مؤتمر المانحين - اصدقاء السودان

الدعم الاقتصادي ودعم الحكم المدني
انعقد المؤتمر ونتمني ان يوفون بما وعدوا


مليار يورو ومنح دراسية ومعونات
شكراً اصدقاء السودان

Quote: ومنح دراسية

احسن حاجة.
أولادنا و بناتنا يستاهلو .

فعلاً الحبيبة نعمات
الشباب يستاهل
مليار ومائتي مليون وثمانية الف دولار
دعم للحكم المدني .

المبهرة زينب البدوي وجه لها الرئيس حمدوك
رسالة شكر متميزة ، ومستحقة


شكراً اوربا
شكراً الرائعة زينب البدوي

شكراً حمدوك

الحمد لله على نجاح المؤتمرببرلين و الشكر لبنتنا زيب البدوى على الاداء المهنى الرائع فى التواصل مع المشاركين والتقديم عبر الاسافير
المؤتمر خرج بخمسة فوائد هامة للسودان
1- ايجاد صداقات دائمة مع السودان من دول العالم بعد ثورة ديسمبر المجيدة و التغيير
2- الدعم المالى الكبير للسودان من المشاركين و وادوات التمويل الدولية البنك الدولى موسسة التمويل الدولية بنك التنمية الافريقى و غيرهم
3- حصول السودان على وعد تمويل ب 108 بليون دولار زايد 400 مليون مساعدات انسانية
4- افساح الطريق للعودة للمجوعة الدولية
5- تاكيد WB و IMF للمشاركة كشريك جاد فى تنمية السودان
حرية سلام و عدالة و المجد لشعب السودان

الاستاذ Mohamed Kabbar

شكراً علي التلخيص الشامل
أعطيتناالزبدة ، الاعلامية الرائعة زينب البدوي
كما تفضلت واكثر .

الرجوع للمنظومة الدوليه الاقتصادية خبر مفرح


مرحب بك أستاذ

صدقي كباو بتلفزيون السودان
لم يكن امامه سوي الاشادة رغم ان
بالنفس شئ من حتي ( يا ريت ينسي
حتي دي) ، وكالعادة ذكر عدم موافقته
علي رفع الدعم عن البنزين علي استحياء
وطالب بتصليح المواصلات بدل القروش العينية.

يا صدقي كيلو ننتظر ومعانا البنوك لحدي ما
نبني مترو الانفاق في امدرمان ولا شنو ؟

مجموع التبرعات بلغت 3مليارو611 مليون دولار

بشرتنابالخير استاذ Hassan Farah
ربنا يفرحك ويسعد احبابك

أحسن شئ ولاية وزارة المالية علي المال العام
شغل ام غمتي والعصابة يتوقف .
ولاية كاملة لوزارة المالية وحتي الاقسام المالية
في باقي الوزارات كالخارجية تخضع لوزارة المالية
ويكون المراجع المالي العام حاضراً في كل القطاعات
المالية.

عهد السرقة والارتزاق يجب ان يوقف.

هناك حوالى 5 مليون سودانى فى الخارج لو كل واحد تبرع ب 200 دولار نستطيع ان نقدم للوطن مليار دولار اضافى

اخر اخبار الخليج السعودية تلقي القبض
علي سودانيين يتعاملون خارج النظام البنكي

الخليج بح يا حسن اخوي، بعد الكورونا جفاف
و( تفتش )

د. اخلاص تحياتي
شكرا على البوست الاحتفالي
المهم الالتزام الدول بالوعود
السماح لوزير المالية بحرية التحرك لاتخاذ القرارات
بدون رفع الدعم عن بعض السلع الاعانات لن تصل
أقول لصديق كبلو الحبيب .. اتركوا البدوي يعمل

لابد من التوقف عن ,, المظاهرات وحرق اللساتك
ونعكس صورة استقرار للعالم الخارجي

تحياتي د اخلاص

فعلاً استاذما علي عبدالوهاب عثمان ع ع ع
الاستقرار ثم الاستقرار عشان
نبني الوطن حقيقة ما كلام

زراعة وتعليم وبني تحتية
قروض واستثمارات يكون معروف
متي اخذت وفي ما انفقت والمراجع العام
جاهز وعيون المانحين لا يخفي عليها شئ.

شفافية كاملة عشان ننهض

شكراً استاذي

ولدت زينب في السودان ثم انتقلت أسرتها إلى بريطانيا وهي في سن الثانية
إذ التحق والدها الإعلامي السوداني محمد خير البدوي بقناة ال بي بي سي العربية.
كان جدها بابكر بدري من أنصار محمد أحمد المهدي ورائد تعليم المرأة في
السودان الذي أنشأ جامعة الأحفاد للبنات.

تعلمت زينب في مدرسة هورنزي الثانوية للبنات في شمال لندن،
ثم درست الفلسفة والسياسة والاقتصاد بكلية سانت هيلدا في جامعة أوكسفورد.
حازت على درجة الماجستير في السياسة وعلم الاجتماع في الشرق الأوسط
من مدرسة الدراسات الشرقية والإفريقية بجامعة لندن في عام 1989.
عملت كمراسلة للبث الحي من قصر ويستمنستر لمدة خمس سنوات.

