يا حمدوك كفاءة إدارية لوزارة الصحة وأكرم يشوف ليه شغلة تانية

05:17 PM May, 28 2020

سودانيز اون لاين
عبدالعظيم عثمان-
مكتبتى
رابط مختصر

المتابع لوزارة الصحة في ظل أزمة كورونا
حيشوف كمية الأخطاء الإدارية الوقع
فيها الوزير الحالي، وهو غير ملام
حديث عهد بإدارة الدولة.. فشل
عادي يمشي ويجي زول عنده خبرة إدارية
ما ضروري يكون طبيب.. والمدراء في
وزارة الصحة يكونوا من الاطباء لأنهم الاعلم
بالأمور الفنية
ولكن موضوع الشئون الإدارية
وإدارة المرافق الصحية والتفاهم مع
شركات القطاع الخاص ذات الصلة بالقطاع
الصحي دا كله عاوز ليه زول بيعرف في الإدارة
وعنده خبرة
أكرم يشوف ليه شغلة تانية
قبل ما الفأس يقع في الرأس
يا حمدوك الحق وزارة الصحة
وخلي الزول دا يمشي.. انت حملته
فوق طاقته وفوق خبرته الإدارية

رفقاً بوزير الصحة الحالي يا حمدوك
الزول دا ما عنده قدرة يتحمل العبء الثقيل
في وزارة الصحة.. اشكره بي بوست كارب
وخلي الزول دا يمشي
فتش ليك كفاءة إدارية لاعادة الأمور الي نصابها
فتش على زول مركز مع الخدمات والمرافق وتذليل
العقبات للأطباء والمستشفيات
فتش ليك زول إداري ما ضروري يكون طبيب

وزير الصحة الحالي اذا خليته مية سنة حليف في المكان اللافي
فيه هسي وما حيقدر يحل مشاكل وزارة الصحة

العِلة في وزير الصحة يا حمدوك

خلي الزول دا يمشي

قمطيس الضكر (أبو الدرداق).
قمت تدردك في خراك.
 

عبدالعظيم ارحم نفسك ياخ
ياخ انا متابعك ليك عدد من البوستات فى نفس المنوال
الحكاية شنو؟ انت مع الحكومة ول معارض ؟
الحكاية زادت عن الحد .

وزير الصحة الأمريكي الحالي( أليكس أزار)
زول خريج قانون
وزير الصحة السعودي 2016 خالد الفالح

يعني يا حمدوك ما ضروري وزير الصحة يكون طبيب
اطلع من طريقة التفكير القديمة التقليدية
الوزارة دي عاوزة كفاءة إدارية

أرحم الوزير الحالي يا حمدوك وخليه يمشي
الزول دا غلبته وقرب يقول الرووب

الموضوع دا عاوز خبرة رجال دولة
الزول دا ما عنده الخبرة دي... بالقوة تخليه يستمر
عاوزه يتعلم الحجامة على قفى اليتامة ولا شنو الفهم

أخونا عبدالعظيم
سلامات
مالك يا اخوي ؟
قول بسم الله
يا اخوي انت من جماعة ناس ابوقردة ود. مأمون ؟
يازول أكرم ده زول عالم كبير .
وشغال في مجالو .

كدي بالراحة يا ناس
انا مستوعب كمية الاندفاع العاطفي عند
بعض الناس في الدفاع عن وزير الصحة الفاشل
دا.. لأنهم عاطفيين ما قادرين يشوفوا فشل الزول دا

القصة ببساطة دا إقتراح
الوزارة دي توكل لي زول عنده خبرة إدارية طويلة
وما ضروري يكون من عيال المنظمات
خبير سوداني إداري عارف مشاكل البلد
ويكون ثوري ومؤمن بالتغيير
وما بالضرورة يكون طبيب
دا المقترح ببساطة

اها رأيكم شنو
خلونا نساهم في تخليص وزير الصحة
من العبء الثقيل الماقادر يتحمله
صدقوني تكونوا كسبتوا فيه خير
وتكونوا كسبتوا خير في البلد
الزول دا شغلة يستمر وزير للصحة صعبة عليه
وغلبته تب

