة
مكتبتى
رابط مختصر

القنوات الفضائية .. الجزيرة والعربية والحدث واسكاي نيوز العربية
والحرة ... الخ ، تغطية من شوارع الخرطوم ومن النيل الازرق وسد بوط
مع المراسلين في السودان .. استطلاع آراء المواطنين
ما قصر مراسل الجزيرة شاب موهوب ( نسيت اسمو ) ما شاء الله

قنواتنا ولا خبر ..
ما شاء الله بنوتنا الحلوات الله يحفظهن من كل سوء
آخر أناقة وابتسامات وغناء وطرب إلى الآخر
يمكن تكون خطة اعلامية لاخراج المنكوبين ديل من الاكتئاب
أهلنا ناس ضواحي الدنيا في قناة الشمالية .. شابكين طنابير طول اليوم
والسيول نسفت قرية شدة في المحس .. وكذلك قرى جنوب دنقلا
ما في حتى خواضة في الموية على طريقة الكيزان
الوالى / الوالية ( ما عارف مذكر ومؤنث ) بنتنا قالت ( تكوين لجان ) مصيبة

على الأقل حصر .. وكمان توضيح الاسبابهل الناس بنت في مجاري السيول في حاجات كده
لازم يناقشوهاغايتو نحن

في قناة الشمالية مشكلة ( لا تغطية الامطار ولا ناس الموضة ) طنابير وحكايات

علي امبس كل عام وأنت بخير.
التلفزيونات ما زالت تحت سيطرة الكيزان.
تجاهل الأحداث ذات العلاقة بالمواطن والاهتمام بالمساخر.

عارف امبس تحياتي
صدقت يا الحبيب
ما ممكن اعتى القنوات تتابع الاحداث
ما مصدق لقمان فرحنا بيه كثير
من أجل الاعلام الصادق
اتمنى ان ينتبه للوضع

صدقني يا عارف امبس شيء مؤسف

ارتفاع كبير في النيل الازرق
ولسع العطبراوي
الله يهون علينا في جزيرتنا في ضواحي الدنيا
يا جماعة ناس سد النهضة حصل ليهم شنو
السد ده مهم جداً معانا .. ما علينا بالمصريين
يعني كده الغرق جايينا .. أهلنا تاني نوم ما في اكتئاب ولخبطة
ورحيل عفش ..

اللهم انصر اثيوبيا في موضوع السد

السلام عليكم
كيفك استاذنا
المطرة بدايتها تدل عليها ، ان شاء الله خريف
خيروللخين الامر مقدور عليه حسب ما قالو
بس متوقعين اليومين الجايات مطرة تقيلة .
الارض شربت المطرة الاول منتظرين الثانية.

سد النهضة ولو الناس اجتهدت وقدرت المطرة
تستفيد منها البلد ح تتغير وحتي الجو .
ناس تلفزيون السودان لا أمل يرجئ منهم.

د. اخلاص تحياتي .. شكرا على الحضور
الشيء المؤلم ان قنواتنا في عالم آخر
وفي نشرات الاخبار العالمية تجد مناظر محبطة
ناس تشكي من عدم ايواء

غايتو الخريف يمكن شوية أرحم
نحن خوفنا من غرق جزرنا في الشمال

ما عارف ليه الاثيوبيين ما قفلوا سد النهضية

تحياتي الدكتورة

الاستاذ غلي عبد الوهاب والضيوف الكرام مسكاقجروا
كنت متوقع من أخونا لقمان أن يقود التلفزيون إلى دور ريادي لكن باين عليهو طلع أفندي
بدلة وكرفتة وقشرة في الفارغة

هُونَق دِحِيشُو .. الضوْ بكى
بكى ما بكا
بكَّاهُو رادِي الدندهُوب الغادِي
وأم درمان تَنُونِي .. حبيبتي آه .. وودادي وين وحبيبي وُوُوب !
والباقي كلُّو مقابلات ..
والنشرة مافي ولا خبرْ عن بلدُو .. عن شِدَّة عَناهو عن البحر
عن سر نَفي ..!
ودِي الوكْتِ لندن ماب تبين ..
حالاً دَحِين زيْ حالُو فِي .؟!

