شكيت محنك ياملكة برطانيا بتقرى من غير نظارة

09:17 PM April, 05 2020 سودانيز اون لاين
بدر الدين الأمير-دولة قطر
مكتبتى
رابط مختصر

(adsbygoogle = window.adsbygoogle || []).push({});٠

مافى حد غيرك
بقدر على كرونا
عينى باردة

ودالامير ماتحرجنا عندها عدسات ههههها

ديل ناس الراحات يا ود الامير ، نظرهم بيضعف لشنو !!؟؟
صديق
ما عندها عدسات،،
وعادي تلقى واحد هنا في امريكا عمره ٧٠ او ٨٠ سنة وتلقاهو قاعد في حديقة وبيقرا في كتاب ،،،
طبعا ده قبل الكرونا ، لكن الان مافي قعاد في الحدائق ، كل زول داخل بيته،،،
..وبعدين انت قايل الزي ديل بقيفوا في صفوف الرغيف وفي الشمس الحارة دي بالساعات إإ. لغاية
ما نظرهم بيضعف...

يا عريبي بعد تقمع البامية احضر مسلسل في نتفلكس إسمه The Crown

حباب امتثال مستورة الحال

بريطانيا ما برطانية يا عريبي .....
غايتو كوجنتها كوجان شديد ..... 😂😂😂😂😂

ياصديق مهدى
نحن عندنا امل ننافس برطانيا
بسيدى الصادق سيدى الميرغني
قالو خارج الشبكة

امتثال
رحم الله جدتى لامى امنة بت جبرالله
جيل ملكة برطانيا ماتت قبل اربعين سنة
كنا لمن نسالها حبوبة كيف أصبحتى تقوليك
العوينات ماحليوات يعنى النظر ضعف شديد

منتصر
الام درمانى نص كم
ابشرك امس كنت طابخ
قرع بالكمونية وجا صحبك الظلامى معتز القريش
وعجنها فى صينية ولهطها كلها واوصى بان اتعلم
العواسة بدل الكسرة البشتروها عشان كرونا وكدا

ابو حسين
ماتجى بوستاتى يجيك القاوات
وتمش بعصايتين زى الطفص الظلامى معتز القريش
البياكل الكمونية بالدس

دي جاتني بالواتساب الليلة يا مدير ...

ملكة بريطانيا "*أليزابيث*" حضرت
الطاعون
والجدري
والملاريا
والحرب العالمية الثانية
والحرب الكورية
وحرب فيتنام
وتصنيع اللاندروفر
والرينج روفر
والجي واغن
وطيران الكونكورد
وتقاعد الكونكورد
وسيطرة النازيين علي برلين
وتدمير برلين
وتقسيم برلين
وتوحيد برلين
والنكبة
وقيام إسرائيل
وعدوان ٥٦
وهزيمة حزيران
وحرب اكتوبر
والحرب العراقية الايرانية
وحرب الخليج
وغزو الكويت
وصفقة القرن
والحرب الباردة
ودخول بريطانيا الاتحاد الأوروبي
وخروج بريطانيا الاتحاد الأوروبي
واستقلال ٥٤ دولة أفريقية
ومن ابولو ١ الي ١٧
وانقلاب خليفة بن حمد على احمد بن علي
وانقلاب حمد بن خليفة على ابوه
والربيع العربي
و ١٤ رئيس وزراء بريطاني خدم باسمها
وشارلز وديانا
وشارلز وكاميلا
وأندرو وفيرغي
وهاري وميغان
وحلقات مسلسل الكراون
و ١٤ رئيس أمريكي
و ٧ ملوك سعوديين
و ٤٨ رئيس وزراء إيطالي
و ٦ أمناء عامين لمجلس التعاون
و ٨ أمناء عامين للجامعة العربية
و ٩ أمناء عامين للأمم المتحدة
والجمهورية الثالثة والرابعة والخامسة في فرنسا
وجنون البقر
وانفلونزا الطيور
واكتشاف التلفزيون
والابل تي في
والواي فاي
وفلافل العربي
والشاورما السجق
والسارس
وانفلونزا الخنازير
و اخيرا الكورونا !

فقط لانها ما بتطلع من قصرها
#خليك_بالبيت

عقبالنا وعقبالكم يا بدرالدين وضيوفك

جينات تمام ما شاء الله، امها الملكة فكتوريا ماتت في سن ١٠٤ سنة

و هي في كامل عافيتها و نشاطها و أناقتها.

