Post: #1
Title: التجمع يهاجم حمدوك
Author: عبدالحفيظ ابوسن
Date: 07-14-2020, 09:49 PM
09:49 PM July, 14 2020 سودانيز اون لاين
عبدالحفيظ ابوسن-no where
مكتبتى
رابط مختصر
تجمع المهنيين السودانيين
#بيان حول مجزرة فض اعتصام فتابرنو وتصريحات رئيس مجلس الوزراء
خرج علينا الدكتور عبد الله حمدوك رئيس الوزراء بتصريح يفتقر للحساسية اللازمة بشأن جريمة فض اعتصام فتابرنو والتي راح ضحيتها شهداء ونُهِبت وأُحرِقت ممتلكات. فهي جرائم مدانة ارتكبها مسلحون بحق مواطنين عزّل وليس لها أي تكييف آخر ليتحدث عنها رئيس الوزراء بمثل هذا التسطيح والإبهام.
وصَفَ رئيس الوزراء تلك الجرائم بالحوادث، وهو تعبير يتهرّب من مواجهة ما ارتُكب من انتهاكات، ويوحي كأنما هي اقتتال أهلي أو تناوش بين مجموعتين من المواطنين، لا بين مليشيا مسلحة فالتة معتدية أطلقت النار على معتصمين سلميين، الحديث عنها باعتبارها "حوادث" هو تقييد للجريمة ضد مجهول، وهو أمر يتناقض مع رسالة رئيس الوزراء حول المساءلة في إطار سيادة حكم القانون، بتغافله هنا عن الخارجين، بسلاحهم، على حكم القانون.
كذلك ذكر رئيس الوزراء أنه إذا لم تتم مواجهة ومعالجة هذه الحوادث بشكل مباشر فسوف تبطئ عجلة التغيير والازدهار في السودان، كأنما يُملي السيد رئيس الوزراء مسؤولياته على آخرين، أو كأن هذه المشكلات ستُحل من تلقاء نفسها. لا معنى لأن يصدر هذا التصريح من المسؤول الحكومي الأول، بل كان المنتظر منه أن يذكر، هو بالذات، قراراته وإجراءاته الفورية لاحتواء العدوان والانفلات.
أرسل رئيس الوزراء بهذا التصريح رسالة سالبة وباهتة لأهلنا المعتصمين في فتابرنو وفي غيرها، رسالة لا تقول إن الدم السوداني واحد، وأنه غالٍ أينما كان. بدا من تصريح رئيس الوزراء كأن السلطة الانتقالية تقف على الحياد بين المليشيات المنفلتة وبين المواطنين السلميين.
هذا التصريح الذي تأخر بالأساس، يجيء بعد اكتمال مهلة الأسبوعين التي وعد رئيس الوزراء أن يتخذ خلالها قرارات تستجيب لمطالب مليونيات الثلاثين من يونيو 2020، لكنه يأتي مخيبا للآمال إزاء هذه الجريمة في فتابرنو وبعيدًا كل البعد عن ملامسة روح مطالب المليونيات، نطالب السلطة الانتقالية وفي مقدمتها رئيس الوزراء بتدارك هذا القصور والبت في تدابير حازمة تعيد وضع الأمور في نصابها وترد الحقوق.
أتت مؤسسات السلطة المدنية الانتقالية المكونة حتى الآن بتضحيات شعبنا العظيمة ودماء الشهداء الكرام، وينبغي أن ترتقي لمستوى تطلعات الجماهير وأهداف ثورتها واستحقاقاتها، وأولها احتكار أدوات العنف وحماية أرواح كل المواطنين السودانيين وحقهم في الأمن والعيش الكريم. وليعلم من قدمهم شعبنا لقيادة الفترة الانتقالية أن قوى شعبنا الثورية حية ويقظة ولن تقبل التراجع عن مكتسبات ثورتها أو تكرار مجازر الإبادة أو استمرار مهازل النظام البائد.