كل عام وأنتم جميعا بخير

Quote: التلفزيونات ما زالت تحت سيطرة الكيزان. تجاهل الأحداث ذات العلاقة بالمواطن والاهتمام بالمساخر

تقصد الكيزان داعمين لحكومة حمدوك وما عايزين يبشعو بيها؟
ويبينو عوارها؟

هذا ما كتبته قبل قرابة الثلاثة شهور يوم 9مايو في هذا العام

البلد من خمسة شهور سلموها لوزارة الصحة تعبث بها ما تشاء!
وزارة الصحة حيث يوجد أطباء عجزوا عن علاج مرضاهم
فسلموهم البلد صرة وخيت وناموا الوزارء في بيوتهم ولبسوا الكمامات
قايلين نفسهم لسع في بلاد المهجر!
ولسع ما صحو نايمييين لسع في العسل
ما تصحيهم خليهم نايمين ما تخليك مزعج يا شيخ علي
هههههههه

حبيبنا منتصر عبدالباسط .. يا باسط الخير
يا باسط يديك لهذا الوطن الجميل الذي يعاني من تصرفات ابنائه
حبيبنا منتصر الاعلام هو مفتاح أي تحرك وحشد ..

أنا شعرت بنوع من الحزن وأنا أتابع اخبار اهلي من القنوات العالمية
يبدو ان التلفزيون مازال بعيد عن خط الثوار
كنا منتظرين اخونا الحبيب لقمان بخبراته العالمية يعمل نوع من النقلة
ولكن ربما هناك باقي جماعة التمكين مازالوا مؤثرين

شكرا كثير على حرصك للوطن .. دائما أقرا مداخلاتك وحماسك الدافق

تحياتي الحبيب منتصر

muntasir الحبيب تحياتي يا جميل
حبيبنا تعرف نحن تعلمنا العربي في المدارس في ضواحي الدنيا
ما معقول تكتب لي بلغة ناس شنو كده ما عارف
خليك زي الامير بدرالدين الجميل يخاطبنا بلغة مفهومة ( عشان الرطانة ) حسب تعريفه
أنا في بوست سابق قبل ساعات ودالشيخ قال ( توهيط ) دخلت القوقل ما لقيت المعنى
ههههههه ( معانا بعربي دنقلا)تحياتي ياجميل ..

في مداخلتك في عبارة واحدة مشتركة مع اللغة النوبية

(( هونق دحيشو )) نحن بالنوبية نقول ( هونقي ) نهيق الحمار
لأن لفظ جاء من الصوت نفسه ( هونق هونق هونق )

الباقي ما بعرف

تحياتي منتصر

ترهاقا .. اننقا .. مسكقامي ووو اشري
موسيقارنا الجميل
صدقني أنا ما خايف إلا جزرنا الجميلة على امتداد النيل
الغرق كارثة بالنسبة للجزر
هذه الجزر التي جاء منها أجمل الناس الخليل ووردي ودهب وحسين لالا وانتو كمان
حرام والله ..
أنا يا الحبيب ترهاقا .. قلبي مع اثيوبيا وسد النهضة
كفاية أهلنا الذين تم ترحليهم شوف امس في حلفا الجديدة كم واحد قتل عن طريق مجموعة من قبيلة الزغاوة
مع أن مشروع القربة من تعويضات حلفا ..

يا ريت السد النهضة تخزن مياه الفيضان

تحياتي موسيقارنا الجميل ترهاقا

أستاذنا أنيق الحروف علي الأبيات من معلقات الراحل حميد وهي الضو وجهجهة التساب ، وهي عن تساب ٨٨ ورغم شايقيتي لكن أعتقد أن حظك من فهم مفردات حميد سيكون أكبر مني لأصلها النوبي ودمت يا غالي

حبيبنا منتصر .. يا أخي أهلي الشايقية ديل اهل فن وجمال
حميدة التربال رحمه الله مبالغة وأنا عندي بحث واسع عن مفردات الترابلة
عند حميد حتى مفردات انقرضت في النوبية مثل ( كون شبر .. جوبل جريد )
حميد كان زول غير عادي كثيرين يقرأون شعر حميد ولكن أحياناً مفردات تكون صعبة عليهم

تحياتي الرائع منتصر ..

