Post: #1
Title: Osman Musa
Author: أبوذر بابكر
Date: 07-26-2020, 05:20 PM
05:20 PM July, 26 2020 سودانيز اون لاين
أبوذر بابكر-
مكتبتى
رابط مختصر
وأنا جاي ليك
مرقت من فرقات زماني
وقفت فوق تلة اساي
وما شفت غير
حُترُب العمر الدراش
مكتف بى جنازير حزني الحماني
اجيك براي
وحداك
رقدت على جنبة شقاي
وما لقيت
غير غفوة الحلم النساني
عاينت ليك والشوف طشاش
وما وصل
جيهات مقيل شمس العمر
تحت ضل الأماني
وناديتك
جفل طعم الدعاش
وحس الغنيه فى خشمي
مكتف بى حبال صوتي
وقفت بعيد
اتاوق لى زحيح موتي
و جوه العتمة
ولعّت الصبر فانوس
تايه فى بطن حوتي
وقعدت اكوس
لقيت اسمك بضوي هناك
لقيت اسمي
فى لوح الودار منقوش
لقيت خوفي اللبد جواي
حداي مفروش
فيا جهرة مباهج الكون
منو الختاكي فى بالي ؟
منو الأهداكي لون ؟
وجواي القليب معروش
ملان احزان
وجيب الفرح خالي
قت ليهو خليني النشوف
وتشوف معاي
خليني النشِد
صهوة غنانا واجيك
نهوّن قاسية الأيام
نلوّن لوحة الأحلام
نشد حيلا الفتر
ونناغم النجمات يجن
نقعد حداك أنا والقمر
نبارك اللون المقسّم طعمه
بينك والشدر
ونمسك رعشة الطرب الأكيد
البوزع نغمه
بينك و الوتر
وتهجس حرقة الشوق المديد
المدفق دمعه
بينك والأتر
وا ضيعة الولد الكتم
مغسو الشديد
شايف ضلام الخوف صباح
حد البصر
يا جمرة الحسرة الندم
حس المنادا الانكتم
مارق يعامت فى وحيح الليل
الفرزع نجيماتو السفر
الضلمة والخوف و السهاد
رفاقة العابد الفضحو البعاد
صلاهو جهرا
وما انستر
دساهو في دمو المباح
فى خاطر النشيد الإنكسر
جوه فى خاطر النشيد الإنكسر
|
Post: #2
Title: Re: Osman Musa
Author: أبوذر بابكر
Date: 07-26-2020, 05:21 PM
Parent: #1
جاييك يا ابو عفان
يا داب بديت افضى
جاييك تب
|
Post: #3
Title: Re: Osman Musa
Author: أبوذر بابكر
Date: 07-26-2020, 06:12 PM
Parent: #1
أما قبل
قال الأسى
بمثلِ ما للريحِ من جسارةٍ
وما للجهاتِ من يقينْ
خذ ما تبقى
من ركامِ العمرِ
ثم غادر جِلدَك اللعينْ
فالآن فيكَ
تنتصبُ المآتمُ
تنادم أشلاء الفجيعةِ
تستبيح أقاليم الدمِ الحزينْ
وفى كلِ ناحيةٍ
تجلس بوصلةٌ يتيمة
لا تشير سوى إليكَ
كنايةً
عما نحتته يدُ الريح
وشماً يسكن سطحَ حلمك
ينتظر الشمسَ، نائماً
متشبثاً بيقظةِ الجدرانِ
ببوارِ جهاتك السقيمة
بمثل ما للريحِ من جسارةٍ
ما للجهاتِ من يقينْ
خذ ما تبقى
من مأدبةِ اللعناتِ
رملاً من تفاصيلِ الهزيمة
رماداً من مجامرِ السنينْ
أو
إِقْنع بما تساقط حولك
من ريشِ الخسارة
فهو
بعض نشيدٍ
يستبيح دمَ العبارة
هو لفحٌ لئيم
|
Post: #5
Title: Re: Osman Musa
Author: Osman Musa
Date: 07-26-2020, 06:36 PM
Parent: #3
اتفضل
اتفضل تعالك باهي
تالا المنبر
المليان كتاب .
تعالك باهي
واكتب للمعارف والمتابعين والصحاب.
تعالك ضمة
منتظرين قصبتك والدواية
ولون تفانين
الحروف
تعال جيب
النجيمات والحكايات
والوصوف.
تعالك ارسم الدكنت من السحب
المستفة بالخريف.
اوعك تقيف .
اوعك تغيب
اوعك تقيف .
|
Post: #7
Title: Re: Osman Musa
Author: أبوذر بابكر
Date: 07-26-2020, 07:46 PM
Parent: #5
وأصل الحكايه
من ألفين ومعاها اتنين
مسحنا اللوح
وعمرنا الدوايه
حمام الدوح
وغربان النهايه
حمامة نوح
غصن زيتون النهايه
من ألفين ومعاها اتنين
نفوت لا وين
نقبل وين
مرحات الكلام
خير السعايه
حيشان الوئام
بيبان العناية
من ألفين ومعاها اتنين
لى ألفين زايد عشرين
|
Post: #4
Title: Re: Osman Musa
Author: أبوذر بابكر
Date: 07-26-2020, 06:30 PM
Parent: #1
أما بعد
والله يا صاحبي
إلا الملم نضمي الدنيا السمح جت عليهو
واعطنو في كافور المحبة واعجنو مع ياسمين المعزة
حتين يكون لايق ينضم ليك قولة شكرا في خيط المودة والامتنان
لكين بحاول
|
Post: #6
Title: Re: Osman Musa
Author: Gafar Bashir
Date: 07-26-2020, 06:57 PM
Parent: #4
حبيبنا المطر
ياخ عيوننا طششت
وقفتخمسة دقايق عشان افهم البوست كاتبو منو لي منو وعنوانو شنو؟
ابوذر لي عثمان موسي ولا عثمان موسي لي ابوذر ولا العنوان ابوذر ولا عثمان موسي ... بس يونس شلبي في مدرسة المشاغبين
تحياتي ليكم الاتنين
|
Post: #8
Title: Re: Osman Musa
Author: أبوذر بابكر
Date: 07-26-2020, 08:02 PM
Parent: #6
إزيك يا جعفر
انت كويس عيونك طششن
نحن رويحاتنا طشن و طششت
يا زول حكاية عوسمان ده حكاية طويييييله
خليك قريب بس بتقع ليك
|
Post: #9
Title: Re: Osman Musa
Author: محمد المرتضى حامد
Date: 07-26-2020, 11:44 PM
Parent: #8
مش في غنية حقت أبوداؤود (في الشاطيء) بيقول ( يا ألطف أنواع البشر)؟
السهل الممتنع عثمان الخيالي..
