Post: #2
Title: Re: حميدتي: يفتح باب تصدير الدهب لكل من يريد ت�
Author: محمود الدقم
Date: 06-17-2020, 09:57 AM
Parent: #1
ماذا يعني هذا؟
1- يعني ان كل خمسة مغتربين مثلا يؤسسو شركة تصدير دهب مقرها الخرطوم ويقوموا بتصدير كيلوا واحد او 2 كيلوا او اكتر حسب الميزانية لدبي باعتبار اسهل سوق لتصدير الدهب السوداني وجني العوائد
2- يعني ممكن لاي سوداني يستفيد من الكلام دا يباشر في تغير وضعو المالي فورا بعد الاطلاع علي ديباجة تاسيس الشركة واسس والتصدير وقانون التصدير الملحق بالشغلانة
3-علي المستوي الاقتصادي للبلد هذا الفكرة لوطبقت حتغطس حجر الدولار وينخفض الي ادني مستوي له
4-اتوقع الكيزان المسيطرين علي تجارة الدهب انهم سيتسغلون نفوذهم في المطارات والمواني والمنافذ لتكسير هذا القرار ووضع العراقل امامه وخلفه وتحته ومن فوقه
5-ربما يلجا الاجانب المقمين بالسودان من سوريين ومصريين وعراقيين وصوماليين للاستفادة من قانون تصدير الدهب السوداني وسيتم تهريب عائد الدهنب الي البنوك الاجنبية بالخارج وايصا بعض السودانيين
|
Post: #3
Title: Re: حميدتي: يفتح باب تصدير الدهب لكل من يريد ت�
Author: Hatim Alhwary
Date: 06-17-2020, 10:20 AM
Parent: #2
تحياتي اخ الدقم
غايتو بلدنا منكوبة الصراحة
نخلص من جنرال نقع في جنرال
والتاني دا كمان جنرال خلا
هل نقدر نقول انتهى عهد جنرالات الجيش وبدا عهد جنرالات الخلا ؟
|
Post: #4
Title: Re: حميدتي: يفتح باب تصدير الدهب لكل من يريد ت�
Author: محمد البشرى الخضر
Date: 06-17-2020, 10:57 AM
| Quote: - يعني ان كل خمسة مغتربين مثلا يؤسسو شركة تصدير دهب مقرها الخرطوم ويقوموا بتصدير كيلوا واحد او 2 كيلوا او اكتر حسب الميزانية |
سلام محمود
المنشور حدد اقل كمية بـ 10 كيلو أما أهم النقاط فهي توريد حصيلة الصادر مقدما و يتم اخذ الانصبة الحكومية عينا و الكلام عن التعدين الاهلي و عن المخلفات فقط
ونقطة أخرى ان الحاصل يظل في حساب المصدر لمدة شهر ويمكنه بيعه للبنك او لمورد او لبنك آخر
عموما الفكرة في احكام المنافذ و منع التهريب ومن ثم مع التزام الجميع ستحدث الوفرة التي ترفع من قيمة الجنيه بإذن الله
|
Post: #5
Title: Re: حميدتي: يفتح باب تصدير الدهب لكل من يريد ت�
Author: أيمن نواى على
Date: 06-17-2020, 01:14 PM
Parent: #4
شغل لعب عيال .. بدون دراسة و تخطيط .. أولا ينشط غسيل الاموال بصورة غير مسبوقة .. ثانيا تجارة المخدرات تمارس نشاطها بحرية تامة و السودان يصبح قبلة للتجار و يتضاعف أعدادهم .. ثالثا طباعة العملة المزورة تزاد لشراء الذهب كله يتم بالقانون عينك يا تاجر.. رابعا كل العملة المكدسة فى البيوت تجد طريقها للخارج لتفلت من المحاسبة .. الضرر الاكبر يقع على المواطن و البلد .. هذا الحل اسوء من الحل السابق .
|
Post: #6
Title: Re: حميدتي: يفتح باب تصدير الدهب لكل من يريد ت�
Author: منتصر عبد الباسط
Date: 06-17-2020, 04:21 PM
Parent: #5
| Quote: العملة المكدسة فى البيوت تجد طريقها للخارج لتفلت من المحاسبة |
موش أحسن من توظف في تجارة العملة؟
أي سياسات تؤدي لاستقرار صرف الجنيه السوداني مقابل العملات الأجنبية
ويغذي البنك المركزي بالعملة الأجنبية
سيؤدي ذلك بلا شك لوقف تجارة العملة خارج المصارف الرسمية
وتعود للبنوك عافيتها وللإقتصاد عافيته
|
Post: #7
Title: Re: حميدتي: يفتح باب تصدير الدهب لكل من يريد ت�
Author: عمر سعيد علي
Date: 06-18-2020, 06:57 AM
Parent: #6
الفرق بين المنشور القديم لسياسات الذهب والمنشور الجديد
Quote: طيب إجابات متفرقة عشان الناس تعرف الفرق بين المنشور القديم لسياسات الذهب والمنشور الجديد المجاز اليوم في اجتماع لجنة الطواريء الاقتصادية – لحكومة الثورة….
