ما هي المؤهلات المطلوب لي لاكون قيادي بتجمع المهنيين ؟

07:17 AM July, 26 2020

سودانيز اون لاين
MOHAMMED ELSHEIKH- الرياض- السعودية
مكتبتى
رابط مختصر

مع اعترافي الكامل بقيادة تجمع المهنيين لثورة 19 ديسمبر الشعبية في اصعب الأوقات
ولكن استفسر عن الكيفية التي تم بها التوافق على ان ان فلان وعلان هم قيادات تجمع المهنيين.

ان كان الامر انهم يمثلون القيادات الشرعية للنقابات المهنية قبل الإنقاذ فهذا يدحضه التاريخ اذ ان معظم قيادات النقابات النقابية آنذاك
تعتبر اليوم خارج الفعل النقابي والسياسي اليوم بسبب تقدم العمر لاغلبهم.
وان افترضنا وجودهم وبهذه الشرعية فأين ذهبت شرعية حكام الامس (التنفيذيين + التشريعيين) ؟

المهم تكون عندك شلة
ولو ماعندك شلة حزبية
تكون عندك قبيلة حزبية
ولا ماعندك قبيلة حزبية
يكون عندك ميم عين
ولو ماعندك ميم عين
يكون عندك بندقة حتى
ولو مؤجرة
وكدا ودواليك

Quote: مع اعترافي الكامل بقيادة تجمع المهنيين لثورة 19 ديسمبر الشعبية في اصعب الأوقاتولكن استفسر عن الكيفية التي تم بها التوافق على ان ان فلان وعلان هم قيادات تجمع المهنيين.

الزمن داك يا محمد الشيخ كانت جمرة ما ظنيت كان في واحد عايزالقيادة . .
زمن الاعتقالات والبمبان والدهس بالتاتشرات بكونو فازو بالتزكية . .
لا يَسْتَوِي مِنكُم مَّنْ أَنفَقَ مِن قَبْلِ الْفَتْحِ وَقَاتَلَ ۚ أُولَٰئِكَ أَعْظَمُ دَرَجَةً

الاستاذ عمر سعيد قال الحقيقة
و كت الرجال تضاير برزوا

بتعرف شغل المشاطة
بتعرف تطبل و تكيل المدح
بتعرف تلف و تدور
بتعرف تنظم القعدات
بتعرف تدفن الكلام
بتعرف الهناى و الهنايات
بتعرف تنوم بالنهار و تشتغل باليل
بتعرف تجيب لبن الطير
اهم حاجة البتاع داك

شكرا د.اخلاص المشرف . .

Quote: لمهم تكون عندك شلة ولو ماعندك شلة حزبية تكون عندك قبيلة حزبية ولا ماعندك قبيلة حزبية يكون عندك ميم عين ولو ماعندك ميم عين يكون عندك بندقة حتى ولو مؤجرة وكدا ودواليك

أهلا ياخال
نشوف ايجار لموضوع البندقية دا

Quote: لزمن داك يا محمد الشيخ كانت جمرة ما ظنيت كان في واحد عايزالقيادة . . زمن الاعتقالات والبمبان والدهس بالتاتشرات بكونو فازو بالتزكية . . لا يَسْتَوِي مِنكُم مَّنْ أَنفَقَ مِن قَبْلِ الْفَتْحِ وَقَاتَلَ ۚ أُولَٰئِكَ أَعْظَمُ دَرَجَةً

عمر ود سعيد
مراحب
ياحبيبي خليها التاتشرات
نحن شفنا ناس مقاومين زمن دق المسمار في الرأس ويحملون كل المؤهلات ولكن حتى لم يتم استضافتهم حتى في برنامج تلفزيوني!

شكرا لمرورك دكتورة اخلاص ومسهماتك في كل ما يهم الشأن العام

Quote: تعرف شغل المشاطة بتعرف تطبل و تكيل المدح بتعرف تلف و تدور بتعرف تنظم القعدات بتعرف تدفن الكلام بتعرف الهناى و الهنايات بتعرف تنوم بالنهار و تشتغل باليل بتعرف تجيب لبن الطير اهم حاجة البتاع داك

ودنواي مرحب بيك
و
لا حولتن ياخ
ما قدر دا لكن!

ما اردت أن أقوله باختصار :
باعتبار قيادة المهنيين قيادة مرحلية
كان المفترض من البداية ومع هم الكسرة والملاح وأرواح الشهداء الميامين يكون هم وضع قوانين النقابات
ونكون انتهينا من انتخاب نقابات شرعية تقود اتحاد شرعي للمهنيين بدل التخبط الحاصل وكل مرة تخرج علينا قيادة للمهنيين ببيان
وتعقبها أخرى ببيان معاكس مثلها مثل تناسل الحركات المسلحة أيام المنبوذة الانقاذ

ياتو واحد فيهم القديم بتاع الثورة
ولا المخطوف بتاع الشيوعين

مشكلتك مصدق دي ثورة
لحدي هسة
ده انقلاب
شفت ثورة في العالم تخت في راسك 23 جنرال
الختاهم منو غير الاعلان الدستوري
دي ما ثورة ده انقلاب مدعوم مصر والسعودية والامارات والاتحاد الاوربي وامريكا وليس له علاقة بحراك الشباب وقضايا السودان الجوهرية
الثورة ما جات لسه وما تبجي بي وعي ذى ده اطلاقا

Quote: ياتو واحد فيهم القديم بتاع الثورة ولا المخطوف بتاع الشيوعين

ماهي دي المشكلة ذاتها يا عبد العظيم اخوي
وخلونا ما عارفين نصدق مين ونخلي مين
كلهم قالوا نحن ناس الثورة

Quote: مشكلتك مصدق دي ثورة لحدي هسة ده انقلاب

الحقيقة المؤلمة تكمن فيما قاله عادل أمين.

