حكايات مع الاصدقاء

05:41 PM June, 11 2020

سودانيز اون لاين
النعمان اسحاق -السودان
مكتبتى
رابط مختصر

الجزء الاول :-
شاءت الأقدار أن أسافر برفقة الأسرة إلي قضاء الإجازة مع ناس خالتي في مدينة الخرطوم وهناك سجلت في كورس الصف الخامس في واحدة من مدارس الحي و أتعرفت على صديق أسمو امجد ومن خلال الأيام الجمعتنا عرفت انو امجد أتولد في السعودية وعاش فيها جزء من الطفولة وفي سن المدرسة جابوه السودان , امجد كان راقي شديد في لبسو وطريقة كلامو ومستواه الأكاديمي كان ممتاز جدا لانو مهتم وما من النوع البحب اللعب والشغب , وفي يوم امجد مرض وعدا اليوم الاول والتاني وفي اليوم الثالث قررنا معاي أتنين من زملاء الكورس نمشي ليهو زيارة عشان نكفر ليهو وفعلا مشينا ودقينا الباب وجاء أخوه الأكبر منو فتح لينا ورحب بينا وطبعا امجد فرح بجيتنا وقام على حيلو سلم علينا بالأحضان وبقي يتونس معانا .
بعدها جات والدة امجد داخلة وأول ما شافتنا ملامح وشها أتغيرت فسالت امجد ديل منو ؟ فقال ليها ديل أصحابي في الكورس فقالت ليليهو أنت بتقرا مع الإشكال دي يلا امشو اطلعو برا وأوعكم تأني تجو هنا يا وسخنين يا معفنين وامجد انا بنقلو يقرا الكورس في مدرسة تانية مادام هو بقرا مع إشكال زيكم كده

الجزء الثاني
طبعا طلعنا مذلولين وواحد من زملائي قال لينا ما كنا نجي أحرجنا امجد ساي هسه , فقلنا ليهو كلامك صاح وصراحة كنا حاسين بخنقه شديد وعايزين نبكي من الإحراج لكن بارك الله في سكة كلب خلتنا نجري ونضحك وننسى الحاصل , وامجد بعديها تم نقله إلي مدرسة تانية عشان يكمل الكورس
بالموقف الحصل دا علاقتي ازداد بزملائي الاتنين وصداقتنا بي امجد ما اتاثرت بحاجة وبقينا قدر مانلقى فرصة بنمشي ليهو في مدرستو بس بعيد من الأسرة وفي كل اجازة انا بجي فيها الخرطوم بنتلاقى أنحنا الأربعة ونجدد صداقتنا واستمرينا كده لحدي الصف الثامن وبعدها توقفت زيارتنا للخرطوم وانقطعت الإخبار بينا وبقيت تأني ماعارف عنهم حاجة , وبعد سنوات طويلة كنت في الخرطوم وبالصدفة صادفت واحد فيهم وسلمنا على بعض سلام حار وقعدنا واتوسنا مسافة وسالتو من زميلنا التأني فقال لي رقمو تلفونو معاي واتصلنا بيهو بس لسؤ الحظ كان خارج ولاية الخرطوم ووعدنا انو قريب ح يجي ونلم الشمل من أول جديد
وفعلا بعد كم يوم جا ويا سلام كان لقاء جميل ولمة سمحة وجات ذكرى امجد صديقنا الأول واقترحنا نمشي ليهو زيارة في بيتم بس ترددنا في البداية لكن تاني أتوكلنا على الله ومشينا .
ودقينا الباب وجا راجل شايب في عمر الثمانين فتح لينا فسالناهو امجد موجود فقال لينا موجود أتفضلوا وفعلا أتفضلنا وجا امجد عشان يشوف الجاهو منو ,قبل مايسلم علينا وقف مسافة وعاين لينا وقعد يقول اصلو مابصدق وبقي يسلم علينا سلام بلهفة ويفك دا ويحضن دا ويضرب على كتف دا وقعد يقول لينا كبرتو والله ماشاء الله عليكم , وشوية هو جرى جوه عشان يجيب لينا واجب الضيافة

الجزء الثالث
بعد شوية جات والدة امجد الزمان طردتنا بس المرة دي جات داخلة بابتسامة وسلمت علينا سلام بطريقة راقية ومودبة وقعدت تتونس معانا وبعدها طلبت من امجد انو يعرفنا بيها فالتعارف بدا بالصديق نادر عبد الله , نادر طبعا درس كلية الطيران ومن النوع الأسبوع في السودان وشهر في دولة تانية , وبعدها تعارف شمس الدين وشمس طبعا درس اللغة الانجليزية وعشان مستواه كان ممتاز فالجامعة طلعتو بعثة في فترة الجامعة إلي دولة من الدول العربية وحاليا هو أستاذ في مدرسة مرموقة في الخرطوم
وأخيرا التعارف انتهى بي انا , بحمد الله درست نظم المعلومات وحاليا اعمل في وظيفة مسئول مركز المعلومات والتقانة في واحدة من المؤسسات الحكومية
وبعد انتهت عملية التعارف امجد سألها أنتي ديل ما أتذكرتيهم فقالت ليهو لا لا ما أتذكرتهم , قال ليها تذكري لمن كنت بقرا كورس سنة خامسة وجوني مرة أصحابي لمن مرضت عشان يكفروا لي وأنتي طرديهم من البيت .
صمتنا كلنا زى التقل لسانا أتخرس وبقينا نتلفت إلي بعض وهي سكتت ودنقرت في الواطة وشوية كده انفجرت بالبكاء الشديد بصوت عالي , وبدينا نهدا فيها شوية شوية ونهائيا ما راضية تسكت , بعد ما أخذت بكيتها جات تبوس على رأسنا وتعتذر مننا وضمت عليها التلاتة وقالت لينا أعفوا لي ي أولادي ظلمتكم وطردتكم وحرمتكم من أخوكم امجد وانحنا برضو طلع فينا لسه الجرح مختزن فقعدنا نبكي معاها.... لحظة كانت مؤثرة جدا وخصوصا بعد ماعرفنا انو امجد خلى الدارسة من هو في الثانوي ورفض يواصل فيها ومستواه الاكاديمي اتدهور بسبب انو تابع شلة ما كويسة

حاشية القصة :-
ما تحرموا أولادكم من الأصحاب عشان إشكالهم ومظهرهم أو من خلال البيئة اللي هم عايشين فيها لأنو الأيام دول والحال متغير وفي منقلب , خليكم دائما على مسافة واحدة مع أولادكم وأصحابهم وخلوا مقياسكم على أساس الأخلاق مش المظهر .


تحياتي : النعمان يعقوب

روووعة.

انت زول حكاي يا النعمان.

سلام نعمان و مرحب بيك فى حوش بكري
انداح با زول
و اوعاك تقيف

سلام كتير جلادونا
سعيد كوني بينكم وفي حوش بكري العامر
اسعدني مرورك ووضع كلمة تشجيع

فائق تقديري لك

تحياتي نعمات عماد
سلمتي على مرورك الجميل ورفع المعنويات
لكي فائق تقديري وامتناني

درس أخلاقي تربوي في منتهي الابداع.

سلام مضمخ بعبق حضورك الانيق Arif Nashed
اسعدني تعليقك واسعدني مرورك
ودي وتقديري المؤكد لك