اولا في زمن الكيزان هم كانوا بحددوا سعر جرام الذهب عبر بنك السودان المركزي وطبعا بختوا ليك سعر قليل مقارنة بسعر الذهب في البورصة العالمية وبجبروك تبيع ليهم هم في بنك السودان المركزي عشان هم يربحوا، ودا كان بخلي اغلب دهب البلد مهربة لان فارق السعر كبير، تخيل الجرام كان بكون في البورصة لحدي 6000 جنيه وسعر البنك بكون 4000 جنيه، يعني زول ما انتج ولا دق حجر دقش بكسب من عرق المنتجين اكثر من الثلث بسبب منشور وسياسات.
مثلا اليوم سعر بنك السودان كان 4560 وسعر العمارة ياهو السعر الاخر كان 6700 يعني فرق في الجرام الواحد اكتر من 2000 جنيه، فبعد منشور اليوم تاني مافي سعرين، سعر واحد وبس ولا يحدد بواسطة جهة ولا إلزام وبالتالي لا سبب للتهريب، تجي تبيع بعين قوية.
ثانيا : بالنسبة لشركات معالجة الكرتة كان مسموح ليها تصدر حوالي 15٪ من إنتاجها والباقي تبيعوا لبنك السودان بسعر البنك المعلن مثل الفوق، ولشركات الامتياز كان بتصدر حوالي 70٪ والباقي تبيعه للبنك أيضا بالسعر المعلن، المهم هنا زاتو كان بكون في تهريب من إظهار الإنتاج الفعلي وبالتالي النسب ما صحيحة، حاليا تصدر اي كمية اكثر من 10 كجم فقط وفق لوائح الصادر من وزارة التجارة والجمارك والمواصفات والمقاييس وبنك السودان المركزي وحتى صغار المنتجين والمصدرين المعدنيين التقليديين اللي يملكوا اكثر من 10كجم ممكن يصدروا بالباب عديييل، ويجيبوا حصيلة الصادر وفق اللوائح برضوا.
المنشور دا اهم من كدة خلى سعر الذهب مثل سعر البورصة العالمية ومافي جهة ستفرض سعرها وتجبر المنتجين ببيع انتاجهم إليها استغلالا لسلطة الدولة.
وبنك السودان المركزي ووزارة المالية تشتري الذهب وفق سعره الجاري في السوق ليكون عندها ذهب عيني.
الشركة السودانية ستتحصل نصيب الحكومة لصالح وزارة المالية والتخطيط الاقتصادى عينا من الإنتاج وده بالتراكم بخلينا عندنا احتياطي من الذهب.
طيب دا ح يعمل لينا شنو، اولا كل انتاجنا من الذهب بكون مضبوط وبطلع بالقنوات الرسمية وثانيا الدولة بتعرف انتجت كم ولو عايزة تشتري بتخطط وفق ماعندها.
ثالثا ح نتحصل كل عوائدنا الجليلة تقريبا وما حيكون في تهريب ولو في زول هرب مع ذلك ستكون العقوبات رادعة للغاية.
أيضا سعر البورصة العالمي دا ح يخلينا نجذب كل الذهب المنتج من الدول المجاورة ومع مرور الوقت يمكننا أن يكون عندنا اكبر سوق للذهب، وبالنسبة للمواطن سيقل الضغط على الدولار لانه سيودع ذهب عينا بدلا عن الدولار لان الذهب مضمون اكثر من العملة الحرة، وحساب الودائع ده في بنك السودان لو أصبح كبير سيرفع من القيمة الشرائية للجنيه لانه سيكون مضمون في السوق لانه مسنود باحتياطات الذهب في حسابات الودائع.
بالإضافة إلى ذلك المنشور الجديد بدعم الإنتاج وبخلي المستثمرين يجوا القطاع دا جارين حفايا وبخلق فرص عمل جديدة وغيرها من الفوائد، دا اللي قدرت اتذكره من المناقشات لصياغة المنشورة
الناس كدا افتكر بيكونوا عرفوا فرحتنا بالمنشور وبالقرار التأريخي لحكومة الثورة ….
وفي الختام لأول مرة في تاريخ بلادنا انو المنتجين كلهم ادلوا برايهم وشاركوا في صياغة المنشور حتى المعدنيين التقليديين.
وشكرا
مبارك أردول
17 يونيو 2020م
|
|
Post: #8
Title: Re: حميدتي: يفتح باب تصدير الدهب لكل من يريد ت�
Author: محمود الدقم
Date: 06-18-2020, 09:52 AM
Parent: #7
شكرا للجميع سوف اعود للرد علي كل متداخل ريثما افرغ من عملي تسلموا كثيرا
|
|