Post: #1
Title: أوعاك تخافي ...
Author: إدريس محمد إبراهيم
Date: 05-31-2020, 01:24 PM
Parent: #0
01:24 PM May, 31 2020 سودانيز اون لاين
إدريس محمد إبراهيم-السعوديه - الرياض
مكتبتى
رابط مختصر
اوعاك تخافي ...
إنت يا نور السما ....
رايعه يا مزن الفيافي ....
أوعاكي يوم ....
تنساقي للخوف الوهم ...
وتشيلي هم ....
يا روحي يا نبض القوافي ....
أوعاك تخافي ....
*****
أنا ما حفظتك في القلب ....
في الجوّه في الأعماق أمل ...
في فلذة الروح والحوافي ....
في نشوة الوجدان شذى ....
بين شهقة الحس الوريد ....
ينتح يضخ ....
لكنو في جواهو دافي ....
أوعاك تخافي ....
****
أنا كم بكيت طول العمر ....
أنا يامه جربت السهر ....
ضقت القهر ...
ظلم القرايب والأسى ....
ذبحوني في عز النهار ....
ساموني ويل ... أصلوني نار ....
وزرفت ويلات الدموع من حرقتي ...
شرقت دميعاتي الحزاني ...
يا ويلك إنتي ودمعتي ....
يبست مع الحس العطش ...حرقت حشاك ....
من غيرك إنت بحسها .... ومنو البلاك ....
كان لي روضة من الجمال ....
إحساس خرافي ....
أوعاك تخافي ...
.
****
وشربت ماء ....
زي الزلال في الجوف بينزل ...
بيرطب الجرح المنوسر يندمل ....
يبقالي مافي ....
ماكنتي زي ضحكة عيون ...
كنتيلي شركا للفرح ....
كنتيلي كون ...
كنتيلي زولاً عمرو ما عرف الأنا ....
سقتيني زي طفلاً صغير ...
من هوة الحزن السحيق ....
للدنيا للتيه والهنا ....
وبقيت أنا ....
صادفت في عينيك شذى ...
وهج البراءات والسنا ....
كنتي الحقيقة الناصعه يا سر البقاء ....
يا دوحه في ظل الهجير ....
خلتني أعرض وانتشي ....
زي مافي شي ....
درويش مسك درب البراقع والسبح ...
طربان وحافي .....
أوعاكي في يوم ننتكس نرجع ورا ....
لي دنية الناس التجرح في الورى .....
بخشى المفرهد فينا في يوم يبتأس .... يصبح سراب ....
نشفان وجافي ....
أوعاك تخافي من الفرح ....
من قلبي شاف العافي فيك ...
وكأنو ما يوم انجرح ....
من زخة المطر البيرسم قوس قزح ...
من زفة السعد الخرافي .....
أوعاك تخافي .....
إدريس محمد إبراهيم
|
Post: #2
Title: Re: أوعاك تخافي ...
Author: إدريس محمد إبراهيم
Date: 06-02-2020, 12:24 PM
Parent: #1
|
Post: #3
Title: Re: أوعاك تخافي ...
Author: ابو جهينة
Date: 06-02-2020, 04:38 PM
Parent: #2
درويش مسك درب البراقع والسبح ...
طربان وحافي .....
أوعاكي في يوم ننتكس نرجع ورا ....
لي دنية الناس التجرح في الورى .....
يا سلام يا ادريس
لا فض فوك
مع خالص تحياتي
|
Post: #4
Title: Re: أوعاك تخافي ...
Author: إدريس محمد إبراهيم
Date: 06-03-2020, 11:54 AM
Quote: درويش مسك درب البراقع والسبح ...
طربان وحافي .....
أوعاكي في يوم ننتكس نرجع ورا ....
لي دنية الناس التجرح في الورى .....
يا سلام يا ادريس
لا فض فوك
مع خالص تحياتي |
مشكور كتيرأخوي جلال للمروروالمؤازره ... وأن شاءالله تسلم يا حبيب ....
مع فائق شكري وتقديري ؛؛؛
|
|