ليست الاشياء كما تبدو

05:05 PM June, 09 2020

سودانيز اون لاين
النعمان اسحاق -السودان
مكتبتى
رابط مختصر

حكايات من السفر
الجزء الاول
مرة وانأ مسافر من كوستي للخرطوم عبر أحدة السفريات المعروفة فحصل لينا عطل للباص في منطقة المرابيع ود اللبيح التابعة لمحلية ربك فنزل السواق والمضيف عشان يشوفو العطل في الجهة الخلفية من الباص
واخذوا فترة طويلة خلتنا كلنا نزهج ونتساءل الحاصل شنو ؟
فنزلنا كلنا من الباص عشان نعرف الحاصل ولمن نزلنا لقينا السواق والمضيف شغالين يهبشو في المكنة وسألناهم مالكم يا جماعة قالوا لينا عطل في المكنة
فتدخل احد الركاب لديه خبرة في المجال عشان يساعدهم ولكن برضو مساعدتو ما نجحت
فجأة جا ولد عمرو زى 14 سنة راكب كارو وشكلو داخل منطقة المرابيع ود اللبيح فسألنا مالكم يا ناس إن شاء الله خير ؟ فنظر ليهو كل المتواجدين نظرة استغراب وماف زول رد عليهو
المهم وقف كاروتو وبقي يعاين للجماعة البصلحو في العطل مع محاولات فشلهم , نزل من الكارو وجا ناحيتهم وقال للسواق عن إذنك دقيقة بس فالسواق رفض وقال ليهو يا ولد امشي شوف شغلتك وين
فقال ليهو انا عندي خبرة في المجال دا وكنت شغال في الخرطوم في ورشة خالي والباصات دي طوالي بنصلحها وهسه انا عرفت العطل وين
طبعا الركاب بعد سمعوا الكلام دا قالوا للسواق اديهو فرصة احتمال كلامو صاح , السواق زح شوية من محلو وقال ليهو أتفضل يا سيد

الجزء التأني
صاحبنا اول حاجة عملها سال المضيف من مقاس مفاتيح معينة ف المضيف اداها ليهو وطوالي بعده دخل تحت المكنة وبدا يصلح في العطل وبقي بقول للمضيف امسك دا هنا , سوي داك , حرك دا , فك دا
يعني أسلوب معلم أسلوب معلم , وبعد 10 دقائق قام قال للسواق امشي دور بعد دا , السواق طلع الباص ودور وبحمد الله الباص دور زي الحلوة والسواق طبعا بقي شغال في الباص ابنصيات تقيله من الفرحة .
صراحة وقفنا كلنا مذهولين من الولد دا لأنو في البداية استهززنا بيهو وماف واحد مننا ممكن يتخيل انو الود دا ممكن يصلح عجلة خلى باص
والولد ذاتو استغرب فينا لمن بقين نشكر فيهو شديد وقعد يقول لينا يا جماعة دا عطل صغير ولا حاجة والله

حاشية القصة :-
دائما ليست الأشياء كما تبدو عشان كده ما نحكم على شخص من مظهرو او سنو ممكن يكون سائق كارو أو مش لابس كويس او سنو صغير لكن بفهم كويس في حاجات كتيرة
وممكن يكون لابس كويس او سنو كبير لكن ما بفهم في إي حاجة

تحياتي : النعمان يعقوب