Post: #1
Title: مولانا جانا اسد الخلا النرنر
Author: يحي قباني
Date: 05-19-2020, 02:50 AM
Parent: #0
02:50 AM May, 18 2020 سودانيز اون لاين
يحي قباني-فى الدنيا العجيبة
مكتبتى
رابط مختصر
ما القى فيكم زول عنده الحلمنتيشية دي كامله.
انا حافظ جزء منها و الباقي راح لي ...
و النرنر تنطق الnurnur وبين النون و الراء في زي جيم رايحة ...
مولانا جانا اسد الخلا النرنر ..
فار شنباتو زي عنتر ... مطرقط وشو ما بنفر ..
ؤ واقف وقفه في مصلايتو بي كراكة ما بنجر ..
ؤ قانص قنصة ..
أكان تيبان أكان فستان ..
أكان أحمر اكان اخدر ..
و كت شروهو قال و اللاهي ما منشر .. ؤ واقف ساكت اتمنظر
حريف مولانا .. العب غيرها .. واقف ساعة .. ياهو الشر ..
أكان هامان أكان عرمان أكان عنتر تضوق الشر ..
بعد داك نسيت ... ههه
فيها اكان يجن عايمات تمش بالبر و اكان يجن حايمات تمش حداك تنفر
قصيدة طويلة ... تذكرتها اليوم بعد ما اشار اخينا ناصر امين في بوست كبر ان الصادق الضليل قابل عثمان خالد مضوي ... ( فضل ظهر)
اتمنى القاها عند اي واحد من عجايز المنبر ... كتبت في سبعينات القرن الماضي ...
|
Post: #2
Title: Re: مولانا جانا اسد الخلا النرنر
Author: adil amin
Date: 05-19-2020, 09:32 AM
انا بتذكر منها بيتين بس عملت بيهم اللاركس ده يا يحي
https://top4top.io/
ديل ناس قريعتي راحت لمن ينفصمو في الخرتوم
قصيدة ما ساهلة
لمن يجي زول الاقاليم وتمشخو الخرطوم ويفك اهلو عكس الهوا
شوف التجاني السياسي يرفس سنتين في الدوحة بي سلام دارفور واخرتا جا عرس وجاور في كافوري وخلي النازحين لحدي الليلة مايو 2020 في معسكرات النزوح وديل مدورين ليهم سيرك في جوبا ذى بتاع الدوحة مع نفس العينة
|
Post: #3
Title: Re: مولانا جانا اسد الخلا النرنر
Author: Nasser Amin
Date: 05-19-2020, 07:31 PM
Parent: #2
سلامات يا هندسة
قوقلتها و اتلقت في منتدى هيئة حلمنتيش العليا - مكتبة الأغنية السودانية
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
مولانا قال أسد الخلا الجرجر
وفار شنباتو زي عنتر
مطرقس وشه ما بنفر
ولاصق لصقه في مصلايتو بي كراكه ما بنجر
وكت شروه قال والله ما منشر
وواقف ساكت أتمنظر
حريف مولانا .. ألعب غيرها
واقف ساعة ياهو الشر
أكان هامان أكان عرمان .. أكان عنتر
تضوق الشر
أكنت زمان وكت بتشوفها ماشه تعوم
تمش بالبر
وكان قعدت حِداك تنتر
وكان حدرت بعد طولك تمش منصر
تمرق السبحه لي مولاك تستغفر
وتتحصن من الجن المغطي التوب
وما فاضل غير تقول حي ووب
ويوم تنزر .. وفي اللكشر
تقول أحيّ كفاي يا ناس .. أمرقوني
فســخني الحر
وما بقدر
أكنت زمان بتدسدس
وجيت الليلة تتهندس
وتتلبس .. وتتملس
وتقعد في النشاط تركين
وتشرب شاهي للتسخين
تشوف السمحة بي فد عين
تغض الطرف بي التانية وتتمتم زين
تقول والله أصلو زمان
دروايش ساي وما عارفين
وفي خلط النشاط زاهدين
ولو بالغلط قالت
لا يا مولانا بالغت
بيتنحنح
يبرِّم شنبو في قعداتو يتصلح
يروح خالف كراع في كراع
يخلي التانية تتمرجح
وفي سرو
يقول توفيق من المولى وعلينا يدوم
ومما جينا في الخرطوم
جنيهات كوم
شربنا المنقة خليناه كد الدوم
وشاهي الحلبة والكمون
وقرش البصلة بالليمون
ويوماً شوم على السمحة الكساها الهم
وكيف تنجم
ويا مولانا حِن وأرحم
وأمضي الشيك
وأصرف للبنية بريك
ولو رمشه
بقيت تخلط بعد فرادي بالكمشه
وتتفنجر
أكنت زمان أكان شافنك السمحات .. يقولن جر
وكان شافنك الشينات .. يقولن كر
أريت يا يابه تتدغور
أكنت زمان بتتعجن
من السايقين بنات آوى .. وواقعين صب
أكنت تزوغ وتتهرب
وجيت الليلة تتكبكب
وعايز خلطه تتدرب
عشان تبدا الطرح بالتكس
تجقلب في محاور صاح
وتلعب في محاور عكس
وما بهمك حرارة الطقس
وما مِرتاح .. وعرقك يصب
تشوتك واحدة ضفاري وتقع أرروب
تقول زاحمنا يا مولانا
والمولانا .....
طرشق كيسو .. فضى الخانة ...
مــولانــــا ..
|
Post: #4
Title: Re: مولانا جانا اسد الخلا النرنر
Author: يحي قباني
Date: 05-19-2020, 08:37 PM
Parent: #3
Quote: سلامات يا هندسة
قوقلتها و اتلقت في منتدى هيئة حلمنتيش العليا - مكتبة الأغنية السودانية |
شينة مني ...
يمين امس فتشت المكتبة فوق تحت ما لقيتها ...
باب النجار مخلع ...يا ناصر ... :)
فيها بعض النواقص و الاخطاء ححاول اتمتمها ...
كتر خيرك يا حبيبنا ...
|
|