حبابكم اجمعين .. ومدد الحظر!. انا شخصيا كنت مع رفع الحظر

03:44 PM May, 18 2020

سودانيز اون لاين
شهاب الفاتح عثمان-ماليزيا.
مكتبتى
رابط مختصر

د شهاب الفاتح.
استشاري الاذن و الانف و الحنحرة.

** حبابكم اجمعين .. ومدد الحظر!.

انا شخصيا كنت مع رفع الحظر ، لان المرض ده و بالطريقة دي لازم يوم نواجهه!. - و لا قدر الله - لكن اسوء ايام مرض الكرونا في السودان ما جاء لسه ..

* انا طبيب و حزين يكون لسه في تفكير جماعي ان البحصل ده سياسية ، كتبتها لي اخوة في اماكن اخرى واعيدها ، الحالات اشتباه بالالاف و الكتير من الالاف كمان، ٣٢٥ في يوم و لا حاجة .. ده المشخص المؤكد فقط.

سيبو عين الغضب، وسب الحظر ، و روح التمرد في مواجهه مرض فاتك، اقعد مع نفسك وعد عدد المرضى كبار العمر الماتو في اخر ٢٠ يوم حواليك خاصة مرضى القلب و السكرى و ما اتشخصوا ذاتو ..

* اسمحو لي ان اقول اقسى من كده ، انتو شعب شديد الملاحظة وراصد كويس لا قدر الله شوف كميات الموت حوالينا قادم الايام ، شغل مخك براك.
* في ناس متحركين في اتم الصحة او بهم صداع او نقص حاسة الشم و حاملين المرض ، وبنشروه لغيرهم و اسرهم و كبار العمر ،
الاكثرية لان مناعتهم قوية المرض عندهم خفيف، او حتى بدون اعراض، و عندهم القدرة لنقلة للجميع !.

مرض ضارب الدول الحوالينا كلها، يستثنينا ليه؟! .

* و لاننا شعب فيه من الجهل الكثير ..
لابد من وجود عسكري ينظم و الا الاشارة تجوط ، الا الحظر يوقفو دوريات و نقط تفتيش حتين نوقف حوامة .. برانا نفعل الوعى انسى ..

واحد كسر الحظر يتفاخر كانه بطل ، و الاثنين البسمعوه تاني يوم يكسرو يقلدو الغلط، شراء تراخيص مضروبة ، ادخلنا السياسة و التغبيش في نفي الكرونا .. الخ..

* شعب للاسف يقدم في واحدة من اسوء تجارب الوعي الجماعي للشعوب في مكافحه الكرونا.

* نصيحة لوجهه الله ادعوكم جميعا التزام الوقاية و الصبر و الدعاء.
اذا ما عشانكم عشان اسركم و كبار السن تاج رؤوسنا.

ياحافظ يا حفيظ..