رحلة العال الإسرائيلية العبرت المجال الجوي السوداني أمس اقلعت من بيونس آيريس

05:35 PM June, 05 2020

سودانيز اون لاين
Osman Musa-
مكتبتى
رابط مختصر

عبرت المجال الجوي السوداني أمس رحلة الركاب ely046
التابعة لشركة العال الإسرائيلية. الرحلة اقلعت من العاصمة الأرجنتينية
بيونس ايريس.
وهبطت بعد 14 ساعة طيران في مطار بن غوريون .
الآن شركة العال توفر 3 ساعات بعد خط مسارها المبروك الجديد.

كويس.. مبروك عليها.

أقلعت من مكان الزيت ذاتو يا عسمان ؟

حبيبنا عثمان .. تحياتي
ده خبر جميل
دفعوا كم دولار .. استثمار الاجواء كما بدون أي مصاريف ( ربح مضمون)
اهم شيء الدولارات عشان الكادحين

حبيبنا عثمان اهم حاجة دفعوا كم .. مستوصف في ضواحي الدنيا أهم عندي أهم من كل فلسطين

تحياتي

Quote: دفعوا كم دولار .. استثمار الاجواء كما بدون أي مصاريف ( ربح مضمون) اهم شيء الدولارات عشان الكادحين

يا استاذنا علي ماف جواب لسؤالك و البرهان لم يوضح أي تفاصيل للإتفاق

مع إسرائيل مع ان الجيروسليم بوست قالت إن الأجواء السودانية فتحت بعد

يومين من لقاء برهان و نتنياهو. وأن لجان مشتركة بين البلدين تعمل على التطبيع.

أذكر تصريحات صدرت - اعتقد من اعلام مجلس السيادة - بخصوص فتح المجال الجوي انها تتعلق بالشركات الأخرى المتجهة من وإلى اسرائيل وليس لشركة العال الاسرائيلية !
و الان اتضح انه إما كذب تلك التصريحات أو هناك مستجدات حدثت ولم يصرح احد بشأنها

اخونا محمد البشرى
سلامات
عان جاي يا ود البشرى .
اي كلام يمرق من جماعتنا اخد نصو ونص
ارميهو البحر.
لا تخدعك الدبابير والنحاس المرصرص في
بردلوبات الكاكي.
الزمن يا اخوي ما زي زمن الفريق عبود
وحسن بشير والخواص .
الدبابير والنياشين والعكاكيز والعنجاوي
واي نجمة وأي مقص ممكن تشتريهو من
مربع 6 في سوق ام دفسو .
ضحكتني لمان قلت يمكن بكذبوا .
ياخ كيف يكذبوا .
طائر العال سيد الجلد والراس دي حتكون سكتو.
يدفع ما يدفع صنفور السماء مفتوح ليه .
يا ود البشري .
دي فلوس .
ده باب سياحة جوية جديد اتفتح .
عيال الحاخامات أهل التكنلوجيا الجديدة حيطلعوا الكاميرات
ام رقبة .
والعال يحلق بمحازاة النيل الرحيم .
الكاميرات العندهم تفرز ليك الفرق بين بيض التمساح
وبيض الورل .
ده باب سياحة مهول يا ود العم .
ديك معابد وكنايس واهرامات كبوشية.
وديك تلال ابوقرينات.
في المكان ده كانت في أضخم صيدلية سموم
وادوية واعشاب يهودية في العالم .
ديك الشواديف.
في المكان ده قامت أول التجارب الزراعية .
ديك سواقي وقواديس وكناتيش ومناسج الزيداب .
هنا دي الجروف المقصودة بثومها وبصلها .
دي بلاد الاندهاش.
ولاد بمبا ما يخدعوك.
نحنا الحقيقة .
..
ده النيل .
نيلو .
ديل سكان النيل.
النايوليتي بيبول .
هنا الحمص .
هنا الزيت.

ده باب سياحة جديد .
...
بعد الانتخابات يا ود البشرى
ندخل معاهم مشاركة النص بالنص .
لي داك الوكت ليها ألف حلال
لو ما كهربتنا الكورونا.