Quote: القصة ببساطة دا إقتراح الوزارة دي توكل لي زول عنده خبرة إدارية طويلة وما ضروري يكون من عيال المنظمات خبير سوداني إداري عارف مشاكل البلد ويكون ثوري ومؤمن بالتغيير وما بالضرورة يكون طبيب دا المقترح ببساطة

للأسف الشديد، هذه المواصفات لا تنطبق إلا على أبوقردة، لذا عليك بالصبر أخي عبدالعظيم حتى نهاية الفترة الانتقالية، وبشّر الصابرين!

يا محمد الأمين
يعني يا تقبلوا أكرم الماسورة دا
او نجيب ليكم ابوقردة تاني

اكيد ما بتكون قاصد المقايضة دي

سلام صاحب البوست

رجاء توضيح ماهي الأخطاء الإدارية التي وقع فيها وزير الصحة الحالي؟

مع وافر الشكر والتقدير

انت عندك مشكلة شخصية مع أكرم
ما شئ طبيعي كونك تكون ما شايف أي فشل في الوزارات والمجلس السيادي إلا أكرم
أياً كانت مشكلتك مع أكرم أتمنى إنك تحلها بطريقة تانية غير البوستات الما عندها معنى دي
بس ياها عمايل السلفية والكيزان السالين سيف الدين يتكلموا بي اسمه ويحاربوا بيه من يختلفون معه
قد تكون ما شايف نفسك يا عبد العظيم لكن حالتك دي ما طبيعية
تكون جاري وراء شخص واحد آناء الليل وأطراف النهار دي مشكلة شخصية .. أو في أفضل التبريرات تضارب مصالح

Quote: سلام صاحب البوست رجاء توضيح ماهي الأخطاء الإدارية التي وقع فيها وزير الصحة الحالي؟ مع وافر الشكر والتقدير

ننتظر الاجابة يا عز الدين. و لو فس سبب مقنع واحد ح أضم صوتي لصوت
صاحب البوست دون تردد.

يا عز الدين اخطاء شنو البجيبا الكوز الشعبي ده
فاتح ليهو كم بوست عن د/اكرم ما قدّم خطأ واحد
الزول ده عامل الثورة حقّتو و هو الكوّنا فى رحم الغيب
هو الداية يوم شهقة الميلاد
انسى يا حبيب و خلّيهو ينبح

ديل خلال اسبوعين

وزير الصحة حالة ميئوس منها

وزير الصحة يتخلف عن السفر

يا أكرم امشي ما تننتظر الاستقالة

هل إقالة أكرم نهاية الدنيا

إقالة وزير الصحة على نفسها جنت براقش

أكرم قطره صفر

Quote: يعني يا تقبلوا أكرم الماسورة دا او نجيب ليكم ابوقردة تاني

بابكر فيصل كيف!

Quote: ديل خلال اسبوعين وزير الصحة حالة ميئوس منها وزير الصحة يتخلف عن السفر يا أكرم امشي ما تننتظر الاستقالة هل إقالة أكرم نهاية الدنيا إقالة وزير الصحة على نفسها جنت براقش أكرم قطره صفر

Quote: قد تكون ما شايف نفسك يا عبد العظيم لكن حالتك دي ما طبيعية

بالعكس يا أحمد طبيعية جداً
الثورة ثورة تغيير شاملة .
كل العقليات الرجعية و الغير مؤمنة بالتغير و الغير مهيئة له نفسياً او أخلاقياً
و تتعارض مصالحها المادية بالضرورة تكون ضد التغيير
و بالضرورة تعبر عن سخطها بشكل من الاشكال.

