Post: #1
Title: بهدوء جدا ضراقراطية
Author: عبدالحفيظ ابوسن
Date: 06-19-2020, 02:53 PM
لي فترة بتمعن في تصريح حميدتي
انهم بي كاكيهم بجيبو الديمقراطية ضر كدة
نسيت ألف العنوان كتبتها ضراقرطية
عدلت عولقت البوست كلو
عدلت تاني
|
Post: #2
Title: Re: بهدوء جدا ضراقراطية
Author: أحمد محمد عمر
Date: 06-19-2020, 02:58 PM
Parent: #1
مر بي وصف زمان واحد قال عن صاحبه الزول دة شدة ما متدين بعد يكتح كباية العرقي بقول الحمد الله الذي أطعمنا وسقانا
|
Post: #3
Title: Re: بهدوء جدا ضراقراطية
Author: عبدالحفيظ ابوسن
Date: 06-19-2020, 03:02 PM
Parent: #2
هههه مايكون نفس الزول الشرب كم جردل وقال توفيق من ربنا
يا معلم عندي صحبي كان اول زول بصلي العشا
بكون واقف في المصلاية . المؤذن بقول الله اكبر هو بكبر معاهو . مع قولة السلام عليكم بتلفت للجماعة
كبو لي 😆😆😆
|
Post: #4
Title: Re: بهدوء جدا ضراقراطية
Author: عبدالحفيظ ابوسن
Date: 06-19-2020, 03:07 PM
Parent: #3
التعبير سوداني قح
وقطع شك بدون معرفة للتراث السودان واللغة السودانية ما بتقدر تعرف مراميهو
عندنا كمية استخدامات لي ضر كدة بس
|
Post: #5
Title: Re: بهدوء جدا ضراقراطية
Author: أحمد محمد عمر
Date: 06-19-2020, 03:20 PM
Parent: #4
ديمقراطية بجيبوها ضر
وبالكاكي (البندقية)
علي الحلال دي لم يسبقه عليها صاحب الكرتين أمام طراوة البحر
|
Post: #6
Title: Re: بهدوء جدا ضراقراطية
Author: Salah Zubeir
Date: 06-19-2020, 03:31 PM
Parent: #3
ههههههه
التلاته عزابه واحد بصلي والتاني
قاعد في كرسي صاحي من النوم
يادابك وغازي يدينو اللتنين في
شعرو والتالت لابس زول مرقه
عمل آخر ترتيبات شعرو في النص
الباقي من المرايه المكسورة
المغزوزه في الحيطه ...
الزول القاعد في الكرسي
سأل الزول المارق الوصل
الباب ماشي وين .. قال
ليهو ماشي اجيب قزازة
عرقي ... الزول البصلي
طقطق بي اصابعينو
وعمل حركة علامة
النصر ✌... الزول المارق
قال ليهو ما بجيب ليك
إنتا ما عندك قروش وأنا
عندي حق قزازة واحده ..
الزول البصلي عمل أصابعينو
في شكل ورده '(يعني انتظر)
ومن ثم راح ضارب جيب
عراقيهو بي يدو ...
وواصل صلاتو ...
|
Post: #7
Title: Re: بهدوء جدا ضراقراطية
Author: عبدالحفيظ ابوسن
Date: 06-19-2020, 04:29 PM
Parent: #6
والله يا احمد مفكر في التعبير مقرونا مع قائله .