يلا أستعد يا برنس شارلس، كلها كم سنة و تبقى ملك.

الحبيب بدرالدين الامير
قالوا من الجينات العربية
اجدادها من عرب الاندلس

التحية الحبيب الامير
الحبيب معتز اوعا يكون التقط صور للكمونية
المشكلة بقيتو تنافسونا في الطبخ
نحن في ضواحي الدنيا من قبل عشرات السنوات
نأكل المحاشي والضلع ، ورغيف الفرن .. بيض بالطماطم
طباخين القصر الجمهوري زمان .. انتو ناس ( الدود النتر )
اليوم اصبحتوا نافسين لينا في المطاعم حتى مطاعم جدة
الصعايدة زمان يجوا عندنا يزرعوا ، الفلفل والجزر .. اكثر ما كنا نحبه البنجر
طعمه كان سكر ..
تصدق يا الامير قبل اكثر من نصف قرن أيام الداخليات
كنا نشيل معنا ( بسكويت بيتي ، منين ، قرقوش )
تأثير مصر ..
بالجد من ناحية شغل المطبخ جيل الامهات عليهن الرحمة قمة التفوق
الحلويات .. خاصة الكنافة بالسمن البلدي .. والزلابية ( ثقافة القمح ) صناعة الشعيرية في البيت قبل رمضان
كلها من مصر عبر حلفا بوابة الحداثة .. طبعاً مصر زمان أيام الخديوي
عبدالناصر جاب الفقر لمصر

أولادنا وبناتنا اليوم .. أنسى .. زيرو

يا الحبيب بوستاتك جميلة .. مع حبس الكورونا ..
يا سلام عليك زول فرايحي ..
تحياتي الأمير

Quote: ابو حسين ماتجى بوستاتى يجيك القاوات وتمش بعصايتين زى الطفص الظلامى معتز القريش البياكل الكمونية بالدس

يا عربي R P G
بوستاتك دي التقول كاتبها العقاد ... 😂😂😂
يا عربي انا اتواضعت و جيت بوستاتك و انت ما راضي كمان .... !!!!!
اسي تكون كل ما اكتب مداخلة في اي بوست ليك بتتصل علي اهلك تكلمهم
و نسوان R P G يزغردن و الدلوكة تدق .....
قول الحمد لله ..

Quote: ملكة بريطانيا "*أليزابيث*" حضرت الطاعون والجدري والملاريا والحرب العالمية الثانية والحرب الكورية وحرب فيتنام وتصنيع اللاندروفر والرينج روفر والجي واغن وطيران الكونكورد وتقاعد الكونكورد وسيطرة النازيين علي برلين وتدمير برلين وتقسيم برلين وتوحيد برلين والنكبة وقيام إسرائيل وعدوان ٥٦ وهزيمة حزيران وحرب اكتوبر والحرب العراقية الايرانية وحرب الخليج وغزو الكويت وصفقة القرن والحرب الباردة ودخول بريطانيا الاتحاد الأوروبي وخروج بريطانيا الاتحاد الأوروبي واستقلال ٥٤ دولة أفريقية ومن ابولو ١ الي ١٧ وانقلاب خليفة بن حمد على احمد بن علي وانقلاب حمد بن خليفة على ابوه والربيع العربي و ١٤ رئيس وزراء بريطاني خدم باسمها وشارلز وديانا وشارلز وكاميلا وأندرو وفيرغي وهاري وميغان وحلقات مسلسل الكراون و ١٤ رئيس أمريكي و ٧ ملوك سعوديين و ٤٨ رئيس وزراء إيطالي و ٦ أمناء عامين لمجلس التعاون و ٨ أمناء عامين للجامعة العربية و ٩ أمناء عامين للأمم المتحدة والجمهورية الثالثة والرابعة والخامسة في فرنسا وجنون البقر وانفلونزا الطيور واكتشاف التلفزيون والابل تي في والواي فاي وفلافل العربي والشاورما السجق والسارس وانفلونزا الخنازير و اخيرا الكورونا ! فقط لانها ما بتطلع من قصرها #خليك_بالبي

.زى ما قال رباطابي (الشي Duracell) !؟ :)

نعومي
كيفنك
ما كلها كم سنة وشارلس يبقى ملك !!
اذا عمرها الان ٩٠ سنة ، فشارلس حينتظر ٢٠ سنة عشان يبقى ملك
ده اذا ما مات قبلها لان عمره الان ٧٠ سنة،،

امتثال
برنس شارلس ما بتجيهو الحبة ان شاءالله،
أمه عمرها 90 سنة
ابوه برنس فيليب عمره 98 سنة
و جدته فكتوريا عاشت 104سنة
يعني كورونا و تعدي، الله يستر على بوريس جونسون،
مهلهل شديد.

