Post: #2
Title: Re: التقلية في فتيل ..
Author: يحي قباني
Date: 06-21-2020, 01:57 AM
Parent: #1
الصورة ده ذكرتني حاجة حصلت زمان ...
عندنا قريبا لينا والدته كانت تباخة تبيخ شديد .. و كان لما يعزمنا ...
تلاتة اربعه يوم قبلها ما بناكل و بنستعد لعزومة غير مسبوقة ... اولا كنا طلبة في الجامعة و اكل الدخليات مطلع زيتنا
و ثانيا الحاجة والدته طباخة نمره واحد ...
المهم العزومة دي بالتحديد كان عنده خالو متزوج مصرية ... و اولاده عاشو في مصر فترات طويله و الاكل السوداني ما بعرفو ليهو و حاضرين معانا...
و الحاجة اليوم داك ظبطت لقمة و تقلية A1 ... و طبعا سنتر التربيزة كانت اللقمة و الملاح ...
المهم قريبو ده يتحاوم بعيد منها .. لامن انا قت ليهو ياخي ما تجرب الحاجة دي ...
و قام صاحبنا غرف حته كده و اكلها و ما صرح بي أي شي ...
مع الحلو عمتو جاتنا ... و قالت ان شاء الله الاكل عجبكم ...
نطيت قت ليها اولاد اخوك كدي أسأليهم عن الحاجة السمحة ديك ..
قام العزمت عليو داك داير يجامل عمتو قال ليها ...
يحيى خلاني اضوق الاكلة حقتك ... حقيقة ( الصوص ) طعمه حلو جدا ... بس (الجلي مسيخ ) ...
الصوص طلع الملاح و الجلي طلع العصيدة !!!
|
Post: #3
Title: Re: التقلية في فتيل ..
Author: يحي قباني
Date: 06-21-2020, 02:01 AM
Parent: #2
نرجع لي دي ...
هسي ده جد الكلام ده ؟
يعني دي مناسبة و الجماعة مقيفيين الشغله ؟
انا بعرف العز بعمل اكتر من ده ...
زمان عندنا صاحبنا ساكن الركابية من اولاد الكوارتة و كلهم تجار ...
يوم قاعدين في الديوان حقهم و في علبه فضة .. Queen Anne انجليزي اصلي
طبعا قلت دي يا ماكنتوش ..
يا بالميت مكسرات وارد بره ...
اقوم اتشالق و اعمل سيد بيت و افتح العلبة القيافة ... وريقي جاري على الكوالتي استريت ...
لقيتو تمباك !!!!
( لو ما فاطر ما تخاطر ) ... او ( سف و قارن ) ...
|
Post: #4
Title: Re: التقلية في فتيل ..
Author: نادر الفضلى
Date: 06-21-2020, 02:35 AM
Parent: #3
طيب فى فتيل بقت صوص!
لكن بالغتا يا يحيى .. هسة أكل سفرة الجامعة داك بيقولو عليهو أكل الداخليات طلع زيتنا؟!
داخليات المدارس معليش ..
|
Post: #6
Title: Re: التقلية في فتيل ..
Author: نادر الفضلى
Date: 06-21-2020, 02:46 AM
Parent: #4
أديك ى برضو عن مصرى زار السودان والجماعة عزموه غدوة مدنكلة
نطام صينيية لحوم ومحاشى وما لذ وطاب والناس بتاكل بأياديها
ما نظام سفرة وكل واحد يغرف فى صحنه براهو.
كان يتوسط الصينية صحن باشرى ماكن كسرة بأم ريقيقة كاربة ومتوصى بيها
اللحم كتير .. الجماعة عزمو على ضيفهم المصرى يجربا .. زولك بعد
محاولات وتوجيهات عرف كيف يتناولها وياكلوها. سأألوه أها لقيتا كيف؟
قال ليهم دى طاعمة أوى .. بس يكون أحسن كل واحد يكون معجنتو لوحدو!.
|
Post: #5
Title: Re: التقلية في فتيل ..
Author: Hamid Elsawi
Date: 06-21-2020, 02:41 AM
Parent: #3
سلام يحي و تحياتي
مرة كنا قاعدين في كفتيريا الهندسة
منتظرين المخرج طارق فريجون عليه الرحمة
في الاستعداد لبروفة عمل مسرحي
أحد الزملاء كان شايل علبة حديد ذهبية جميلة في شكل
صندوق سيجاير و قاعد يلعب بيها فيها زر بالجنبة عند الضغط عليه
العلبة تفتح و يغلقها و يكرر في العملية أثناء الونسة.