#اعتصامات_السودان_السلميه
#فض_اعتصام_فتابرنو
إعلام التجمع
14 يوليو 2020
|
Post: #2
Title: Re: التجمع يهاجم حمدوك
Author: محمد مصطفى محمد
Date: 07-14-2020, 10:03 PM
Parent: #1
سلام استاذ ابو سن
بيان مصادم وموفق واللغة تعبر عن حجم الجرم المرتكبكدا التجمع حيرجع للقواعد ويشيل مع الجماهير الشيلةحمدوك كبرها بشكل واضح ولكن الجبن لا يبني الدوليجب عليه ان يصارح الناس والا راقدلو فوق راي
|
Post: #3
Title: Re: التجمع يهاجم حمدوك
Author: elsharief
Date: 07-14-2020, 10:36 PM
Parent: #2
دماء الشهداء اغلى من مناصب الحكام ، يكفي انو حمدوك صعد لهذا المنصب عبر دماء الشهداء ، لولا دمائهم لا حد يعرف حمدوك الا عبر الترشيح السابق للكيزان لوزارة المالية ، الويل من خيانة دماء الشهداء
|
Post: #4
Title: Re: التجمع يهاجم حمدوك
Author: عبدالحفيظ ابوسن
Date: 07-14-2020, 11:01 PM
Parent: #3
مرحب محمد المصطفي
لغة خائبة وباردة
ودون انفعال بالمأساة تشبه بيانات المنظمات
ماحدث بشع ومؤلم ويوضح بجلاء ان الوضع يزداد سؤا
|
Post: #5
Title: Re: التجمع يهاجم حمدوك
Author: عبدالحفيظ ابوسن
Date: 07-14-2020, 11:04 PM
Parent: #4
مرحب الشريف
صحيح
واسأل دوما مع التذكير
من سوق وقدم لنا حمدوك؟
حمدوك.كان خيارا للانقاذ من قبل الخارج
حصان طراودة
|
Post: #6
Title: Re: التجمع يهاجم حمدوك
Author: Asim Ali
Date: 07-15-2020, 01:20 AM
Parent: #5
Quote: من سوق وقدم لنا حمدوك؟
حمدوك.كان خيارا للانقاذ من قبل الخارج |
سلام عليكم ابو سن
وضعته الانقاذ فى طؤيق الثوره والثوار وربما زى مابتدل كتير من الشواهد انو النظام البائد ادرك سقوطو وذهابو وروج لشخصيه تمكنو من احتوائه وتكبيله وعزله تدريجيا عن مكونات الثوره وقواعدها
تصريحو لايرقى حتى الى مستوى ناشط ناهيك بيان رئيس حكومه مسئول عن ماحدث مهما كان من ارتكب المجزره ومطالب بموقف اكثر حزم
|
Post: #7
Title: Re: التجمع يهاجم حمدوك
Author: يحي قباني
Date: 07-15-2020, 01:28 AM
Parent: #6
Quote: مرحب الشريف
صحيح
واسأل دوما مع التذكير
من سوق وقدم لنا حمدوك؟
حمدوك.كان خيارا للانقاذ من قبل الخارج
حصان طراودة |
اب سن يا صاحب
تحية ليك و لضيوفك ...
اتفق معك ان من سوق و قدم لنا حمدوك هي الانقاذ ..
و لكن كانت خطوة اشبه بفرفرة مذبوح ...
