اب سفنجة يبدع

08:52 PM June, 09 2020

سودانيز اون لاين
اخلاص عبدالرحمن المشرف-
مكتبتى
رابط مختصر

صاحبما كتب حاجة جميلة
قلنا ننزلها هنا
اختلفنا في العنوان
قالو نكتب ود المدير قلت لهم
ما ممكن اكرر مرتين ، دي ح نكتبها في النهاية
قالو نكتب اب صلعة قلت لهم يجوني المهندسين
ويحبنا الحلة بله
وبعدين صلعته دي بتزحلق الموضوع
ويا القرنتنيه يا البوليس واحد فيهم يتكسر
والقرنتنية لو انكسرت ناس الحياة البرية
بيطلعونا من امة محمد ومن البشرية ذاتها

البهارات الكثيرة دي عشان اقول انا
كتبت معه القصة

والي القصة
.
.
.
.
.

نظام تشويق وكدة
وممكن مثل قصة تعلم قيادة الطيارة
نخليها معلقة في الهواء

انا جيت اسلم و اكون اول واحد في البوست ده.

__________
ابصلع الامريكى طوالي بقي زى ترمب و فرض عقوبات علي ابصلع الكندى.
دائما الامريكان حقارين تجاه الكنديين زى المصريين تجاه السودانيين.

سليت روحكم مش؟

حكاية قرنتية كريمة ...

قالوا، والله يكفينا شر قلنا وقالوا،
في كريمة ظهرت قرنتية محنت الناس محنة
شديدة. كمّلت الجروف، وسدرت
كملت المزروع في الحيضان، وكان
في جرايد نخل مهدلات أكلتن، قش
الواطة لحستو، البروس عدمتو نفااخة
د النار، التقا عدمتها أسم الحبة
د. دز الفي بطن المطآمير برضو لحقتو.
الناس حاولوا المستحيل للقبض عليها
أو قتلها، كل المحآولآت بآءت
بالفشل... أعيان البلد عقدوا إجتماع طارئ
وقرروا إرسال برقية لشـرطة
اتبرا

وصلت البرقية وردت عليها شرطة أتبرا
بإرسال إثنين شاويشية لكريمة
نُحآف زي المساويك، قُدآم من زمن
الأردية والعمم. كل وآحد دآرع في
كتفو بندقية أبوعشرة، كان علقها في كتفو
د اليمين يميل معاها يمين
كوكان علقها في كتفو الشمال يميل معاها
شمال. يآالله شايلين روحهم
وقالين البنادق.


وصلوا كريمة مواعيد الفطور. ناس
البلد كلهم مرقوا لإستقبالهم
فوق المشرع. ركبوهم فوق الحمير وزفوهم علي المضيفة
حليل المضيفة. ( المضيفة عبارة عن غرفة
كبيرة تُبنى في مكان. منعزل غير بعيد عن
المنازل، وغالبا يبنيها ناس البلد عن طريق
النفير. وهي مأوى لكل عابر سبيل، يتفقدها
دز ناس البلد في مواعيد الطعام عسي
أن يكون لجأ إليها عابر سبيل).

بعد فاصلوهم وأخدوا خبارهم، الفطور
وصل. الجاي بملاح دمعة بقراصة ، والقراصتو
مملحة بملاح ورق، والجاي بعمود، وواحد بصحن
كبير مغطي بكبديق، ووأحد كسرتو بايته
مملحها بلسان طير. إنكسرو فوقهم ناس
البلد من كل صوب وحدب، بأصناف متعددة
من الطعام. الجماعة. أكلوا تمام ومصمصوا
أصابعينهم. بعد دآك وصل الشاى. كل وآحد
شرب تِسعي وحقبوا بنادقهم وبقو مندلين علي البحر.

الوقت منتصف النهار والسخآنة تقلي الحبة. النسوان قامن
علي(التكلة) شدّن الحِلل فوق النار. الحِلل يجقجقن، والبلد
صآآآنة. صوت الفنان الكاشف منبعث من راديو
قديم حجارته قديمة
يحاول بصعوبة أن يوصل صوت الكاشف
للسآمعين وهو يردد (حبيبي آه وقلبي
تآه يوم الزيارة). الصاجات مولعة، والقراريص
مردومة في الطُبآقة. القرية صآآآنة,
الدخآخين منبعثة من التكلة ورواكيب
العُوآسة. قطع هذا الصمت صوت حمار بدأ
ينهق، أزعج قمريتين في رأس التمرة،
طارن وركّن فوق شُدرة سنط، قوقن لفترة بسيطة وسكتن،
ثمّ عاد الهدؤ يعم المكان، وبدأ صوت المذياع يظهر
من جديد ضعيف متقطع، والنعام آدم يردد
(يقولوا لي يا مسكين عليك ظلم الحسن
وحسين، يا دآب قل نوم العين).
الجماعة مصنقرين فوق البحر والقرنتية ما منها خبر

