الرشيد سعيد .. اخبار سارة .. عن القمح والبترول

08:01 PM April, 18 2020

سودانيز اون لاين
علي عبدالوهاب عثمان-جدة
مكتبتى
رابط مختصر

في برنامج الاعلامي الجميل لقمان الذي يستضيف فيه شخصيات مهمة
ما عارف اسم البرنامج ولكن المهم المحتوى وخاصة في برنامج اليوم ..
حبيبنا الرشيد وكيل وزارة الاعلام .. بشر بأن انتاج القمح هذه السنة يغطي نصف الاستهلاك
ويوفر للدولة مليار وثمانمائة مليون دولار
الخبر الثاني بأن الاتصال ما بين حمدوك وسلفاكير قد تم لتوفير 70 % من احتياجات البترول
وسوف يوفر 200 مليون دولار يعني 2 مليار واربعمائة مليون دولار

تقريبا يوفر 4 مليارات دولار

ده خبر في غاية الجمال .. بعد ذلك لم انتبه إلى احاديث باقي الضيوف وهم وزير الصحة ووزيرة الشئون الاجتماعية
ورجل الاعمال مأمون البرير

أنا اهتمامي بأخبار الاقتصاد في البلد ازداد
ما عندي شغل غير اتابع أخبار المدخلات وخاصة البترول
عشان يا جماعة العمر خلاص .. والغربة في الزمن الضائع .. جفاف في الخليج
البترول في الأرض وكمان الكورونا قضت على كثير من الشركات
طبعا العودة الى ضواحي الدنيا .. هو الهدف

رغم ذلك كنت أتمنى أن اسمع هذه الاخبار من
حمدوك أو حميدتي أو على الأقل من فيصل أو مدني
لكن برضو لا يمكن الرشيد يصرح هكذا لأنني ملاحظ فيه زول حصيف

يا رب ..

استاذنا علي عبدالوهاب عثمان ع ع ع
النفيدي ما البرير

دكتور اكرم يبذل مجهود خرافي وربنا يغطي
علي البلد وناسها

د. اخلاص .. تحياتي
شكرا على التصحيح
د . اكرم ما شاء الله .. صريح وواضح وعملي
كمان فيه شبه بأمين عام منظمة الصحة العالمية
سبحان الله تشابه في الملامح رغم فارق السن
وزيرة الشئون الاجتماعية تردد وعود سوف وسوف
ولكن وزير الصحة واضح جداً

تحياتي د. اخلاص

تعود بإذن الله معافى وتواصل انتاج أرضك وتسعد نفسك وأهلك ..
نعم الاخبار مبشرة والنتاج ما شاء الله مبشر بحمد الله ..
البعض من 15 فدان فقط انتج 180 جوال فول ربنا يزيد ويبارك .

Quote: مليار وثمانمائة مليون دولار الخبر الثاني بأن الاتصال ما بين حمدوك وسلفاكير قد تم لتوفير 70 % من احتياجات البترول وسوف يوفر 200 مليون دولار يعني 2 مليار واربعمائة مليون دولار تقريبا يوفر 4 مليارات دولار

دي ارقامك يا علي يا عمّك ولاّ أرقام الرشيد؟

دي ارقامك يا علي يا عمّك ولاّ أرقام الرشيد؟

=================================

حبيبنا البشرى مودتي
الرشيد بالحرف قال ( نصف الاستهلاك ويوفر 1.8 مليار )
وبالنسبة للبترول قال ( 70% ) ويوفر 200 مليون دولار

حبيبنا الجميل البشري .. صدقني لولا هذه الارقام ( ما كنت فتحت البوست )
لم اهتم بأي كلام انشاء .. فقط كلام الارقام ..

وإذا الرشيد اطلق هذا الكلام بدون سند .. سوف أكون محبط ولن اصدقه إلى الابد

والبوست طبعاً للتحقق من هذه الارقام

تحياتي الحبيب البشرى .. لو سمحت دقق لينا في مصداقية حبيبنا الرشيد

تعود بإذن الله معافى وتواصل انتاج أرضك وتسعد نفسك وأهلك ..
نعم الاخبار مبشرة والنتاج ما شاء الله مبشر بحمد الله ..
البعض من 15 فدان فقط انتج 180 جوال فول ربنا يزيد ويبارك .
=====================================
مولانا الملك
الارض في البلد لها طعم خاص .. خاصة أرض السواقي لا شهادة بحث لا حكومة
تشعر أنك جزء منها .. وقدمك لا تثبت إلا في هذه الأرض .. لا أعرف لماذا لا أشعر بالوطن
إلا عندما تطأ قدمى تلك الأرض .. الواحد لا يعترف بأي سلطة .. احساس غريب
حتى النيل في العاصمة أو حتى في مدينة دنقلا بدون طعم ولكن في جروف سواقينا هو جزء مني
ومرجعيتي بل الواحد يشعر بنوع من القداسة تجاهه

