حزب الثورة ...

02:56 PM May, 29 2020

سودانيز اون لاين
HAIDER ALZAIN-
مكتبتى
رابط مختصر

في إنتظار بيـان الإعلان والنظام السياسي ..!

استباقاً للمؤتمر الصحفي ونسبة لوجود أخوة مقدرين من المؤسسين لهذا الحزب أعضاء هنا بالمنبر العام ..
فبنقدم الدعوة بعد ذاك لفتح نافذة للحوار هنا ايضاً عبر المنبر العام وعدم الإكتفاء بالفيسبوكات والوسائط الاخرى ..
عارف ومقدر انه المنبر العام لسودانيزاونلاين حار وما بينقدر وبيدفع الكتير من النخبة والمستنخبين للهروب ..
لكنه مجرد عشم..!

وقنطرة :) ..

من بعض المؤسسين اعضاء المنبر - بدون القاب - قريت ..

بشرى الفاضل
محمد ابراهيم علي
نجلا سيد احمد
الباقر موسى
الطيب مصطفى
عبدالله الشقليني
اسامة محمد خليفة
صبري الشريف
تماضر شيخ الدين


ديل العرفتهم إذا كان البيان المنسوب لي الا جعفر عبدالمطلب صحيح وحقيقي ..!

ديل ناس منبر سونا ياحيدر ؟
تحياتى

الله يهديك يا شيخ صديق ..

هلا حيدر
بشرى الفاضل في الفيس يدير حوارا معطوبا
وشديد الملل ومتناقض وهروبي للامام
ودائري بصورة تدعو للرثاء
...........
رائي الشخصي ان الحزب دا بطريقتو المطروحة لن يمشي لللامام
سيكون حزب اسفيري زي حزب الخضر بتاع تبارك وامنة
وزي حزب عثمان مرغني الصحفي الزمان داك
وزي حزب الليبراليين بتاع عادل عبدالعاطي او الدكتورة سوار الذهب
.......
فكرة عميقة شديد ونلاين يا حيدر

مرحبتين وسلامات الأخ عبدالمنعم..

قلنا ننتظر آعلانهم شايف جاء صبري الشريف عمل إعلان زي دعاية احلاوة سعيد بتاع التلاتة مصريات ..

Quote: بشرى الفاضل في الفيس يدير حوارا معطوبا وشديد الملل ومتناقض وهروبي للامام ودائري بصورة تدعو للرثاء

قريت جزء من كلام بشرى الفاضل بيبرر فيهوم لماذا هنالك حوجة لقيام حزب .. اقتنعت بوجهة نظروا مبدئياً
وببنتظر نشوف الحزب المُبرر دا ..
ننتظر أصلاً ما ورانا شيء..

عشان يعملو شنو

https://top4top.io/

عاش ابو هاشم

دي اكبر وانظف قوة ديمقراطية ضاربة ان شاء الله بعد تنتهي حيطة الجالوص ق ح ت
والمرجعية الحكم الاقليمي للامركزي ودستور 1974

سلام يا حيدر
من الله خلقنا ما شفنا لينا حزب ببنوه في الهوا وينزلوه ارض الواقع ... دي واحد
اتنين الناس ديل " واقصد المؤسسين " ياتو وحي نزل عليهم قال نظمو الشباب ديل
الثوار الانجزوا الثورة انا لاقيتهم شوف العين
شباب صعبين خلاص ما بتنظموا .. سمو نفسهم الجيل الراكب راس ..
ولو في اتنين تلاتة قالوا ليكم وافقنا .. اعرفوهم فلول عايزين يضربو لجان المقاومة
مافي حزب بقدر عليهم .. لا جن لا سحره يقدرو يقتفوا دربهم ..
شايف اللستة المؤسسة سبعين في المية من خارج السودان .. حاجة غريبة
لا حضروا ثورة لا حرقو لستك لا شمو بمبان ..
بس كده عايزين يجو يركبو
لذا فانا بقول ليهم مشروعكم مطرشق مطرشق ..
معظم اللستة فنانين وشعرا ورسامين .. وده الحايجيب ليهم الفشل
لانو هم ما ناقصين .. شباب الثورة فنانين غنو وابتدعو اجمل الاهازيج الثورية
ورسامين زينوا جدران البيوت والمؤسسات المدنية والعسكرية باجمل وابهى الرسومات
ماليا دعموا الثورة بي اجمل شعار خلقتو ثورة في العالم :
( عندك خت .. ما عندك شيل )
على اي حال المؤسسين فيهم كتير من الاصدقاء
وبدون ما يزعلوا اقول ليهم :
مشروعكم فاشل فاشل .. ساعدوا الشباب ديل بالسكات واقعدو في الضل