بالعكس يا احمد محمد عمر
الغير طبيعي هو نصرتكم لي وزير الصحة ظالما ومظلوما
الغير طبيعي هو عدم قبولكم لفكرة فشل الوزير
الغير طبيعي هو وضع الثورة والتغيير كحزام ناسف
يلف وزير الصحة.. وكلما هبشنا الوزير تصايحتوا
لا الثورة حتنفجر.. لي درجة حرق اللساتك في الشوارع

الغير طبيعي هو ربط الثورة والحكومة بالشخوص
وتقديسهم وعدم قبول اي نقد.. ووصف المختلف بالكوز

بالله في انتكاسة أكبر من دي

ما عندي مشكلة في انتقاد أي زول
عندي مشكلة في الاستهداف المنظم
استهداف شخص واحد بصورة يومية
بوستات عبارة عن أراء شخصية وأحكام جزافية لا تستند على أي منطق غير إنه بس هو ما نافع ساي كدة

يا حامد الصاوي سلوك عبد العظيم بوضح بشكل جلي إنه عندو مصلحة معطلها أكرم

عبدالعظيم يعنى فى رايك الناس ديل كلهم مهابيل وانت الوحيد العاقل؟
اهبش راسك ياخى شوفو فى مكانو؟؟؟

عاقل شديد وعارف نفسه بعمل في شنو
قبل شهر أو زيادة عمل بوست قال أكرم بعين الشيوعيين في الوزارة
ما جاب إسم أي شيوعي ولا خطاب ولا أي حاجة .. بس كلام وخلاص

عبد العظيم عين نفسه مخلب لناس بتحارب أكرم من داخل الوزارة

بالله دا بوست جديد
ياخ ارفع اي بوست من القديمات دي نفس الغرض ونفس الفكرة
رفقا بالباندويث
يا كوز يا خروف
يا ذاتي يا مصلحجي
عملتها ظاهرة يا عبيط
...............
شكرا عارف ناشد عبرت عني

يا عبدالعظيم أنت تعطينا إحساس وكأن الدكتور أكرم مارس التمكين الشيوعي في الوزارة لدرجة أنه فرض على الأطباء تدخين السيجار الهافاني والتحدث بالبرتغالية، وحتى عيّنة فحص الكورونا منعهم من أخذها من الأنف وأصر على أخذها من الوريد حبّا في اللون الأحمر!
غايتو بعد دا ما فضل ليك إلا تلجأ للفقراء وتجلب ليهم اللبان الضكر عشان يخلصوك من أكرم! كده أرفع معانا يديك للسماء تضرعا أن ينصر الله دكتور أكرم ورجاله في حربه على وباء كورونا.

يا محمد الأمين
صدقني انا مستوعب عدم إلمامكم بالمعلومات التفصيلية
ومقدر الكلام دا عشان كدا ردود الأفعال الما بتستند للمعلومات
بتكون عاطفية..
آخر زول عينه أكرم مدير طبي
شيوعي من وقته الكان طالب في الثانوي
وقرا طب في روسيا.. وساكن في امدرمان القديمة

قبله شيوعيين كتار عينهم أكرم مدراء
السلوك دا خطير جدا وحيغطس حجر الوزارة
مافي زول بيسكت وهو شغال يعين في كوادر حزبه
بدون اي معاينات مفتوحة لكل الناس
دا نوع التمكين الأنا بتكلم عنه...
بعدين كان يختشي شوية هو وزير تم تعينه
ما جابه صندوق انتخابي.. يعني يحترم شركاء
الثورة ويبطل الشغل البيعمل فيه دا...
وقت حزبه يفوز في الانتخابات (والكلام دا طبعا من سابع المستحيلات)
بعدين يعمل العاوزه في الجهاز التنفيذي.. لانه هو عارف
دي فرصته الأخيرة.. إذا ضاعت تاني ممكن ما يشمها
قاعد يخرمج