سلامات
و خليك قريب يا د. نعمات .

الإخوان الكرام سلام
الأخ ابوالريش
الأخ محمد
والاخ علي .
شركة العال ما فرحانة بي توفير التلات ساعات طيران وبس.
شركة العال والركاب فرحانين للمرور والفرجة في النيل العظيم .
مكان الزيت نعم .
الرحلة يا شيخ علي مرت فوق جروفكن و بيوتكن في دنقلا العجوز .

Quote: يومين من لقاء برهان و نتنياهو. وأن لجان مشتركة بين البلدين تعمل على التطبيع.

الحمد لله

عال العال
ومرحب بطيران العال
يعبر أجواء السودان
هل اسرائيل حاتضم
اوتحتل سماء السودان
واجواء السودان إليها
بعد ماتحلق طائراتها
فوق سمانا
هو المحتل من اراضى السودان
شوية

Quote: هو المحتل من اراضى السودان شوية

الناس فقدت البوصلة.. نحن ما عندنا مشكلة مع إسرائيل و أتمنى الإقلاع القادم يكون من مطار الخرطوم..

السلام عليكم
وبرضو كانت طافية النور ؟

نحن لا مال لا سلاح وفي هامش ( العرب )
ولا اراضي لنا محتلة من اسرائيل .

مرحب بنتنا اخلاص
قريب العال حتنزل، مطارنا.
وقريب حتتزود من عندنا زي ما كان زمان
شركات الطيران بتتزود بي الجنجبيرة والبوفتيك
والبيرة ابوجمل.
نص الطيران كان بيشيل اكلو من الخرطوم الجميلة.
والطيران كلو كان بشيل الطشمة والفول المدمس من عندنا.
هههههها يا اخلاص
تصدقي كان عندنا رغيف قبل ما طيران الامارات
يعرف الرغيف.
وكان عندنا ما كنتوششششششش اصلية.
وبصل .
وعربات التاكسي خارج الصالة كانت نضيفة وعندها مفتش.
عمك التكاسي في مطار الخرطوم استبرس قالوا كان بيتكلم
انجليزي ويوناني .
وبين المطار ونزلة الفندق الكبير يحكي للزبون عن الثقافة.
وابدأ ما بشيل من الزبون مسحة شنب.
حقو بس.
عين مليانة وعز .
شايفة كيف ؟

أخونا بدرالدين سلام
بعدين أسعار العال معقولة
و التأشيرة بالنسبة ليك تكلفك وقفة في شباك
السفارة الأرجنتينية سبعطاشر دقيقة بس .
انت وعيالك تشوفوا بلاد ميسى.
وفي مرورك بمحازاة النيل في طريقك
للارجنتين تشوف قريتكن والشوارع والمنقة والحلال.
طبعا ما حتكون عندك كاميرات زي كاميرات عيال بنجامين.
المهم تتفسح حتي لو بي تلفون ربيكا.

أخونا علي عبدالوهاب
زي ما قلت ليك .
عبرت قصاد جروفك في دنقلا العجوز
عبرت قصاد كرمكول.
المضيفة السمحة شيبا يوسف عاينت للتاريخ تحتها.
وقالت شالوم يا جبل البركل.
شالوم.
المسلات ومدافن الملكات واضحة.
العال ما جات عبط.
ديل مجانين سياحة جوية .
اي حيدفعوا .
حيدفعوا كتير.

