من أفصح من يتحدث العربية فى الحكومة بشقيها؟

إختيارى الفريق الكباشى

ده مش القال (حدس )ما حدس ولا مطلعنها فيه إشاعة

الموضوع عن العربية الفصحى يا منتصر.. ما لما يتكلموا بالدارجة

بناءً على متابعتي غير المنتظمة، في المجلس السيادي الكباشي أفصح. وفي مجلس الوزراء ما سمعت منهم واحد فصيح (يمكن أقول وزير العدل، عبد الباري، أفصح). لكن صراحة كلهم تعبانين. أحسن يتكلموا بلغتنا الدارجة، زي مولانا المرحوم محمد إبراهيم نقد.

السودانيين عموماً حتى لو مجوِّدين لأي لغة بيرتبكوا لما يخطبوا أو يتكلموا أمام جماهير أو أمام شاشات تلفزة. طوال السنوات التي شاهدت فيها قادة سودانيين كبار يتكلموا في قنوات إذاعية أو تلفزيونية، شعرت بأنهم تعبانين مقارنة بجيرانهم. مخارج حروف غلط، وتأتأة وتعتعة وحوسة.

واعتقد أن السبب في المسْكَنة اللغوية دي كله جايي من تربيتنا. والله يا أب ريش في الجامعات الأجنبية بتاكلنا الشعوب التانية بالجرأة وقوة العين والفصاحة. يجيك هندي أو حتى مصري أو سوري يا دوب عارف نصف المعلومات الانت عارفها وعادي يشوتك خارج الحلبة. وياما حصل للعبد لله. العقل الباطن أتاريه مخزِّن كل شيء وسوف يصيبك بالشلل العقلي، أو الربكة العقلية، عندما تكبر، ونحن ما كنا عارفين ولا كبارنا التربويين كانوا عارفين.

وفي المعاينات برضو نحن بنكون تعبانين مع أن الواحد فينا يكون فاهم كل شيء مطلوب لكنه لا يستطيع التعبير عن ما يفهمه بسلاسلة وطلاقة. دي آثار التربية الغلط والجلد واللبع منذ الطفولة، وأسكت يا شافع ونعامة تزوزي بيك وتف على وشك يا حمار.

كلما يطلع واحد سوداني، أياً كان، على القنوات العربية أو الإنجليزية والله أنا بشيل هم لأنه أكيد حيكون كارثة ومَضْحَكة، خصوصاً لو بقى برنامج حواري. يا أيها السودانيون، ابتعدوا عن البرامج السجالية على كل القنوات العالمية والعربية والأفريقية. مش لازم نتكلم يعني.

المهم. نحن ضاعت مننا عقود أو قرون كتيرة والعلاج صعب ومحتاج تغيير في التعليم الابتدائي وقبل الابتدائي بطريقة تخلي الطفل واثق من نفسه وقادر يتفاهم مع الناس بطريقة طبيعية.

نحن راكبنا خوف منذ الطفولة، وأثر فينا تأثير أضاع علينا فرص كتيرة.

عشان كدا وعن قناعة وبكامل قواي العقلية بقول إن مشكلة السودان في إنسانه، في دماغ إنسانه ... الخلل في شخصيتنا واستعدادنا الذهني، لأن تربيتنا غلط وشائهة.

دي وجهة نظري باختصار.

البركة في عيالنا المولودين خارج السودان، وفي الدول الغربية بالذات. وبرضو في عيال في الداخل كسروا قيد الخوف (قيد الأكبر منك بيوم أعرف منك بسنة). لكن المشوار طويل طويل جد.

تربية لا يمكن أن تُخرج إلا إنساناً محلي التفكير وسلبي السلوك 100%، في كل شيء، ولا ناقة له ولا بعير في مناطحة الغير. والنتيجة ................ بقينا نكتل بعض ومبسوطين الحمد لله. أهو لازم نعمل حاجة.

Quote: دي وجهة نظري باختصار.

وأنا أتفق معك يا شنتير 100%.. و شكرا أديت البوست بعد اخر لكنه فى ذات الإتجاه.. مشكلة كتير من السودانيين، خصوصا المتعلمين، الثقفة فى النفس.. و هذه كما اسلفت من التربية
القراية أم دق.. فى البيت تتجلد و فى المردرسة تتجلد.. الطفل منذ نعومة أظفاره ملطشة.. مرة فى قطر، و مافى داعى ذكر الأسماء، مدير سودانى وصاحب أعمال عين شاب سودانى ليكون
فى الإستقبال يوجه المراجعين و زوار الشركة.. الزول دا تلقاه طبيعى من السودانيين و باقى الجنسيات لكن أول ما يجى مواطن قطرى يقوم يتسوى و يتكلم معاه بصوت منخفض ومهزوز
و هو ينظر للأرض.. بعد اسبوع المدير السودانى شاله... ديل الجايين من السودان يا دوب.. يحتاجوا سنين عشان يتلحلحوا و يتشخصنوا. شئ مؤسف.
بعدين نرجع السودان.. المشكلة ما فى التأتأة و الإرتباك فقط، بل فى قواعد اللغة التقول كلهم بدون فرز كانوا داكين حصة العربى.. زمنا الما ينجح فى العربى لازم يعيد.. شهادة مافى.
ما لاقانى سياسى واحد لا يلحن فى اللغة العربية غير الصادق المهدى.. و الان الفريق الكباشى.

