اتمنى النجاح لدكتورة آمال والي الشمالية بالمناسبة هي قريبتنا

08:01 AM July, 23 2020

سودانيز اون لاين
علي عبدالوهاب عثمان-جدة
مكتبتى
رابط مختصر

أولاً قبل كل شيء للناطقين بالعربية ما هو المؤنث من والي ( والية )
ما عارف حتى د. آمال أنا متأكد ما بتعرف لأنها ( لسان نوبي ) لغة الام
وهي من جزيرتنا ومن ساقية جدنا وابوها الله يرحمه تربال عديل
وهي نشأت بين السواقي والنخيل ( تربالة ) كانت في المدرسة دفعة اختى الصغرى
أنا ما كنت متخيل انها ستصل هذا المنصب ..

يا ريت يا د. آمال خالنا ( والدك) محمد عزالدين الله يرحمه كان حي وحضر المناسبة دي
وهو أبوها ( خالنا) كان زول تربال (سمد) .. ولكن كانت لديه شخصية وكاريزما طاغية جداً يتسيد الونسة
وأي مناقشات عن الزراعة والساقية .. وكان المدافع الأول عن ساقيتنا ضد اي معتدي آخر
يعني كان قيادي .. أجزم أنني صدقت ان القيادة والرياة هي جينة موروثة بين الاباء والابناء

وكان خالنا ده يعني شوية كده يجيد بعض الجمل بالعربية .. خاصة اذكر ايام الانتخابات
يهتف بالمكرفون ( حديد ) زي صبابة الجاز .. يهتف ونحن نردد
خلفه ( يا ناس الفتة أرفع يدك من الفتة ) والغريبة بعد هذا الهتاف كنا نمشي في ضل لبخ الادريسي
ونأكل الفتة معاهم ..

أنا خوفي ليس من الشباب والنخب وغيرهم
ولكن من العامة وحتى عندنا في جزيرتنا ان لا يستوعبوا الأمر
مشكلة الجازولين ، والتقاوي ، والسماد ، والمهم كيفية مخالطة المزارعين
ولا بد من جولات في المحليات والمزارع ..
أنا مقتنع جداً بكفاءتها ولو لا هذه الكفاءة لما تم اختيارها
ولكن خوفي ومشكلتي اقتناع هؤلاء

سلامات عمنا

يعني خلاص ركبلك عود في الحكومة و بقيت من أهل الواو :) :)

التوفيق والسداد للكنداكة آمال .. ولجميع الولاة المعينيين ..

نتمنى السلام والاستقرار ويمرقوا البلد من جحر الوزة الدخلها فيهو الكيزان

حبيبنا حيدر .. تحياتي
اتمنى لها التوفيق .. لكن منصب والي الشمالية
كثيرين من دهاقنة السياسة من الاحزاب كانوا متربصين لهذه الوظيفة
ما اظن هي تستمر .. الموضوع حيكون صعب بالنسبة ليها
ما في كيزان ودولة عميقة لكن من الاحزاب التقليدية والناشطين
كلهم كانوا متوقعين هذا المنصب ..
أعرف انها ستعاني كثير

أنا خوفي من ناس حبيبنا برطم ..
تحياتي الحبيب حيدر

الزول الجميل علي عبدالوهاب
الف مبروك منصب الوالي لقريبتك..
وربنا يوفقها يا رب
تحياتي 🌹

ألف مبروك للدكتورة أمال و للولاية و لكم استاذنا علي.

جميل أن يأتي التغيير من عندكم و ان شاء الله نجاح

الدكتورة في مهمتها سيسرع التغيير في كل السودان

و سيعزز فرص النساء في الإنتخابات القادمة.

فلتفخر د. أمال بأنها ستقود عملية تغيير المفاهيم القديمة

بخلق واقع أفضل للمنطقة.

مبروك استاذنا علي عبدالوهاب عثمان ع ع ع
كلما فخورين بها ومتاكدين من دعمكم لها

تحياتي د. اخلاص ..
طالت سنوات الغربة ابعدتنا عن الاهل نوعا ما
لم أكن اتابع هذا الجيل ..
ولكن لم يأت الاختيار هكذا وبالمناسبة بدون مخاصصة
المهم والاهم هو التوفيق في عملها

المشكلة في من كانوا يركضون خلف هذا المنصب
بالتوفيق ان شاء الله

تحياتي د. اخلاص

د. نعمات تحياتي وشكرا على الحضور
أجزم أن د آمال .. ورثت والدها ( خالنا) كان رجل قيادي بالفطرة
سبحان الله أنا صدفت أن المقدرات ورثة وجينة في العائلة
أنا أذكر أن كل مراحلها الدراسية كانت عندنا في ضواحي الدنيا وهي دفعة اختى الصغرى
بعد الجامعات والانفتاح التعليمي لم أتابع اخبارها .. إلا عندما سمعت امس تعيينها والي للشمالية
يا جماعة هل ( والي ) يستخدم للمذكر والمؤنث او ( والي .. ووالية )

تحياتي الدكتورة نعمات .. شكرا للحضور

دكتورنا الجميل .. محمد مودتي
كانت مفاجأة بالنسبة لي لأننا في الغربة لم نتابع هذا الجيل
كنت اعرفها متوفقة اكاديمياً ولكن نشاطها وعملها العام هو الذي فاجأني
الشمالية آمنة وليس بها أي مشاكل كبيرة تذكر حتى الخلافات بين الناس
ليست بتلك الصورة .. ولكني أكرر نظرة الناس العاديين ناس ( تراب البلد )
يا رب يقتنعوا .. مع أن المرأة عندنا لها وضع خاص

تحياتي الحبيب محمد

شيخنا علي
اختيار موفق
وربنا يعينها على حل جميع المشاكل من صناعة واخراج النظام البائد بامتياز
خاصة موضوع المشاريع والشركات المساهمة والاراضي .. والصحة ..
واهم شىء المصائب والمخلفات المدفونة في صحراء الولاية
الكوز عادل عدلان عندما كان والي الشمالية وعينه اسامة عبدالله بدل الراحل ميرغني صالح
كان في مشكلة مشروع "بنا" ( تكنو) مستفحلة . ركب بجماعتو اسطول سياراته الدفع الرباعي وقال
انا حاحل الموضوع قبل ما اخوت رجلي في الواطة.. واول ما وصل . الجماعة هجموا عليه وضربوه ضرب
وولى هاربا.. صاحبنا الله يطراه بالخير عبدالمنعم ولد شيخ عثمان مختار كان اول الواصلين لضرب وجه الوالي
المنتفخ واول الضاربين
طبعا بعد فترة تم القاء القبض عليهم.. انا اتصلت عليه بعد مجهودات عشان اطمئن عليه وهو في الحجز
وامام العساكر قلت ليه انت ياعبدالمنعم تضرب الوالي بونية؟ قال لي: اضربو واضرب ابوهو (ايل..كللللب دا)

عمنا على سلامات يااخ
مبروك عليكم بروف آمال محمد عزالدين عثمان
رغم محاولات الشيوعين عرقلة ترشيحها
وكذبوا عليها ليفوز مرشحهم
نالت آمال ثقة أهلها في الولاية وثقة المجلس
المركزي للحرية والتغيير
كان في صراع ومحاولات لمنعها من أن تصبح
والي للولاية الشمالية

أتمنى لها التوفيق ومبروك عليكم

التمنيات بالنجاح لقريبتك عمنا علي
المهمة غير سهلة خاصة في ولاية كالشمالية واهلها والمتابعون لشأنها يدركون مدى تعقيد المور فيها .. مطلوب من الوالي - نكون في السيف صايد ونحيد الكلمة -ان تنافح على أكثر من جبهة : الدولة العميقة والكيزان من يعزفون على وتر المشاكل الاقتصادة والازمات والتي هي في الاصل إرث فترتهم وحتى قوى الثورة في الشمالية ليسوا على قلب رجل واحد
نتمنى ان تراهن على صقور قوى الحرية والتغيير وتكون على تناغم معهم فتخليص الولاية من التمكين مهمة شرسة

Quote: كلفت بروفيسور أمال محمد عز الدين منصب والي الولاية الشمالية و هي من مواليد منطقة البرقيق في العام 1965. نالت الدكتوراة في فيزياء التربة من كلية الزراعة جامعة الخرطوم (2005). و ماجيستير علوم التربة من كلية الزراعة جامعة الخرطوم (1995). و البكالريوس في علوم التربة من كلية الزراعة جامعة الزقازيق بجمهورية مصر العربية (1988). عملت بروفيسور آمال كرئيسة لقسم انتاج المحاصيل بجامعة دنقلا (2005 – 2007)، و رئيسة لقسم انتاج المحاصيل بجامعة دنقلا (2011 – 2012)، و أيضا رئيسة لقسم الأبحاث العلمية بكلية الدراسات العليا بجامعة دنقلا (2012 – 2013). كما شغلت منصب عميد كلية الدراسات العليا بجامعة دنقلا (2013 – 2017)، و عضوة بلجنة الاستشاريين بقسم علوم التربة بجامعة دنقلا، عضوة مجلس كلية الزراعة بجامعة دنقلا،عضوة مجلس أساتذة جامعة دنقلا، و رئيسة للجنة التسييرية لنقابة أساتذة جامعة دنقلا (2020).

