النادي السوداني بالعين .. انتهى زمن الفوضى والفوقية

01:11 PM July, 28 2020

سودانيز اون لاين
طلحة عبدالله-
مكتبتى
رابط مختصر

أي نعم أنتهى زمن الفلهمة والقلاصة والبوبار الذي
كان سائدا أيام العهد البائد وجاء عهد البساطة
والإبتسامة والتعامل الحضاري الواعي الذي ينم عن ( عين مليانة)
ونفوس رضية ومشاعر مفعمة بحب خدمة أبناء الوطن وناكرة
لذاتها .
ذهب عهد التعامل الفوقي والوجوه العابسة المكفهرة المتعالية
على خلق الله وجاء عهد التعامل الراقي المتحضر والابتسامات
الرحيبة التي نعم بها رواد النادي في أول اختبار حقيقي لعمل رئيس الجالية
وأركان حربه وياله من اختبار تتقاصر دونه أعقد المهام،
فبعد اعلان السفارة السودانية بأبوظبي عن وصول ختم
تمديد الجوازات والإشارة إلى إمكانية التنسيق مع رئيس
الجالية بالعين وعطفا على تجارب سابقة عانى فيه الناس ما عانوا
توجست مما يمكن أن يحدث من عنت وتعنت و تعقيدات ومتاعب أغلبها مفتعل
تحول دون انسياب الخدمة كما ينبغي وكانت تتقافز
إلى مخيلتي مشاهد لا أطيقها ولا أملك لها أخلاقا
أقلها الزحام الرهيب الذي يمكن أن يحدثه تدافع
المئات من طالبي الخدمة وفكرت أكثر من مرة أن أؤجل ذهابي
إلى النادي إلى وقت آخر عسى أن تتيسر الأمور، غير أنى
وبعد تردد توكلت على الهوان وانطلقت متوجسا وقلقا طوال
الطريق حتى وصلت، وهناك فاجأني الواقع ففور
دخولي إلى القاعة المخصصة لاستلام الجوازات
أدركت عكس ما توقعته حيث تراصت في الترابيز عشرات المئات إن لم
يكن آلاف الجوازات مع العلم أنني لم أتأخر كثيرا عن الموعد
المحدد لتسليم الجوازات بداية من الثامنة والنصف
حتى الواحدة، ووصلت في العاشرة أي بعد ساعة ونصف فقط
وهذا يؤكد أن عدد كبير جدا من أعضاء الجالية توافد إلى
النادي في هذا الوقت القصير جدا ومع ذلك لم يكن هناك
زحاما ولا تكدسا للسيارات أو صفوف، وفي داخل القاعة
بضع أشخاص من الذين كانوا يسلمون جوازاتهم، ونحو خمسة
سادسهم رئيس الجالية نفسه ( معتصم ) يعملون بهمة
ونشاط في ترتيب الجوازات والتأكد من المعلومات وأرقام
التلفونات وتعبئة الفورمات المرفقة وإدخال البيانات في جهاز
لاب توب واحد فقط، وعلى الرغم من المشاق والجهود الكبيرة
التي بذلها هؤلاء الأفاضل المتطوعين لخدمة إخوانهم متجردين
من الذات ومضحين براحتهم ووقتهم إلا أنهم جميعا وللحق كانوا
في قمة الاحترام، يستقبلون الجميع بابتسامة وصدر رحب ولا يملون
من الإجابة على الأسئلة والاستفسارات وتوجيه أعضاء الجالية.
سلمت جوازاتي الأربعة بيسر وسهولة لم اعتد عليها في أية معاملة
لي مع أية جهة سودانية، وفي الموعد الذي حدده رئيس الجالية عبر
تسجيل صوتي على الواتس لاستلامها ذهبت إلى هناك وتسلمتها
كاملة ومستوفية بلا أدنى مشقة إلا مشقة عجزي عن الشكر والتفدير
والاحترام عسى أن أوفيهم جزء من تقديرهم واحترامهم لنا .
شكرا رئيس الجالية معتصم وكتيبته على جهدكم وأدبكم وتهذيبكم
ورقيكم وخدمتكم المتجردة لأخوانكم في الجالية السودانية بالعين
وفقكم الله دائما وحفظكم .
......................
رئيس الجالية المهذب المؤدب المحترم يشرف بنفسه على تسليم
الجوازات واعادتها بعد الختم ويحرص على أن يعلم الجميع بضرورة
الالتزام بالإجراءات الوقائية عبر تسجيل صوتي معمم في الأسافير.

