عودة المغتربين والمهاجرين للسودان الآن احسن . ودي أمثلة .

11:08 AM June, 04 2020

سودانيز اون لاين
Osman Musa-
مكتبتى
رابط مختصر

حتتعبوا في البداية .
وتتشلهتوا شلهتة ألسنين.
وممكن ما تحصلوا حتي حق التمباك .
واي واحدة وأي واحد فيكم حيصر
جبهتو .
ويمد قدومو .
ويتململ.
ويزهج.
ويطلع يحرقلو لستكين ويرجع.
لكن يا جماعة بالجد الصورة وردية .
و حلم المستقبل الحقيقي في السودان حيلوح ليكم .
وهاكم أمثلة كتيرة لمغتربين عادوا
من الاغتراب والهجرة ونجحوا .

واصل بدون فواصل يا عثمان
معاك قلبا وقالبا

ادينا تجارب ناجحة ومجدية
خلينا من البهدلة وحرق اللساتك اللي فعلا لابد منه

في اطار التجهيز للعودة النهائية مع خفقان ليه ستة شهور وتعرق مستمر كلما جات السيرة


اشواقي ياخ

أخونا محمد ابوزيد
سلامات
عان جاي .
كرب عفشك في عربيتك.
حتكون محتاج لي حديدة .
صدقني الخير باسط مهما طال صف الرغيف.
وريالات الغربة كلها ما بتساوي بقة واحدة من لبن ضان السودان.
تعال ساكت .
تحياتي يا عزيز .

عسمان إنتا الأمثلة دي عايز تجيبها بالصور ولا شنو ؟! :)
ماااتيلا !

انتظر لغاية ما الكرونا تنتهي وبعدين ناشد المغتربين والمهاجرين بالعودة ..لانهم اذا رجعوا الآن فكل واحد
فيهم حيجيب معاه بليون فيروس كرونا....
وطبعا انت سمعت براك أن الكرونا ما حتنتهي قبل سنتين ...

أخونا أستاذ وليد سلامات
عليك الله عندك لحمة في اهلنا الرباطاب؟
يمين جاياك امثلة تكيفك.
وتفرحك.
صدقني النيل الرحيم الممدد ما حيخذلك.
صدقني يا وليد حتلقاو يشيل ويكبليك في
شوالاتك.
وجيوبك.
حتلقاو يشتت لي عيالك المطر
والشوكولاتة والنبق.
ده نيل ما رهاب.
ده هنا مكان الزيت.
اركب وتعال .

احلام العودة تحدونا
ولكن ليست الان فما زلنا نحلم
بوطن حدادي مدادي مترف العيش والرغيف
خالي الوفاق من صفوف وأزمات وهموم
معدوم الرشوات والغمتات واتفاقات تحت الطاولة..
فاضي مليشيات مرتزقة وجيوش عاطلة وشرطة تضرب المواطن..
وطن حر عادل مسالم تاتيه مريضا فتعافي وفقيرا فتغني وميتا فتحيا..
أما الان وبكل صدق، الغربة أفضل لنا، والعلاج أقرب لنا من جبل الوريد

كلو كوم ودا

Quote: والعلاج أقرب لنا من جبل الوريد

كوم برا.

أخونا المحترم مولانا محمد طه الملك
سلامات
البلاد محتاجة لسيادة القانون وانتو أهل القانون البتقوم عليه النهضة.
عشان كدي عودتك مهمة.
الليلة سامع د. حمدوك في مقابلة في قناة النيل الأزرق بقول
السودان حيرجع الشركات البتصنع الادوية زي زمان .
يعني حترجع الشركات السويسرية الكانت في السودان. بجانب الشركات الوطنية.
وقال لازم ننجح .

أخونا محمد ابوزيد
جيتك
هاك تجربة الشاب ده .
وهو واحد من كتيرين ربنا سهل ليهم العودة .
شاب من قبيلة البزعة من كردفان .
عمرو الآن 28 سنة .
ترك المدرسة من السنة التانية ثانوي .
واشتغل في جمع حب البطيخ للتجار البسافروا مصر.
اشتغل عشان يدفع مصاريف معايش اخوانو الصغار
في المدارس وعلاج الوالد المريض .
..
الشاب ده لمان عمرو كان 23 سنة سافر السعودية عمرة .
قعد شغال في السعودية و ماقدر يشتري إقامة .
اشتغل راعي شوية في مناطق قريبة من المدينة المنورة .
صاحب الجمال الكان شغال معاو لقاهو زول أمين و هميم .
ويعرف الكتابة والحساب .
وعرض عليه يشتغل معاو في دكان كبير يبيع الاسمنت بالجملة.
والشاب ما عندو إقامة .
وافق .
وصبر 3 سنة وأربعة شهور بدون إقامة .
الشاب اشتاق للوالدة وفكر في الزواج .
وطلب من السعودي الطيب انو يسمحلو يرجع
السودان . بعد تحانيس السعودي وافق.
الشاب لاحدي ما وصل سوق ليبيا كان في شنطتو
مبلغ 87 ألف ريال .
هو جمع في التلاتة سنة وأربعة شهور 70 ألف ريال
والسعودي الكريم اداهو 15 ألف واين السعودي اداهو
خمشة المهم لملم لحافو وركب الباخرة .
وصل سوق ليبيا وفي جيبو 87 ألف ريال،
..
شوية وأتم ليك حكاية عودة الشاب البزعي. ونجاحو العجيب.