في عام 2005أصبحت مذيعة برنامج العالم في قناة بي بي سي الرابعة،
وهو أول برنامج بريطاني يومي مكرس للأخبار العالمية.
أعيدت تسمية البرنامج في 2007الى اخبار العالم اليوم واصبح يبث
في قناة بي بي سي الإخبارية العالمية.

قدمت عدة حلقات في برنامج هارد توك من بينها استضافة شخصيات
سياسية سودانية مثل عمر البشير، وغازي صلاح الدين،
ومحمد حمدان دقلو وبعض وجوه ثورة ديسمبر 2018.

غطت انتخابات جنوب افريقيا 2014 من جوهانسبرغ
للقناة الإخبارية والإخبارية العالمية.

تقدم برنامج عقول نوبل السنوي منذ عام 2012،
البرنامج الذي يغطي احتفالات جوائز نوبل ويستضيف الفائزين بها.

غطت انتخابات بريطانيا 2010.

كما قدمت عدة حلقات خاصة منها سلسلة تاريخ افريقيا
التي كانت من انتاجها في عام 2017 وقدمت حلقتين خاصتين
في هارد توك اكسترا في عام 2006استضافت فيهما سوزان سراندون
وميا فارو كما قدمت برنامج مناظرة بي بي سي العالمية: النساء في العالم العربي عام 2005.

منقول من النت لتسهيل البحث للقراء

ترسيخ و تثبيت دعائم الحكم المدني الديمقراطي
هو عهدنا مه شهداء الوطن وشهداء الحرية
وشهداء ثورة شعبنا السلمية
شكرا دكتورة إخلاص

شكرا باشمهندس Hamid Elsawi
والد الإعلامية الناجحة هو محمد خير البدوي
اعلامي ومؤرخ(له الرحمة) استضافة من قبل الإعلامي
عمر الجزولي في برنامج اسماء في حياتنا.
قصة نجاح .
المؤتمر به عدد من الفرص ، أن استغلت نجوما
واستطعنا بناء الوطن .

مكسب السودان الاهم هو : خروجه من العزلة الدولية والاندماج فى المجتمع الدولى
والمطلوب استثمار الدعم العالمى لاقامة مشاريع تنمية لرفع مستوى المعيشة للمواطنين
وتحسين بيئة المعيشة ومحاربة الفقر .
شكرا د.اخلاص .

اهلاً استاذ علاء سيد احمد
عدنا دولة محترمة ، نستطيع التعامل
بندية وثقة مع الجميع .
انتهي عهد ادخال البلاد في نزاعات
غير مجدية وتفتح الباب للصوص الدوليين.
تعاملاتنا كلها ستكون في النور

شكراً دكتور ياسر الشريف المليح
علي جلب هذه التفاصيل .
مساعدة مقدرة لننطلق في درب
التنمية والنهضة ببلد له امكانيات وافشلته
سوء الادارة .

بكرة احلي

يا ريت العرب ودول الخليج تحديدا يساعدونا بالسكوت والجلوس متفرجين
بنعرف كيف نحول السودان ليصبح سويد افريقيا ..

الي الان هم اختاروا من يدعمون في الحكومة
وقد يدعموا الجميع في مقبل الايام .

لاول مرة من (٣١) عام نشعر ونعرف ان العالم الحقيقي صار معنا
ونحن جزء من هذا العالم وان نحن بشر من حقنا ان نعيش كبشر

Quote: مكسب السودان الاهم هو : خروجه من العزلة الدولية والاندماج فى المجتمع الدولى والمطلوب استثمار الدعم العالمى لاقامة مشاريع تنمية لرفع مستوى المعيشة للمواطنين وتحسين بيئة المعيشة ومحاربة الفقر .

صحيح لان الدعم مرتبط بمشاريع تنمية فعلية
في البنية التحتية والتعليم والصحة
كل دولة حددت مجال الدعم تبعها
نتمني نشوف مشاريع طموحة

اهلاً AhmedYassin
من 31 سنة والسودانيين يتعاملون كالمجرمين
بسبب اعمال مجموعة لم تراعي لشعبها ومصالحة
اختطفت الوطن ومقدراته وبعد فشلها صارت مشروع
لصوصية .

كنا وين وبقينا وين

شكراً حمدوك

اهلاً Gafar Bashir
البنية التحتية والصحة والتعليم
زي ما ذكرت ، ونعيش بكرامة تحت
حكم مدني ديمقراطي تتبادل السلطة
سلمياً ، البشير اخر انقلابي واخر عسكري
يحكمفي السودان

مدنيااااااو

بس الله يكفينا شر الجهلاء الذين ملأوا صفحات سودانيزاونلاين باكاذيبهم معتبرين ان ما قام به حمدوك مجرد شحدة متناسين مشروع مارشال الامريكى الذى طبق بهدف اعادة نبض الحياة الى اوروبا المحطمة بعد الحرب العالمية الثانية

متناسين مشروع مارشال الامريكى
-------------------------
سلام يا ياراكز
يا ريت لو بقت علي دي ..
ياخ ده نسى قرعة سيدو عبدالرحمن الكان حايم بيها من سفارة لي سفارة ..
ومشغل المساكين في دايرتو بي قبضة عيش

إعادة اعتبار للشخصية السودانية.
عودة السودان للمنظومة الدولية.