البقول بعمل الحاجة دى ضر كدة مابكون قالها كقناعة اصيلة ولكن نتيجة لنقاشات حصلت فيها خلافات . او لعلمو الراسخ انو البعملو دة سيضر آخرين هو موجوع منهم
دة عموما
يلا بالمنطق دة داير اقرا كلامو
دي واحدة من الادوات زي مابقولو عشان اقدر افهم
|
Post: #8
Title: Re: بهدوء جدا ضراقراطية
Author: عبدالحفيظ ابوسن
Date: 06-19-2020, 04:56 PM
Parent: #7
ههه يا صلاح شوف اسلام السودانين دة كان كيف
بسكر ويقول ليك ان شاء الله ربنا يهدينا
يواظب علي صلاته ويسكر
والناس يقولو ليك عن ايمان وطيبة خاطر
عندو كوتة لسة ماكملها . بكملها وبتوب
يسكر ويصوم رمضان
بيوت الشربة في رمضان بتقفل
بسكرو لكن ملتزمين بحسن الاخلاق والسلوك
افضل خدمة مدنية وعسكرية وقانونية زمان كان عندنا وبرضو سمعة ميزاتها سيئة من كلو
|
Post: #9
Title: Re: بهدوء جدا ضراقراطية
Author: عبدالحفيظ ابوسن
Date: 06-19-2020, 05:13 PM
Parent: #8
وبفكر بي صوت عالي برضو
الحاجة البتسويها ضر معناتو انت مامقتنع بيها ولا مؤمن بيها لكن بتعملها مضرة للناس بس
غض النظر عن رؤية الاخرين ليها
|
Post: #10
Title: Re: بهدوء جدا ضراقراطية
Author: محمد البشرى الخضر
Date: 06-19-2020, 05:16 PM
Parent: #8
حميدتي يا قريبك ماشي على خطى البشير! يلعب على الجميع و نهايته ستكون مثله سيخسر الجميع
أو بطريقة تانية هو اشبه بالراقص على السلم لا الفوق شافوه ولا التحت
خسر الكيزان و الآن في طريقه لخسارة العسكر ولن يكسب المدنيين
يسافر مصر يقابل السيسي و بتاع المخابرات ووزير الري واول تصريح يدلي به في الخرطوم ان ملف موقف السودان من سد النهضة بيد حمدوك
انتظر تصريحه بعد عودته من رحلة الترفيه و السيلفيهات مع ابي احمد
تصريحه الضر دا في ريحة فارس النور و تغريدته المكملة و الشارحة له
|
Post: #11
Title: Re: بهدوء جدا ضراقراطية
Author: Hafiz Bashir
Date: 06-19-2020, 05:29 PM
Parent: #10
يا أبو سن
قيل أن كلمة ضر في قاموس حميدتي تعني قوة ورجالة وحمرة عين وزندية.
يعني المعنى لمن تجي الإنتخابات الله يقدرك ويختو ليك صندوق وما تجي تصوت ولَ تقول ممتنع
عشان حميدتي يوريك المكشن بلا بصل.
______________
المستفز في القصة هو أن يدعي حميدتي أن الديمقراطية سيأتي بها العسكر ومن خلفه يظهر حمدوك وفيصل
|
Post: #12
Title: Re: بهدوء جدا ضراقراطية
Author: عبدالحفيظ ابوسن
Date: 06-19-2020, 05:48 PM
Parent: #11
بصرح مايطلبه المستمعون يا ودو
لايمكن ارضاء الجميع
يا مولانا ماعلي كيفهم يفسرو . دة تعبير معروف ومفهوم وقديم جدا
لو عندو معني تاني كان يلحقنا بي هامش ولا مذكرة تفسيرية 😅😅
وزي ماقال ودو راجع قول فارس النور
|
Post: #13
Title: Re: بهدوء جدا ضراقراطية
Author: يحي قباني
Date: 06-19-2020, 07:29 PM
Parent: #12
Quote: مر بي وصف زمان واحد قال عن صاحبه الزول دة شدة ما متدين بعد يكتح كباية العرقي بقول الحمد الله الذي أطعمنا وسقانا
|
سنو مشتاقين ...
انا حضرت زي ده كتير يا احمد ... و حتى مرات بعد كاس الشري الاول لو نسى العشا بقوم بصليو ...
دي فطره سودانية ... الفطرة القالت " ده برا و ده برا "
اها ازيدك من الشعر بيتين ؟
ايام "الدِش" ... صاحبنا ماشي الحله مع اصحابو .. و نسى الطاقية ...
سالهم عندكم زياده .. اتغاتتو عليو ... طبق زولتك و دخل و قال ( عليك يا الله ) ...
اي شرح في الخاص لو سمحت ...
|
Post: #14
Title: Re: بهدوء جدا ضراقراطية
Author: عبدالحفيظ ابوسن
Date: 06-19-2020, 07:45 PM
Parent: #13
هههه بالغ يا قبة لكن
زي القال ليهو
العزل قالو حرام
ماينط واحد يقول لي العزل دة شنو
|
Post: #15
Title: Re: بهدوء جدا ضراقراطية
Author: أحمد محمد عمر
Date: 06-19-2020, 07:48 PM
Parent: #13
دة المعنى الحقيقي للتوكل .. ولا تعقلها ذاتو تخليها كلها على الله 
علي الحلال زول ايمانه ضعيف زينا كدة إن بقت ماريا شارابوفا ما عندو ليها حاجة
|
Post: #16
Title: Re: بهدوء جدا ضراقراطية
Author: عبدالحفيظ ابوسن
Date: 06-19-2020, 08:14 PM
Parent: #15
كنت بقول في شنو !!!
