Post: #1
Title: مانشستر سيتي في الخرطوم
Author: Osman Musa
Date: 04-30-2020, 06:29 AM
Parent: #0
06:29 AM April, 30 2020 سودانيز اون لاين
Osman Musa-
مكتبتى
رابط مختصر
رحلة من الرحلات الجديدة تحمل الرقم a6 ..and
هبطت في الجزء العسكري من مطار الخرطوم .
طبعا في زمن الكورونا صعب نقدر نشوف تمارين
الفريق . و ح يقابل منو من الفرق السودانية .
|
Post: #2
Title: Re: مانشستر سيتي في الخرطوم
Author: بدر الدين الأمير
Date: 04-30-2020, 07:01 AM
Parent: #1
ياود موسى
حايلاقو فريق الدعم السريع
وحمكم الساحة حايكون الكضابشى
يعاونه البرهان وياسر العطا
الحكم الرابع حايكون حمدوك
وتقنية الشنو كدا ديك حا يكون عليها
محمد الفكى والتعايشى
|
Post: #3
Title: Re: مانشستر سيتي في الخرطوم
Author: Osman Musa
Date: 04-30-2020, 07:25 AM
Parent: #2
يا بدر الدين لياقة فريقنا كيف .؟
والدفع كاش ولا كمبيالات؟ .
دي اول مره فريق سوداني يلعب بدون مشجعين.
يا حليل زمن المسطبة كلها بتبكي .
لمان كما عبدالوهاب يتعرض لي خشونة .
من لاعب اماراتي ولا ليبي .
كان المشجعين ينطوا السلك .
و يدقوا الحكم المصري ويمعطوا النجيلة .
وكانت أي حركة علي المكشوف .
|
Post: #4
Title: Re: مانشستر سيتي في الخرطوم
Author: ANWAR SAYED IBRAHIM
Date: 04-30-2020, 07:31 AM
Parent: #3
حبيبنا Osman Musa
سلام ورمضان كريم عليك
كان المشجعين ينطوا السلك و يدقوا الحكم المصري ويمعطوا
النجيلة .
هنالك مشكلتين :
لاعب الوسط ( احمد هارون ) قالوا عندو كرونة
ومشجّعننا من الوقوف فى الطوابير الواحد بقى يمشى زى ( الجنازة )
دمت بعافية
|
Post: #5
Title: Re: مانشستر سيتي في الخرطوم
Author: Osman Musa
Date: 04-30-2020, 07:54 AM
Parent: #4
أخونا أنور سلامات
فريق مانشستر دخل توش.
نحنا يهمنا الفحص عند دخول الفريق .
الناس ديل يا أنور عند الدخول باقيلك فحصوا؟
نتيجة المباراة ما بتهم كتير .
..
رحم الله شاعرنا العراف عمر الدش
لمان قال : بلد رايح .
الدوش كان مشجع كبير للعبة الحلوة
اللعبة النظيفة . النظيفة .
|
Post: #6
Title: Re: مانشستر سيتي في الخرطوم
Author: بدر الدين الأمير
Date: 04-30-2020, 08:37 AM
Parent: #5
هل فى اى امل
ان باريس سنجرمان
ممكن يدخل المنافسة
|
Post: #7
Title: Re: مانشستر سيتي في الخرطوم
Author: Osman Musa
Date: 04-30-2020, 08:58 AM
Parent: #6
والله يا بدر اخوي .
باريس سنجيرمان .
ظنيتو لو دخل .
بس حيلخبت كدارات اللاعبين ساكت .
يعني ممكن يدي لاعب فردة مقاس 9 .
وفردة مقاس 7 ونص وهو و حرفنتو.
يعني ما ح يفيد .
و حيكب الجاز والغاز في المدرجات و يشعلل اللهبة زيادة .
يا بدر ياخ يا حليل الفرق الجد جد .
الفرق البتجي بدون دسديس.
عليك الله قول لي صاحبك أستاذ محمد السني بتتذكر .
لحظة المدرجات الأربعة سمعت كع ؟
لحظة فوزي المرضي كسر كراع الخطيب ؟
قشاهو هو وكورتو وكرونتو و رواية كورنتو ههههه .
يا حليل زمن فوزي الاسد .
قولو تتذكر نزال الفراعنة و صقور الجديان في الخرطوم بالليل .
زمن الباسطة بالشوال.
كانت لنا أيام .
يا حليلك يا مطارنا المكتول كمد.