ناس الحزب الشيوعي البتهافتو ديل
خلاص عرفنا عندهم التحزب للحزب أغلى من أرواح وحياة كل السودانين
خلاص عرفنا وقرفنا ما مشكلة
فكو يا شويعيين وزارة الصحة ويعوضوكم بوزارة أخرى
حياة السودانيين أغلى من حزبكم العجوز ومن كل الأحزاب أجمعين
هداكم الله لحظيرة الإنسانية وقلبها النابض حباً للناس ورعايتهم وحفظ كرامتهم وحياتهم وأمنهم
يخلق الإنسان إنساناً ليختار بمحض إرادته أن يكون كأن الله لم يخلقه بقلب ينبض بين ضلوعه
وهو يرى المرضى يمنع عنهم العلاج وتغلق دونهم المستشفيات
بأمر هذا الوزير القاتل البارد عديم الضمير الذي همه فقط
دعم المنظمات الدولية وارضائها كل يوم نرى الموت بالجلطات
وكل هم الوزير تسجيل من تمكن من تسجيله في قائمة المصابين!
ما عرفناه وزير صحة ولا بتاع إحصاء !

المسألة دي بقت مملة جد ..... الغرض مرض !!







فكنا رحم الله والديك .

ياود البشرى كدي أسهب لينا عن قصة بابكر فيصل دي لانه حاولت أقوقل جاتني مقالاته شي دفاع عن رفاعة رافع الطهطاوي وشي عن دموع حميدتي في لحظة انسانية بعد فض الاعتصام فانا عارف انه الدوافع بتاعت الهجوم على اكرم هي خلافات في التجمع بين الشيوعين وناس تانين فزائر اعرف منطلقات الهادي وعبدالعظيم الحزبية وسألت قبل كده وما لقيت رد فأفدنا أفادك الله لان العالم النحرير بقى تخصصه عالمي وغادر محطة المحليات

(مخلب) دي اللفظ المهذب لكلمة تانية بنفس عدد الحروف وبتبدأ بالميم برضو

دة سودانيز اونلاين ما قروب فيسبوك مغلق
مافي مجال تجيب معلومات عائمة زي دي وتفكها بدون ما تتقبقب وتختها صراحة بالأسماء وبخطابات التعيين حتى بعد داك نمشي لمسألة هل التعيين دة فيه مخالف للائحة ولا لأ ثم بعد ذلك ننظر في كفاءة المعين وهل هو أهل للمنصب ولا لأ
علماً بإنه اتجاهه السياسي ما عندو أي وزن في الحوار دة

إذا كنت شغال في وزارة الصحة أو في شركة عندها علاقة بالوزارة وأكرم أضر بمصالحك بأي شكل من الأشكال عليك اتباع الوسائل الرسمية للاعتراض
ولو عاوزها تبقى قضية رأي عام مفروض تكون بالوثائق والمستندات والأسماء بوضوح كامل عشان يتم التحقيق
لكن تكون معـ....
معترض ساي كدة عشان ناس تانيين شوف قروبات الزواحف بفرحهم جنس التعـ....... التعاون دة في تحقيق أهدافهم وسحب الثقة في الحكومة الانتقالية عشان يجوا يمسكوها ناس أنس عمر

يا منص بابكر فيص دا ينطبق عليه المواصفات الختاها عظمة كبديل للوزير, اولا ما طبيب, إداري او قانوني ما متأكد لكن الأهم انه من قيادي في التجمع الاتحادي بتاع عظمة
بالنسبة للهادي ما عنده لون سياسي لكنه من زعلان من التوقيع و الشراكة مع الفتلة وشايف كل من شاركهم خاين وبايع و كان يفضل استمرار التظاهر و الاعتصامات حتى يسقط كامل النظام و يقوم العسكر بتسليم السلطة لمدنيين (بس ما يكون فيهم السيد الامام ولا المؤتمر السوداني )

Quote: آخر زول عينه أكرم مدير طبي شيوعي من وقته الكان طالب في الثانوي وقرا طب في روسيا.. وساكن في امدرمان القديمة قبله شيوعيين كتار عينهم أكرم مدراء السلوك دا خطير جدا وحيغطس حجر الوزارة مافي زول بيسكت وهو شغال يعين في كوادر حزبه بدون اي معاينات مفتوحة لكل الناس دا نوع التمكين الأنا بتكلم عنه...