|
Post: #17
Title: Re: بهدوء جدا ضراقراطية
Author: جمال ود القوز
Date: 06-19-2020, 09:23 PM
Parent: #16
| Quote: علي الحلال زول ايمانه ضعيف زينا كدة إن بقت ماريا شارابوفا ما عندو ليها حاجة |
إتا كمان ما تصعبا قدر ده ...
عشان نصدقك
زي عمك قال لي وليداتو كان أكدو بي قدومي ده ..
بوست لابد أن تأتيه محتقبا :
(المعاني) لأبي ( الفرج ) البُرتكاني ...
وإلا لاستعصت عليك دروبه ..
أب سن كعهدنا به مليحا ممراحا ..
باقي الليل ده ..
كان (فضينا) بنجي (نعشّق ) عندكم ... خخخخخ
|
Post: #18
Title: Re: بهدوء جدا ضراقراطية
Author: عبدالحفيظ ابوسن
Date: 06-20-2020, 06:41 AM
Parent: #17
راجينك ود القوز
|
Post: #19
Title: Re: بهدوء جدا ضراقراطية
Author: Hafiz Bashir
Date: 06-20-2020, 06:57 AM
Parent: #18
😂😂😂
كنت داير أسألك يا أبو سن "إنت بوستك دا حدو وين؟"
لكن جاتني نكتة في الواتساب فيها نفس سؤالي و نهايتها طبق بيض، قمت خليت السؤال وقلت ما أعرض نفسي لموقف محرج
|
Post: #20
Title: Re: بهدوء جدا ضراقراطية
Author: أحمد محمد عمر
Date: 06-20-2020, 09:15 AM
Parent: #19
قول ليه كان بتضمن تقيف عند القدوم كد زي ما عاوز
لكن أنا غايتو إيماني الضعيف خبرته من زمني الشافع مع برطمانية العسل .. أقول آخد لي لحسة واحدة بس وحاتك ما بقيف إلا أتدشى من الشبع
|
Post: #21
Title: Re: بهدوء جدا ضراقراطية
Author: Salah Zubeir
Date: 06-20-2020, 09:41 AM
Parent: #20
😜😜😜
ايمان شنو يا زول .. ايمان دا بتاع
جهاد وصبر ومصابره وصوم رمضان ...
دي إسما النفيسه الدنييه ... وما واقفا
علي برطمانية العسل ... ممكن
تتاورك في حاجات كتيره ...
وفي أحيان كتيرة بتكون سبب
للأمراض المؤقته والمزمنه حمانا
واياكم الله وحسن استخدامها ...
(النفيسه الدنييه) ...
|
Post: #22
Title: Re: بهدوء جدا ضراقراطية
Author: Ahmed Yassin
Date: 06-20-2020, 10:47 AM
Parent: #21
Quote:
الزول البصلي عمل اصابعيو
في شكل ورده '(يعني انتظر)
ومن ثم راح ضارب جيب
عراقيهو بي يدو ...
وواصل صلاتو ... |
ابو سن اللذيذ وشركاه اللذيذون المحدودة
نفس العذابة ديل بعد سكروا.. اصروا على ( الزيادة) واحد بقول كفاية ياجماعة لى بكرة
وواحدين حلفوا بى الله الا هسي دا. قاموا رسلوا واحد .. مشى اشترى .. وهو راجع
سكاهو كلب .. وعضاهو... وبقى ياخد في الحقن ولقوها ليو بعد تعب. اها الناس بتسألوا
( انت الكلب دا لقاك وين ؟؟! وعضاك )
كان بقول ليهم ( عضاني كلب الزيادة)
|
Post: #23
Title: Re: بهدوء جدا ضراقراطية
Author: عبدالحفيظ ابوسن
Date: 06-20-2020, 12:33 PM
Parent: #22
شكلو حدو حسن يا مولانا
ابا يمرق زاتو ياخ
|
Post: #24
Title: Re: بهدوء جدا ضراقراطية
Author: جمال ود القوز
Date: 06-20-2020, 12:45 PM
Parent: #18
يرجاك السمح يأخ ...