استاذنا علي أمبس
انا مع شغل المرأة للمناصب العليا
و ما عندي اي اعتراض و لا يحق لي الإعتراض
لكن هل هي كوزة كما ورد في الصورة ؟

https://top4top.io/

استاذنا علي عبد الوهاب
الف الف مبروك للكنداكة قريبتكم امال في هذا المنصب ،منصب حاكم الولاية الشمالية
ونحن نكاد نجزم على انها سوف تنجح فيما فشل فيه الاخرون ،،،ونكاد نجزم ان هذا الاختيار
صادف اهله ما دام انت بتقول هى جات من بيئة تربالية واسرتها اسرة عادية وليست من البيت
البرجوازي ،،يعني هب التي سوف تحس وتشعر بمعاناة الفقراء وتشعر بمشاكل ناس الشمالية
وتسعى لحل هذه المشاكل بصبر المزارعين وحرصهم على نجاح زراعتهم،،،
...ونتمتى من هذه الحكومة ان تقوم بتغيير كلمة الوالي ،لان كلمة الوالي من مخلفات عهد اللصوص
والحرامية وتجار الدين الذين كانوا يريدون محاكاة عهد الخلفاء الراشدين والتظاهر بانهم يطبقون
ما سار عليه الخلفاء الراشدين ،ولكنهم في الحقيقة كانوا يمكرون ليخدعوا الشعب ويسرقوا امواله،،،
ولذا يجب تغيير كلمة الوالي واستبداله بكلمة حاكم وتغيير اسم الولاية الى اسم محافظة او مديرية
او اي اسم مناسب ،،،
ومرة ثانية مبروك لحاكمة المديرية الشمالية وامنياتها لها بالتوفيق والسداد ،،،

الحبيب خضر أمبس .. تحياتي
نحن طبعاً الغربة ومع هذا الجيل الشاب لا نعرف الكثير عنهم
ولكن في الشمالية الموضوع ظاهر جداً
اذا كانت كوزة لجان المقاومة والحرية والتغيير ما كانوا رشحوها
لكن يا خضر امبس الموضوع صعب جداً في الشمالية
من الناحية الامنية والخلافات لا توجد مشاكل كثيرة ولكن الناس النفعيين
المشكلة في الاحزاب والتجار وبعض الشخصيات التي لا تقتنع بأبناء وبنات الكادحين
لو ما مؤهلة ما أظن كانوا يوافقوا عليها ..
صدقني يا الحبيب خضرما أظن لكن سيتم شيطنتها من جهات ذات نفوذ
لحد الآن في القروبات والواتساب ما ظهر شيء

كمان المشكلة في عامة الناس أهلنا الترابلة ( خليك من النخب) يا خضر ديل ما يعترفوا
إلا للعسكري .. تعرف الوالي الغير العسكري .. ينظروا ليه زي ( موظف عادي )
دعك من الموافقة على ( بنت) لكن الشباب هم الواجهة

كمان ابوالقاسم برطم .. هو صاحب نفوذ في الشمالية خاصة دنقلا
كمان ناس السدود زمان

الله يهون .. المفروض تنظر للوضع كويس .. وتقدم الاستقالة

المهمة غير سهلة خاصة في ولاية كالشمالية واهلها والمتابعون لشأنها يدركون مدى تعقيد المور فيها ..
مطلوب من الوالي - نكون في السيف صايد ونحيد الكلمة -ان تنافح على أكثر من جبهة :
الدولة العميقة والكيزان من يعزفون على وتر المشاكل الاقتصادة والازمات
والتي هي في الاصل إرث فترتهم وحتى قوى الثورة في الشمالية ليسوا على قلب رجل واحد
========================================
حبيبنا مهدي .. تحياتي ..
أصعب فترة في تاريخ الشمالية .. من أيام المديرية الشمالية
نعم يا مهدي المهمة صعبة جداً .. أكثر من الدولة العميقة والكيزان
المشكلة المنافسين كمان من الاحزاب الاخرى ناس بشرى عبدالحميد وباقي الجماعة
وكمان حبيبنا برطم خطير .. لا أعرف موقفه الى الان

أنا من رأي د. آمال رغم انها صلبة ولكن الشمالية فيها مصالح ضخمة جداً اراضي زراعية
وكمان التعدين .. المشكلة اصحاب النفوذ والمال كما انت من عمق المنطقة ما تنسى ( الاحزاب المنافسة)
وكمان ناس السدود والاراضي الممتدة ..

الله يكون في عونها ..

تحياتي .. الحبيب مهدي

حبيبنا عبدالعظيم .. تحياتي
دائما منصب الوالي في الشمالية يكون محل نزاع
حتى الكيزان مع بعضهم ..
مع أن دائرة في انتخابات الانقاذ لم يفز فيها كوز
فاز برطم ( مستقل )
الحكاية سوف تكون صعبة على د, آمال
أحسن كانت تعتذر لأن هناك مصالح ضخمة جداً لرأس مال
اراضي زراعية واسعة وتعدين

تحياتي الحبيب عبدالعظيم

حبيبنا احمد الفنان .. تحياتي
مشروع بنا كانت مشكلة كبيرة جداً وخاصة بين عادل عوض
وميرغني الله يرحمه .. بس موقف رجال بنا كان 100% لأنهم مارسوا
طريقة حل المشكلة لدينا احيانا العنف بالدنقلاوية النظرية دي ( سوكي جوم )
اضرب وبعد داك المشكلة تتحل .. وخاصة الاراضي
كان موقف بطولي من اهلنا في بنا .. كنا متابعين من جمعية بنا في جدة

تحياتي الحبيب احمد .. حسب ما اعتقد الحكاية صعبة جداً بالنسبة د. آمال المتربصين كثيرين
جداً .. الله يهون ..

ونكاد نجزم ان هذا الاختيار
صادف اهله ما دام انت بتقول هى جات من بيئة تربالية واسرتها اسرة عادية وليست من البيت
البرجوازي ،،يعني هب التي سوف تحس وتشعر بمعاناة الفقراء وتشعر بمشاكل ناس الشمالية
وتسعى لحل هذه المشاكل بصبر المزارعين وحرصهم على نجاح زراعتهم،،،
==========================
تحياتي الابنة امتثال والتحية لباقي الاميرات
صحيح كلنا نشأنا في جزر مغلقة .. اسر عادية جداً
برجوازي ده كان العمدة وشيخ البلد .. فقط
أنا طبعا حسب الغربة والعمر ما متابع الجيل الجديد
زي ما قلت فوق والدها كان رجل شجاع ومقدام سمد الساقية وقائد الترابلة
ربما ورثت هذه المقدرات ..
كمان في الشمالية ما في معارضة مسلحة أو ما شابه .. ولكن برضو كانت بؤرة كيزان
أكيد لم يتم اختيارها هكذا لأنها بدون أي سند حزبي .. وفي هذه المرحلة الحساسة
لن يتم تعيين بالمجاملة ..
المهم رضى المجتمع .. الموضوع شوية صعب عليها
ولكن شباب اليوم اكثر صلابة وقوة

تحياتي الاميرة امتثال

ما بتنجح والا بتقوم ليها قائمة تكون معلقة في الهوا بس ذى باقي الولاة
والزواحف مبسطوطين 24 قيراط
اذا جنرال اب قلقات ما قدر يؤمن حياة الناس ويغير واقع الولاية التعيس دي تعمل شنو
اراضي الولاية كلها منهوبة من دول انت عارفا كويس وما في مجلس تشريعي ولائي يدعم الوالي وقرارته النتيجة معروفة
ومرشحنا لولاية لحدي يوم الدين ازدهار جمعة الحركة الشعبية
وبي الانتخابات فقط وليس المحاصصة اطلافا
انا من الشمالية حمدوك وقحت لا يمثلوني وكل مخرجاتهم ايضا
الحركة شعبية كانت اصدق وانظف من عقاب مايو المستهبلين ديل
وكل اول ليه اخر
بجدعوها بكره ذى اكرم وتجي تولول في البورد
https://top4top.io/https://top4top.io/

بس اوعك يا عادل امين تقول لينا انه في جريدة في السودان اسمها الوطن، او الثورة او السودان!!!؟؟؟

ومرشحنا لولاية لحدي يوم الدين ازدهار جمعة الحركة الشعبية

=========================
حبيبنا عادل أمين .. تحياتي
يا سلام على ازدهار كانت مناضلة في الايام الصعبة
ما بين المضايقة والمعتقلات ..
الغريبة لم اسمع بها لا ضمن شباب التغيير ولا الثوار
حبيبنا عادل هل هي موجودة في السودان

هي حقيقة كنداكة الشمالية

تحياتي الحبيب عادل

على ياعبد الوهاب
امنياتنا لها بلنجاح
كنداكا حفيدة كنداكات
المهمة صعبة وعسيرة
ولكنه ليس مستحيلة
وحسب علمى ان المصرين
كانو بفضلو والى اتحادى

حبيبنا الأمير تحياتي
صدقني الرطانية ( حسب مصطلحك ) مهمتها صعبة جداً
عندنا الاحزاب التقليدية ومصالح البعض أصعب من الكيزان والحكومة العميقة
كانوا كثيرين متربصين ومجهزين انفسهم لمنصب الوالي
هذا التعيين فاجأ الكثيرين ..

نتمنى ناجحها .. تحياتي الامير

ياعلى اهما حاجة تكون بتعرف
طرطن عشان تكون قروية اصيلة
زى ناس امتثال قاعدة فى امريكا
وكانها قاعدة فى القرية

يدون مجلس شوري منتخب في الولاية ولا والي ما نبجح والناس الضربو دستور 2005 بي الاعلان الدستوري اعادو تدوير الدولة المركزية المجرمة سبب البلاوي
لانه المجلس التشريعي الولائي هم البحمي الولاية ارض وانسان
الحركة الشعبية اخر مشروع محترم جانا في الشمال وديمقراطي
واهلنا في الشمال كانو جاهزين للانتخابات الوالي ازدهار جمعة وبرلمان الولاية
وحدث ما حدث
والزمن بمشي ونشوف الراي الني بتاع المحاصصة والاعلان الدستوري بتاع ساطح الحاج الناصري والسنوهري البعثي وصديق يوسف بودي الولاية وين

مبروك علي امبس ..
من امبارح انا فتحت بوست تهنئة ليك والاهل بارتقاشا..
بعنوان ارتقاشا جابت كنداكة..
الظاهر ما شفته.

