حميدتي الذي استطاع صد ١٣ دبابة قادمة من معسكر الشجرة ومنعها من الوصول لمنطقة الاعتصام

06:45 PM May, 26 2020

سودانيز اون لاين
عمر التاج-KHT
مكتبتى
رابط مختصر

كيف له أن يعجز عن منع قوات برية قادمة من معسكر في أطراف امدرمان تحمل العصى والبنادق، ولماذا لم يصدها من دخول منطقة الاعتصام وفضه؟

عمر التاج كل سنة وانت طيب

حبابك صديق؛ وانت اطيب

لمن صبحت رماد علي حد تعبيره

كون التاتشر يرجع دبابة، دي فوتناها ليه يا جعفر..
طيب التاتشرات دي ما منعت المرتزقة الذين دخلوا ساحة الاعتصام بعصيهم والبنادق في اغمادها ليه؟

فعلا فوتناها
يمكن لانو اصلا الكلام زي الغربال
تفوت شنو وتمسك شنو

قادر تتخيل انه دبابة واحدة من الدبابات ال١٣ الرجعها حميدتي للمعسكر الشجرة
رجعت قبل كده أكثر من ٢٠٠ تاتشر لخليل ابراهيم في كبري امدرمان في أقل من ساعة ..
طيب حميدتي ما رجع الجنود المرتزقة وهم يفضون الاعتصام ويقتلون الثوار بالساعات ليه؟
تحت تحت الموضوع قالوا جاري دول ليس مجرد أحزاب و عساكر وضباط..

في حوار مع اللواء نصر الدين قائد سابق للمدرعات علق على الكلام دا انه غير صحيح
الحوار منشور في موقع النيلين, ومكتوب المصدر "متداول في الفيس بووك" لكن للامانة ما لقيته في موقع صحيفة باعتبارها هي التي اجرت الحوار و نشرته لذا لا استطيع التأكد من صحته حتى الآن
لكن عموما حوار حميدتي واضح انه مصنوع بغرض تلميعه و ارسال رسائل معينة هنا وهناك و مليئ بالثقوب, وزاد تأكيد ان حميدتي لا يصلح للعب اي دور حقيقي و قيادي لا الآن ولا في المستقبل و قمة ما يمكن ان يصله دور "الداعم" لجهة او كيان او تحالف ما, لكن بالتأكيد دعمه هذا سيرجح الكفة

مرحبا ود البشرى،

Quote: لكن عموما حوار حميدتي واضح انه مصنوع بغرض تلميعه و ارسال رسائل معينة هنا وهناك و مليئ بالثقوب

للأسف فان فرية تصدي قواته ل13 دبابة كانت تنوي فض الاعتصام كانت النقطة الرئيسية التي تحدث فيها عن فض الاعتصام في ذلك اللقاء
وبغض النظر عن الفكرة الموضوعية في كيفية صمود عرباته التاتشر ل 13 دبابة دفعة واحدة وصدها لتعود خائبة لمعسكر الشجرة دون خسائر
وكذلك تكذيب اللواء نصر الدين لحميدتي وحديثه المسرب عن المواجهة الصلبة في وجهه عندما زار معسكر الشجرة
وغض النظر عن الأسباب التي دعت الجيش لمحاولة فض الاعتصام ب 13 دبابة من معسكر الشجرة وليس عربة أو عربتين مصفحتين من داخل القيادة العامة ..
غض النظر عن هذا كل يبقى حميدتي في مواجهة نيران حامية خلال الفترة المقبلة ويبقى مصيره مرتبط بتاريخه أكثر من أي شيء آخر ..
حميدتي الذي اعتلى فوق كل قياداته السابقين وأودعهم السجن أو حاول، بدأ بكوشيب ثم موسى هلال ثم صلاح قوش ثم البشير ..
لا أظنه يقوى الآن على اعتلاء ثورة الشعب والتضحية بها في مقابل ريادته وسيادته مهما دعمته الدول الصديقة والحليفة والمجتمع الدولي..