Quote: شكلتك مصدق دي ثورة لحدي هسة ده انقلاب

يا جقود انا لا انفي حدوث انقلاب 11 ابريل
ولكن
ثورة
ومازالت مستمرة ضد الانقلاب

يعني اتركنا نمشي فيها للامام بدل ان نبدأ من المربع رقم صفر
يعني ماهو بديلك في الوقت الحاضر ؟

سلامات ود الشيخ

في عز الثورة وسطوة المجلس العسكري قال أحد الشباب وأظنه احمد الشريف أن تجمع المهنيين السودانيين وإالتفاف الناس حولو دي صدفة تاريخية من الصعب حدوثها فحقو الناس تحافظ على الصدفة دي! وقد صدق

تجمع المهنيين من قام في أيامو الأولى ناس كتيرة كانت عارفة إنو كل أعضائه والقياديين الفيهو ما جوا بي مؤهلات ولا بتمثيل ديمقراطي لأجسامهم المهنية بل حتى ناس كتيرة جدا" ما كانت عارفة منو هو تجمع المهنيين!
ولقى الدعم ببساطة لأنو الناس كانت متفقة على تسقط بس وعلى شوية عشم انو يكونو ناس واعين و وطنيين ويمشوا في الخطوة البعدها ! لكن للأسف أي واحد مسك قال ما بفك و لسخرية القدر رجعوا هم نفسهم لإتهام المخالفين
بي نفس التهم الكانت موجهة للتجمع !!
الخلاصة بعد تسقط بس هم زاتم بقوا سايقين خط نقعد بس ! والموضوع جاب ليهو بيانات واحزاب وسرقة باسوردات ..والخ

لا توجد ورة في العالم كان طريقها ممهد ومفروش بالرياحين
كل انواع الثورات ضد الاقطاعية والدكتاتورية والظلم والعدل والخ..
والبحصل دا شىء طبيعي للضغوط الحاصلة من الداخل والخارج
لدول وكيانات وتمعات وكجموعات لاتريد خيرا للبلاد والعباد
ومؤكد ان هناك شرخ و(اختراق) ل(قحت)
المؤهلات المطلوبة هو مؤهل واحد فقط لاغير
انك تعرف كيف تدار الامور في الخفاء مع العسكر والفلول

Quote: مشكلتك مصدق دي ثورة لحدي هسة ده انقلاب

القول ماقاله هذا العادل الأمين..
فالذي نجح هو الانقلاب وقادته
والفشلت هي الثورة وأهدافها..
أما ان تبحث عن مؤهلات في ظل هذه الحكومة
فعليك باستعادة حديث وزيرة التعليم عندما قالت فيما معناه
أن الحكومة لا توظف الا من (كان يؤمن بميثاق الحرية والتغيير) .

سلام ود الامام واهلا وسهلا

Quote: الخلاصة بعد تسقط بس هم زاتم بقوا سايقين خط نقعد بس ! والموضوع جاب ليهو بيانات واحزاب وسرقة باسوردات ..والخ

انا محتار
مافي أصوات ارتفعت بعد التغيير والانفراج النسبي لشرعنة الهيئات النقابية ليه؟
ودا ما كان محتاج مجهود خرافي مثل إزالة السودان من قائمة الدول الراعية للارهاب

Quote: ماهي دي المشكلة ذاتها يا عبد العظيم اخوي وخلونا ما عارفين نصدق مين ونخلي مين كلهم قالوا نحن ناس الثورةماهي دي المشكلة ذاتها يا عبد العظيم اخوي وخلونا ما عارفين نصدق مين ونخلي مين كلهم قالوا نحن ناس الثورة

ذكرتني يا ود الشيخ زمان كنا بنقول الزول كان عاوز يبقى كوز
يشوف ليه أقرب يتيم في الحلة ويأكل قروشه

هسي كان عاوز تبقى قيادي في تجمع المهنيين بتاع الجماعة
تقطع زرار قميصك وبعد المغرب تدقش الحِلة في يوم خريفي ماطر
وتقول : شدي حيلك يا قطاطي ويا بيوت الطين أقيفي

انا عاوزة اغير السؤال بتاعك واعممه والسؤال يكون : "ما هي المؤهلات المطلوبة لتكون سياسيا قياديا
ناجحا وتتقدم الصفوف لتكون مسؤولا بارزا او حتى رئيسا !!؟
والجواب هو :
المؤهلات المطلوبة هي:
ان تكون انتهازيا
ان تكون مكارا
ان تكون حاسدا تتمنى زوال نعمة الغير
ان تكون لصا
ان تكون انانيا تغلب مصلحتك الشخصية على مصلحة الوطن
ان تكون خطيبا مفوها وتاثر على الناس بمعسول الكلام
ان لا تعرف الخط المستقيم لتحقيق اهدافك وتعرف فقط اللف والدوران،،
ان لا تفرق بين الحلال والحرام،وتفضل الحرام على الحلال
ان لا تعرف الصدق ابدا ،والكذب مبدا اساسي في حياتك،،
......
كفاية ولا ازيدك....لسع عندي ٢٠من المؤهلات المطلوبة ومنها ان تكون جاهلا،،،

Quote: كفاية ولا ازيدك....لسع عندي ٢٠من المؤهلات المطلوبة ومنها ان تكون جاهلا،،،

اهلا الأستاذة امتثال ومرحب

كفانا ال 8 ديل بتستحقي الاوسكار

بس يكونوا عندنا في بلدا حصريا