الملك امبس .. تحياتي ..
ما شاء الله د. امال .. لكن اكيد سوف تواجه مشاكل كبيرة جداً
طبعاً الاحزاب
كمان المشكلة في ابوالقاسم برطم عمل منظومة ( نداء الشمال )
قبل قليل اصدر بيان .. الموضوع ما عجبو .. ستعاني د. امال تماماً كما عانى
ميرغني صالح الله يرحمه ..
لأن الشمالية فيها شللية خطيرة جداً ( كمان المال نموذج برطم )

يكفيها الثقة والتعيين حتى لو استقالت اليوم ..

تحياتي الملك امبس

حبيبنا عادل تحياتي
تحياتي شكرا على الحضور
واتمنى ان تطبق اقتراحاتك في الولايات
اي تعيين بدون انتخابات فيه خلل

تحياتي الحبيب عادل

الأمير بدر تحياتي الحبيب
هي 100% ما في غير لسانا
تربية السواقي والترابلة
اكيد .. لسانها نوبي 100%

تحياتي الحبيب الامير
بس حرام الظرف صعب جداً بالنسبة لها

استاذنا علي
ارجو ان تشجع قريبتك الكنداكة امال لأنك اذا قلت ان أمر حكم الشمالية حيكون صعب عليها
حتصاب بالإحباط والأمر كله نفسيات ...ولذا نرجو أن تقول ليها نحن متأكدين انك حتنجحي
لأنك لذا إرادة قوية وعزم وتصميم لحل مشاكل الشمالية المتراكمة...
ونحن على يقين انها ستنجح...
والحكومة ما قررت إسناد هذا المنصب إليها إلا لأنها واثقة من كفاءتها واثقة ان أهل الشمالية
المستنيرين سيتقبلونها بصدر رحب ويقفوا معها لمساعدتها وليس لوضع العقبات أمامها..
والله يوفقها ويسدد خطاها ...

تحياتي الاميرة
في منتديات وقروبات دنقلا شاغلين تشجيع على الطوال
نعم هي كفاءة ما شاءالله ..
ولا يمكن اختيارها هكذا لأنها لا تدخل في المخاصصة

تحياتي الابنة امتثال

ا
الأخ على وضيوفه
والاخ خضر
سلامات ومبروك للدكتورة امال
جابتي شهادة في حق دكتوره امال..
دكتورة امال ما كانت في يوم من الايام كوزه ولا علاقة لها بالكيزان. عرفتها منذ ايام دراستها للماجستير في جامعة الخرطوم وعملت معها في جامعة دنقلا حتى هجرتنا لامريكا. واشهد انها عانت من معنا من ظلم الكيزان في مسيرتها المهنية
اتمنى لها التوفيق وربنا بيسالنا من الشهادة دي
لكم الود

Quote: بالمناسبة هى قريبتنا

ههههه بقيتو أهل العوض يا على.

الف مبروك يا علي يا اخوي بلدنا مصنع كل جميل زيك
نتمنى من القلب أنها تنجح كل العرفته عنها زولة مؤهلة
نساءنا في الشمال بالف راجل من باقي الولايات

سلام امبس علي

نتمنى لها السداد والتوفيق
ونأمل أن تجد المساندة والدعم من العاملين معها في الولاية

اديبنا الرائع أبوجهينة تحياتي
صدقني ووو أمبس أنا اكثر حاجة فرحتني تكرار اسم ارتقاشا
لكن بالنسبة لنجاحها .. بصراحة صعب جداً الحكاية فيها مصالح
غايتو التوفيق من الله

تحياتي

ألف مبروك للدكتورة أمال

جمال امبس تحياتي
الحكاية ابداً ما سهلة
فيها صعوبة شديدة جداً

تحياتي جمال امبس

حبيبنا الامير توفيق ..
شكرا على المداخلة ..
نتنمى نجاحها وده المهم .. الامير لازم جولة الى
مرجعيتكم في أكد بلد جدكم الامير

تحياتي الحبيب أميرنا توفيق

ول أبا علي،
سلام .. وألف مبروك ليكم .. نحن طالبنا بأميرة الجبال نور تاور .. قالوا لا إلا رجل في ولايات الحرب ..

ألف مبروك للآرتاوية دكتور آمال ..
يا علي أنت مطالب بالعودة للتوثيق لدور الآرتاويات .. رغم إنك وثقت ل "فوفا" كقيادة تقليدية في دائرة الجزيرة .. لكنك لم توثق لها كقيادة علي نطاق المجتمع إلا إذا رجعنا للملكات أمثال الملكة أماني ..

مبروك ليكم وأشعر بالفخر لدور المرأة السودانية المتنامي في قيادة المجتمع.


بريمة

هوووي الحكيم،

Quote: نساءنا في الشمال بالف راجل من باقي الولايات

مرتنا في غرب السودان بمليون مرأة من الشمال .. يعنى 500 ألف من رجالكم يساوي مرأة واحدة من عندياتنا.

بريمة

◼️*لا خير فيك ان لم تسمعها يا حمدوك*
_________________

تفاجأت كغيري بتعيين الدكتورة امال في منصب والي الولاية الشمالية وقبل الخوض في التفاصيل وقبل ان يتم اتهامنا باننا ضد تعيين المرأة في مناصب عليا واسطوانة حقوق المرأة والمساواة وقصص الف ليلة وليلة ..
أقول أننى انتمى لأمة لا تفرق بين الرجل والمرأة لدرجة ان لغتنا النوبية هي اللغة الوحيدة في العالم التي تخاطب المرأة بنفس لغة الرجل .. اللغة الوحيدة في العالم التي لا تجد فيها كلمة ( هو) وكلمة ( هي) وهي قمة المساواة في كل شيء حتى في لغة المخاطبة فارجو ان لا تزايدوا علينا بذلك فنحن سبقنا الامم بسنوات ضوئية في هذا المقام .
ما هي المسوغات التي اعتمد عليها حمدوك في اختيارها لهذا المنصب الخطير ؟؟ سؤال يجب ان نعرف إجابته .
ان قلت ذلك هو اختيار قوى الحرية والتغيير في الولاية فهذا غير صحيح اطلاقا حيث لم يرد ذكر اسمها في اي مرحلة من مراخل الاختيار .
ان قلت ان جماهير الولاية طالبت بها .. بكل اسف نقول لك .. ان 95% من سكان الولاية لم يسمعوا حتى بأسمها من قبل ناهيك عن المطالبة بتعيينها .
الذين طالبوا بتعيينها هم الذين يعرفونها وهم اسرة جامعة دنقلا وفي جامعة دنقلا اسرة كلية الزراعة !!!!
خريجي كليات الزراعة بأقسامها المختلفة هم الذين اصبحوا الكفة الراجحة في اختيارات حمدوك للوظائف العليا وبشكل مثير للدهشة والاستغراب وليتهم نجحوا في وظائفهم لكفونا شر استجداء طعامنا من دول اقل من السودان زراعيا .. راجعوا معي شهادات عدد من مستشاري حمدوك وكذلك من الذين تم تعيينهم مؤخرا كولاة او وزراء لتتأكدوا من هذا الادعاء ..
اقول هذا مع أكيد اعتذاري لقبيلة الزراعيين والذين أحسب نفسي منهم .
نعود للسيدة واليه الولابة الشمالية ونقول .. ما هو تاريخها النضالي في هذه الولاية حتى يتم تشريفها بهذا المنصب .
واين هي ابحاثها عن التربة والفيزياء واين كانت عندما تم تدمير تربة الشمالية بالسيانيد والزئبق وبطريقة عشوائية بحثا عن الذهب ..لم نسمع لها رأيا .. لم نقرأ لها اعتراضا بل لم نسمع صوتها في يوم من الايام !!!
اين كانت وجماهير الولاية في كجبار ودال تصارع الحكومة السابقة سنينا عددا لمنعها من إقامة السدود ؟؟ لم نسمع لها صوتا ولم نقرأ لها ما يفيد بموقفها .
اين كانت من مألات سد مروري وتشريد سكان المنطقة ... بل اين كانت مما حدث في مسقط رأسها البرقيق من مشاكل الطفح المأئي الذي تسبب في تشريد مئات الاسر من مساكتها . لم نسمع لها رأيا وهي المختصة في فيزياء التربة .. هذه التربة التي طفحت في مسقط رأسها البرقيق ..يا للفجيعة وبا للوجع الذي ينتظرنا في الولاية الشمالية .
وأين كانت وملايين الافدنة في الولاية الشمالية توزع لمستثمرين مجهولي الهوية من خارج وداخل السودان .. حتى اصبحت اراضي الشمالية الخصبة مرتعا خصبا لكل سماسرة الارض .
واين كانت وهي المتخصصة في الزراعة والالاف من نخيل الولاية تحترق كل شهر والجريمة تسجل ضد مجهول .
هذا قليل من الكثير الذي لم أقله . هل سمع احدكم باسم الدكتورة أمال ؟؟ هل سمع احدكم ولو بنصف رأي من كم المشاكل التي ذكرتها للدكتورة امال ..
مالك كيف تحكم يا حمدوك ؟؟ اذا كنتم مصرون على المحاصصة الحزبية فاختاروا لنا في الولاية الشمالية واليا بثقل ولايتنا من اي حزب كان رجلا كان او أمراءة لا فرق لدينا . يقال انها تنتمى لحزب المؤتمر ولا غضاضة في ذلك ولكن شريطة ان يختار الحزب واليا بحجم ولايتنا وأكرر رجلا كان او أمراءة لا فرق .. وان لا تختاروا لنا فقط لملأ الكرسي الشاغر والسلام .
وسيدفع حزب المؤتمر ثمنا غاليا في الولاية الشمالية جراء هذا الاختيار الخاطيء هذا اذا صدق انها مرشحة الحزب .
بقى ان نقول ان أعظم نضال للسيدة امال كما تناقلتها الاسافير انها تبرعت براتبها الشهري للمعتصمين في القيادة ويا لعظمة نضالها وكفاحها ضد النظام السابق .
اهلي في الولاية الشمالية الجاتكم في واليتكم سامحتكم !!
_______________
رمزي المصري


ومع التقدير للأخ على وفرحته بالتعيين
اتفق مع رمزي في مقاله
وحقيقة التجمع الاتحادي ذات الثمانية اسماء غير مؤهل لاختيار والي
كما وان الدكتورة تفتقد خبرة السياسة لتدير ولاية وع قولة واحد بلدياتها أقصى ما يمكن أن تقوم به إدارة ووكالة الزراعة لا وزارتها.