تحياتي الملك الحبيب .. الزارعة مجدية جداً خاصة الموسم الشتوي .. 10 فدان اكبر من دخل عمارة في الخرطوم

تحياتي الملك أمبس

البرنامج هو (( حوار البناء ))
تقديم الاعلامي الخبير لقمان
الحلقة السابقة لم تكن جاذية
ولكن الحلقة الثانية كانت مثيرة

هذه الثورة الرائعة لابد منتصرة


الله يبشرك

الحبيب مكي ,, تحياتي
نعم منتصرة
لأنهم صريحين وواضحين
والمواطن أصبح يعرف ما يجري في دهاليز السياسة

شكرا للحضور الحبيب مكي

Quote: في برنامج الاعلامي الجميل لقمان الذي يستضيف فيه شخصيات مهمة ما عارف اسم البرنامج ولكن المهم المحتوى وخاصة في برنامج اليوم .. حبيبنا الرشيد وكيل وزارة الاعلام .. بشر بأن انتاج القمح هذه السنة يغطي نصف الاستهلاك ويوفر للدولة مليار وثمانمائة مليون دولار الخبر الثاني بأن الاتصال ما بين حمدوك وسلفاكير قد تم لتوفير 70 % من احتياجات البترول وسوف يوفر 200 مليون دولار يعني 2 مليار واربعمائة مليون دولار تقريبا يوفر 4 مليارات دولار ده خبر في غاية الجمال .. بعد ذلك لم انتبه إلى احاديث باقي الضيوف وهم وزير الصحة ووزيرة الشئون الاجتماعية ورجل الاعمال مأمون البرير

حياك با ابو علوة
ما يتكلمو عن القمح خلي المواطن في الخرطوم يلقي 10 عيشات بي جنيه الرغيف زمن عبود واللحم بعد الظهر في سوق الخرطوم بخلو في طالويتو وجذره ما في زول بجي يشيلو الناس شبعانة وبطرانة قبل البلد الذى خبث
ده برنامج عمك جقود في البورد ده من 2010
البند السادس في الروزنامة التطبيع مع دولة جنوب السودان النفط مقابل الغذاء
مع الحريات الاربعة لابناء دولة جنوب السودان ونخلص من دول الخليج الوسخة
باقي
حاجة واحدة مهمة جدا جدا
تستورد وزارة الزراعة ووزارةالكهريا مدخلات الطاقة الشمسية من شرق اسيا الصين واليابان والهند وكوريا الجنوبية قبل رمضان وبكميات كبيرة جدا تنزلا في اسواق الاقاليم الستة ومع معاهد تدريب سريعة للشباب للتركيب والصيانة
الخلايا الشمسية والبطريات القوية ولكل السودان
ونستفيد من الحر الشديد ده شوية
الطاقة الشمسية رخيصة ومعداتا رخيصة جدا
https://top4top.io/

هسة شايف ليك عمود سلك غبي هنا ولي برميل جزلين ؟؟
الموارد في السودان موجودة والمخ ما شغال وما عايزين يشعلو مخهم ولا يحترمو الناس المشغلين مخهم
الطاقة الشمسية قبل رمضان
للاستخدام المنزلي ما تكلف 300 دولار والخلية الانت شايفا دي في اليمن المحاصر الواحدة بي 40 دولار

تدريب سريعة للشباب للتركيب والصيانة
الخلايا الشمسية والبطريات القوية ولكل السودان
ونستفيد من الحر الشديد ده شوية
الطاقة الشمسية رخيصة ومعداتا رخيصة جدا

===========================
الحبيب عادل يا ريت
لا أعرف لماذا نحن مبادرات ؟
كل الدول تبادر وتسعى الى الحلول

مودتي الحبيب عادل شكرا على الحضور
الصورة معبرة ليت هذه عندنا في الشمالية

أخونا علي سلامات
ما داير اديك صورة وردية عن السودان .
لكن صدقني لو نويت العودة السودان احسن ليك .
وابشرك انو حالك ح ينصلح.
ح تتعب في السنتين الأولانيات . لكن بعدها
امورك بتمشي .
البلد واعدة . و في فرص ما ليها حد .
طبعا لو تقدر تحتفظ بي إقامتك للطلعة كويس
ولو لا ما في مشكلة .