دعواتك معانا عشان سد النهضة تحل مشكلتنا

يا علي عاين شوف ياصديق
لو العين تطيق
بلدنا ضيعت الدرب
والكلب
يهوهو فوق متاهات الطريق
والشعب عطشان وهو الغريق!
وأغنام الفريق
الخايفين عليها من السلب
والدارين يوقفو للحرب
مين منهم يصحي ويفيق ؟
مين ليها يليق؟
والبلدا الخضبوها بالدم للعرس
ضاع دهبها النفيس
وتاه العريس
جاري وما لاقيلو ميس!

يا سلام حبيبنا منتصر عبدالباسط
أجمل صورة جعلتني أخاف على الوطن
هي صورة التائه

ودائماً من يضل الطريق يجعل الكلاب تهوهو
اذكر زمان زمان عندما نسمع هوهوة الكلاب في المساء
كان نعرف أن هناك شخص غريب تائه داخل القرية

كلام بليغ يا منتصر .. قلبنا على الوطن ونتمنى ان يعرف طريق الرفاهية
وأن لا يتوه شبابنا عن المسار الصحيح

شكرا على العمق والرمزية حبيبنا منتصر أيها الباسط

على ياود عبدالوهاب
زى ماقال حميد وغنى مصطفى سيد احمد
يفيض النيل نحيض نحنا
يظل حال البلد وافق تقع محنة
ولا النيل القديم ياهو ولايانا....الخ

امس فتحت قناة النيل الازرق قلت
اشوف أخبار هلنا وفياضان النيل لقيت دلوكة
عفاف حسن امين مدورة غيرت للتلفزيون
المسمى قومى لقيت مدايح
فتحت قناة الجزيرة لقيت
المذيع الشاطر النابه احمد
الرهيد عامل تقرير شامل
عن الفيضان والقرى التى
غرقت والقرى التى
تحاصرها المياه
قنواتنا بدل تكون فى حالة استنفار
فهى في حالة استهتار

فتحت قناة الجزيرة لقيت
المذيع الشاطر النابه احمد
الرهيد عامل تقرير شامل
عن الفيضان والقرى التى
غرقت والقرى التى
تحاصرها المياه
قنواتنا بدل تكون فى حالة استنفار
فهى في حالة استهتار
==================================
حبيبنا الأمير .. تحياتي ..
مداخلة في الصميم حتى التلفزيون القومي .. مشغول بالفارغات
يا سلام على الشاب احمد الرهيد .. حاضر البديهة هذا الشاب ربنا خلقو اعلامي
حضور وحركة ولا يكرر تلك العبارات ( طيب ... يعني )
حنجرة مذيع ليته يأتي الى الاستديو
عمل تغطية رائعة جداً
============
حبيبنا لقمان .. ربما يكون اصابه الملل
الى الآن نفس تلفزيون الطيب مصطفى


تحياتي الامير .. شكرا للحضور الرائع ..

لو اثيوبيا قفلت بوابات السد
الجزر ما بتغرق

هل البناء في مرحلته الحالية يستحمل
رجاء اثيوبيا اقفلي البوابات واملئ السد
ناسنا غرقوا

د . اخلاص تحياتي
يبدو ان السد مازال يحتاج لبعض الوقت
أنا قصدي سد النهضة يكون زي السد العالي في مصر
يوقف الفيضانات والغرق والتهجير ويكون في استقرار
بعد السد العالي المصريين وخاصة المزارعين استفاوا

من 74 مليار فقط تم تخزين 5 مليار تقريبا

تحياتي د. اخلاص .. شكرا للمداخلة والحضور