يعني ان شاء الله بعد عودة النشاط ح ترجع للطربيزة؟
حقيقة ادارة الجالية تستحق الشكر

أنا أصلا رجعت مع وقف التنفيذ بسبب الجائحة يا جرجير
لكن بعد العودة انت ونفر آخرين من الكيشة وخصوصا
الرشاشات إلا تشوفوا ليكم طربيزة تانية واللا تمشوا تلعبوا
حرينا خخخخخ

وست، هارت، حريق، شطرنج، دومينو، كر الولد
حكم الشائب، بصرة، كيرم، كلو كلو برشكم فيهو

التحيـــة لكما طلحة وودالبشرى وكل عام وانتم بخير ..

حقيقة النادي السوداني تحت ادارة معتصم مالك اختلفت كتير عما كان..

معتصم راجل بركه ياخ وخدوم .. ويتمتع بكل صفات رئيس الجالية الناجح.

Quote: وست، هارت، حريق، شطرنج، دومينو، كر الولد حكم الشائب، بصرة، كيرم، كلو كلو برشكم فيهو

سكج بكج
ام الحفر
كمبلت
سفرجت

انت غايتو حدك سفرجت بس ..
ما اشوفك في طربيزة الناس الحريفين..خليك هناك مع الجلاكين :)

انا جاييكم "عضو منتدب" يوم الجمعة ح نعمل "درس عصر" لتطوير مهارات "تنظير" و "ودالبشرى"
وكل الناس الكيشة خخخخخخخخخخخخ

الله يكرمك يا دكتور أحمد ومعتصم مالك رجل
حبوب زي ما قلت ربنا يوفقه ويسهل طريقو
تحياتي يا الحبيب

الشيخ يا سيد احمد
اولا الجماعة مقفلين كما اعتقد بسبب الجائحة
دا غايتو القالوا لي قبيل لما مشيت أجيب جوازي
ثانيا استهدي بالله يا زول .. شنو هو الجائي تطورو أنت
قالوا ليك طلقت ساي كدا ؟؟خخخ
ثالثا وليس أخيرا اسمو (جرجير) ود البشرى
دا لقبو.. اشمعنى أنا قلت لي تنظير وهو ود البشرى
حاف كدا؟؟ .
دي حركات الكيزان الما بتخارج يا زول .. خخخخ

Quote: الشيخ يا سيد احمد اولا الجماعة مقفلين كما اعتقد بسبب الجائحة دا غايتو القالوا لي قبيل لما مشيت أجيب جوازي

مش قلت ليك زول كيشة..هسه اذا كنت زول حريف
كانو قالو ليك..التربيزة مدورة بي هناك جنب المسرح خخخخخخ

Quote: ثانيا استهدي بالله يا زول .. شنو هو الجائي تطورو أنت قالوا ليك طلقت ساي كدا ؟؟خخخ

هههههه غايتو قصة طلقت دي انت تاني زول تقول لي كده...
معناها الزول محتاج لي انو يتعشى بي مديدة وينوم عكس الهوا
عشان ينشط خلايا الاوزون النائمة خخخخخخ

Quote: ثالثا وليس أخيرا اسمو (جرجير) ود البشرى دا لقبو.. اشمعنى أنا قلت لي تنظير وهو ود البشرى حاف كدا؟؟ . دي حركات الكيزان الما بتخارج يا زول .. خخخخ