أخونا محمد الشيخ
سلامات
نعم من مكان الزيت .
لكن قالوا يا ود الشيخ تاني العال حترك في مطارنا .
وتتزود من مجاميعو من عندنا .
زي شركات الطيران الزمان .
عان يا ود الشيخ عندنا خال من بلدياتنا زمان كان
شغال ويتر في بار في الخرطوم اتنين .
بار محترم .
( الويتر )
يعني الجرسون اسمو حماد وكان بقولولو الحكمدار .
زول نضيف ومتعلم .
قالوا مره جا واحد قعد وقالو بلاي داير كستليتا
و اديني بيرة ابوجمل .
قام حماد قال للزبون انا ما بخدمك بي دي الطريقة.
الشراب عندنا ثقافة .
والبيرة البنعرفها اسمها البيرة ام جمل.
ما ابوجمل .
في السودان مافي حاجة اسمها ابوجمل.
ام جمل .
الزبون اعتزر اعتزر شديد.
وفي النهاية قدم للزبون اجمل خدمة .
عان يا ود الشيخ .
تخيل ؟
حماد الحكمدار أول زول يجن ويتشرد
بعد ما نميري صادر شركات صناعة الخمور
ومن ضمنها البار والمطعم الشغال فيه حماد .
حماد تشرد بعد قوانين سبتمبر .
ومات في ركن تحت شجرة نيمة قريب للبار.
ولي آخر ايامو كان بيردد . انا حماد الحكمدار
انا فخور باني قدمت خدمات لي اكبر كاتب انجليزي
زار السودان .
انا قدمت خدمات وسمعة طيبة للوطن.
انا لم ارتشي في حياتي ولم اسرق .

أخونا ابوالريش
سلامات
تفكير اقتصادي شديد من شركة العال ومن
وزارة السياحة .
شعب يعرف كيف يجيب القروش .

طيارة فى رحلة مدنية .. فلتعبر، حتى لو عطشت أو عطش ركابا التنزل!
هى لو عبرت بدون إذن فى زول بيعترضا .. الروسية دخلت وضربت
الإذاعة ومشت تتقدل فى السما مرتاحة .. زول مافى قال ليها عينك
فى راسك وللا جيتى بالنهار كنا مقيليين ومعسلين تعسيلة الضهرية
وللا الشمس فاقعة فى عيونا ما قدرنا الدفاع بالنظر!

أخونا الفنان نادر الفضلى
سلامات
سلامات يا صاحب المداخلات الشاعرة .
اذكر مداخلاتك في بوست نفق كولومبيا .
وأذكر كيف الناس كانت بتسالني عن نادر
الكتاب .
انت زول فنان بتعرف توجهات البوست
والقصد منها شنو .
وأذكر واحد من الشباب المتابعين ناقشني في
كيف نادر جدع ليك فيديو ويز خليفة
في الوقت المناسب في البوست .
علي كل حال ابشرك بالخبر
الأكيد عن انو البطانة اترشت بي
عطر مضيفات العال .
وعن قريب حتشوفهن قاطعات
جسر توتي.
..
تحياتي وخليك قريب

Quote: يعني الجرسون اسمو حماد وكان بقولولو الحكمدار . زول نضيف ومتعلم . قالوا مره جا واحد قعد وقالو بلاي داير كستليتا و اديني بيرة ابوجمل . قام حماد قال للزبون انا ما بخدمك بي دي الطريقة. الشراب عندنا ثقافة . والبيرة البنعرفها اسمها البيرة ام جمل. ما ابوجمل . في السودان مافي حاجة اسمها ابوجمل. ام جمل . الزبون اعتزر اعتزر شديد. وفي النهاية قدم للزبون اجمل خدمة

عصمان
حماد ثقافته ثقافة بارات ساي
البيره اسمها الرسمي
بيره ابوجمل Camel Beer
ام جمل دي ما البيره البنعرفها ده اسم سلانق ساي ...

حماد شكلو كان شغال في السلمابي؟

أخونا قبة سلامات
ياخ مشكور علي المرور الكريم .
في سنة 1985 رحل عمنا حماد الحكمدار بعد سنتين من تطبيق
قوانين سبتمبر .
كان حزين علي تغيير القوانين ورحيل وكالة شركة بيرة كازبلانكا المغربية .
ووكالة شركة البيرة القبرصية.
زي ما كان بيردد في ركن نقاشو العاملو تحت النيمة.
يا سلام علي ديك أيام .
كانت ايام استقامة .
وكان كل إنسان بقوم بالواجب في مجالو .