شكرا شاعرنا المجيد وكل سنه وانت وعثمان طيبين
|
Post: #10
Title: Re: Osman Musa
Author: اخلاص عبدالرحمن المشرف
Date: 07-27-2020, 07:12 AM
Parent: #9
ابو ذر بابكر
الشاعر الجميل. عثمان موسي الزول الفنان.
ومحمد المرتضي ، شن بنعرف في الكلام نحن .
احلي هدية
|
Post: #12
Title: Re: Osman Musa
Author: أبوذر بابكر
Date: 07-27-2020, 11:16 AM
Parent: #10
يا دكتورة
مشرفه و مشرفه
اللولانيه الميم مضمومه بي نور جيتك
والراء مفتوحه زى نفاجات بيوتنا زمان
والتانيه ميمها برضو عليها ضمه لونها اخدر زى شوق الامات
والراء عليها كسرة
أجمل وابهى من كسرة عبد الحميد يوسف
لامن يغني يا الحجروك عليا
|
Post: #11
Title: Re: Osman Musa
Author: أبوذر بابكر
Date: 07-27-2020, 08:31 AM
Parent: #9
يا مرتضى
مش في غنيه حقت عمر البنا بغنوها كل الناس السمحين
من اللورد كرومر و عطا ومحمود وابوداود واللحو
يا نعيم الدنيا
بقولو فيها
يا البيك نور إقليمك
وانت ياكا ضو كل الأقاليم
غنية في الشاطى اظنها حقت الكاشف
|
Post: #13
Title: Re: Osman Musa
Author: أبوذر بابكر
Date: 07-27-2020, 11:26 AM
Parent: #1
عوسمان
ياخ دار اشكرك والله
قوتا اول شي النستاذنك
لكين بي تحت تحت كدي
كان رضيت ولا ما رضيت ياني المشكرك
والله ما بخليك
|
Post: #14
Title: Re: Osman Musa
Author: Osman Musa
Date: 07-27-2020, 11:58 AM
Parent: #13
أخونا آب ذر
وحات الخوة لا نستحق الشكر ا جنا .
تصدق يا اب ذر .
في أول رجعة من امريكا بعد 14 فيضان للنيل .
اول زول مشيتلو .
كانت أم الزميل الراحل محمد عبدالرحمن المطرطش .
يجوز احكي ليك عن المطرطش.
ويجوز تسمع القصيدة الجات بعد يوم
من رحيل المطرطش .
بصوت ود النصري .
يا أب ذر
اقولك حاجة .
المطرطش اتصل بي لحظة موتو
من اريزونا وانا نايم في نيويورك.
|
Post: #15
Title: Re: Osman Musa
Author: Osman Musa
Date: 07-27-2020, 12:06 PM
Parent: #14
يا أب ذر
ما كنت عارف المطرطش داير يقول شنو.
كنت سامع جرس التلفون بين نايم وصاحي.
في اليوم التالت الصباح اتصل علينا
من ولاية أريزونا الأديب د. عبدالله جلاب
وعرفنا انهم وجدوا المطرطش متوفي
في سلام .
له الرحمة
|
Post: #16
Title: Re: Osman Musa
Author: أبوذر بابكر
Date: 07-27-2020, 02:01 PM
Parent: #14
يمين بالله بتستحق وتستاهل
غير كده كمان
الشكر ده من اركان المحبة الخمسة
|
Post: #17
Title: Re: Osman Musa
Author: Osman Musa
Date: 07-27-2020, 02:17 PM
Parent: #16
تموت فى الغربة
زعلان من ملك موتك
وندمان من سبب سفرك
وموجوع من وجع فوتك
أغانيك
والجواز
جايات
ومرسولات
على الخرطوم وتابوتك
تموت فى الغربة زعلان من ملك موتك
تموت من الرحيل تعبان
تموت من الزعل فتران
كفاك تكابد التجوال
كفاك فليل
كفاك ألوان
كفاك تصارع الأيام
كفاك تجابد الأحلام
كفاك طريق
كفاك حريق
سواد الليل عليهن تانى بنوتك
تموت فى الغربة زعلان من ملك موتك
زغاريد الحزن فى البيت أكانن بعزنك
مهاجرين السفر بالليل متابعين الخبر عنك
باكر بدرى فى الخرطوم
أهل اللمه متلمين
وحتى أمات شلوخ جنك
تموت فى الغربة زعلان من ملك موتك
___
عثمان عبدالرحيم موسى
...
القصيدة طويلة يا أب ذر منشورة
(
|
Post: #18
Title: Re: Osman Musa
Author: Osman Musa
Date: 07-27-2020, 02:21 PM
Parent: #17
والله يا أب ذر
أبكتني كلمات عزيزنا الأديب عبدالحميد البرنس عن القصيدة
|
|