طيب يا ريت تجيب المعلومات التفصيلية عن الذين عيّنهم أكرم حتى يتضح ما إذا كانوا شيوعيين أم لا؟ وهل كلهم أو غالبيتهم شيوعيين؟ وهل هم مؤهلين للمناصب التي تقلدوها؟ وهل يحق له القانون تعيينهم؟ وكيف يجب أن تكون الممارسة السليمة من وجهة نظركم: تعيين بالقرعة أم بالمحاصصة؟ هكذا يصبح طرحكم طرحا عاما وليس خاصا يتغيّا مصلحة ذاتية.

السؤال هو هل تم التعامل مع الوظائف الشاغرة
بالطريقة المتعارف عليها إداريا" (اعلان ثم تقديم
وفرز ومعاينات ثم اختيار الأفضل) ولا التعيين
تم علي حسب مزاج الوزير ... الاجابة متروكة لي
لجنة الأطباء الاشتراكيين الوكيل الحصري لملء
وظائف وزارة الصحة ...

من أكبر أخطاء الوزير هو تعيين وكيل وزارة مؤهلها خريجة
صيدلة فقط وليست لديها خبرة في الخدمة المدنية بالمطلق
والمصيبة الأكبر أنها أول وظيفة لها في الخدمة المدنية ...
يعني عرفت العمل الإداري بعد تعيينها وكيل لوزارة الصحة ..
ومن المفترض وكيل الوزارة هو الدينمو المحرك لكل
مفاصل وسياسات الوزارة الصحية والتنفيذية في
كل أرجاء البلاد ... ولا يتقلد وظيفة الوكيل الا من
تاهل وعمل وترقي في سلم الوزارة وعرف إدارة
النظام الصحي بالبلاد …

القصة دي بقت زي بقرة بني إسرائيل
ما لونها وتشابهة علينا البقر
كلما تجيب إثبات للتمكين
قالوا هل من مزيد
في النهاية الوزير حتبقى عليه قصة فأقالوه وما كادوا يفعلون

إثارة هذه المشاكل و الهجوم علي وزير الصحة
في هذا الوقت بالذات أكرر هذا الوقت بالذات
و كل المؤسسات و الوزارات الصحية في كل العالم
تواجه خطر وباء عالمي يفتك بالمواطنين

إثارة هذه المشاكل في هذا الوقت هو اصطياد في الماء العكر
و بالنسبة لي لا يقل علي تهمة الخيانة العظمي لحق الشعوب
في الحياة.
عندما تطاول ذو النون عي الوزير أكرم رد أكرم بانه مشغول
و ليس له وقت لهذه المعارك.

و أقول لكم الان لكل مقام مقال ...
وزارة الصحة الان لديها ما هو أهم
الشرفاء هم من يقفون معها للتوعية و محاربة هذا المرض
و ليس توجيه اسلحتهم ضد الوزارة.

يا الصاوي ليه ما تشوفها بالزاوية الثانية
غض الطرف عن وزير الصحة الفاشل دا
في هذا الظرف الحرج يعد خيانة
كلما عجلت الحكومة باقالته كلما أدركت ما يمكن إدراكه
ليه ما تشوفها من زاوية الحفاظ على الخدمات الصحية
والدواء والطبيب والمستشفيات

حاول تشوفها بالحياد وحاول تتخلص من التعاطف مع الوزير
حتلقى نفسك بسهولة تتقبل فكرة الاحلال في وزارة الصحة

غايتو وزير الصحة دا حالة ميؤوس منها
ساق معاه أمجد فريد المطار لاستقبال الوفد الصيني؟
هو أمجد فريد دا شغال شنو؟

دي مصيبة شنو دي
الوزير دا تخلوا يتم السنة دي حيقلب الوزارة كلها
شيوعين من الوزير حتى الغفير

الشيوعين ديل ورثوا الثورة
ولا وقعت ليهم في كرتلة ونحن ما عارفين
ديل شنو ديل
الحركات دي الكيزان ما كان بسوها ظاهرة كدا
الناس ديل أسوأ من الكيزان حصلوا ثورتكم يا ناس