لذا اجد من الظلم وصم الرجل بالتبعية الانقاذية البشعة ...
|
Post: #8
Title: Re: التجمع يهاجم حمدوك
Author: Abureesh
Date: 07-15-2020, 01:57 AM
Parent: #7
هل ممكن يا شباب نص البيان او رابط فيديو؟
|
Post: #9
Title: Re: التجمع يهاجم حمدوك
Author: Asim Ali
Date: 07-15-2020, 02:13 AM
Parent: #8
|
Post: #10
Title: Re: التجمع يهاجم حمدوك
Author: Abureesh
Date: 07-15-2020, 02:24 AM
Parent: #9
شكرا يا عاصم
و كمل جميلك بتوفير الرابط من فيسبوك لو تكرمت
|
Post: #11
Title: Re: التجمع يهاجم حمدوك
Author: جمال ود القوز
Date: 07-15-2020, 06:32 AM
Parent: #10
اضغط على صورة حمدوك حبيبنا ابو الريش
|
Post: #12
Title: Re: التجمع يهاجم حمدوك
Author: عبدالحفيظ ابوسن
Date: 07-15-2020, 06:38 AM
Parent: #11
تشكروا جميعا
يا قبة ماقلت تابع للانقاذ . بل اقصد تابع للذين قدموه للانقاذ ثم لنا
يا ابوالريش تغريدته منشوره في تيوتر في صفحته
|
Post: #13
Title: Re: التجمع يهاجم حمدوك
Author: جمال ود القوز
Date: 07-15-2020, 06:59 AM
Parent: #11
والله يا حبيبنا ابو سن ده كلام عجيب جدا شغل الفهلوة وملوص وحكومة ومعارضة
وافلق وداوي واللعب على الحبلين وبيع الوهم والعواطف الحزبية الجياشة
والاجندة الاجنبية للشعب بلا اي اكتراث لمعيشته ومايصلحه
ده اكيد شغل تدميري منظم ومش عشوائي ولا بي حسن نية اطلاقا
وفيهو استغباء واستحمار للشعب المسكين ده واستهتار بيهو وبي احبابه
الابتلع طعم حمدوك منو ؟ اصلا العمل الزيطة والزمبريطة التي لا يستحقها حمدوك
وجعل منه المنقذ والمخلص والرئيس الاوحد والملهم الما جابت مثله ولادة ؟
منو العمل كده ؟ ياها نفس الجهة الحزبية القاعدة الان تروج وتسوق لي غيره
وبنفس الطريقة الغبية والمكرورة بيتعاد نفس المسلسل الاستعباطي
مع اي ترشيح للمناصب والوزارات والولايات واي منصب كان
مافي اي ضمير في الترشيحات يا اب سن وده منتهى الحقد على الشعب السوداني
شنو يعني تقعد تهلل زي الطيرة باسم تنظيم اوحزب او جهة لترشيح شخص
وانت تعلم في قرارة نفسك انه لايملك ما يؤهله لادارة هذا المنصب
دي تندرج تحت بند الخيانة للوطن والشعب ومافيها اي حسن نية
لان نظرية الترشيح بنظام جرب يا خابت يا صابت المهم يتعين زولنا
اكيد مقصود منها الاضرار بالمواطن وسحقه بكل عنجهية تحت مفرمة المعيشة التي لاترحم
والله تشوف معاناة بعض المواطنين في الشارع والاسواق العبرة تخنقك
الناس دي يا اب سن ما عايشة حياة الشعب السوداني المكلوم ولا تكترث لهم اصلا
هي ازمة ضمير ده التوصيف الحقيقي لها
|
Post: #14
Title: Re: التجمع يهاجم حمدوك
Author: عبدالحفيظ ابوسن
Date: 07-15-2020, 07:08 AM
Parent: #13
صدقت ياود القوز
في اياد اجنبية خفية تدير الصراع ويعاونها بعض بني جلدتنا
فلتبق جذوة الثورة متقدة
|
Post: #15
Title: Re: التجمع يهاجم حمدوك
Author: Mahjob Abdalla
Date: 07-15-2020, 07:37 AM
Parent: #14
Quote: منو العمل كده ؟ ياها نفس الجهة الحزبية القاعدة الان تروج وتسوق لي غيره
وبنفس الطريقة الغبية والمكرورة بيتعاد نفس المسلسل الاستعباطي
مع اي ترشيح للمناصب والوزارات والولايات واي منصب كان
مافي اي ضمير في الترشيحات |
سلام عبدالحفيظ
و سلام جمال
في مسلسل امريكى اسمو
House of cards
لو شاهدت المسلسل ده حتعرف كيف حدس ما حدس
_______________
المسلسل يطابق مسألة الترشيحات الوزارية و ليس بالضرورة علي حمدوك.