الف مبروك يا على اخوى
والتهانى لدكتوره آمال مع الامنيات بالتوفيق
حتماً ستواجه عقبات كبيرة من الدولة العميقة فى دنقلا وما اكثرهم هناك
فى جهاز الدولة .

دكتورة آمال غير حزبية
وانا اعنى ما اقول وهذه شهادة لله ( لا اتحادية ولا اى حزب آخر ابوها رحمه الله كان اتحادى )
ولا عندها اى قضية مع السياسة .

الف مبروك يا على اخوى
والتهانى لدكتوره آمال مع الامنيات بالتوفيق
حتماً ستواجه عقبات كبيرة من الدولة العميقة فى دنقلا وما اكثرهم هناك
فى جهاز الدولة .
==========================
علاء امبس .. تحياتي
صدقني أنا فرحان لارتقاشا الجزيرة الجميلة
النجاح صعب جداً في الشمالية ..
يا علاء لا توجد أي معينات او معطيات للنجاح

كان المفروض يتم تعيين ابوزيد عبدالله هارون الوحيد الذي اثبت
نجاحه عندما مسئولا قبل اختلافه مع الكيزان

ابوزيد انسان ناجح وكاريزما

د. أمال لو نجحت تكون انسانة غير طبيعية
لا احد يمكنه النجاح في الشمالية
بعدين الناس العامة ( ملح الأرض ) لا يتعرفوا بقدرة المرأة
حتى أهلنا في الجزيرة ومن داخل عائلتها

أنا عندي المهم ارتقاشا

الحبيب Al Sunda تحياتي
حبيبنا رمزي المصري دائما أقرا مقالاته في موقع اخبار السودان
صدقني أنا ليس لدي اي معلومات عن نشاطها السياسي أو غيرها
لأنها من الجيل الاصغر ونحن في الغربة
لاحظ حتى عنوان البوست (( اتمنى النجاح ... )) لأنني متخوف جداً
المهمة في غاية الصعوبة
لا اعرف ان هناك مافيا من خريجي الزراعة حول حمدوك
أنا دافعي هناك هو الدها يرحمه الله واشياء خارج نطاق السياسة
حتى في حاضتنا هناك أعرف ان البعض لا يؤيد تعيين المرأة مهما كانت
وقد ذكرت ذلك في مداخلاتي في بداية البوست

هي الحرية والديمقراطية واختلاف وجهات النظر
اذا لم تثبت كفاءتها سوف تغادر الموقع كما فعل الكثيرون

تحياتي الحبيب .. صدقني لم أفرح بتعيينها لأن المناصب هذه الايام مقصلة
فرحتي كانت اسم جزيرتي تعلو فوق .. ولن أحزن اذا غادرت المنصب اليوم

وأقول مستحيل نجاح أي فرد مهما كانت مؤهلاته وخبراته في هذه المرحلة لأن المعطيات (زيرو)
ولا توجد أي ادوات او معينات أو كفاءات او فريق عمل ... الخ

تحياتي الحبيب مودتي

حبيبنا الاديب بريمة .. تحياتي شكرا
يا الحبيب يا سلام لن انسى تلك الخدمة الرائعة في جمع الكتاب

جميل وانت تستخدم عبارة ( آرتاوية ) طبعا بالعربي ( بنت الجزيرة )
هكذا لديك عمق في التراث ..

حبيبنا بريمة سكان الجزر مختلفين شوية لأنهم نشأوا في بيئة معزولة عن الآخرين
لكن جيل اليوم طبعاً مختلف عن الاباء والاجداد
والمرأة في كل السودان لها تاثيرها ودورها في الزراعة والرعي وادارة البيت
يا سلام على الأخوة والمشاكسة الجميلة بينك وبين الامير توفيق مداخلاتكم قيمة اضافية للبوست

مودتي اديبنا الرائع بريمة

ول أبا علي،
أنا غلطت في "يو فافا" .. كتبتها "فوفا" ..

ربنا يوفق بت الجزيرة .. ودا نصر لبنات الريف .. الريفيات صادقات ومخلصات في جميع بقاء العالم .. عكس بنات المدن ..

بريمة

أنا غلطت في "يو فافا" .. كتبتها "فوفا"
==========================

يا سلام اديبنا الجميل
يو يعني يمة
فافا اسم الدلع لفاطمة ولكن فقط للوالدة أو الحبوبة
يعني واحدة اسمها فاطمة وتكون شابة لا يمكن تقول ليها (فافا)
أو نقول بدل الدلع .. رمزية للتكريم للامومة ( فافا)

تحياتي الحبيب بريمة دائما تقودنا الى جمال التراث النوبي

ههههه بقيتو أهل العوض يا على.

==================

حبيبنا الجميل ابريش
صدقني ما فهمت الكلام الفوق
نحن ناس ضواحي الدنيا حتى د أمال كمان (ههه)

تحياتي الحبيب ابريش

والاخ خضر
سلامات ومبروك للدكتورة امال
جابتي شهادة في حق دكتوره امال..
دكتورة امال ما كانت في يوم من الايام كوزه ولا علاقة لها بالكيزان.
عرفتها منذ ايام دراستها للماجستير في جامعة الخرطوم وعملت معها في جامعة دنقلا حتى هجرتنا لامريكا.
واشهد انها عانت من معنا من ظلم الكيزان في مسيرتها المهنية
اتمنى لها التوفيق وربنا بيسالنا من الشهادة دي

=============================
شكرا حبيبنا سيف على الشهادة
ما أظن لو كانت كوزة كان يتم تعيينها في هذا المنصب
لأن الشمالية كل واحد يعرف الاخر كويس
وكمان عدد السكان محدود


تحياتي الحبيب يوسف

د. أمال ستواجه مشكلة كبيرة جداً ولن تستطيع المقاومة
بيان خطير صادر من ابوالقاسم برطم ضد ( والي الشمالية ووالي ولاية النيل )
الرجل طبعاً معروف لديه قدرات مالية عالية جداً مما يساعده على تنفيذ كل مخططاته
طبعا اصدر بيان واضح لافشال الولاة
============================
هدد البرلماني السابق أبو القاسم برطم بأنهم كقيادات سيعملون على هزيمة وإفشال ولاة الشمالية ونهر النيل. وتساءل برطم خلال تصريح لـ (الانتباهة أون لاين) حول اختيار ولاة الشمالية ونهر النيل من المراة؟ مبيناً أن الوثيقة نصت على 40% للمرأة للمشاركة في السلطة بعدد ثمان نساء توزع على ثمانية ولايات. وشن برطم هجوماً لاذعاً على قوى اعلان الحرية والتغيير بسبب اعلان قائمة ولاة الولايات. وقال إنها تمضي في ذات نهج الحكومة السابقة مبيناً أن الأسماء المعلنة لم تخرج من عباءة المحاصصة ومحاولة لتمكين الأحزاب المشاركة من الاستفادة من موارد الدولة وتهيئتها للانتخابات.
وكان رئيس الوزراء د. عبد الله حمدوك أعلن في مؤتمر صحفي بمقر مجلس الوزراء مساء الأربعاء، تعيين آمال عز الدين عثمان في منصب والي ولاية الشمالية، وآمنة أحمد المكي لولاية نهر النيل.

باي باي د . امال واستاذة آمنة

هكذا ابوالقاسم سوف يجند كل طاقاته لافشال مهمة
الولاة في الشمالية والنيل
وكمان وعد بكل وضوح لافشال مهمة الولاة
ليس تقويم أو نقد أو منافسة ( بصريح العبارة افشال )
وما اسهل الخراب

برطم ومجموعته بدأوا وسوف ينجحوا ( المال)
الخوف ليس في ابعاد الولاة ولكن الخوف من تخريب الادارات والمشاريع في الولاية
وخلق الندرة في السلع ومدخلات الزراعة وهذه اسرع طريقة للغضب على الولاة

هسي حبوبتي النمساوية لو كانت عايشة كان رشحناها تكون والي
عشان ناس حبيبنا بريمة يتهجم
بالمناسبة لما مشيت أكد وروني بيتها ودخلته طبعا قبل ما تستقر في بيت المال

الأمير توفيق .. تحياتي
أكد ناس جميلين اهلنا جمعوا ما بين المحسية ودنقلاوية
تحياتي الامير
صدقني يا الامير بريمة زول رائع وصاحب قلم جميل
تدوم الاخوة .. تحياتي

يا فرحة ما تمت .. د.أمال وآمنة ( الشمالية والنيل)
حبيبنا برطم كان أصدر بيان امس بعدم الموافقة على تعيين المرأة في الولايتين
واليوم عزز كلامه بلقاءات صحفية وقرأت الكثير عنه تصريحاته في قروبات دنقلا
====================================
هدد البرلماني السابق أبو القاسم برطم بأنهم كقيادات سيعملون على هزيمة وإفشال ولاة الشمالية ونهر النيل. وتساءل برطم خلال تصريح لـ (الانتباهة أون لاين) حول اختيار ولاة الشمالية ونهر النيل من المراة؟ مبيناً أن الوثيقة نصت على 40% للمرأة للمشاركة في السلطة بعدد ثمان نساء توزع على ثمانية ولايات. وشن برطم هجوماً لاذعاً على قوى اعلان الحرية والتغيير بسبب اعلان قائمة ولاة الولايات. وقال إنها تمضي في ذات نهج الحكومة السابقة مبيناً أن الأسماء المعلنة لم تخرج من عباءة المحاصصة ومحاولة لتمكين الأحزاب المشاركة من الاستفادة من موارد الدولة وتهيئتها للانتخابات.
وكان رئيس الوزراء د. عبد الله حمدوك أعلن في مؤتمر صحفي بمقر مجلس الوزراء مساء الأربعاء، تعيين آمال عز الدين عثمان في منصب والي ولاية الشمالية، وآمنة أحمد المكي لولاية نهر النيل.