واحده زميلتنا من بنات الرياض قالت ليهو يا ..... انت دايما متميز و تناولت منه العلبة
و بدت تفتح و تقفل فيها ... بعد كم محاوله دخلت يدها في العلبة
و أخرجت كيس سعوط .....
رجهت ليهو العلبة و قالت ليهو فعلاً متميز
|
Post: #7
Title: Re: التقلية في فتيل ..
Author: Ahmed Yassin
Date: 06-21-2020, 03:08 AM
Parent: #5
دي خمرة (بالضمة) او ( خومرة)
ظاهرة من ريحتا
|
Post: #8
Title: Re: التقلية في فتيل ..
Author: يحي قباني
Date: 06-21-2020, 03:33 AM
Parent: #7
| Quote: لكن بالغتا يا يحيى .. هسة أكل سفرة الجامعة داك بيقولو عليهو أكل الداخليات طلع زيتنا؟! |
اكل السفره يابن عمي بس مرقتكم من الجامعة انحنا حضرنا بداية التدهور
لغاية بداية تالتة تقريبا 1980 كانت الامور كويسة ...
بعد داك قبلنا ملاح نجيلة ..
|
Post: #9
Title: Re: التقلية في فتيل ..
Author: يحي قباني
Date: 06-21-2020, 03:49 AM
Parent: #8
Quote: كان يتوسط الصينية صحن باشرى ماكن كسرة بأم ريقيقة كاربة ومتوصى بيها
اللحم كتير .. |
الغريبة بي لياقتها ديك .. لحمتها لا يعلا عليها .. هي و لحمة المفروكة ...
|
Post: #10
Title: Re: التقلية في فتيل ..
Author: يحي قباني
Date: 06-21-2020, 03:56 AM
Parent: #9
Quote: واحده زميلتنا من بنات الرياض قالت ليهو يا ..... انت دايما متميز و تناولت منه العلبة
و بدت تفتح و تقفل فيها ... بعد كم محاوله دخلت يدها في العلبة
و أخرجت كيس سعوط .....
رجهت ليهو العلبة و قالت ليهو فعلاً متميز |
هههه
من بنات الرياض دي ذكرتني بتين من بنات الرياض اتصاحبن على بنية تالتة قيافه وفايته الناس مسافه بتقرا معاهم في الاحفاد ...
طالعين و نازلين معاها ... لغاية ما في يوم واحده من الاتنين قالت لي صاحبتها :
تصوري فلانة طلعت ساكنة الثورة !!!
الغنج جميل ياخ ... و الجلع بالرطانه اجمل ...
او كما غنن بعض الحسان وراء ابن عمك و صديقي الساحر الباجوري
كان الباجوري يغني قام اتعزز ( الليمون )...
و احداهن كانت (تشيل) و تردد و تقول : و الله قام اتعزز ( اللامون ) ...
فكسرت ضلعا في قريبك اظنه ما زال لم ينجبر ... هههههههههه
|
Post: #11
Title: Re: التقلية في فتيل ..
Author: يحي قباني
Date: 06-21-2020, 07:50 PM
Parent: #10
Quote: دي خمرة (بالضمة) او ( خومرة)
ظاهرة من ريحتا
|
قمره تمطر خمره و حارسها الفضاح ...
اوعك يا فنان تكون من النوع لو سمع خجتها يبكي ... :)
|
Post: #12
Title: Re: التقلية في فتيل ..
Author: Ahmed Yassin
Date: 06-21-2020, 08:35 PM
Parent: #11
مصري ازهري كان عميان..بمشي بيت واحد من ناس الحلة بتعشى عنده بصفة متكررة
وصاحب البيت كان بكرمه وكل ما يجي بضبح ليهو جدادة .وعمك لضرب ومستمتع
الخال استمر سنوات طويلة...صاحب البيت مات... مولانا جاء بعد فترة طبعا في الليل
وقدم واجب العزاء وقعد وقعد .. ولد المرحوم صاحب البيت قام جاب لمولانا فتة عدس وبصلة
وسماحته طبعا ما بشوف .يمد يده ويهبش ويفتش.. قام استوعب الحصل وانشد متسائلا:
اين ابوك الذي كان يذبح الديوك ؟!
الولد طنشو
انشد مرة اخرى: اين ابيك الذي كان يذبح الديك ؟!
الولد يعاين ليهو ساي وساكت وبهز في راسو بس
مولانا قرم لي بصلة وقال: اين اباكا الذي كان يذبح الادياكا. ؟!
الولد قال ليه:
يا مولانا اعدس وابصل وانسى الزمن داكا
( ومعاها هزة في كتف مولانا)
|
|