الحبيب عثمان تحياتي
اكيد بإذن الله .. لأن الخليج لم يعد كما في السابق
التجربة التي خاضها الاخوان من قبل توضح
أن الزراعة هي الاهم والأكثر جدوى
خاصة وجودنا خارج العاصمة تجعل تكلفة المعيشة أقل نوعاً ما
فقط .. شمار .. قمح .. فول مصري

تحياتي يا جميل .. بإذن الله قادمون
شوق لضواحي الدنيا

بس يكون عندك رأس مال
و ما تجي العاصمة إلا تكون داير تبيع محاصيل ولا بلح ولا خضار .
سكنك و تعليم عيالك وبيتك كلو في الشمال أو الغرب أو أي مكان
فيه إنتاج في ضواحي السودان .
وتاني ما محتاج إلا طمبور

Quote: ح تتعب في السنتين الأولانيات . لكن بعدها امورك بتمشي . البلد واعدة . و في فرص ما ليها حد . طبعا لو تقدر تحتفظ بي إقامتك للطلعة كويس ولو لا ما في مشكلة .

حبينا عثمان موسى تحياتى فى زمن الكرونا القرض والحرجل والقنقليز والسعدة وزيت السمسم السودانى
دخلت معادلة الاعشاب العلاجية تصدق وتامن فى جدة وخاصة الكرنتينا اكبر محلات
الاعشاب السودانية الكيس ابو ريالين دقا 15 ريال وقارورة زيت السمسم الكان قيمتها 5 ريال
دقت 20 ريال وتشوف الخلق وخاصة السعوديين
شطبو جيمع الاعشاب قرض وحرجل والسعدة والقنقليز الخام يعنى التبلدى

السودان رهيب يا على..
فيهو خير لايمكن وصفه ،
غايتو نحن بنستف فى الشنط راجعين ، اهم شء
ترجع بمشروع استثماري ناجح و مفيد للبلد .

ما قريت باقى مداخلات البوست لكن الله يكفيك شر المحبطين

غايتو نحن بنستف فى الشنط راجعين ، اهم شء
ترجع بمشروع استثماري ناجح و مفيد للبلد .
==========================
الحبيب النصري
الغربة علمتنا الكثير .. والاحتكاك مع الخبرات ومختلف الجنسيات
الشركات تعمل فقط للربحية بغض النظر عن جنسية العاملين أو دياناتهم وألوانهم
أذكر عندما بدأ مديرنا السعودي الشركة طلب منه المستشار الخاص بأن يبعد
أي شخص له صلة قرابة به .. الاقرباء هم احد اسباب الفشل لأنهم لا يتوقعون العقوبة أو الفصل ..
بالاضافة الى تعطيل عمل الاخرين ونسة او اوامر او تجاوزات .. أفضل تخصيص عائد رمزي لهم بعيدا عن الشركة
عندنا طبعاً لا بد من البعد عن الاقرباء ممكن تصرف عليهم وهم بعيدين

في بعض المحلات في العاصمة شاهدت معظم العاملين من الاخوة الاثيوبيين واليمنيين .. هنا الكونترول يكون سهل ..
كما في الخليج اصحاب الشركات يفضلوا الاجانب اكثر من المواطنين

كمان المهم كيفية ادارة الوقت والمال وتكلفة المنتج (( مركز التكلفة ))
خاصة الزمن .. الزمن ..

أعرف بعض الاخوان نجحوا في أعمالهم بفضل الخبرات المكتسبة من العمل في الشركات

تحياتي الحبيب النصري .. بقينا ترابلة خمسة نجوم ..

شكرا الحبيب أحمد
على الحضور .. الناس بقت ترجع للاعشاب
مودتي

الحبيب عثمان .. تحياتي
رغم العمر إلا انني لم اسكن لفترة الا أيام تدريب معهد المعلمين
في بداية السبعينات .. بعدها فقط مرور وحالياً عند الذهاب والعودة يومين او ثلاثة
رغم وجود اخواتي والاخواني
ومعظم الاهل ..
ولكن البلد أجمل وله طعم .. وحالياً كلها 5 ساعات تكون في امدرمان اذا دعت الضرورة

تحياتي الحبيب عثمان