الولاة

09:07 AM April, 19 2020

سودانيز اون لاين
عبدالحفيظ ابوسن-no where
مكتبتى
رابط مختصر

انتشرت قائمة ترشيحات الولاة . الملاحظ فيها كتابة الاسم والحزب ! . تقسيم الولاة وفقا لحصص مسبقة .
ان صح هذا الامر فهو مفارق لاهداف الثورة . وهذا عين ما كانت تصنعه الانقاذ . تعتبر الولاية غنيمة توزعها لمناصريها
نحن في الولايات حتي الخرطوم لسنا غنيمة حرب لأحد . ولا مكافأة لزعم احد النضالي .
من اراد ان يحاصص فلينتظر الانتخابات
نريد الاصلح للولاية ولا نريد غريبا . نريد شخصا يعرف الولاية وكابد فيها الظلم وادري بها
لا تأتونا بأسماء لا نعرفها حتي نسأل منها
نريد ولاة منا ويعرفوننا ونعرفهم

السلام عليكم

ارشح عبدالحفيظ ابوسن والي لمنطقته

لاك قريبي لا متاكدة من اتجاهك بس متاكدة
من انك عارف ولايتك

أبو سن

سلامات.

مسألة تعيين الولاة دي بقت معركة في غير معترك.

أولا ربط التعيين بمحاصصة التفاوض خطاء كبير، وذلك لأنني أتوقع في عدم الوصول الى أتفاق سلام نهائي مع الحركات المسلحة في الفترة الاإنتقالية.
لذلك من الافضا أن تمضي الحكومة قدما في تعيين الولاة وحتى لو كانوا عبارة عن ولاة مدنيين مكلفين، الى أن يتم التوصل الى اتفاقية سلام. وهولاء الولاة من الافضل أن يتم تعيينهم من أبناء الولاية الاكفاء وليس من خارج الولايات.

والله يا قريبك الموضوع شائك
تجربة التكنوقراط في الوزارات و اداؤهم و العراقيل البضعوها التحتهم و الحفر اثبتت ضرورة وجود سياسيين عركتهم التجارب و عارفين دا اتجاهه شنو وقصده شنو وكدا
الاجهزة التنفيذية للولايات من الامين العام لحدي آخر سواق عبارة عن مستعمرات كيزانية بامتياز, حتى الماهو كوز بكون نال وظيفته بناء على ترضيات جهوية وولاؤه لمحل النقاطة و الماسورة المحلوجة التي ينتظر من الولاة المدنيين اغلاقها
لذا اتوقع دس محافير و ضرب تحت الحزام بشكل مبالغ فيه, ما ينفع تجيب والي ما ليه في السياسة او كان برة البلد او برة الولاية عمره كله, حيقعد لينا اسوا من مدني ووزير الطاقة لأنو مسألة تفكيك قبضة المؤتمر الوطني على الولايات مسالة مفصلية و هامة جدا في طريق الثورة ونجاحها
يلّا تبقى المعضلة وين! في انه كيف تختار السياسيين ديل! وكل حزب طبعا بما لديهم من عضوية فرحون وما معترفين بأحقية غيرهم
بالجد مشكلة و اهل الولاية زاتها ما برضو الا بي ولدهم! انتو ناس كوستي مثلا ما ح يعجبكم والي من الدويم! وعلى ذلك قس
ايام الانقاذ الناس بتسكت واسي الولاة العسكريين الناس بلعت خشمها لكن في المدنيين الامر مختلف وما في زول ح يسكت و دي الدمقراطية كدا
غايتو اتمنى ان يصل حمدوك لفضل صيغة تراعي وترضي اغلب الآراء بما فيها الجبهة الثورية
ساهم يا قريبك بالاقتراحات و قياس الرأي العام حولك

هههه
تشكري اخلاص
اشكرك

Quote: تجربة التكنوقراط في الوزارات و اداؤهم و العراقيل البضعوها التحتهم و الحفر اثبتت ضرورة وجود سياسيين عركتهم التجارب و عارفين دا اتجاهه شنو وقصده شنو وكدا

والله يا دفعة حتي للناس الما مقتنعين بالكلام
تكون تجربة
ولاة سياسيين لحكومة تكنوقراط
حكومتين مع بعض
السياسين ميزتهم مدعومين باحزاب عندها بور عالية
خلينا نقول انها نظرية ونشوف النتيجة
ومافي زول بنرحمه
مافي مجال للتفريط في ثورة قدمت الاف مئات الشهداء
نحتاج لكل ذراع طويلة

شخصيا مستاء جدا من الخطوة دي لو حصلت ، لعلمي ان الاحزاب تدفع بشخصيات
ليسوا الاكفأ بل لأن لهم وزن سياسي داخل الحزب قد يكونوا اكتسبوهو بطرق غير
موضوعية بسبب العلاقة مع كبار الحزب او القرابة او الحلقوم ساي كده ..
كما انني لا اعتقد انو اي تقني ما بقدر يتعامل مع الظروف الحالية كويس .. او تنصقه
الصرامة او الشفتنة ..