أمس على غير العادة
داهمني صداع كرهني العيشه
الا الصباح فكاني
يا أبو حميد عمك كان داير يعيد أمجاده بعدما الكُبر عمل عمايله
أولاده كبار ووالدين يعني عمك بي احفاده ..
وعشان يقهموهو من الفي راسه قللوا من امكانياته البحثية
ومن إنه بعد العمر ده ما حيقدر يتباحث زي الناس
وشن قدّره على هز الجميز فاتحف من تولى كبر الموضوع ده
بي واحد ميتين مدنكل وقاللو يا قليل الأدب ..
إتا البتتفاصح ده جيت كيفن ؟ ..
وحاة الله كان أكدو بي قدومي ده ما بخليهو ..
المهم ..
اتباحث وجاب جنايين في عين الغدو
وحتا قرموووو من الاسمي ده ..
حتين أسلم الروح ..
عليك الله مش ختا بصمة ..
قلت لي ما بتقيف غير تدشا .. خخخخخخخ ..
إتا بي شرايتك لكن عمك داك كان عادم نفّاخ النار
وجاب الجنيات بي جاز المصافي ..
|
Post: #25
Title: Re: بهدوء جدا ضراقراطية
Author: محمد البشرى الخضر
Date: 06-20-2020, 01:10 PM
Parent: #24
يا قريبك بمناسبة الضراقراطية دي اليوم لاقاني فيديو من كوستي النقل النهري بحمل اغاثة استضافوا الموظف المسؤول فرحان قال دي اول مرة الصنادل تشتغل من عشرة سنة!
نقول #شكرا_حمدوك ولاّ في ناس بتزعل
|
Post: #26
Title: Re: بهدوء جدا ضراقراطية
Author: عبدالحفيظ ابوسن
Date: 06-20-2020, 05:39 PM
Parent: #25
ل
حين
ميسرة
|
Post: #27
Title: Re: بهدوء جدا ضراقراطية
Author: عبدالحفيظ ابوسن
Date: 06-22-2020, 07:24 AM
Parent: #26
المتنبئ قال
وَلَيسَ يَصِحّ في الأفهامِ شيءٌ إذا احتَاجَ النّهارُ إلى دَليلِ
من الواضح بعض المحاولات البائسة لشرح كلام حميدتي بلي عنق التراث . او المحاولات التبريرية الفاشلة كما فعل قريبه
من الواضح لي ان حميدتي لا يؤمن بالديمقراطية الا مكاجرة لغيره ومكاواة وضر .
والديمقراطية ليست فعلا وقتيا بل هو سلوك دائم ومتصل . وكما قيل لابديل للديمقراطية الا بمزيد من الديمقراطة
اما ثقافة لصق ليهم وشاتهم هي لعبة دنيئة علي جسد الوطن
|
Post: #28
Title: Re: بهدوء جدا ضراقراطية
Author: عبدالحفيظ ابوسن
Date: 06-22-2020, 07:31 AM
Parent: #27
اهلنا بقولو للفعل السئ من احدهم دون تبرير بل وقد يجر ضررا علي فاعله بقولو
دة شغل ضر
مادايرين شغل ضر فما اصله ضر سيجر ضر اظرط منو
ونحن هنا نتحدث عن دولة ومؤسسات وليس امرا شخصيا بين طرفين .
ففي الوطن يقف الشرفاء صفا واحد متناسين جراحاتهم وخلافاتهم الشخصية
لن يفعلو الامر ضرا بل يفعلونه وان ضرهم وكان في مصلحة الوطن
ضرهم بحساب السياسية وخصم من رصيدهم
بعضنا لايجر بالحق خوفا علي مصلحته السياسية وبعضهم لا يهمه سوى الوطن
قوى الثورة المضادة هي قوى تغبيش الوعي ونشر غلالة سوداء امام الاعين
|
Post: #29
Title: Re: بهدوء جدا ضراقراطية
Author: HAIDER ALZAIN
Date: 06-20-2023, 02:53 PM
Parent: #28
سبحان الله
اليوم الذكرى السنوية التالتة للكلام دا..
فالتحية ليهو ولكل الغائبين عن المنبر اليوم ونتمناهم جميعاً واهاليهم بخير وعافية
وربنا يخفف مصاب الوطن في الضراقراطية التي نتنسم عبيـر ذخيرتها منذ شهرين ونيف ..
|
|