ارسل دموع هات غنوة لي ......
|
Post: #8
Title: Re: مانشستر سيتي في الخرطوم
Author: Osman Musa
Date: 04-30-2020, 10:06 AM
Parent: #7
المدهش و المحير
وصول الفريق العدني من عدن للخرطوم
في نفس ساعة وصول العملاق فريق مانشستر .
|
Post: #9
Title: Re: مانشستر سيتي في الخرطوم
Author: MOHAMMED ELSHEIKH
Date: 04-30-2020, 10:41 AM
Parent: #8
الليلة ياودموسى الكرونة طارت لي في راسي؟
أي مبارة مانشستر ستي يتغلب فيها خالد ولدي لا بينوم ولابيسكت من البكاء
يعلم الله بقيت اعرف اللعيبة وتاريخ ولادتهم وحبوباتهم وأنواع سياراتهم
معقول خبر زي دي خالد مايديني ليهو؟
قبل يومين قال لي بقينا نجيب للسودان مساعدات بطيارتنا
لكن ماني عارفو يقصد شنو
|
Post: #10
Title: Re: مانشستر سيتي في الخرطوم
Author: بدر الدين الأمير
Date: 04-30-2020, 11:34 AM
Parent: #9
ياود موسى
ياخى ابعدنى من محمد السنى دفع الله
هو هلالابى سلفى وانا هلالابى تقدمى
وبرضو عندنا هلالاب كيزان واشباه كيزان
وتجار اسلحة وغسيل اموال
وهلالاب مع الرصين
|
Post: #14
Title: Re: مانشستر سيتي في الخرطوم
Author: Osman Musa
Date: 04-30-2020, 07:28 PM
Parent: #10
عارف يا بدرالدين
صحيفة الميرور البريطانية جابت سيرة الجنا مالك منشستر .
قاليك الشيخ ده قاشط في خزينة النادي 20 مليار جنه استرليني ( حولا )
عشرين مليار ؟
يا حليلك يا فريق الوحدة الزيداب .
ياربي منشستر بكون داير في بلدنا شنو ؟
|
Post: #11
Title: Re: مانشستر سيتي في الخرطوم
Author: Osman Musa
Date: 04-30-2020, 12:04 PM
Parent: #9
أخونا محمد ود الشيخ سلامات
ورمضان كريم
يا زول انت وين .؟
خالد ولدك ما شاءالله عليه اظنو مانشستراوي علي السكين .
ياخ ده جيل الثورة .
الجيل الفكر في المتاريس و حرق اللساتك . ما حرق البخور
ده الجيل الصنع الساعة وقابل أوباما.
ده ال second generation
ده الجيل العارف مكان الطيارة بتقوم .
وعارف الفرق بين استاد ويست هام و مانشستر سيتي
والشوت الضفاري في استاد جبل عامر .
استاد جبل عامر الطافي النور
وما مكندش .
ده جيل ناقش.
ما فاتت عليه رايحة.
كموووووووون مان.
منشستر سيتي عديل ؟
وفي مطارنا ؟
|
Post: #12
Title: Re: مانشستر سيتي في الخرطوم
Author: Arif Nashed
Date: 04-30-2020, 12:19 PM
Parent: #11
وصول طائرة فريق الحديدة التي تحمل الرقم fxx2534 قادمة من عدن للمشاركة في بطولة الكاف ويلعب ضمن صفوفه اللاعب السوداني الختري جقود
الذي انتقل إليه من فريق الختمية سنتر ليق.
[/B
|
Post: #13
Title: Re: مانشستر سيتي في الخرطوم
Author: Osman Musa
Date: 04-30-2020, 03:30 PM
Parent: #12
أخونا عارف سلام
ورمضان كريم
ياخ المنتخب العدني ربنا يحل كربتو .
والله حزين علي جهجهة الفرق اليمنية المكافحة للصعود.
وعلي قول الشاعر اليمني .
( انتي الاصل والفصل والروح والبدن .. من يشبهك من ) ؟
|
Post: #15
Title: Re: مانشستر سيتي في الخرطوم
Author: عمر التاج
Date: 04-30-2020, 07:59 PM
Parent: #13
السلام عليكم؛
| Quote: هبطت في الجزء العسكري من مطار الخرطوم . |
س سؤالين:
- علاقة مانشستر ستي بالكورة السودانية شنو؟ بل بالسودان كله شنو؟
- البخلي طيارة نادي رياضي بتحمل معدات صحية تهبط في المطار العسكري شنو؟
|
Post: #16
Title: Re: مانشستر سيتي في الخرطوم
Author: Osman Musa
Date: 04-30-2020, 08:35 PM
Parent: #15
أخونا عمر التاج سلام
ورمضان كريم
الحظ .
الحظ في السودان لما يضرب مافي تاني كلام .
ممكن تكون فني لحام و تضرب معاك وتنط طوالي لي وزير صحة.
في السودان ما ممكن تسال عن علاقة داك بي ده .
منشستر هبطت في مطارنا والدنيا كلها عرفت.
والمنتخب اليمني الجنوبي برضو .
|
|