|
Post: #16
Title: Re: التجمع يهاجم حمدوك
Author: عبدالحفيظ ابوسن
Date: 07-15-2020, 07:54 AM
Parent: #15
تشكر محجوب
المحاصصات دي الا يزيدو الولايات
شايفهم دايرين يزيدو الوزراء
كما يقول المثل
دة ربيتا يكفي سخانو !
|
Post: #17
Title: Re: التجمع يهاجم حمدوك
Author: محمد البشرى الخضر
Date: 07-15-2020, 09:30 AM
Parent: #16
بيان والي الولاية العسكري و قراراته كانت أقوى واكثر انصافا للضحايا
حقيقة دي تحسب على حمدوك حتى لو حاول هو او البعض تبريرها
وحسن فاروق بتاع تجمع المهنيين الجديد نجيض و عرف ياخد اللقطة في صالح شعاره المرفوع من فترة (تسقط تالت)
عموما دي زي غلطة أكرم بتاعة المليونية غلطة الشاطر, ارجو أن لا يكون لها تأثير مشابه
|
Post: #18
Title: Re: التجمع يهاجم حمدوك
Author: اخلاص عبدالرحمن المشرف
Date: 07-15-2020, 09:37 AM
Parent: #17
المجد للشهداء
عاجل الشفاء للجرحي
العز للوطن
من امر باطلاق الرصاص ، لابد من التقصي
هذه مثل مجزرة فض اعتصام القيادة الخرطوم.
نفس الفاعل ، نفس الفعل ، نفس الحقد مع تربص.
|
Post: #19
Title: Re: التجمع يهاجم حمدوك
Author: اخلاص عبدالرحمن المشرف
Date: 07-15-2020, 10:03 AM
Parent: #18
اكثر دولة متضررة من استقرار المنطقة هي فرنسا
|
Post: #20
Title: Re: التجمع يهاجم حمدوك
Author: جمال ود القوز
Date: 07-15-2020, 10:41 AM
Parent: #19
Quote: في اياد اجنبية خفية تدير الصراع ويعاونها بعض بني جلدتنا
|
ده الحاصل يا أب سن ..
والناس فاكرة إنه العرايس العلي المسرح دي ..
بتتحرك من تلقاء نفسها أو بارادتها أو حتى بارادة الثوار ..
يا أب سن أي بضاعة تم إعادة تدويرها وتمويلها من الخارج
وجايانا من المنظمات واستخبارات الدول الخارجية ..
أخير الناس تبعد عنها ...
المنظمات هي القاعدة تدير الصراع الآن في الساحة السودانية ..
وبتدلل على بضاعتها من موظفيها الجابتهم لينا كوزراء ..
والآن عايزة تدخل قادة الحركات المسلحة في دولاب الحكم ..
عشان تكمل قبضتها عى الحكومة وتخنق الشعب والثورة ..
بعدما ما صرفت عليهم سنين من ضرائب مواطنيها ..
فديل ضررهم أكيد ولا يهمهم السودان ولا مواطنه ولا ثورته .
الصراع بيتم إدارته من الخارج ..
والناس دي ما عندها قرار في يدها وفي أي لحظة
لو خرجت عن طوع من يمولها
حيتم كسرها وربما قتلها في حادث طيارة أو غيره ..
الله يعين السودان على بعض أبنائه الباعوا الوطن مقابل دراهم معدودة ..
ياهم القاعدين الناس تهلل ليهم وتسوّق ليهم ..