معليش مكرر .. آسف

ما ممكن يا برطم .. بهذه الطريقة
على الأقل فترة تجربة لمدة شهر وبعد ذلك ممكن
ولكن قبل الدخول في المكتب والقرار الاستباقي
سبحان الله يمكن الشفاء يجي منهن

مفروض الزول الاسمه برطم ده يعتقلوهو فورا ويختوهو في برطمانية في سجن كوبر
ويحاكموهو بتهمة الشروع في تخريب الاقتصاد القومي ،،لأن إفشال مهمة حاكم الولاية يعني
وضع العقبات عن اصرار وترصد أمام الحاكم لمنعه من تنفيذ المشاريع التنموية ،،وذلك فيه
اضرار بالاقتصاد....

لا أعرف كاتب المقال.. لكن يجب أن يتذكر الجميع أن هذه التعينات مؤقتة بعام و نصف تقريبا.. هى تعينات مؤقتة.. حين تنتهى الفترة الإنتقالية بعد داك الإنتخابات و كل حشاش يملأ شبكتو

Quote: وحسب علمى ان المصرين كانو بفضلو والى اتحادى

هلا بدر الدين
ما عندى شك وربما حاولوا ذلك فعلا.. ورئيس الحزب قاعد معاهم 10 سنين هسى و عنده شارع رئيسى بإسمه فى القاهرة..

ابو الريش
إذا انت بتفتكر ان الفترة الانتقالية حتنتهي بعد عام ونصف فأنت بتحلم..ما دام العساكر هم في رأس السلطة
فأن الفترة الانتقالية مدتها ٣٠ سنة ....
وانت عارف ان الفترة الانتقالية كانت بموجب اتفاقية الدستور ٣ سنوات وتم تمديدها لأربعة سنوات بحجة الانتهاء
من المفاوضات مع الحركات المسلحة ... والحركات المسلحة دي المفاوضات معاها ما حتنتهي الت بعد ١٠٠ سنة ...وانت
عارف السبب ...لأنهم ما عندهم موضوع بعد نجاح الثورة ..واذا تم أي اتفاق سلام فهم مجبرين يخلوا الفنادق الفخمة
العايشين فيها ويرجعوا السودان .وما اظن انهم يرجعوا السودان ..
وبعدين انت مفتكر العساكر حيسلموا السلطة للأحزاب بالسهولة دي بعد ذاقوا حلاوة السلطة والجاه والمال !!!!

اهنيك اخى على و اهنى نفسى و كل الاهل فى شمالنا الحبيب
اول اهام يا على المسمّى الوظيفى لا يؤنث
___
للذين لا يعرفون الشمال
حكومة الخرطوم و منذ الاستقلال لم تر خدمة لها تستهدف انسان المنطقة
الا طريق شريان الشمال و السد المضروب
كل الخدمات من مدارس و شفخانات وشبكات مياه للشرب تم بجهد ذاتى من ابناء الشمال
فى حكاية السد احكى ليكم دى
اقيمت مدينة اسمها الفلوجة لمهندسى و موظفى و عمال وحامية السد العسكرية
كل الخدمات التى يحتاجها هؤلاء من تعليم و صحة و مياه شرب
اضيفت الى كاهل اهل دويم ود حاج دون اى مساهمة من الحكومة فى تطوير تلك الخدمات التى قامت بمال
و مجهود ابن المنطقة لاستيعاب الريادة السكانية الجديدة
المطلوب شنو من الوالى
موضوع النفايات النووية
تنظيم تعدين الذهب و تحديد نصيب الولابة
المشاريع الزراعية....مراجعة التصاديق
و اثبات حق الولاية فيها من نصيب الارض و العمالة
مشاريع السد و مشاكل اهلنا المناصير
التواجد المصري فى الولاية
امّا بالنسبة لتطوبر خدمات التعليم و الصحة و شبكات مياه الشرب
انت خطّطى و التمويل على ابن المنطقة
اصلو حكومة المركز دى ما عليها تكل
وبنسمع بيها يوم تكون فى انتخابات
هذا مع الامنيات الصادقات بالتوفيق و النجاح

"وبنسمع بيها يوم تكون في انتخابات:

جلالدونا
بس للاسف ما حتكون في انتخابات..

ده فى الماضى عزيزتنا امتثال
و الى هذا الوقت و هكذا دواليك

ده فى الماضى عزيزتنا امتثال
و الى هذا الوقت و هكذا دواليك

أستاذ على عبد الوهاب

تحياتى
مبروك لبتكم ونتمة لها التوفيق .. بس عصرت علينا شديد
بإعلن قرابتك بها .. حنفكر مرتية إذا أردنا إنتقادها ..

كنت متوقع هذا البوست يفتحوا بشاشا يحتفل بها ويذكرنا
بالتاريخ .. بالكنداكا .. وأيزيس .. ومكانة المرآة الكوشية

أها بتكم دى بتاعة تربة وزراعة .. حتشدكم شد للإنتاج الزراعى
أفقيا أى شبر يتزرع، ورأسيا زراعة نوعية بكثافة عالية للمحصول
وشى تالت منع التصحر .. وما عندها مشكلة تشرح ليكم
عرب أو إنجليزى وللا نوبى

بس محتاجة لمستشارين وأرشحك أحدهم ستفيد الولاية فى
امور عديدة منها التعليم، الزراعة، الثقافة، الإعلام
التنمية الإجتماعية!

مبروك

كويس يا نادر جبت سيرة بشاشا..
وهو وين مختفي بالمناسبة دي !!؟
لعله بخير وعافية ..

الوالي المحترم والمنتخب
عايزمجلس تشريعي منتخب ايضا
وادارة اهلية محترمة مجالس محلية
ولا يدار بريموت من المركز المجرم
كدي ورونا الاراضي المنهوبة دي
وين في الاقليم الشمالي كلو

Quote: مملكة البحرين تملك مساحة أكبر من حجمها الجغرافي في السودان 6 أبريل، 2019 0 Facebook Twitter حقائق صادمة ١-في عام 2016 استأجرت البحرين 100000 فدان وهي مساحة ضخمة تشكل تقريبًا مساحة البحرين نفسها، و في نفس العام استأجرت الحكومة السعودية مليون فدان صالح للزراعة في شرق البلاد. ٢-قامت شركة باكستانية بتأجير قطعة أرض كبيرة ما بين الخرطوم و عطبرة و بدأ السوريون الزراعة في الشمال قرب عطبرة. ٣-استحوذ الإماراتيون واللبنانيون واليمنيون والجيش الأردني!…نعم الجيش الأردني على مساحة 100000 فدان على نهر النيل و النيل الأزرق. ٤-قامت شركة الروابي للتطوير ، وهي شركة سعودية يمنية بالإستثار بأكثر من 200000 فدان في ولاية نهر النيل. ٥-استحوذت GLB Invest على السودان ، حيث حصلت على 226000 فدان مع تخصيص المياه ، أيضًا ، سخاء بشكل مذهل 900 مليون متر مكعب من مياه النيل سنويًا ، أي ما يقرب من نصف الكمية التي يستخدمها لبنان وعدد سكانه أكثر من 5 ملايين نسمة سنويًا. ٦- إيجار الأراضي رخيص (غالبًا ما يكون أقل من نصف دولار فقط لكل فدان) وطويلًا (عمومًا 99 عامًا) والماء مجاني. ٧- يقول مدير سابق لعملية مصرية انتهت الآن في جنوب ولاية النيل الأبيض إن شركته مُنحت حوالي 750 مليون متر مكعب منذ ما يزيد قليلاً عن عقد من الزمن ، أي 4 في المائة من حصة السودان السنوية الكاملة من النيل بموجب الاتفاقيات الإقليمية ؛ أن هذا الحجم من المياه سيكلف أكثر من مليار دولار في مكان آخر. ولا تدفع الشركات التجارية الزراعية سوى القليل من الضرائب. ٨-في يوليو 2018 وقعت الحكومة القطرية على صفقة زراعية بقيمة 500 مليون دولار في شمال السودان ، مكمّلة لمخططها الحالي الذي تبلغ مساحته 260 ألف فدان. ٩-ومع ذلك فإن القليل من الـ 5 ملايين فدان التي تقدرها وزارة الزراعة هي في أيد أجنبية – ربما أقل من 1 في 20 فدان – تمت زراعته. ١٠-يقول أسامة داؤد رئيس و صاحب مجموعة دال في لقاء مع صحفي امريكي من صحيفة بلومبيرج نشر في الثاني من أبريل ٢٠١٩ ( أعتقد أن المشكلة هي: لماذا يستثمر هؤلاء الأشخاص هنا؟ هل يأتون فقط لأخذ الأرض والمياه؟ هذا ليس استثمارًا ، هذا اغتصاب). على من تبقى من الشرفاء الحجر على هذا المعتوه الذي فصل الجنوب و رهن أرض الوطن من الباطن للاجانب .إذا كان بوتفليقة قد حجر صحياَ، فهذا المعتوه يجب أن يعزل ويحجر نفسياً. وليد المنسي [email protected]

انا اصلا ما مقتنع بي برنامج ق ح ت والمحاصصة
بعدين ملف سد مروي الكلف 6 مليار دولار حقق شنو
وينا الكهرباء والزراعة خلونا من سد النهضة انتو ما قدرو
ملف سد مروي ده مسؤلية منو

الحبيب عادل .. تحياتي
كلامك في الصميم .. الحل هو الوالي المنتخب
وولاية النيل والشمالية فيها فوضى في الاراضي
الزراعية ..