حان موعد الغداء.
نادوها للمضيفة، وناس البلد يعجبوك، ردموا قرآريص ومِلحآت
تكفي يأجوج ومأجوج. الجماعة دفسوا تمآآآم
وشربوا الشاي، تآني
كل واحد شِرِب تسعى، وقاموا علي البحر.
الجو أصبح معتدل نوعا ما. لحظات العصاري جميلة. النيل هادئ
وساكن، لايعكر صفوه إلا مركب حوآتة تعبث
بمجاديفها خالقة فوضي
في وسط السكون الممتد يين الضفتين.
الجماعة حاقبين بنادقهم وقاعدين، البيناوِلُن سيجارة
البيناوِلُن سفة، واحد يديهم تمرآت،
ترمس، كبكبيق... الخ،
وكت الواطة بقت المِغيرِب نادوهم للشاى. شاي المُغرب طبعا
شئ أساسي في البلد، وبلبن طبيعي.
البرآريد والكبابي وقُداحة
اللقيمآت ما تديك الدرب، وكل زول يحلف
عليهم لآزم يضوقوا
شاهيهو وزلابيتو وهم طبعا أسكت كِب.
ضربوا تمآآآم وبقو مندلين علي البحر.

بدأت حالة الرباط من جديد تحت ضوء القمر
الذي أطل في تلك
الساعة من خلف النخيل جاعلاً جزء من ظلالها
ممتد علي الرمال البيضاء،
والجزء الآخر منعكس علي صفحة النهر.
القمر متسلل للأمام والظلآل. متراجعة للخلف،
والقرنتية لم تظهر بعد. حتي تناقصت الظلآل وإختفت
وأصبح القمر بلونه الفضي منعكس علي صفحة النهر،
حان موعد العشاء.
الجماعة حقبوا بنادقهم وبقوا سادرين. كمية غير عادية من الفطير
دباللبن والقرآصة بالسمن والسكر، وقرآصة التمُر كانت في إنتظارهم
ضربوا تمآآآم، وكل وآحد كتحلوا كورية لبن، ورقدوا ناموا

الصباح عيونهم فتّحن فوق براريد الشاي
وقُدآحة الزلآبية، لهطو تمآآآم
ما قصروا، وبقوا مندلين علي البحر.
ثلاثة أيام بالتمام والكمال وهم علي هذه الحالة،
والقرنتية كأنها ما وُجدت ولا خُلقت.

يوم في ساعة الغداء، البروش مفروشة
وعليها كمية من صواني الأكل
دددلاتجد كميتها في أجعص دكان عَدة في
البلد، والجماعة عرقانين وشغالين
لهط نضيييف.
واحد من ظرفاء البلد علق قائلاً: والله
يا جماعة، الأكل الأكلوهو
الجماعة ديل القرنتية زآآآتا ما أكلتو...
.
.
.
ود المدير...

اهلاً استاذ Mahjob Abdalla

شرفت البوست
ود المدير محظوظ ان تكون الاول في قصته
الامريكان شعب جميل والدليل حبهم للعدل
وديمقراطيتهم .

شكرا د. اخلاص على نقل هذا الابداع
صورة مجسدة عن شمالنا الجميل
فيلم جاهز
خفه روح أهلنا الشايقية
يا سلام أجمل ناس وأجمل بلد .. عشت ايام جميلة هناك ايام التدريس

معقول مبدع بهذه المقدرات يتم حجبه عن المنبر

شكرا كثير د. اخلاص والى المزيد
ود المدير .. وكمان ما ننسى ودجبريل

استاذنا علي عبدالوهاب عثمان ع ع ع
فعلاً اللهجة حنينة
شوف تسعي لتسعة ومندلي ( كريمي )
واجمل شئ صوت النعام ادم وجنا الوزين

انتي كان تحذفي النون والجيم

كملي لينا باقي القصة يا دكتورة

😛

اهلاً استاذ Ahmed Yassin
عوجة كبيرة
كان اب تفة اريت اب صلعة طاير كان كده

مولانا دكتور Hafiz Bashir

ننتظر العدد القادم 🌹

شكرأ إخلاص علي هذه القصة
معاوية المدير شخصية مليانة إبداع
و هو شاعر متمكن يجيد استخدام الحروف
ببراعة ... أتمني أن يعود قلمه كما كان سابقاً

معاوية المدير

شكراً كثير باشمهندس Hsmid Elsawi
ليت جميع المحتجبين يعودون

اسع تعال يا ود المدير انفي قصة السفة دي

سلام عليكم

اريتو يبقى طيب بس!

الباقي كلو هين.

ود المدير، اسمها شنو أغنية بوب مارلي ال كنت

بتجيبها في بوستاتك؟ الأغنية مهداة ليك و للضيوف و لإخلاص.

سلام عليكم
المضبفه ولا الديوان ؟؟

الحبيبة دكتورة نعمات
نقول ليه غيب وتعال تلقانا نحن يانا نحن.

شكراً علي الاهداء

اهلاً استاذ
Asim Ali
وشكراً علي الضيافة

ود المدير ما موقوف كل الحاصل حسب ما افادني به
عنده مشكلة في اللابتوب ولا يحب الكتابة من الموبايل


عذر بتاع زول ما عندو ( صلة بالتكنولوجيا )
نحاول نشوف له حل