نهب أموال تقيلة في سوق ليبيا

06:56 AM July, 30 2020

سودانيز اون لاين
Osman Musa-
مكتبتى
رابط مختصر

الكبسة حصلت في باب شركة شحن
بضايع كبيرة للولايات .
حصلت في تمام الساعة 7 وربع صباح اليوم الخميس .
شوال كبير مستف بحوالي 2 مليار .

عثمان موسى

سلامات


ده الامريكان بسموهو (Inside Job)

الأخ دينق
سلامات
والله يا أخ دينق نص عمري
شغال مع اليهود في الجينز في قلب منهاتن .
ومرينا بي عشرات البلاوي
من ضرب رصاص في الرأس
وختف وربري .
بس الحاصل في الخرطوم دا أصعب وأسرع .
والشرطة هنا نايمة.
ربك يستر .

واضح جدا أن التجار ورجال الاعمال في السودان لا يثقون في النظام البنكي، ولذلك لا يتعاملون مع الشيكات.
لذلك يجب على البنوك في السودان أن يكون لها نظام بنكي إليكتروني يمكن للعملاء من خلاله تحويل الاموال عبر الحسابات المختلفة إلكترونيا، وده ممكن يتم عن طريق الهاتف الجوال أو البطاقة البنكية. ده ممكن يلغي عملية التعامل بمبالغ كبيرة والاحتفاظ بها في مواقع العمل. في النهاية المسألة مسألة ثقة في النظام البنكي، ويجب على الحكومة أن تقوم بتثقيف رجال الاعمال والتجار الذين يتعاملون يوميا بمبالغ نقدية كبيرة.

نعم يا أخ دينق
مفروض يكون في تثقيف للتجار .
لكن ياخ القايمين علي إدارة البنوك زاتهم ما مواكبين
الحاصل في الدنيا .
البنوك تقفل بدري . وتظل التجارة شغالة.
اها البيع البجي بعد تقفيل البنوك
كلو بيبيت في الشوالات للصباح .
واكيد عيون النهابين مفتحة.
وبعدين مافي أي undercover cop
عشان يكتشف الجريمة قبل ما تحصل
ولا الشرطة عندها خطة للحماية.
ولا البنوك عندهم خطة للمساعدة .
دي يا أخ دينق نفس الاسباب
المنعت المستثمرين الأجانب من دخول
السوق في غواتيمالا .

وزير الداخلية قاعد ساكت.
جرائم النهب والعنف مستشرية.
وحملات القبض على المشبوهين
خفيفة وما بحجم موسم الاعياد .
المواتر البدون لوحات طالعة نازلة
ودي هي الاخطر .
والعربات البوكو البدون لوحات .
ماليها حد .

حبيبنا عثمان .. تحياتي
ده كلام خطير جداً ..
في ناس مفتكرين الحرية بطريقة خطأ
والشرطة احيانا لا تعجبها اعطاء حقوق للمواطنين
فيحدث نوع من التراخي الامني

الشرطة مش رفعوا رواتبهم زي المعلمين ؟

الأمن أهم من أكل

تحياتي عثمان الحبيب

سلام عليكم
سوق ليبيا يكاد يكون نظام مصرفى خاص خارج المنظومه الرسميه مثلا تجرى فيهو عمليات تحويل خارجيه لافريقيا الوسطى وتشاد بنظام المناديب تدفع هنا تدفع القروش هناك عن طريق مندوب /وكيل والعكس وبالضروره نفس معاملات التحويل من والى الخليج واحتمال الصين برضو نفس الطريقه يعنى كتله عمله سائله ربما اضخم كتله خارج النظام المصرفى فى الخرطوم تكون فى سوق ليبيا وماتنسى انو دا مساحه جيده لغسيل الاموال.
حادثه الاغتداء واطلاق النار على تاجر فى الفاشر طالع من بيتو بكيس قروش قبل ايام ماننساها
وسط دا كلو وفى الظروف الحاليه التجلر ديل الا يستعينو بشركات حراسه خاصه

أخونا asim
سلام
حقيقة سوق ليبيا مملكة بحالها .
و التعامل فيه يختلف عن التعامل في الأسواق السودانية .
زي الفرق بين السوق نيويورك وباقي الولايات الامريكية .
سوق ليبيا خليط من التجار من دول إفريقية مختلفة و من اليمن
وباكستان والهند و سوريا والأردن وتركيا ومصر والصين والسودان
وحقيقة الكتل النقدية المدورة فيه ضخمة .
والشحن منو لتشاد والنيجر وافريقيا الوسطي ومصر والخشية
اريتريا و الجنوب الحبيب . شحن يومي ميات الجامبوهات تسافر
وترجع .
الهيلمانة دي محتاجة قوة ضخمة من رجال الشرطة .

الأخ علي عبدالوهاب
سلامات
والله الواحد شايل همكم انتو المغتربين
والمهاجرين البيجوا في الإجازات .
الواحد يخاف عليكم من البلاوي
غايتو الناس تنتبه في الأسواق والمواصلات
والشارع .
تحياتي أخ علي وكل عام والبلد في امان

اخطر مناطق النهب والخطف والتهديد .
( 1) السوق الشعبي امدرمان من أستاذ الهلال وانت ماشي
( 2) سوق ليبيا من جميع جهات السوق
(3 ) سوق كرور امبدة