سؤال أخير..
هل يمكن أن يصل تفكير الجيش -اذا رغب في فض الاعتصام -
لاستخدام الدبابات؟
و ١٣ دبابة كمان؟
١٣ دبابة لمواجهة مواطنين عزل يحتمون خلف متاريس من حجارة قارعة الطريق؟
الدبابة التي تخترق اصلب الدفاعات وتفتح بها الدول وتدك المدن تستخدم لفض اعتصام؟
معقولة ده تفكير زول عاقل سوي يا حميدتي؟

حميدتي يا ود التاج كرت ( مهم ) حاليا بالنسبة للجيش لانهم مندسين وراهو ..
لكن في اي لحظة ممكن يحرقوا الكرت ده ،المصبرهم انه حميدتي ما عشمان يحكم
فلو كان عنده تطلع للرئاسة كان بدري عجّلو بي حرقه ككرت بينفذ للجيش أحلامه
للوصول للحكم الما حيتنازل عنه بي أخوي وأخوك
حكاية انه يرجّع 13 دبابة بتاعة مدرعات بي 76 تاتشر دي صعبة وواسعة
لكن ممكن الواحد يقبلها في سياغ دلالو على عسكر المجلس السيادي
فلو طلب ارجاع الدبابات ممكن يأمروا بارجاعها لكن من منطلق قوة عسكرية ..
ده كلام ما مبلوع لانه تلاتة من ال 13 دبابة ممكن يجهجهوه ويخرجوه من اللعبة
المدرعات أخطر وحدات الجيش - والكباشي ده أخطر وأمكر منو مااافي
ما تشوف ترقيدو لي حميدتي وهو تحت تحت راقد ليهو فوق راي ..


لكن النصيحة طول ما حميدتي في حلف مع الحرية والتغيير ما بتجيهم عوجة
فكان هبشوا حميدتي أو الدعم السريع الشارع المخوف الجيش بيمرق
والجيش حتضيع آماله في العودة للانفراد بحكم البلد المنكوبة دي ..
بقاءه أصلح من ذهابه رغم استخدام بعض قواته في قتل المتظاهرين ..
طبعا تهديده بكشف كثير من الأسرار الخاصة بفض الاعتصام حتعجل المواجهة

قلبي مع نبيل أديب بقى زي أم العروس ..
التقرير بتاعه ده لازم يديهو كوزين تلاتة موية
حتى يرضي جميع الاطراف ودا ما ممكن نهائي ..
غايتو حيكون كبش فداء كان مرق الحقيقة المرة ..

Quote: حميدتي يا ود التاج كرت ( مهم ) حاليا بالنسبة للجيش لانهم مندسين وراهو .. لكن في اي لحظة ممكن يحرقوا الكرت ده ،المصبرهم انه حميدتي ما عشمان يحكم فلو كان عنده تطلع للرئاسة كان بدري عجّلو بي حرقه ككرت بينفذ للجيش أحلامه

حميدتي يا ود القوز ما زال طموحه في السماء، ولعله يتطلع لحكم دولتين أو ثلاثة وفق ما يخطط له وينفذه من حزم برامج عسكرية (تجنيد، تدريب، تخريج، استقطاب، تسليح.. الخ)؛ وقيادية (رتبة عسكرية رفيعة، فصائل عسكرية متنوعة، أجهزة أمنية وشرطية، اعلام حربي.. الخ) ومالية (صادر جمال، صادر دهب، صادر رجال، صائد عصابات، مرتزقة، صاحب مناجم ذهب والماس.. ال) وبرامج سياسية ( مخترع نائب رئيس مجلس سيادي، قائد عسكري، لقاءات سياسية، ظهور اعلامي)، وبرامج اجتماعية ( لقاءات مفتوحة،، استقطاب قبلي، دعم اجتماعي، قافلات صحية وسلعية.. الخ)..
ورغم أن ماضيه لايسعفه لتحقيق أدوار في المستقبل الا انه يأبى الا وان يستكمل منظومته التي وجد الطريق لها سهلا ومشجعا تخطي خلالها كل قادته السابقين بكل يسر ومكر (كوشيب، موسى هلال، دمبلاب، صلاح قوش، كمال عبد المعروف، عوض ابن عوف، عمر البشير)، ولم يتبق له إلا حمدوك والبرهان ليحكم السودان..
الطريق مازال قصيرا والأمل قريبا وهو قد اكمل استعداده ليهرش الجيش بعد أن هرش الأمن، وليصعد فوق قحت كما صعد فوق المؤتمر الوطني، وليقف فوق تل الدولة بعد أن تضخم خلال الفترة الأخيرة وأصبحت جنوده تخرج في الكلية الحربية، موارده تدعم الخزينة المركزية، وصلاحياته تصل ارفع رتب القادة العسكريين تحاسبهم وتذلهم وتقصيهم..