وعامله منهم مخلّصين وأبطال من كرتون
والغريبة الناس قاعدة تتغشا وتشتري البضاعة الضاربة دي !!!.....
|
Post: #21
Title: Re: التجمع يهاجم حمدوك
Author: عبدالعظيم عثمان
Date: 07-15-2020, 12:16 PM
Parent: #20
عجيب أمر الشيوعين والله
زمان وقت قلنا ليكم حمدوك ملكلك (بعض المهاويس من الشيوعين طلعونا كيزان)
بعد ما حمدوك رفد أكرم.. طلع حمدوك ماسورة
كأنما العلاقة من الحكومة هي وجود أكرم
طالما أكرم ركب التونسية فحمدوك ماسورة
|
Post: #22
Title: Re: التجمع يهاجم حمدوك
Author: عبدالحفيظ ابوسن
Date: 07-15-2020, 09:14 PM
Parent: #21
ياودو بيان بارد جدا
زي بيانات ندين ونشجب
المجد لهم يا اخلاص
فعلا نفس المشهد ونفس الممثلين
يا ود القوز مصيبتنا يلاقو فيها
يفتقدون لاي حس وطني ولا انساني ولا ديني
شيوعين شنو يا عظمة اخوي
|
Post: #23
Title: Re: التجمع يهاجم حمدوك
Author: عبدالعظيم عثمان
Date: 07-15-2020, 09:31 PM
Parent: #22
تجمع المهنيين دا الجديد الخطفوه الشيوعين
إذا أكرم لسه قاعد وزير صحة.. زي البيان الفوق دا
ما كان حتشوفه
|
Post: #24
Title: Re: التجمع يهاجم حمدوك
Author: عبدالحفيظ ابوسن
Date: 07-15-2020, 10:15 PM
Parent: #23
حسب متابعتي يا عظمة انو ناس الاصم وافقو وشاركو في الانتخابات. وبعد ظهرت النتيجة ومضي كم يوم خرخرو
ومش كدة استولوا علي الصفحة
وحسب ماقريت انو الشيوعيين دعمو الاصم في البدايات الاولي
شخصيا ماقادر ابلع للاصم و مريم الصادق والدقير مشيهم للامارات في بدايات نجاح الثورة
|
Post: #25
Title: Re: التجمع يهاجم حمدوك
Author: منتصر عبد الباسط
Date: 07-16-2020, 00:24 AM
Parent: #24
| Quote: في اياد اجنبية خفية تدير الصراع |
قصدك من ياتو شباك؟
|
Post: #26
Title: Re: التجمع يهاجم حمدوك
Author: عبدالحفيظ ابوسن
Date: 07-16-2020, 03:41 AM
Parent: #25
لم افهم مغزى الصورة منتصر ؟
الواضح انو دة مكتب يخص الحزب الشيوعي ومعاهم صديق يوسف . لكن يعني شنو ؟
|
Post: #27
Title: Re: التجمع يهاجم حمدوك
Author: Asim Ali
Date: 07-16-2020, 06:47 AM
Parent: #26
الصوره لزياره السفير المصرى للمركز العام للحزب الشيوعى
|
Post: #28
Title: Re: التجمع يهاجم حمدوك
Author: محمد البشرى الخضر
Date: 07-16-2020, 07:27 AM
Parent: #27
| Quote: شخصيا ماقادر ابلع للاصم و مريم الصادق والدقير مشيهم للامارات في بدايات نجاح الثورة |
الأصم ما سافر الامارات معاهم يا قريبك
|
Post: #29
Title: Re: التجمع يهاجم حمدوك
Author: عبدالحفيظ ابوسن
Date: 07-16-2020, 07:59 AM
Parent: #28
شكرا عاصم
يعني شنو برضو ؟
صاح ودو سافر اثيوبيا وقعد فترة متجاوزا التجمع
|
|