خمسة وخميسة في عين الحسود
النبي فيكم ما تنجهوها وتكتلوها في الأيام دي
الأيام دي ومع الكورونا إذا ماتت العالم ما بيقدر يشيعها بطريقة تليق بصاحبة الجلالة
والعالم ذاتو اليومين دي ما فاضي لمتابعة التشييع وتنصيب ملك جديد

خلوها تموت في وقت العالم يكون فيهو هادي ورايق عشان يقدر يتابع مراسم التشييع والتنصيب

Quote: خمسة وخميسة في عين الحسود النبي فيكم ما تنجهوها وتكتلوها في الأيام دي الأيام دي ومع الكورونا إذا ماتت العالم ما بيقدر يشيعها بطريقة تليق بصاحبة الجلالة والعالم ذاتو اليومين دي ما فاضي لمتابعة التشييع وتنصيب ملك جديد خلوها تموت في وقت العالم يكون فيهو هادي ورايق عشان يقدر يتابع مراسم التشييع والتنصيب

قريبتك و ل شنو ؟؟؟؟
كفاها اخدت زمنا و زمن غيرا ....
المسكين دا منتظرا كم سنة ؟؟؟؟
إتلايقت شديد ياخ ... 😂😂😂😂😂😂😂😂

Quote: قريبتك و ل شنو ؟

نحن الإتنين أشراف هي حسنية وأنا حسيني😜.

بدر الدين خلي ملكتنا في حالا
هي عايشة و بتفرفر و لسه طمعانه ليها في فايفة يعني خمسة سنة
عشان كدا الأمير هاري قنع من انو يحكم و هو ترتيبو السادس عشان يكون ملك
مفروض يعيش اربعمية سنة عشان يحكم

قبانى
احكى لك قصة
واحد من اهلك الشوايقة كان شغال محاسب فى الحكومة فى منطقتهم
تم نقلة للعاصمة بعد فترة رسل لامو تجيهو عشان يعمل لها
بعض الفحوصات الطبية مشى يستقبلها فى محطة السكة حديد
ومعه صديقة من ظرفاء المدينة الحاجة وهم فى طريقهم للبيت
شافت صور ملكة برطانيا تملأ الشوارع كانت الملكة تزور السودان
قامت الحاجة سألت دى منو قام ولدها قاليها دى ملكة بريطانيا قامت
سألت والجايبها هنا شنو رد عليها صديق ابنها جايا منقولة

دكتور نعمات
ماوريتينا الملكة بتاكل شنو
عشان نعمل زيها وعلى قول المصريين
العمر مش بعزقة

على يابوب
يقال ان الخليفة عبدالله
ارسل للملكة فكتوريا رسالة
وطلب منها ان تدخل الاسلام كى تسلم
ولو اسلمت حايزوجها من مستشاره
جراب الرأى يونس ود الدكيم
احدهم
كتب مخطوطة بتاعت مسرحية عبثية
بفترض فيها ان الملكة وافقت وتزوجت
من يونس
تخيل كان كيف بكون حالنا ونحن احفاد الملكة

حافظ
حسادة شنو نحن جاين نتبرك فى جدتك الملكة
تلحقنا وتفزعنا من الكرونا

خضر الطيب
ملكتكم دى سرها باتع مع نكير

بدر سلامات
و شنو الحسادة دي ؟
دي بت العز الما بتشيل جردل علي الزير .
انت فاكر انها عدت عمرها حش بصل ؟
ولا كحلوها من التراكوما بي موية السعف المبلول .
ياخ الملكة دي لا هسع ممكن تطلع في دكة قصرها
من الناحية الغربية وتعاين لي هلال رمضان .

ياعثمان
الجدة شديدة ولضيضة
من يوم قمنا شايفنها بتلبس
شرابات فى يديها عاملا حساب
لكرونا وزمن كرونا