سلام عليكم
اغتقد انو الولايات تتطلب شخصيات بمواصفات اداريه اكثر منها سياسيه .وتحتاج لنوع من الحزم والصرامه لنظاغه هياكل الحكم المحلى من مستنقعات الفساد الكيزانى.وفى رائبى انو يكون الولاه من شرفاء الجيش جيش او الشرطه من الذين تم احالتهم للصالح العام ايام حكم الكيزان. فشخصيات بخلفيات عسكريه تصلح للمهمه اضافه لمساله الانتماء السابق لمؤسسه القوات المسلحه كمؤسسه قوميه ومن جانب اخر تكريم لشرفاء الجيش مالمتضررين منسياسات الانقاذ بعد ان كانت الفرصه الاولى بتمثيل العسكريين فى المجلس السيادى
وديل قاعده دعمهم من ابناء القوات المسلحه فى منااطقهم:ولاياتهم اكبر من قاعده الدعم الحزبى الضيق
تحياتى

الثورية فاهمة قوي الحرية عاوزة تتوزع الولايات بين بعضها
لبعديييييين الانتخابات..تمكين زي البحصل مع خج شديد..
عارفين انه مافي حزب الليلة في كل السودان ممكن يجيب
دائرتين.. رؤوس من غير قواعد..
فاااا خلوها مستورة واتوزعوها علي الاقل لو تمت ديمقراطية
في دورة واحدة في تاريخنا السياسي تعتبر انجاز..
سلام يا ابوسن وضيوفه.

مرحب دينق
اتمني ذلك
مطر السلام كل مايشيل سحابو يتفرق
وبالجد التعينات من خارج الولاية بتخلي الوالي زي الاطرش في الزفة

Quote: وبالجد التعينات من خارج الولاية بتخلي الوالي زي الاطرش في الزفة

اخونا عبد الحفيظ ابو سن . .
حسب لقاء خالد سلك امس في قناة سودانية 24 الترشيح يتم من لجان الحرية والتغيير بالولايات على ان يتم التوافق على شخصية واحدة او بالعدم لا تزيد الترشيحات عن خمسة افراد وفق 10 معايير للمرشح . .

عذرا للرد الراتب
يا عمر
سلك دة بتكلم كأنو ق ح ت الاقاليم ( الخرطوم ماعارفها) جسم واحد صلد وعلي قلب رجل واحد
في النيل الابيض في مشاكل لدرجة الفصل والفصل المضاد والمهاترات والتراشق والاتهامات . وحتي ق ح ت المركزية متهمة بالتواطوء مع جهة
الترشيحات ماتديك الدرب
سلك دة بتكلم عن واقع ذهني ساي

الحركة الشعبية تؤيد تعيين الولاة المدنيين المؤقتين


الخرطوم- السوداني

جددت الحركة الشعبية لتحرير السودان- شمال، موقفها الثابت و الداعم لأستكمال مهمام و واجبات ثورة ديسمبر المجيدة، وتحقيق أهدافها كاملة.

وأكدت في بيان لها الأحد، ان ذلك ممثل في إنهاء حكم الفرد المستبد و سياسات عدم المساواة والأقصاء والتهميش، وبناء دولة القانون و الحرية والسلام والعدالة .

وأضافت: “نؤكد أن هذه الأهداف لا يمكن تحقيقها الا عبر سلطة مدنية غير عسكرية كاملة في كل مستويات الحكم ، وانطلاقا من هذا المبدأ يهمنا أن نوضح لجماهير شعبنا أننا نشيد بالخطوات التي شرعت فيها الحكومة الانتقالية برئاسة د عبد الله حمدوك، بخصوص تعيين ولاة مدنيين، ومؤسسات حكومية مدنية في ولايات السودان المختلفة”.

ونبهت إلى إن دعوة الجبهة الثورية الداعيه ألى تعطيل تعين الولاة، لا يتسق مع أهداف وروح الثورة، وقالت ان إعاقة خطوات تعين الولاة المدنيين يعتبر تعطيل لعملية التحول الديمقراطي المدني الذي بدونه لن يتحقق السلام و لا التحول الديمقراطي الذي يمكن شعبنا من السيطرة على مصيره بنفسه.