تحياتي

Quote: من بعض المؤسسين اعضاء المنبر - بدون القاب - قريت .. بشرى الفاضل محمد ابراهيم علي نجلا سيد احمد الباقر موسى الطيب مصطفى عبدالله الشقليني اسامة محمد خليفة صبري الشريف تماضر شيخ الدين

(محمد ابراهيم علي ) ده مش انا شخص آخر اسمه مشابه لاسمي
لست عضوا في هذا الحزب واتمنى لهم التوفيق

نحن الناس البتخضم دي بنحاول نقدم ليهم دورس مجانية في (الواقعية السياسية )
اخر انتخابات في السودان 1986 ده حجم الجميع
يا ود الزين

Quote: فى أنتخابات 1986 م وهى انتخابات شهد المجتمع الدولى والإقليمى والمحلى بنزاهتها وشفافيتها كانت النتائج النهائية كالآتى.. 1/حزب الأمة القومى الجديد برئاسة السيد الصادق المهدى(101)واحد ومائة مقعد. 2/الحزب الاتحادى الديمقراطي بزعامة مولانا محمد عثمان الميرغنى (63)ثلاثة وستون مقعداً 3/الجبهة الإسلامية القومية بزعامة الشيخ الدكتور حسن عبدالله الترابي (51) واحد وخمسون مقعداً 4/الحزب القومى السودانى برئاسة المرحوم الأب فليب عباس غبوش (7)سبعة مقاعد red]5/الحزب الشيوعي السودانى برئاسة الأستاذ المرحوم محمد إبراهيم نقد (3)ثلاثة مقاعد فقط. 6/حزب البعث العربي الاشتراكي برئاسة الرفيق بدرالدين مدثر (صفر) 7/حزب البعث العربي الاشتراكى..جناح سوريا(صفر) 8/الحزب العربي الاشتراكى الناصري برئاسة الأستاذ ساطع الحاج(صفر) الناس ديل ما مشكلتم الشعب بنتخب الكيزان المشكلة لحدي هسة في ناصريين وبعثيين في السودان ليه ؟؟ 1- المحكمة الدستورية والاعلام الحر والمسؤل وانتخابات قوة المقعد الدائرة الواحدة كاف لتصحيح خيارات الناس الانتخابية لو المشكلة وعي يا ناس الغزالة الفوق في السلم ق حت او بعاعيت مايو 1969

هل ديل كلهم وناس ق ح ت 2020
اكثر من الختمية والحركة الشعبية الاصل ؟؟
كل ناس حزب الامة في الهامش عندهم خيارين
اما الختمية او الحركة الشعبية الاصل
دي اسما الواقعية السياسية

هي الثورة أنجزت و انتهت..
الا قصدهم الثورة المضادة العايزة ليها حزب
أو يقوموا يغيروا الاسم ل(حزب ما بعد الثورة) ..

محمد إبراهيم علي المعانا هنا دا ما معاهم..