معقول يا طلحة انت مايقولو ليك بي لقبك...
ودالبشرى زول زينا كده شغال في الشمس..
وانت زول ضل "صحفي ضللة" عشان كده لازم الالقاب لمرتادي
الظلال خخخخخخخخخخخخخ

Quote: كانو قالو ليك..التربيزة مدورة بي هناك جنب المسرح

اولاد الهرمة وزعوني يعنى
أكيد القال لي ما شغالين دا رشاشة مسكين
موصنوا على لأنو عارفين لو جيت إلا يشوفوا ليهم
بلد .
أها عاد كان كدا بكرة اتحزموا واتلزموا وخليكم
خفاف للعردة خخخخخ

ههههههههههههههههه


انت تعال وبتشوف

سلام عليكم طلحه ود البشري احمد امين يا حلو الشيخ سيد احمد

تشكرادارة النادي والشباب المعاون علي المجهود

اوووووووو عبس ياخ
وينك وكيفنك الاتنين مع بعض
يوم جيت اسلم الجواز شايف لي زول عندو
صلعة من بعيد كوركت ليهو اتلفت علي طوالي
قال لي يا زول هوى هسة الصلعة المجيهة دي
صلعة عباس .. قرب يقول لي ياخي ما تسىء

Quote: سلام عليكم طلحه ود البشري احمد امين يا حلو الشيخ سيد احمد تشكرادارة النادي والشباب المعاون علي المجهود

وووو الوجيه الأستاذ معتز ياخ كل عام وانت بخير .. طوله شديدة

عساك بخير .. ونشوفك قريب ياخ .. الله يقطع الكرونا ويقطع سنينها
غايتو صاحبكـ عباس محمود مقفول قفله صاح .. حقو ناس منظمة الصحة العالمية يكرموه هاهاهاهاهاها

النجري هسع يجينا

Quote: عباس محمود مقفول قفله صاح .. حقو ناس منظمة الصحة العالمية يكرموه

الحاصل عندكم في الامارات يحدث بحذافيره في السفارة السودانية بالرياض

بكل احترام وتقدير ونظام وبسهولة في وقت وجيز رقم الزحام قمت بتمديد جوازاتي


السؤال :

الجماعة الفاتو ديك كان بقصدو شنو؟؟

معتصم رىيس النادى السودانى بالعين
رجل فى غاية الادب والتهذيب

كنت متوجس جدا من فكرة تجديد الجواز فى قنصلية دبى
وصلت امس الساعة الثالثة عصرا
المكان فى الخارج هادى جدا
فى الاستقبال يتم استلام الجواز باجراءات بسيطة جدا
ساعدنى الاخ صابر
ةاستلمت الجواز سريعا
وانا ما مصدق
اول مرة اجراء فى القنصلية او السفارة يتم بهذا اليسر

Quote: الجماعة الفاتو ديك كان بقصدو شنو؟؟

والله يا محمد الشيخ اعتقد بالإضافة
للوساطات والمتاجرة في أية حاجة حتى في معاملات
المواطنين المساكين الزي دي الجهل والتخلف برضو
ليهو دور كبير في الفوضى والعشوائية ودا كلو بسبب
وضع الزول الغير مناسب في المكان الغير مناسب
زول خريج ابتدائي يا دوب يفك الخط تلقاهو رئيس على
حملة دكتوراة وخبراء يوديهم يمين شمال
حسب المزاج ودرجة القرابة والجيب .

سلام يا محمد سيد أحمد أخبارك
والأهل اجمعين يارب تكونوا بخير يا طيب

Quote: معتصم رىيس النادى السودانى بالعين رجل فى غاية الادب والتهذيب

هو ذاك الرجل يا حبيب
هو ذاك والله.

أغلب الكيزان الكان بتعنطزوا علي الناس ناتج عن عقد في حياتهم قبل ٨٩ وخلعة من وضع لقوه بعد داك أرجع للناس البيعرفوهم زمان وبتعرفو ليه السفلة كان بيعملوا كده

بالضبط كدا يا منتصر بالإضافة للجشع .. الله لا عادهم