وقالت الحركة في بيانها، إن إنهاء الحرب وتحقيق السلام الشامل يمثل واحدة من تطلُّعات الشعب السوداني، وهدف من أهداف ثورة ديسمبر.

وأضافت: ” السلام لا يتحقق بالمحاصصات و تقاسم السلطه بطريقه نخبوية بين هذا أو ذاك، وإنما بمُخاطبة جذور الأزمة التاريخية التي قادت إلى إشعال الحروب والنزاعات منذ الإستقلال ، وإيجاد الحلول الجذرية لهذه الازمات حتى لا تتكرر الحرب مرة اخري اخيرا”.

سلام ابوسن و ضيوفك
الترشيحات الحايمة و ولايتكم تحديدا المرشح ليها حزب امة و بوردابي كمان
و من بورداب الرياض المعروفين
و ما تشيل هم 😂😂😂😂

تحياتي الحبيب أبوسن
تم التأجيل

تمخض الاجتماع الثلاثي للشركاء ( المجلس السيادي ، مجلس الوزراء وقوى الحرية والتغيير ) الاسبوع الماضي
عن مصفوفة أطلق عليها مصفوفة مهام المرحلة الانتقالية العاجلة والتي تضمنت اعلان تعيين الولاة المدنيين في ١٨ أبريل ،
جاء السبت ١٨ أبريل ولم يتم الإعلان عن الولاة ،
لتطالعنا الصحف اليوم بتصريح لرئيس الوزراء الدكتور عبدالله حمدوك يعلن فيه تأجيل تعيين الولاة لحين التشاور مع الجبهة الثورية !

من موقع اخبار السودان

تشكرو
سأعود حين ميسرة

حبيبنا أبوسن .. تحياتي
مع حبس كورونا اصبحنا نتابع الاخبار بدقة عالية
المواقع الاخبارية : تعيين الولاة

الجبهة الثورية تعترض :
“المصفوفة التي بني عليها قرار تعيين الولاة، وتشكيل المجلس التشريعي كتبت في غياب الجبهة الثورية،
رغم أنها شريك أصيل في صناعة الثورة، وفي عملية السلام، وعضو مؤسس في قوى الحرية والتغيير،
وحتى يستقيم الأمر هناك ضرورة لإعادة المصفوفة إلى طاولة الرسم؛ لتشارك الجبهة في إنتاج مصفوفة
معدلة تأخذ في الاعتبار آراء الجبهة”

القائد الحلو قال في بيانه ما يلي :
“إن دعوة الجبهة الثورية الداعية الى تعطيل تعيين الولاة لا يتسق مع أهداف وروح الثورة، وإن اعاقة تعيين الولاة المدنيين
يعتبر تعطيل لعملية التحول الديمقراطي والذي بدونه لن يتحقق السلام “.

=============
نضارب غريب بين الثورية والحلو

وما زالت الأحزاب تصر على إفساد الفترة الانتقالية وإفساد الوطن معها.

وللمرة - الكم ما عارف - يرى السودانيون الأحزاب تتهافت نحو المكاسب وتترك المواطنين يعانون لوحدهم.

الآن تحديداً ... مواطنو جميع الولايات في ضيق غير مسبوق ...

حتى متى تستمر هذه النظرة القصيرة المدى من الأحزاب ؟

وحتى متى يضيع المواطنون ؟!

مع التحية للحبيب أبوسن ..

حبيبنا هاني .. وكأن هناك تمهيد أو استدعاء للجيش لاستلام السلطة
رجعت بنا الذكريات إلى انقلاب نميري على اكتوبر
الشعب عندما يفقد الأمل في هؤلاء ربما يستعيد السودان تجربة مصر ( السيسي )
الآن البعض يردد تسليم الحكومة للجيش حتى الانتخابات

هكذا نحن من قبل الاستقلال لا نستفيد من الدروس

المعيار الحقيقي للوضع للاحبابنا في الداخل وحبيبنا أبوسن رأيه موثوق
تحياتي للاحباب

مرحب ودو
لا والله الولاة العساكر ما سكتنا مثلا في النيل الابيض الناس احتجت لامن شالوهو
مش احتجت لانو عسكري من اول مرة لكن احتجت علي قراراتو الكانت بتكرس لسيطرة الفلول
ممكن يا ودو تكنوقراط نضيف وفاهم وكفء لكن شرطا يكون مستقر في السودان . وشرطا يكون عندهم تيم مساعدين مقبولين . محتاج للجان فنية ودي بتتوفر ليهو ومنها ممكن يعرف السياسة .
اتفق معاك النظام القديم موجود حتي اليوم في الاقاليم

