خمسمية وزير المالية

02:28 PM June, 17 2020

سودانيز اون لاين
عبدالحفيظ ابوسن-no where
مكتبتى
رابط مختصر

عبارة عن واحد كيلو جبنة
عبارة عن واحد كيلو لحمة عجالي
عبارة عن 3 اكياس سلطة لاسرة صغيرة
عبارة عن شوال سكر 5 كيلو والباقي كبريت
نص كيلو لبن بدرة لكن تتم عليهو
3 علب صلصة
خمسمية وزير المالية لدعم الاسر الفقيرة 😆😆😆
دون تحديد لعدد افراد الاسر زاتا 😆😆
خمسميتك دي لمها عليك ياخ ولا بنتسمى بيها

هو الحاصل شنو ؟


بسأل نفس سؤال عادل إمام في مسرحية الزعيم ...

====
لماذا قمنا بالثورة؟
====

Quote: عبارة عن واحد كيلو جبنة عبارة عن واحد كيلو لحمة عجالي عبارة عن 3 اكياس سلطة لاسرة صغيرة عبارة عن شوال سكر 5 كيلو والباقي كبريت نص كيلو لبن بدرة لكن تتم عليهو 3 علب صلصة

لو بتجيب الحاجات دي كلها، تكون مبروكة وما شاء الله عليها.
يا ود ابسن قاليك الخمسماية دي يستفيد منها حوالي 32 مليون سوداني (وطبعا ال8 مليون الباقين مستفيدين من زيادة الأجور).

ونسألك معاك يا عربي
يا محمد شوف الخمسمية دي بتجيب واحد كيلو
او تجيب ليك واحد كيلو لحمة عجالي بي عضم لو داير من غير عضم تخت عليها مية تاني او اكثر
والمصيبة شنو يا محمد اخوي انو زيادة الرواتب للعدد الضئيل دة جرت معاها كل الاسعار
مشيت قبيل اغير عدسة نظارة واحدة اتكسرت . وزول زبوني قال لي بي 200 ج
قلت ليهو معقولا ياخ ! يعني عدستين بي 400 والفريم بي كم والتركيب بي كم
قال لي
انتظر المعلمين زيادتهم دة الا يبكو بس
كون انو معظم المعلمين عندهم نظارات قراية
طيب
وانا ذنبي شنو الما معلم وما شغال في الحكومة . خمسمية الوزير دي ماتجيب لي نظارة

يا الحجروك عليا بتجيب نُصية

بتجيب يامنص
لكن بدون مزة
ولا عشا

يا قريبك.. وبتركّبكم الكركابة ولا أجق أجق ؟

بقشيش مقتر على فقير

اجق اجق ساي ياودو
الايام دي الكركابة لي من الخرطوم كوستي الا 8 حتي يسافر منهم واحد
الراكب 4 الف

ياريت لو كان يا نادر بقشيش
البقشيش تفضل ومنحة
للاسف دة حق
حقنا عديل بدون شك

الخمسمية لكل فرد من أفراد الاسرة حاجة زي كده والا كيف سيستفيد منها 32 مليون فرد أصلوا تعداد السودان كم نسمة.

الماهية لي رب الاسرة ويستفيد منها كل افراد الاسرة
رب الاسرة الماعندو ماهية بياخد خمسمية
انا فهمت كدة عارف
مالم يثبت العكس لي
انو اي فرد في الاسرة بياخد خمسمية

سلام ابسن

إنا غايتو عايزة خمسميتي،على شرط يجيبوها في

البيت بس لو قالوا تعالوا استلمو من وين كدا ما عارفة،

بخليها عشان خمسمية شنو كمان البتزاحمو ليها في

زمن الكورونا؟ عشان الكلام الزي حق الوزير ده نحن

ما عندنا ذاتو القناة القومية، ولا أخواتها ولا جرايد

ولا واتساب.

حبابك نعمات
لعلك واسرتك بخير وليداتك وابوهم
كلامك صاح
هي شن طعمها لامن يكوسو ليها
قيمة الحصول عليها قد يفوق قيمتها

حسب التصريحات انو الخمسميه للفرد الواحد لكم برضو مع الغلاء والعلاج والبعض يعانى من الايجار اللى بقى حاجه خياليه .
مفروض الخمسيه لكل فرد مع تامين صحى مايكون فيهو استثناء لشرائح علاج قد تكون هى الاهم وغير موجوده فى التامين اضف لذلك التشديد على مجانيه التعليم

تسلم عاصم للتوضيح
اضف الي قولي
الكشوفات وينها ومنو البحددها زاتو
خايف يجيبو لينا كشوفات النظام البائد مستلفة من ديوان الزكاة