البقيـة للآن غير صبري الشريف مافي زول إعترف بعمليتو :)

سلام حيدر و ضيوفك

Quote: الطيب مصطفى

الطيب مصطفى؟ الخال الرئاسي؟

انا اعتقد ان مرحلة اطلاق الاحزاب الجديدة لم تات بعد اذ يفترض ان نصل لعملية السلام ومن ثم نعمل معا للمرحلة السياسية باسس وشروط قانونية تستلهم رؤية جديدة تلغى الماضى الذى ساعد فى تهيئة الانقلابات العسكرية وتاتى بجديد يستوعب كل ما هو جديد وان يكون سودانى مائة بالمائة من واقعنا المحلى والوطنى حتى المسميات القديمة التى ترتبط باحزاب خارجية وافكار اخرى تتغير الى اسماء سودانية محلية ولا مانع من ان تحمل افكارها بشرط المسمى يكون سودانى ..
.بالنسبة لحزب الثورة تم طرح هذه الفكرة على الفيس بووك من منسوبى حزب كبير وسرعان ما تم تغيير الفكرة والانسحاب منها يبدو ان التسرع وعدم الرؤية الواضحة جعلتهم يتركونها ليتلقفها اخرون منهم الاستاذ الفاتح جبرا واخرون ولكن كما قلت ان مرحلة انشاء الاحزاب لم تات لان القانون الذى يتم بموجبه تنظيم العمل السياسى مربوط بقوانيين ونظم اخرى تاتى بعد عملية السلام وسوف اواصل معكم هنا لنكتب اكثر

تحية طيبة للجميع

من حق الناس تؤسس احزاب
المحك في النجاح والفشل الجماهير
حقيقة الدعوة قديمة
نشات ابان اعتصام اولاد وبنات زي الورد
قبل ان تمتد يد الغدر والخيانة من المجلس العسكري الانقلابي ومليشبات الدعم السريع
وداخل كل هذه المؤسسات العسكرية الكيزان .


التجربة يتحدث افضل مني في هذا المنحي المؤسسون والمؤسسات في الحزب
من القائمة انذاك
146 اسم
70 اسم يا خالد العبيد داخل الوطن

الحزب ان لم تكن قيادته وعضويته داخل السودان لا ينجح
والتجريب الفاشل ما حبابو

الاسماء المؤسسة حسب معرفتي ليس بها كوز او كوزة
او انتهازي او انتهازية

لك الشكر يا حيدر

زمن طويل من الناس الجميلة

التحايا للجميع
اشتاق اليكم

عجبني كلام صبري الشريف الوحيد الاعترف بعملتو :)
وجاييك لحزب الثورة ده

حبيبنا صبري الشريـف .. التحية والأشواق ياصديق ..

مرحب بيـك بالعودة للمنبر ..

ونتمنى ليكم التوفيق في مسعى الحرية والسلام والعدالة..


الاعلان اتحدد متين؟

وهل ساهمت المجموعة دي او الحزب بأي اوراق في مفاوضات السلام الحالية ؟

تحياتي

الاسم الذى اختاروه فيه اقصاء للاخرين والذين اطلقوه كان فى حلمهم ورثة الثورة بكاملها وفقا لحملة اطلقوها بالانترنت حاولت نشر الكراهية ضد اشخاص واحزاب اخرى شاركت فى الثورة وهى احزاب منافسة لهم ولها جماهيرها المعروفة ولها تاريخ معروف ...
والذى يفكر بهذا المستوى لا شك انهينطلق من فكر وراى ضيق وافق سطحى جعله يعاتقد ان نشر الكراهية والشتائم ي يخيف الاخرين خاصة اذا تمت تلك الاساليب بالمزاودة بالثورية فاطلقوا هذا الاسم المسروق من الوقع ليحتكروه لانفسهم ظنا منهم ان الامر يمكن ان ينطلى على الشعب الواعى ..
واعتقادا منهم بانه شعب يمكن تسييره من الفيس بووك ..
الا ان التراجع والتبرؤ من الاسم الابتعاد عنه تم فجاة ...قيل انه تم بعد مراجعة للواقع وهذا حسن ان كان هناك من يراجع ويتراجع الا ان ما يستغرب له ان يبادر اخرون لتبنى ابن الحرام الذى لا يعرفون من هو اباه اعتقادا منهم بان الاسم كفيل بان يجلب لهم شباب السودان الذى ثار واستطاع ان يغير الواقع بثوريته وهذه فرصة للخم .
اعتقد ان الحزب لا يكون او لاينشا بالرومانسية والاساليب الفهلوية
اواصل

شكرا جزيلا
تعرف مطروحة عدة رؤي لاسم الحزب
وليس فيه فهلوة ولا غش
حتي ان اختير اسم حزب الثورة
هل هذا الاسم غير متاح لاهل الثورة ؟

لك التحية والتقدير الكيك
وودهة نظرك ممكن تطرح من غير اشارات ما كويسه
بيننا المحبه

سلامات


مرحب وحبابك الكيك ...