Quote: لكن شرطا يكون مستقر في السودان

بمناسبة مستقر في السودان دي يا قريبك اعتقد القائمة الحايمة دي ما دقيقة - على الاقل في حتة اسماعيل وراق
لأنو سمعت خالد سلك قبل يومين في سودانية 24 اتكلم عن معايير الاختيار واحد منها انو المرشح يكون مقيم 10 سنوات على الاقل في الولاية المعنية يعني مش فقط السودان لكن الولاية تحديدا
لكن مدى التزامهم بهذا الشرط عاد عليمهم الله

عموما اهو حمدوك ثبّت الموضوع لحدي ما يتم توافق مع الجبهة الثورية على معايير الاختيار يعني لسّة الموضوع ح ياخد وقت نتمنى المرّة دي لاختيارات ترضي اهل كل ولاية - او على الاقل الاغلبية.

ارشح من النساء لمنصب الوالي
نور تاور


المرأة لازم تمثل

الخرطوم تحتاج اي وآلية

المرأة تعرف حوجة الولاية

ابو سن اخوى

كيفك يا رجل

اتمناك والاسرة بخير / شوقتا

.................

انا معك فى كل ما اوردته فى تعيينات الولاة

وربنا يستر مايجينا واحد من خارج الولاية ويكون زى ( ..... ) فى الزفّة

او زى السابقين اللى لبعو الولاية ومشو ولا احد سالهم

خاصة اللى ضرب تعويضات كنانة

ان لم يتم حسابهم فى الدنيا سيحاسبهم الله فى الآخرة

دمت بالف خير

يا حفيظ من جرّب المجرّب حاقت به الندامة ..
محاصصات الأحزاب جربناها في تشكيل وزارات حمدوك
كانت صراحة مخيبة للآمال وبعيدة كل البعد عن المأمول
وكانت عبارة عن اختيارات حزبية خاطئة وكارثية ..
لانها شغل زولي وزولك فأصبحت حكومة شلليات ما أكثر ..
ضروري ما يكرروا فشلهم ويجنبوا الأقاليم شغل المحاصصات ..
وتقسيم البلد كما الغائم الوالي لابد أن يكون ابن المنطقة ..
الذي يرتضيه مواطني منطقته ( بأغلبية ) ..
بأي صورة كانت انتخاب أو تشاور أو ترشيح لشخصيتين
المهم ما يكون فيهم شخص عليه خلافات أو اعتراضات
ويتم رفع الترشيحات للحكومة وهي تختار منهم واحد وانتهينا
ومش مهم اطلاقا اتجاهه السياسي أو ميوله شنو ..
لانه دي نافلة ولزوم ما لا يلزم المهم والي لايُظلم أو يُغبن عنده أحد ..
أو يتم التعامل مع الولاية من جانبه كانها حاكورة أو مزرعة خاصة .
لكن محاصصات تااااني في الولاة اقيفوا فوقا ألف أحمر وأرفضوها ..

ـــــــــــــــــــــــــــــــــــــــــــــــــــــــــــــــــــــــــــــــــــــــــــــ

ثم أنا شخصيا أثني ترشيحك لمنصب الوالي ..
مايغروك أبان بدل وكرفتات وجوازات أجنبية ديل وتقوم تتهيبهم
وحاة الله ساعة الحارة والكوع يحمى ويحتاجوا لمن يعتل هم المواطن ..
مسؤولية والي مابقدر عليها ومابفلح فيها إلا أغبش زيك ..
فتقدّم الصفوف يا عمك وطريقك أخضر ..

تقديري الذي تعلم - والذي لا تعلم ...


لا زلت أذكر محبة أهل كوستي واحتجاجهم الشديد ..
على نقل العراقي والشريف حين تم ابعادهم قسرا لو ما أنا غلطان
(لانه الفترة طالت) ولا زلت أذكر كذلك مدى كرههم الشديد للشنبلي ..
تمر بين الناس في كوستي ساي تقدر تعرف معلومة زي دي
بكل بساطة هو استفتاء بتلقائية يعبر عن جدوى ومنفعة ..
مسؤول او والي أو معتمد للبلد والمواطنين ..

واحدة من الشروط في حاجة لاقتني في الترشيحات ونسيتها
نسيتها عديل كدة
ان يكون جامعيا
ولكم ان تتخيلو هذا الشرط وبعضهم يرغب ان يرأس الحكومة زاتا شخص امي بالكاد يعرف الواو الضكر
وفي القرن ال 21
وبرضو كتر خيركم كلكم
بحاول ارجع حين ميسرة ولا فك حظر