الأخ الفاضل / عبدالعظيم عثمان
والإخوة الأفاضل المتداخلين
التحيات للجميع

أثابكم الله خيراُ يا أخونا عبد العظيم ،، أنت ترى الأمور بتلك الزاوية الصحيحة السليمة ,, وهؤلاء يرونها بتلك الزاوية التي تعني الميول والاتجاهات السياسية العقيمة .. وعزة الله فإنني حتى هذه اللحظة لا أعرف بأن ذلك الشخص الوزير ( أكرم التوم ) ينتمي للحزب الشيوعي السوداني .. ولا أعرف بأنه من الأعضاء البارزين في ذلك الحزب المعروف للناس .. والأمر كذلك بالنسبة للكثيرين من أفراد الشعب السوداني ،، وبالتالي فإن ذلك الانتقاد الشديد الذي يوجه للسيد أكرم التوم ليس من قبيل الأخذ والطعن في الحزب الشيوعي .. وليس من قبيل الموالاة لجماعات النظام البائد .. ولكن ذلك الوزير قد فشل فشلاُ كبيراُ في إدارة الوباء بالسودان .. ولم يستطع أن يحد الوباء في مهده عند المنافذ والمداخل والحدود .. بل فشل ذلك الفشل الكبير حتى تمكن الوباء وانتشر في كافة أرجاء السودان .. وهنالك في العالم الكثيرون من وزراء الصحة الذين استطاعوا أن يحاصروا الوباء بذلك القدر الكبير الماهر من الإدارة والقضاء على الوباء وحصاره في أضيق دائرة ممكنة .. كما هو الحال في دول أفريقية عديدة .. والعالم يشهد ذلك النجاح الباهر لوزراء الصحة في الكثير من البلاد الأفريقية المجاورة .. مثل اريتريا وموريتانيا وخلافها من الدول الأفريقية .. فتلك البلاد قد استطاعت أن تحد من انتشار الوباء في أرجاءها .. بينما أن دولة السودان تواجه اليوم أشد ألوان الانتشار للوباء .. وتواجه تلك الوفيات الكثيرة في كافة أرجاء السودان .. فيا هؤلاء الذين تدافعون عن ذلك الوزير المبجل ( أكرم ) في السراء والضراء أعطونا مثالاً واحداً يؤكد بأن ذلك الوزير ( أكرم التوم ) قد نجح في مهمته وفي خطواته وفي سياساته الصحية !!! . وأعطونا مثالاُ واحداً بأنه قد هزم ذلك الوباء الخطير .. والشعب السوداني لا يعادي ذلك الوزير أكرم التوم لأنه شيوعي .. ولا يعادي ذلك الوزير من منطلق الإيعاز من قبل جماعات النظام البائد .. ولكن الحقائق المريرة في أرض الواقع هي التي تجبر الشعب لكي ينادي باستبدال ذلك الوزير بوزير آخر .. حتى ولو كان ذلك الوزير البديل من أعضاء الحزب الشيوعي السوداني .. لأن القضية ليست قضية مناوشات بقدر ما هي قضية إنقاذ البلاد من الويلات والموت بالآلاف .. وبالتأكيد فإن الوزير البديل حتى ولو كان من أعضاء ( الحزب الشيوعي السوداني ) سوف يكون أفضل من ذلك الوزير ( أكرم التوم ) ألف مرة .. فذلك الوزير ( أكرم ) قد يكون طبيباُ ماهرا في مجال الطب والصحة ولكنه فاشل كلياُ في مجال الإدارة الأزمات والأوبئة .. كما يفيد الأخ الفاضل / عبد العظيم عثمان .. فما الذي يمنع أن يأتي وزير للصحة يجيد إدارة الوباء حتى ولم يكن طبيباً في الأساس والمجال ؟؟.. فالمعضلة ليست معضلة تفاضل بين أشخاص وأشخاص ،، وليست معضلة أحزاب وعداوات .. إنما المعضلة معضلة البحث عن ذلك البديل الأفضل الذي ينقذ البلاد من حالة الويلات .

وفي الختام لكم خالص التحيات