سلام ابوالريش و منتصر و شنتير

Quote: ده مش القال (حدس )ما حدس ولا مطلعنها فيه إشاعة

حدس ما حدس قاله البرهان.


__________
طبعا نحن غير الناطقين بها نجتهد اكثر, عشان كدا كباشي و عبدالبارى جو الاوائل في المجلسين.

الاتنين قالوها لكن على ما أعتقد بتاعة البرهان اتسحبت
بتاعة الكباشي هي الموثقة
ما عندو أي علاقة بالفصاحة كباشي
كدي اسمع الفيديو واتحداك تمرر فيه 4 ثواني بدون خطأ نحوي أو لفظي
الحروف اللسانية كلها ملجنها
بالعكس الكباشي أسوأ من يتكلم اللغة العربية في شقي الحكومة

ما عندنا فصيح
لكن نصر الدين يليه أكرم وحمدوك هم الأفضل لغوياً
ولجنة إزالة التمكين هم الأسوأ

سلام مستر عمر
بقيت تنافس ود البشرى.
طبعا اول مرة اسمع اعتراف قدر ده.

_______________
طيب لجنة اديب عشان تعمل شنو؟
بذار قروش ساكت.

لاحظت اليد الاتمدت ليه بي تحت في نهاية الفيديو؟
مرروا ليه ورقة شكلو مكتوب فيها ديشاااااااك كدة ما وديتنا يا عمك

اوسكار Mahjob Abdalla

امتثال حبابك.
و حباب الدكتورة اخلاص.

لكن صراحة كدا بعد الاعتراف ده, اللجنة لزومها شنو؟

يا حبيب تصريحات كباشي خليها
عندنا عشرات الفيديوهات صورة وصوت أثناء فض الاعتصام سمعت بي عسكري دعم سريع تم التعرف عليه واستدعاؤه؟!

وفي المعاينات برضو نحن بنكون تعبانين مع أن الواحد فينا يكون فاهم كل شيء مطلوب لكنه لا يستطيع التعبير
عن ما يفهمه بسلاسلة وطلاقة. دي آثار التربية الغلط والجلد واللبع منذ الطفولة، وأسكت يا شافع ونعامة تزوزي بيك وتف على وشك يا حمار.
كلما يطلع واحد سوداني، أياً كان، على القنوات العربية أو الإنجليزية والله أنا بشيل هم لأنه أكيد حيكون كارثة ومَضْحَكة،
خصوصاً لو بقى برنامج حواري. يا أيها السودانيون، ابتعدوا عن البرامج السجالية على كل القنوات العالمية والعربية والأفريقية. مش لازم نتكلم يعني.
====================
حبيبنا أبريش .. تحياتي
مداخلة الحبيب شنتير اضافة قيمة للبوست ليكون موضوع نقاش هاديء
هذه مشكلة اساسية بالنسبة للسودانيين ..
أمس في قناة الجزيرة مداخلة لوزير الري السابق شيء معيب
حتى المذيعة سحبت اضطرت الى قطع الحديث وتوجيه الشكر له ورجعت للاخبار

اخلتفنا أو اتفقنا معه وربما الاتفاق معه غير ممكن (( عصام أحمد البشير )) هو الوحيد
الذي كان لديه المقدرة على الخطابة وتعبير في اللقاءات التلفزيونية

تحياتي أبريش .. يا جماعة اختياري لعصام احمد البشير ليس تحيزاً ولكن فقط مثال

ما عصام البشير وإنما جميع خطباء المساجد والإسلاميين بصورة عامة لأنه الكلام في الفقه يتطلب معرفة كبيرة باللغة العربية
عشان كدة بتلقى الترابي وعبد الحي والصادق المهدي وعلي عثمان فصيحين ويندر أن تمسك عليهم خطأ لغوي

لاحظ يا احمد محمد عمر فى الفيديو الذى تكرمت به.. بعد ما اعترف اعتراف كامل بان قرار فض الاعتصام كان لكامل منطقة الاعتصام وحدث ما حدث.. فى واحد اداه ورقة صغيرة فغير رايه بسرعة وقال ان القرار كان لمنطقة كولومبيا فقط.. شاهد الفيديو مرة أخرى. دا كلام خطير جدا فيه اعتراف الفريق ان القرار والتنفيذ كان لمنطقة الاعتصام وليس لكولمبيا