أخونا محمد ابوزيد
اتمليك حكاية عودة الشاب البزعي .
وصل سوق ليبيا وطوالي سافر اهلو تالت يوم .
في سنة 2019 صادفت عودتو مع بداية الخريف .
زولنا آخر الزواج شوية.
والخريف السنة الفاتت كان سمح جد في أرض
البزعة الخصبة .
بقولوا أنها من اخصب مناطق الزراعة في البلد.
وبدون تردد الشاب دخل في الزراعة.
دفق فيها 70 ألف ريال متوكل علي الكريم .
70 الف ريال حيلتو كلها شكاها سمسم النجيض.
هيع .
دعوات امو ما خابت .
السمسم سألت سنابلو دهب .
في كل سنبلة 70 ريال . وضرب علي كدا .
الشاب قبل ما يلملم سمسمو جاهو تاجر سوري
شغال في تصدير السمسم لتركيا قبضو كاش
320 الف ريال سعودي .
الشاب البزعي اتزوج وعطر الطلح ضرب البراري .
..
ما قلت ليك يا محمد النيل الرحيم بدي المطر والبسكويت .
اها شن قولك ؟

صدقوني قرار العودة أصعب من قرار المغادرة ليس لاي شخص طبعاً
لكن للمهاجرين ال عندهم أبناء في المتوسط و الثانوي و الجامعة
لان العودة بهم بتلخبط منهجهم التعليمي . و تركهم في بلاد الهجرة و العودة بدونهم جريمة في حقهم
و أعدادهم كبيرة.
الغريبة الجيل الراكب راس دة أقصد الجيل الثاني من المهاجرين حماسهم أكبر للعودة
من الجيل الأول. و هم ينظرون الي أخوانهم في السودان بنظرة اعجاب و فخر
و قد شاهدناهم في المظاهرات في المنافي يتضامنون مع اخوانهم في المظاهرات
..... تعرف يا أحمد موسي الموضوع معقد خلاس و ظروف كل اسرة
تختلف من التانية.
شكراً للبوست

نعم ظروف المهاجرين والمغتربين تختلف .
لكن كمان يا جماعة شروط بلاد الاغتراب أصبحت صعبة
وفي تشدد .
ومستقبل الاغتراب مجهول .
الموضوع جد محتاج قرار .
التفكير في العودة في خلال السنتين القادمات احسن .
ولابد من التمهيد من الآن بكل الطرق.

أخونا عمر التاج سلامات
من بيان الترابي البشير الأول الناس مرقت من البلد
وكأنها مرقت عبر مطار الخرطوم في فد فلايت .
الناس اتفرزعت في ليل والما اتفرزعوا يا في بيوت الاشباح
يا ساكين السفر .
30 سنة من الفرزعة.
30 سنة بي جاي ناس، علي كرتي عملوا فيها .
في ال 30 سنة دي فيهم واحد سجل لي نفسو مليون
فدان في الحوض النوبي.
قايل نفسو ما حيموت .
لكن الاسبوع الفات مات عليه الرحمة بي كورونا.
قلت ليك لابد من العودة يازول .
البلاد ما حتتعمر إلا بعودة اهلها .
الخراب حصل بعد الكسحة الجماعية.
والعمار بيرجع بعد العودة الجماعية .
دحين اجدع الفي يدك وتعال .
كان للعلاج القرض راقد .
وبيجي الخريف واللواري ما حتقيف.
والتيراب مصرور .
السودان جنة واهلو ما عارفين .

تحياتي للجميع

وزي ما قال اخونا الصاوي قرار العودة أصعب لأسباب

عن تجربة من السعودية ...
كل او غالبية المغتربين نزلوا اولادهم السودان للقرارات والرسوم اللي فرضت من قبل سنتين تلاتة
يبقى تختلف الحالة حسب الشخص وظروفه
بتلقى كمية قنعوا بعد نزلوا اولادهم ومتخوفين من النزلة لأسباب اهمها الوضع الاقتصادي في السودان صعب والحياة غالية وبيفكر الف مرة
من وين لو نزل حيوفر متطلبات حياة كريمة لأسرته
الكتير فارق المجتمع والسوق بالسنين وعشان يتأقلم عايز فترة وناسنا بيخافوا على راسمالهم
حتى في الغربة ما عندهم المجازفة
الواحد افضل ليه راتب مضمون يجيه آخر الشهر من يجازف في تجارة

على المستوى الشخصي ارى ان البلد مستقبلها ممتاز بعد الكورونا دي ومحتاجة مخيخ ورويس مال تبدأ مشروع وتتقدم
مع الاستقرار الامني طبعاً وعودة العسكر الى ثكناتهم

مودتي يا عصمان

https://top4top.io/

يا عثمان
انا بعرف حاجة واحدة بس الديمقراطية والانتخابات وخيارات الشعب هي بالتجلب الاستقرار للسودان وبرنامج واضح ذى بتاع الحركة الشعببية ووشاركت في انتخابات 2010 المضروبة عشات ما اموت ميتة جاهلية ما احضر لي انتخابات زي الناس
ما بعرف حمدوك ولي حميدتي
اذ1ا ما زحت مصر والامارات والسعودية وقطر وتركيا والاستقمارات المشينة لي الدول الدي الحارسنها ليها بعاعيت مايو وجنرلات الكرونة لا مستقبل للسودان اطلاقا
وحمدوك قعد سنة كاملة يلف في الدول المانافعة دي والمحصلة صفر
وطبعا برنامجي واضح ترحع الاقاليم والحكم الاقليمي برحع السودان واقعد في اقليمي ويزحو ناس المركز ديل من راسنا بي الانتخابات بس
حاكم اقليم برلمان اقليم دي اول خطوة في اتحاه استقرار السودان غير كده
الخواء المزخرف هذا ما يباع للشعب السوداني هذه الايام من سماسرة السياسة والمشروع الاقليمي الدولي المشبوه
والواضح ما فاضح
وحتي اعلام ق ح ت محبط ويطمم البطن

أخونا محمد ابوزيد
سلامات
الأحلام شكلها قربت تتحقق