السودان خرج من دمار لا يقل في السوء
عما أصاب اوربا بعد الحرب العالمية ، نطمع
في العودة شركاء ، وشكرا خالد وجعفر
علي التذكير بفائدة الشراكة

الصديق عارف قرأة صحيحة.
أن نتعامل مع النظام المصرفي العالمي
دون معيقات وبثقة

تحياتي

بالمناسبة يا دكتورة وضيوفك حتى الآن بلغت جملة التبرعات 4 مليار و882 مليون دولار بعد ان تبرع البنك العربى للتنمية بواحد مليار دولار كما تبرع بنك التنمية الافريقى ب 155 مليون دولار

تعرف اخوي حسن قصة يوصلوها خمسة مليار بالمغتربين
فكرت فيها ، تجار العملة ديل دايرين يدخلوا هللاتهم
بدل ما يشيلوها منهم كلها ناس مراقبة النقد في دول
الغربة ، لو سمح لهم بادخال الاموال مع نسبة 5-3%
ما بتم الناقصة وتكفي ؟

ناس تحويل العملة ديل لهم فضل علي كل مغترب
وكل اسرة لها ابو مغترب ، منو ال ما رسل عن طريقهم
ياتو اسرة ما اتلفت القروش علي داير المليم وبسرعة
منهم رغم انه لا في شيك لا غيرو ، الان يمكن الظروف
بدأت تتغير وظهرت بعض الاختلالات ، خليهم يدخلوا
قروشهم بطرق مشروعة والحكومة تاخذ نصيب يتفق
عليه بدل البهدلة مع الشرطة والنقد الاجنبي في الغربة

نعم هو نشاط كان خارج النظام المصرفي ولكن كان
لا بد منه.
النظامي كتير ومفتوح للنقاش ولعله يجد قبول من
تجار التحويل وال 5- 3 % ذاتها ممكن تكون
موضع نقاش وتبقي 2-1%

ناس تحويل العملة ديل لهم فضل علي كل مغترب

==============================
د اخلاص تحياتي ,,.
نعم لهم فضل كبير على المغترب
الحكومات لم توفر البنية التحتية للبنوك والحوالات
بالنسبة لتاجر العملة أنا فقط اتصل (( حول لأخي مبلغ الف ريال سعودي ))
بعد ساعة او ساعتين أجد أخي استلم المبلغ ليس في الخرطوم هناك في ضواحي الدنيا
يسلم للوالدة الاخوات داخل البيت (ديلفري)

اذا قلنا البديل البنك .. كيف أكتب عنوان المستلم مثلا أقول :

الولاية الشمالية ـ محلية البرقيق ، جزيرة ارتقاشا ، ساقية رقم 24 ( بالضبط هذا هو عنوان اخي )
أولاً لن يقبل أي بنك ، أو صرافة أ ( يعني لازم أخوي التربال يكون عندو سوفت كود او آيبان )

الحكومة عندنا السودان بالنسبة لهم فقط العاصمة
تجار العملة لديهم نظام سريع جداً .. وسهل وكذلك الثقة
بعد الحوالة بأيام يستلم المبلغ بالريال وده نظام بالنسبة لنا خاصة ناس ضواحي الدنيا
من عشرات السنين ..

تحياتي د اخلاص

لا نسبة لا تأخير ولو انفتح الطريق الدوغري
للسودان ما أظن يقصروا، الصرافات في كل الدول
موجوده، يفتحوا صرافاتهم عادي .

ناس تحويل العملة ديل لهم فضل علي كل مغترب
وكل اسرة لها ابو مغترب ، منو ال ما رسل عن طريقهم
ياتو اسرة ما اتلفت القروش علي داير المليم وبسرعة
منهم رغم انه لا في شيك لا غيرو ، الان يمكن الظروف
بدأت تتغير وظهرت بعض الاختلالات ، خليهم يدخلوا
قروشهم بطرق مشروعة والحكومة تاخذ نصيب يتفق
عليه بدل البهدلة مع الشرطة والنقد الاجنبي في الغربة

نعم هو نشاط كان خارج النظام المصرفي ولكن كان
لا بد منه.
النظامي كتير ومفتوح للنقاش ولعله يجد قبول من
تجار التحويل وال 5- 3 % ذاتها ممكن تكون
موضع نقاش وتبقي 2-1%


زي كلامك ده يا اخلاص بخلي البلد تمشي لي قدام
ياريت كل السودان ولو مره واحدي نجرب نتفق علي حاجه ونديها فرصتها كامله
وبعدين نجي نحكم عليها
العزه للسودان

شكرآ الحبيبة عفاف أبوحريرة
السودان سيخرج من الضائقة اقوي
مما كان ، السودانيون عانوا وبشدة
ولا بد من البناء لتعيش الأجيال القادمة
بكرامة وتفخر بانتمائها للسودان.

مودتي الحبيبة عفاف ابوحرىرة