تحياتي

Quote: الحبيب عادل .. تحياتي كلامك في الصميم .. الحل هو الوالي المنتخب وولاية النيل والشمالية فيها فوضى في الاراضيالزراعية ..تحياتي

وكمان يا علي

يكون في مجلس تشريعي منتخب دستور 2005 يعني الاعلان الدستوري 2019 ما يلزمنا لانه الوالي المعلق في الهوا حيفشل بدون
برلمان ولاية ذى امريكا والهند وغيرا وايضا ادارة اهلية حقيقية
ولي نرجع الحكم الاقليمي دستور 1973 وقوانين 1974 عشان نخلص من رجس الانقاذ والاخوان المسلمين مرة واحدة
ننتخب حاكم اقليم وبرلمان اقليم طوالي ونتفكا من والولايات الكثيرة المسيخة دي حاصل فارغ غير النعرات القبيلة ما جابت للسودان حاحة وهي مت اسوا افرازات نظام الانقاذ المجرم بعد الدفاع الشعبي والدعم السريع
بتمشطو في الانقاذ بي قملا ليه يا ناس شالو السيدة وخلو حرم

بس عصرت علينا شديد
بإعلن قرابتك بها .. حنفكر مرتية إذا أردنا إنتقادها ..
================================
حبيبنا نادر .. تحياتي يا جميل
لا لا نحن فرحنا فقط بإسم جزيرتنا في المواقع
من الصعب جداً ان تنجح في هذه المهمة الصعبة جداً
مشكلات بلا حدود .. كمان وجود لوبيات ضغط ناس الاراضي والتعدين
المهم الخبرة والتجربة المنصب عايز واحد أقل حاجة 60 سنة
كمان يا نادر حتى أهلنا من أقرب الاقربين لا يؤمنون بقيادة المرأة ديل الناس العاديين وهم الغالبية
حتى لا يتعرفوا بالمدنيين ولاءهم وحبهم دائما للعسكريين ..
كان ممكن في العاصمة ولكن حسب العقل الجمعي والتصرف اللاشعور للهوامش البعيدة صعب تحمل
المرأة حتى لو كانت في اعلى كفاءة
نعم هي تخصصها زراعة ولكن التخصص لا يكفي هناك المئات
المشكلة في الحضور واقتناع المنتجين الحقيقيين المزارعين .. لازم الوالي عندنا يقفز من جدول الى جدول
ويخوض الموية ويضرب الطورية مع المزارع ..

بصراحة أكون واقعي معاك .. الموضوع صعب وفي غاية التعقيد
نعم أهل الولاية مسالمين وعدد السكان قليل اقل من مليون مع ان المساحة 330كلم م
وفيها امن مجتمعي موروث من مئات السنين .. ولكن هناك لوبيات اراضي زراعية وتعدين
وهؤلاء يمكن اللعب على أي سياسي لا يكون من مصلحتهم
ومن امس بدأوا وبكل صراحة ووضوح ..

تعرف يا الحبيب نادر أحياناً المصلحة تطغى على المثالية كما ترامب .. صدقني أنا اليوم
لو استشارتي اختار الوالي السابقي اللواء الساعوري .. ده كان زول تربال عديل يعرف رغبات الترابلة
وكان ليهو دور كبير في نجاح الموسم الشتوي ..
أنا ما يمهني السياسي ولكن الذي يعمل .. تجربة الساعوري كانت 100%

تحياتي الحبيب نادر ..

الحبيب جلالدونا .. شكرا على الحضور
الموضوع في غاية الصعوبة واحتمال نجاحها ( زيرو) انت ابن الشمالية
وعارف اللوبيات ( اراضي والتعدين ) بدأوا من امس لافشال الوالي
حبيبنا جلالدونا رغم ان معظم من حكموا السودان من الشمالية لكن
بدون أي مصلحة إلا السدود للاغراق
كما ذكرت كل المدارس والمستشفيات وغيرها
تخيل حبيبنا جلال جامعة دنقلا تم دعمها من ابناء المنطقة في السعودية 600 الف ريال
بالاضافة للمعامل وغيرها حتى اخذوا بعض الاجهزة الى جامعة الخرطوم رغم الاحتجاج
قالوا ( فائض)

تعرف حبيبنا جلالدونا .. أنا بالنسبة لي كمزارع وبعيداً عن السياسة
كان الساعوري احسن مليون مرة من بنتنا دي .. لأنه كان زول تربال عديل
يعرف لغة الترابلة وكيفية التعامل معهم

المشكلة كمان بعض أهلنا لا يتعرفون بحكم المرأة ليس هذا فقط
حتى الوالي المدني عندهم (زيرو) الا عسكري ..

تحياتي الحبيب جلالدونا ..

حبيبنا ابريش تحياتي
المصريين متأكدين طول أو قصر الشمالية خط رجعة لهم
المشكلة يا ابريش الولاية خالية من السكان اقل من مليون
في 330 الف كلم

عندنا مشكلة سكان

تحياتي

تحياتي الاميرة امتثال

برطم رغم فوزه في دائرة دنقلا ايام الانقاذ
في البرلمان الصوري ونزل الانتخابات بصفة مستقل
نعم هو كان معارض للانقاذ ولكن بقفاز ناعم وكان عضو في البرلمان
عن دائرة دنقلا
يريد مرشح من الدائرة حوله ..
رغم ذلك لو حيصرف قروش ويحل مشاكل ما عندنا مانع
لكن فقط مماحكة
ده عندو قصر في الخرطوم على طراز البيت الابيض

تحياتي الابنة امتثال شكرا على الحضور

حبيبنا نادر تحياتي
بالاضافة الى مداخلتي فوق
ما في حصانة نقد لاذع
خلاص انتهت الحفلة .. المهم العمل

تحياتي

برطم إعتاد البحث عن الشهرة والشعبية بالهرجلة والاساليب الرخيصة وآخر ما يعنيه المصلحة العامة وهو من المفترض ان يكون محسوبا على النظام السابق فما وجد صيتا الا من خلال البيئة التي اوجدها الكيزان وقد أسدى جميلا للنظام السابق عندما إرتضى أن يجمل انتخاباته الزائفة فكان كومبارس معارضة
الشمالية ترزح تحت سطوة الكيزان فلتكن المهمة الاولى للوالي الجديد - حماس ضنقالة ..سحبنا عدم التأنيث على المنصب وصفته – المهمة الاولى يجب أن تكون التخلص من منتسبي النظام السابق الذين يتسنمون مناصب عليا ومؤثرة


تعيين إمرأة في هذا المنصب مناسبة كي تفضح العقول المتحجرة تخلفها إن تجرأوا على إظهار ما يعتمل في عقلياتهم و الطعن في أهلية النساء في شغل منصب الوالي


مهمة الدكتورة آمال ليست سهلة فالولاية تعاني أزامات طاحنة على كل الأصعدة وقد بدأت الاعتصامات المطلبية تأخذ سبيلها للمنطقة آخرها أعتصام أمري وإعتصام اكد شمال – مكجور
على العموم أرتي داجن عمنا علي

استاذ علي سلامات
والف مبروك .
ياخ شتت البركاوي .
نرجوا لها التوفيق والسداد في ولاية الحضارة والتاريخ.

والف مبروك .
ياخ شتت البركاوي .
نرجوا لها التوفيق والسداد في ولاية الحضارة والتاريخ.
===============================
الحبيب عثمان تحياتي
خلاص الحفلة انتهت .. بدأنا نرجع للواقع
منصب الوالي اخطر من رئيس الوزراء تمس الحياة اليومية
مهمتها في غاية الصعوبة .. نصبر شوية ولكن النقد بدأ يحاصرها
قبل استلام الوظيفة ..
تحياتي الحبيب عثمان

حبيبنا مهدي .. شكرا على الحضور الرائع
يا سلام مداخلة بوزن الذهب
كلامك عن برطم في الصميم والملاحظ أنه لم يقدم أي خدمة تذكر
رغم أهلنا يقتطعون من دخلهم المحدود لدعم احتياجاتهم
لكن بصراحة كلام عجبني حتى الثمالة
شايف مجتمعة مع قوى الحرية والتغيير .. في القروبات المواقع
لقرى الدنقلا فقط مهلة شهر ..
كما ذكرت الحبيب مهدي وكما تعلم الكيزان مسيطرين على الولاية
والوحدات .. اول قرار ازالة التمكين ..
يا ريت كان عينوا وجدي الحلفاوي بتاع التمكين والي للشمالية

تحياتي مهدي .. شكرا على حضوركم واصل معنا

مشيت قريت معلومات عن برطم العامل نفسه مستقل، والآن يعارض أن تتولى امرأة منصب والي الشمالية والنيل ويهدد بافشال مهامها وكأنه فوق القانون ،،ووجدت أن هذا البرطم فاز في انتخابات وبقى عضو برلمان وذلك بدعم ومساعدة الكيزان لأن الكيزان
عارفين انه بيدعمهم في السر ويجاهر كذبا بأنه معارض....وهو كان بيحاول يجهض الثورة عندما انطلقت في ديسمبر ٢٠١٩...
والآن مفروض يقبضوا على هذا البرطم ويحققوا معاهو لانه بيهدد باعاقة عمل الوالي

الاميرة امتثال .. تحياتي والتحية للاميرات
شكرا على المعلومات عن برطم .. صحيح أنه كان يمثل دور المعارض
وكأنه ضد الكيزان .. ولكن ظهرت الحقيقة ..
الابنة امتثال برطم له فائض مالي كبير ولكن لم يتقدم بأي مبادرة تجاه دنقلا
من أمس بيانات وتصرحيات ليس للشمالية فقط بل تعدى ذلك الى ولاية النيل
السودان أمره محير جداً

تحياتي الابنة امتثال .. وشكرا على الاضافة

بالمناسبة يا استاذ برطم زول قوش في المنطقة وما تخاف ان شاء الله بتنجح خاصة بعد بارك الاتحادي تعينها المهم زي ما اشاروا الاخوة تجد مستشارين جيدين اوافقك لو كانت الفرصة مواتية لرجل حسب تقديرات حمدوك لكانت الولاية بلا منازع للعميد.