سلامات

Quote: الطيب مصطفى؟ الخال الرئاسي؟

لا ما قدر دا كمان :)
بيكون اسم ساي

واعود لحكاية سرقة اسم الثورة وهذه عادة عربية اذ يقوم الانقلاب ويحاول تغطيته باسم الثورة وعندما اتى نظام عبود كمثال غلف نظامه باسم الثورة المباركة ..واراد ان يخلدها بان غير اسم مدينة المهدية بامدرمان الى اسم الثورة كما انشا صحيفة اطلق عليها اسم الثورة ظنا منه انه احتكر الحقيقة ولكن ماذا حدث لم تجد اى حظ تنافسى مع الصحف الاخرى وكانت تباع باقل من اسعار الصحف الاخرى لان القارىء ذكى يعرف القصد تماما وفى سورية انشا نظام حافظ الاسد بعد الانقلاب صحيفة الثورة وهى صحيفة ضعيفة تنظق باسم الحزب الواحد والراى الواحد وفى اليمن ودول اخرى قامت فيها انقلابات تمت سرقة الاسم لاحزاب واسماء صحف ومواقع ومدن سميت باسم الثورة اسلوب غبى فى التفكير ونفس هؤلاء يعودون فى ظل ثورة شعبية تطالب بالحريةو والديمقراطية العودة بنا الى نفس الاسلوب العربى القديم وسرقة الاسم الرنان اسم الثورة سرقة لسان لا سرقة فهم وثورية وشجاعة ونزاهة وعدالة وسلام ..نتواصل

انقلاب مايو كان انقلابا كامل الدسم على نظام ديمقراطى مثله مثل انقلاب الانقاذ ورغم بجاحته فى ايامه الاولى الا ان كلمة ثورة مايو كانت اكثر الكلمات التى كنا نكرهها فى تلك الايام واذكر ان اول احتفال بعيد الثورة كما كانوا يطلقون كانوا يستعجلون تنفيذ الشعارات الجوفاء والتى بسببها تردى الوضع فى السودان ووصلنا الى مستوى الدول الاقل نموا وفى نهاية النظام وصلنا الى المجاعة التى انقذتنا منها ثورة شعبية اذ انتفض الشعب السودانى من مايوهات مايو اى السياسات المتعددة للثوار الصعاليك الذين بداوا بالتاميم وحل الرجعية والادارة الاهلية وانتهوا بالتحالف مع الاخوان المسلمين حتى وصلنا للمجاعة بعد تطبيق شرع الله كما كانوا يدعون .
قبل انقلاب مايو كانت الخرطوم من انظف عواصم العالم ولا يشبهها الا دبى الحالية فى كل المستويات الاقتصادية والاجتماعية والثقافية بل تفوقت الخرطوم ومستوى رفاهية الشعب السودانى وقتها عن شعوب اوربية كثيرة هذا لن يصدقه شخص تعايش مع الانقاذ ولا احد يسال من السبب انها الثورية اللعيننة التى قادتنا للتخلف والحروب وعادت بنا الى القبلية والحروب الاهلية ونبعت الجهوية من جديد بعد ان كادت تندثر .
اذكر عندما رفع ثوار مايو شعار حل الادارة الاهلية والتاميم وحل الخدمة المدنية وتطهيرها كنت من المعارضين لهذه الشعارات رغم اننى كنت فى المرحلة المتوسطة وكان الاصدقاء ممن يؤيدون المايويين يصفوننى باننى رجعى لا اؤمن بالاشتراكية شعار ذلك الزمان ووقتها تم تقسيم السودانيين وفقا لهذا الشعار رجعى وتقدمى وكان اعلام عبد الناصر وصوت العرب يغذى هذه الهوجة المتخلفة فى واقعنا العربى وللاسف انتهى هذا الشعار بعد هزيمة التقدميين بعد حرب يونيو 1967 الا انهم انتقموا من النظام الديمقراطى فى السودان شر انتقام وجاءتنا مايو الهنا التى كانت الاساس للتخلف رغم رفع الثوار وقتها لشعار التقدمية وحزب الثورة وبداوا بتدمير التعليم كاساس لايقاف عجلة تقدم البلاد وكاه هذا احد اهم اهداف الانقلاب والجهة التى ساعدته فى النجاح ولو عدنا الى البيانات الاولى للاحزاب السودانية التى كانت تحتضن مايو لراينا عجبا مقارنة بما هومطروح اليوم .. لنعرف كيف كان يفكر الثوار وقتها ومن هم الرجعيون الحقيقيون ومن الثوار فى المحك الاصلي نتواصل
نتواصل