سلامات عبدالحفيظ
تعرف قصه الكشوفات غير الكاه ناس الشئون الاجتماعيه(ولايه الخرطوم) ولا اسمها شنو . بتذكر فى 2013 /2014 كنت من الاخدوهم خدمه الزاميه من الشغل عندنا .المهم من ضمن الحاجات الكانو بطلبوها احيانا لما نجى فى التمام الاسبوعى مره ادونا استمارات دعم للاسر الفقيره ودايرين الناس تصل االاسر الفقيره فى الحى او حتى خارج الحى انا مليت استمارات فراشات عندنا ظروفهم صعبه زى عجز الاب او وفاتو وطفل عاجز او مريض فى الاسره ومشيت سلمت الاستمارات على امل انو بعد جمع الاستمارات ومعالجتها برنامج الدعم يصل ليهم عن طريق اللجان الشعبيه .لكن حتى قيام الثوره لم يصل زول يقول سلام عليكم شاى خلى من يقدمو ليهم دعم مادى او عينى.
التجربه الحاليه نتمنى انها تتطور وماتكون جزئيه فى مناطق ومناطق زى ايام الكيزان ناس يصلهم دعم الزكاه لالانهم موالين وناس تجرى لامن تحفى ماتلقى مليم

غايتو

واحد بقول لزوجته هات هات نفسي مرة
تقولي لي خد ،قالت له خد كيس الزبالة
هو للعربية بره


ما باقي الاتقولو حليل زمن بشة

من بوست علي عبد الوهاب
https://sudaneseonline.com/board/510/msg/شكرا-وزير-المالية-..-فرح-الغلابا-..-عز-يوم-ولا-بهدلة-سنة--1592236362.html

نص كلام الوزير في موقع اخبار السودان :

حدّدت الوزارة مبلغ 500‪ جنيه لكل فرد من أفراد الأسرة، وأكدت أن المبلغ يُخضع للتعديل بشكلٍ دوري وفقاً لحالة التضخم، وأوضحت أن تحويل المبلغ الإجمالي المستحق سيتم تحويله لرب كل أسرة. بحيث تحصل الأسرة المُكوّنة من 6 أفراد على مبلغ “3000” ألف جنية شهرياً.
وقال وزير المالية د. إبراهيم البدوي، بحسب بيان للوزارة أمس، إن مشروع الدعم النقدي المباشر للأسر يأتي في إطار الرؤية التنموية طويلة الأجل للحكومة الانتقالية، معلناً أن البرنامج يستفيد منه مُستقبلاً “32” مليون شخص أي ما يعادل 80% من جملة السُّكّان.

Quote: وأوضحت أن تحويل المبلغ الإجمالي المستحق سيتم تحويله لرب كل أسرة. بحيث تحصل الأسرة المُكوّنة من 6 أفراد على مبلغ “3000” ألف جنية شهرياً.

اعتقد انو حيكون عن طريق بطاقه ممغطه لكل اسره وشايف زى كان فى كلام عن مشكله فى الطاقات الممغنطه وانهم جمعو من البنولك مخزونهم من البطاقات ونبهو الى القصه عشان الناس ماتفتكر انها تابعه للبنك هذا اوذاك وانما تابعه للجهه مقدمه الدعم

حفيظ يا عمكـ ..
ما دام خمسميتو ما بتجيب حاجة معناها نخصم منها 495!!

مريت بنفس تجربتك يا عاصم مع الوزارة، الموضوع كان

كفالة مجموعة من الأيتام و الأرامل.

دعم كويس لو خمسمية لكل فرد في الأسرة لأن الأسعار

ح ترتفع أكثر خاصة لو أترفع الدعم عن الوقود و الخبز

و هو أحد شروط الإصلاح الإقتصادي التى تؤهل السودان

للإعفاء من الديون و تلقي القروض.

سلام،

طيب ... وين كده ما عارف، مش في كلام إنو الناس إستلموا في حساباتهم مبلغ 3000 جنيه؟

دي حاجة مختلفة؟

Quote: لو بتجيب الحاجات دي كلها، تكون مبروكة وما شاء الله عليها. يا ود ابسن قاليك الخمسماية دي يستفيد منها حوالي 32 مليون سوداني (وطبعا ال8 مليون الباقين مستفيدين من زيادة الأجور).

بتجيك واحدة بس من الحاجات دي (لكن لازم تتم عليها شوية)
أما لو عايز تجيب كل الحاجات دي لازم تضرب ال 500 في (عدد الحاجات + (30%))

Quote: بتجيك واحدة بس من الحاجات دي (لكن لازم تتم عليها شوية) أما لو عايز تجيب كل الحاجات دي لازم تضرب ال 500 في (عدد الحاجات + (30%))

أخي دكتور هاني، يبدو أن الوضع خطير ومقلق جدا، خاصة في ظل التأثيرات السلبية لأزمة كورونا على العالم بصفة عامة والخليج بصفة خاصة.
عادة ما تأتي الانفراجات المالية على الشعب بعد التحسن الفعلي في الاقتصاد عندما يكثر الإنتاج وثزدهر التصدير، ولكن ما تفعله الحكومة الآن يبدو أقرب إلى نظرية "سوق المواسير" منه إلى الاقتصاد الحقيقي.