Quote: لو كانت الفرصة مواتية لرجل حسب تقديرات حمدوك لكانت الولاية بلا منازع للعميد.

اتفق معك تماماً يا ملك والعميد زول عملى وزول ثورى ومطار دنقلا خير مثال .

اتفق معك تماماً يا ملك والعميد زول عملى وزول ثورى ومطار دنقلا خير مثال .
========================
علاء اننقا
في مداخلاتي الأولى انا ذكرت ان الوالي مفروض يكون أبوزيد
علاء والده عبدالله هارون الله يرحمه كان كفاءة يكفي انشأ مخبز في الستينات
واخوانه كلهم ناس وارثين الادارة وجينة فيهم
ابوزيد لديه خبرة عملية في الولاية وعارف مكمن الاشياء
كل محل اعجاب والاحترام وزول نضيف ونقي عشان كده اختلف مع الكيزان

بصراحة خلينا نقول الحق .. بالنسبة لينا عشان مقرنا حيكون ما عندنا خيار تاني
غير الزراعة والبلد ( ابوزيد هوالمناسب ) وحتى في القروبات اوصو آمال باستعداء ابوزيد
كمستشار او نائب

تحياتي

حبيبنا الملك تحياتي
مشكلة برطم حتى التبرع مان مقصر في المناسبات
د. آمال مفروض تختار مستشارين ليهم خبرة وعمق في المنطقة
من شمال الولاية ومن جنوبها
اشرح المستشارين حبيبنا بشرى الفاضل والأهم هو ابوزيد عبدالله هارون
اداري متمكن وعارف كل خفايا الامور وعملي ونزيه

الملك امبس .. المهمة صعبة جدا وإذا عجزت من الشهر الأول عليها تقديم استقالتها مباشرة
الأمر في الشمالية معقد جداً

حبيبنا الملك تحياتي
مشكلة برطم حتى التبرع مان مقصر في المناسبات
د. آمال مفروض تختار مستشارين ليهم خبرة وعمق في المنطقة
من شمال الولاية ومن جنوبها
اشرح المستشارين حبيبنا بشرى الفاضل والأهم هو ابوزيد عبدالله هارون
اداري متمكن وعارف كل خفايا الامور وعملي ونزيه

الملك امبس .. المهمة صعبة جدا وإذا عجزت من الشهر الأول عليها تقديم استقالتها مباشرة
الأمر في الشمالية معقد جداً

هناك حوار جميل بين المعارضين والمؤيدين
في قروبات ومنتديات قرى دنقلا ..
===========================
وقد وجدت هذا المقال كتبه اخي الأصغر محمد عبدالوهاب عثمان
رداً على بعص المعارضين لتعيين البروف آمال :
المقال كالاتي :


من ينتقد سعادة والي الشمالية بروفيسور آمال عزالدين قبل ان تبدأ مشوار مهامها لمجرد انها إمرأة عليه ان يعلم الفرق بين الذكورة و الرجولة...
مثل هذا الإنطباعي عليه ان يعلم أن الذكورة وصف تشريحي يصنف بها جميع الكائنات ليفرق بينهم مثل البغال و الحمير و الإبل و الغنم و الطيور و هلمجرا...
اما الرجولة صفة قيم و معاني سامية يتصف بها الذكور من بني الإنسان...
..كما يصفهم الخالق في القرآن..
رجال صدقوا ما عاهدوا الله..
رجال لا تلهيهم تجارة..
.....
مثل هذا النقد الذي يبدا من نفس معطوبة بتراكمات عقدية يجب ان لا يلتفت إليه بالردود لكي لا تتسع دائرته البليدة الفكرة و تخرج منها عبثيات تشغل العوام بالجدال في تصنيف بني الانسان بين ذكر و انثي يؤثر في نيل حقوقه المستحقة بغض النظر عن نوعه...
...
واخيرا أما قال الفاروق عمر رضي الله عنه..
أصابت إمراة و اخطأ عمر...
.....
سمي مثل هذا النقد الذي يأتي من غير الجديرين و المؤهلين لإنتقاد الامور التي لا يرتقي فهمهم إليها ..نقد الإسكافي...اي النقلتي..
وذلك حدث في روما في عصر النهضة حين إنتقد اسكافي احدى لوحات الرسام العبقري ليونارد دافنشي و كال لها عيوب في حذاء احدي شخصيات اللوحة..
.....
النقلتية الكرام سعادة البروف آمال عالمة زراعة تكنقراطية اتت لمرحلة اقتصادية حرجة تمر على الوطن ولن يخرج البلاد من الفجوة الغذائية إلا أمثال بروف آمال ....
اولا نوفر القمح ثم بعدها نواصل الجدال و القتال في هذا الوطن المثخن بجراحات ابنائه العاقين

===============================

الردود في الفيسبوك .. بالمناسبة كل القروب من ابناء قرية بروف آمال ( الوالي ) للنقل لكم نموذج
كمان من ناس ضواحي الدنيا
===========================
الردود في الفيسبوك .. هذا حوار بين ابناء قرية البروف آمال


وليد طمبل
نسأل الله لها التوفيق بروف آمال
ويهدي العاقين من أبناء هذا الوطن الجريح حبيبنا محمد
· Reply · See Translation · 21h
Shams Aldeen Al-idreesi
ليت قومنا يعلمون.
· Reply · See Translation · 20h
يوسف عرمان عرمان
لمثل فهمك عنوان للعالمين
والتبع لهم نادي يجمعهم الفكر من دون علم
· Reply · See Translation · 20h
ابو احمد السوداني
نسأل الله لها التوفيق ولك التحية محمد
· Reply · See Translation · 20h
Yosry Seyed Apsha
الرجال قوامون علي النساء ... فسرها ...
· Reply · See Translation · 20h
امير محمد عثمان
كلامك كلو مافي محلو الولايات كلها رافضه انته حتسكت يعني يبقه حيتكلم فيك وبقول انتو حريم ياخي اخجل شويه
· Reply · See Translation · 19h
السر عبدالغنى جليس
لك التحيه والتقدير أستاذ محمد
· Reply · See Translation · 18h
كمال جوجو
ياخى اعظم الدول حاكمنها حريم نحنا السودانين غير النقة والكلام ما عندنا شئ ناس كلام بس والله عمرو السودان ما يتقدم ياخى امريكا عدمت الرجال عشان تودى مزاهر بت الشمالية حاكمة فى ولاية نحنا ناس خايبين وحنكون كدة ليوم الدين تلقى الواحد لا شقل لا مشقلة وبس ق… See More
· Reply · See Translation · 17h
طه الامين
المراة قلبها ضعيف وعاطفيه الولايه يريد الحاسم القوي بدون انحياز نجرب الحريم طالما الرجاء ما مدقادرين
و
واللهم تشوف اول شئ حقوق الولاية من سد مروي والتعدين الأهلي في شمال ااولاىه والشرق والغرب
· Reply · See Translation · 16h
عصام شنقريه
نحن الشماليين معروفين لكل السودانيين ..تفلحوا في الكلام بس والله لو جابوا ليكم حبشيه ماتعملوا حاجه
· Reply · See Translation · 16h · Edited
Jedo Saliheen
للأسف م زال الفهم الذكوري مسيطر علينا ألم ينظرو إلى ميركل ف ألمانيا أو إلى تاريخنا الحافل ب ١٣ملكة
· Reply · See Translation · 15h
كمال جوجو
ياخى فى صدر الاسلام حكمو حريم
· Reply · See Translation · 15h
ماجدولين رمرم
كلام جميل
· Reply · See Translation · 14h
ام نون محمد
تهانينا وتمنياتنا لها بالتوفيق وهي اهل لها ان شاءالله
· Reply · See Translation · 12h
ام نون محمد
ووراء كل رجل عظييم امراة..هي المرأة اخت الرجال وأم الرجال ومربية الرجال(الاجيال)..
· Reply · See Translation · 12h
الرشيد عبده الأمين
ياناس الوضع الحالي ماداير مجازفة
· Reply · See Translation · 12h
الرشيد عبده الأمين
حتى ايام الثورة اسمها ماذكر مانجامل ساي عشان ابنة منطقتنا
· Reply · See Translation · 12h
خليل طاهر
تولي المرأة الولاية العامة
دلت الأدلة من الكتاب والسنة على عدم جواز تولي المرأة للولايات العامة ، كالخلافة والوزارة والقضاء وما أشبه ذلك .* … See More
· Reply · See Translation · 11h
عبدالرحيم حمده ال بارودي
نسأل الله لها التوفيق لما فية خير للولاية والسودان ولا نامت اعين الجبناء ؟والثورة مستمرة ###
وسيصرخون.####
· Reply · See Translation · 11h
Adil Kabbar
· Reply · 11h
محمد عابدين
كلام جميل ي استاذ والأجمل نوفر القمح وثم نواصل الجدال وربنا يوفقه ومافي حل الا توفير القمح
وكيف يتم ذلك هل بانتظارنا للجزلين في الطلبات بالصفوف ام بالكهرباء المامقضي البيوت مافي حل للحكومه الاتحاديه وبتنا البروف امال الا الطاقات الشمسيه كدول نجحت في ذ… See More
· Reply · See Translation · 10h
فتحي ماجد الطاهر
انتقادنا للدكتورة بعيد عن كونها انثي او ذكر.. بل نبارك تعيين الاكفأ بغض النظر عن نوعه..
رفضنا لان الدكتورة مؤتمر وطني (كوزة) ولو تم تعيين كوزة كااننا لا رحنا ولا جينا ولن يحصل اي تغيير في الشمالية

Quote: وحقيقة التجمع الاتحادي ذات الثمانية اسماء غير مؤهل لاختيار والي

إعتذار واجب للاتحاديين
وقد قرأت لاحقا ان الدكتورة تنتمي الى حزب المؤتمر السوداني

إعتذار واجب للاتحاديين
وقد قرأت لاحقا ان الدكتورة تنتمي الى حزب المؤتمر السوداني
=============================
Al Sunda حبيبنا .. تحياتي
شكرا على الحضور
بالمناسبة المداخلات المنقولة في الفيسبوك معظمها من ابناء قريية البروف
حلوة الديمقراطية لاحظت ان هناك انتقادات وابداء رأي بكل تجرد .. يبدو
ان شباب وصولوا لمستوى ممتاز من الفكر وممارسة السياسة لأنني لاحظت هذا
في قروبات قريتنا ..