شكرا لهذا التنظير الذي اتفق معك فيه

علما ان مفردة ثورة تتناقلها بعض السن الناس لانظمة قمعية وهذا خطا
وتجد حتي من بين صفوفنا انذاك من مختلف الاحزاب والحركات بعض اصحاب زلة اللسان يطلفون ثورة علي انقلاب
يونيو
ويطلقون فتح ل غزو عبد الله ابن ابي سعد ابن ابي السرح
وفتح تطلق اغزو الجيش التركي اخر جيوش الخلافة الاسلامية التي غزت دول وديار امنة ؟؟

من حق اهل السودان اختيار اي اسم الا في حالة ان يكون هذا الاسم ماركة مسجلة هنا يتم البحث عن اسم اخر
حقيقة ان الاسم لوحده لا يخدم اي قضية اضا لم يكن الحزب ذي بناء واهداف وعضوية تكتب له النجاح

هذه الاسماء من حقك يا عزيزي الكيك مراجعتها وان لك اي توقف اما اي اسم من هذه الاسماء الحسني
ممكن تنبه له .

تكوين حزب لن يقف علي هذه الفكرة وستتع ويصمد الحزب الذي يخدم قضايا البلاد والعباد

لك التحية

سلام للجميع
وتحية خاصة لزميلنا السابق في الحزب الشيوعي صبري الشريف
اولا انا لا اشك في صدق نوايا المؤسسين واعتقد اني اعرف اغلب الاسماء الواردة ...
لكن يا صبري ومن التجارب النوايا الحسنة لا تبني حزب على الاطلاق ومصير هذا الحزب الفشل
وبدلا عن حزب اقترح عليكم تكوين ( رابطة اصدقاء ) او ( مؤسسة دعم ) لتفعيل ودعم انشطتهم المختلفة
وان يكون الدعم غير مشروط ..

حبيبنا صبري الشريـف .. التحية والأشواق ياصديق ..

مرحب بيـك بالعودة للمنبر ..

ونتمنى ليكم التوفيق في مسعى الحرية والسلام والعدالة..


الاعلان اتحدد متين؟

وهل ساهمت المجموعة دي او الحزب بأي اوراق في مفاوضات السلام الحالية ؟

تحياتي

حيدر الزين
لك الاشواق

فكرة الحزب في مخيلة الكثير من اهل السودان
خاصة ان احزاب اليمين واليسار مع ضرورة وجودها لها اشكال في البناء والتنظيم وغياب الديمقراطية وان كثير من اهل السودان
خارج هذه الاحزاب

الحزب فكرة بعض مثقفي ومثقفات بلادي
محك نجاحه في ان اعداد كبيرة ترغب في العضوية
الاهم ان يستلهم الشباب بنين وبنات
في داخل الوطن

لا يزال مؤسسي.ات الحزب في حالة وضع اسس الحزب
لم يشارك الحزب لانه لا زال يرقة
اتمني نجاح التكوين وان يكون البرنامج جاذب ويعمل علي حل اشكال البلاد العصي

سلامات عزيزنا صبري الشريف


الجماعة عقدوا والا لسه ؟!

وووين الناس ..!