((حزب المؤتمر السوداني )) سوف انقل هذه المداخلة الى القروبات

وبحكم أننا من جيل الاباء وليس لدي اهتمام كبير بالسياسة لم أكن أعرف توجهها السياسي

تحياتي الحبيب .. ولكن ما جعلني اكون راضياً هي الاراء الواضحة والانتقادية من قروب القرية

Quote: إعتذار واجب للاتحاديين وقد قرأت لاحقا ان الدكتورة تنتمي الى حزب المؤتمر السوداني

الدكتورة آمال لا تنتمى الى اى حزب وهى مستقلة
وقد اختارها حمدوك وكانت ضمن لستة الولاية الشمالية .
وانا اعنى ما اقول .

مرشح حزب المؤتمر السوداني لمنصب الوالي فى الولاية الشمالية كان :

- أشرف حامد محمد عثمان

حبيبنا علاء .. تحياتي
شكرا على التوضيح أعرف أنك زول متابع وقريب من الاحداث
والتواصل معهم
أنا طبعاً بحكم الاغتراب الطويل هذا الجيل بعيد عنهم كثير
إلا آباء ..
شكرا علاء لأن في مداخلاتك الفيس بوك ملاحظ ما اشارة لإي حزب سياسي
وديل كمان إلا ابن استاذنا عبدالماجد سيد طاهر من بدين يقول انها كانت مؤتمر وطني
لكن تأييد شباب المقاومة والتغيير عالي جداً وحماس زائد في دنقلا من الشباب

ولكن رغم ذلك مهمتها صعبة جداً

تحياتي علاء الحبيب

ما سيساعد آمال عزالدين في مهمتها ان تبدأ ولايتها بالبت في الملفات الساخنة التي تشغل الشارعين السياسي والجماهيري بالولاية
هناك جبهة شرسة جديدة ظهرت في مواجهة الوالي الجديد: المرشحين الذين لم يقع الاختار عليهم ومؤيدوهم وديل شغال بما تناله ايديهم من حديث عن المآخذ على تولي سيدة للمنصب ومن يبخسون سيرتها الذاتية
ستصل غدا للولاية وهناك لجنة تم تكوينها بإسم لحنة استقبال الوالي الجديد ..ما عارف بس كأني بلجنة كهذه اللجنة تشبه نظام الكيزان في طريقة كسير التلج..لا وقت لتكوين لجان وإقامة حفلات إستقبال ..الوضع الحالي يحتم على من سيتولى الامر يجي مسخن ودايركت يخش الشغل

Quote: quote نقلاعن التيار 26 يوليو في ذات المنحى تحدث عضو النقابة بجامعة دنقلا مصعب أبوبكر بأن الدكتورة مجتهدة أكاديميا في تخصصها علوم التربة ونالت درجة الدكتوراة في فيزياء التربة ، لكنها بعيدة كل البعد عن أي نشاط سياسي أو اجتماعي أو نقابي وعملها الإداري لم يتعدَّ إدارة ١٧ عضواً في قسم الدراسات العليا، وطيلة زمالتي لها التي تعدت ال ١٥ عاماً لم نسمع لها صوت في أي محفل خارج الجامعة أو تصريح في قضايا التربة في البرقيق أو تأثير السيانيد أو الزئبق على التربة ولم تتفاعل في قضايا الرأي العام في تأثير المبيدات وزراعة البرسيم على الأرض، فقط ارتبطت بطلابها وتعتبر أكاديمية بحتة ستفشل في إدارة الولاية وسيفقد الحزب –المؤتمر السوداني الكثير لعدم مراعاته لخصوصية الولاية [ /B] الولاية

Al Sunda حبيبنا .. تحياتي وشكرا على الحضور الدائم
ده من مقال حبيبنا المصري هو انسان حريص وهميم بالشمالية ( أمس كنت أقرا في موقع النيلين)
الشباب عندنا وخاصة في مدينة دنقلا شباب المقاومة مؤيدين شديد
لكن بالنسبة نحن نحكم بالعقل حسب السن وليس بالحماس كما الشباب

بغض النظر .. أنا متأكد أن مهتمها صعبة جداً جداً لأن الولاية معقدة محتاجة ( لمهاتير شمالي )
إن شاء الله تنجح .. المهم الموسم الزراعي يكون ناجح في السنة الجاية .. رغم انه كان عسكري
الساعوري ما قصر .. أنا كنت زارع الموسم الشتوي القمح نجاح منقطع النظير .. أنا شخصياً
لا يهمني الانتماء فقط توفير المعينات الزراعية .. ( سماد .. جازولين .. بذور .. شوالات ) اذا
لم توفر هذه الاشياء حتى لو كانت ابنتي سوف لن اؤيدها ..

والغالبية الأعم .. الناس الصامتين ناس المصالح الزراعية والانتاج لا يسألوا إلحزب تنتمي فقط
العمل وتوفير المعينات .. ( الجازولين .. السماد .. بذور .. شوالات ) عندنا أهم من الدواء لأن الموسم الناجح
ممكن الواحد يمشي يتعالج في مصر ..

هذا رأي معظم الاغلبية الصامته .. ( ناس الواتساب والقروبات فقط مكايدات سياسية )

ولكن أكرر مهمتها صعبة جداً إذا ما مستحيلة

مودتي الحبيب وتحياتي ليك .. شكرا كثير على حرصك ..

Quote: لكنها بعيدة كل البعد عن أي نشاط سياسي أو اجتماعي أو نقابي وعملها الإداري لم يتعدَّ إدارة ١٧ عضواً في قسم الدراسات العليا، وطيلة زمالتي لها التي تعدت ال ١٥ عاماً لم نسمع لها صوت في أي محفل خارج الجامعة أو تصريح في قضايا التربة في البرقيق أو تأثير السيانيد أو الزئبق على التربة ولم تتفاعل في قضايا الرأي العام في تأثير المبيدات وزراعة البرسيم على الأرض، فقط ارتبطت بطلابها وتعتبر أكاديمية بحتة ستفشل في إدارة الولاية وسيفقد الحزب –المؤتمر السوداني الكثير لعدم مراعاته لخصوصية الولاية

حبيبنا علي عبدالوهاب

كلام اخونا Alsunda واجب انو ما يتم تجاوزه المؤشرات غير مبشرة وهي نفس المؤشرات اللي تم بيها الاعتراض علي اكثر من مرشح في اكثر من مكان ... الفرق انو هنا ما كان في ترشيح
لكن الجهة اللي رشحتها عندها وجهة نظر تانية وفي ناس من المنطقة عندهم وجهة نظر تانية
يبقي المحك الاساسي هو الاداء والنتيجة ودي بيحددوها ناس المنطقة
نتمني ليها التوفيق

سمعنا تصريح د. امنة والي ولاية النيل ،،بعد أدائها القسم،،ووجدنا منها تصريحا قويا
...وتاكدنا من انها ستنجح في مهمتها الصعبة ..بس نقول الاولاد جعل ادوها فرصة ١٠٠ يوم
وقوموا بتقييم أدائها..واذا ما عجبكم الحال...ارفعوا المذكرات...
وفضل لينا نسمع من والي الشمالية...امال ..ونشوف رأيها كمان شنو!!!

وفضل لينا نسمع من والي الشمالية...امال ..ونشوف رأيها كمان شنو!!!
=====================
تحياتي الاميرة امتثال والتحية للاميرات
عندنا الناس في الشمالية شوية أهدأ من ناس دارجعل
بروف آمال وجدت تأييد من لجان المقاومة ولكن هناك ايضا رأي مخالف
المهم الأمر يتوقف على مدى الخدمة التي تقدمها
المهم توفير المعينات الزراعية
كمان هي ستجد معارضة قوية جداً من أحزاب وكثيرين كانوا متطلعين لهذا المنصب
المهم اعطاءها فرصة أو فترة تجربة اذا نجحت تستمر وفي حالة العجز احسن لها ان تستقيل

تحياتي الابنة امتثال

وفي ناس من المنطقة عندهم وجهة نظر تانية
يبقي المحك الاساسي هو الاداء والنتيجة ودي بيحددوها ناس المنطقة
------------------------------------------------
حبيبنا جعفر تحياتي
كلنا تفاجأنا بالتعيين .. ولكن وجدت تأييد قوي من شباب المقاومة
المهم ما دام حصل التعيين لتخضع لفترة تجريبية وأنا متأكد اذا لم تنجح ما في مجاملة
ربما لم تكن مناضلة أو لها حضور ولكن احتمال لديها مقدرات ادارية ما أظن يكون تعيينها هكذا
كما ذكرت سابقاً أنا شخصيا بالنسبة لي الاتجاه السياسي ما مهم .. ولأن مستقبلنا مرتبط
بالزراعة فالأهم عندنا من يسهل أمورنا في الزراعة ( جازولين ، تقاوي ، سماد ، شوالات )
هو ده المهم كل شيء مرتبط بالزراعة والانتاج ..
صدقني يا جعفر بصراحة أقول ليك بعض النظر عن اتجاهه وديانته وقبيلته ( مهم يوفر المتطلبات)
كل شيء بعد داك ساهل
نعم هناك احياناً مناضلين وثوار ولكن مهتهم تنتهي مع بلوغ الهدف السياسي .. الادارة شوية تختلف
تأكد أنها لو فشلت في شهور الاولى سيكون هناك حشد لابعادها عن المنصب


تحياتي الحبيب جعفر